Suku o Tenda Ndati Ovinyua vi Koluisa?

ULULIKI wetu, una o tu yonguila eci ciwa, ka pisa ovinyua vi koluisa.a Eye wa eca komunu ‘ovinyu vi sanjuisa utima, kuenda ulela u ninisa ocipala caye, lombolo yi kolisa utima.’ (Osamo 104:15) Onjanja yimue Yesu Kristu pocipito cuvala, wa sanjuisile omanu poku pongolola ovava okuti va linga “ovinyu viwa.”—Yoano 2:3-10.

Tu sukila oku ivaluka okuti Ululiki wetu wa kũlĩha ndomo ovinyua vi koluisa vi nyõla etimba liomunu kuenda owoño. Lekuatiso Liembimbiliya, Isietu wokilu o tu ‘longisa eci ci tu kuatisa’ kuenda o tu ĩha elungulo lioku yuvula oku nyua calua evi vi koluisa. (Isaya 48:17) Kũlĩhĩsa alungulo ava a teta onimbu:

“Ko ka kolui lovinyu, momo oco ci koka oku nyõleha.” (Va Efeso 5:18) ‘Oloholua, ka vi piñala usoma wa Suku.’ (1 Va Korindo 6:9-11) Ondaka ya Suku yi pisa “ovoholua, ayele, lovina via lisoka lavio.”—Va Galatia 5:19-21.

Kũlĩhĩsa ovitangi vimue vi tunda koku nyua calua evi vi koluisa.

Ovitangi vi Tunda Koku Nyua Calua

Ndaño okuti ovinyua vi koluisa vi linga ciwa vetimba liomunu, pole, vi kuete ovina vimue vi nyõla etimba kuenda olondonge. Oku nyua calua evi vi koluisa, ci nena ovitangi vimue:

Oku nyua calua evi vi koluisa ci nyõla olondunge viomunu, kuenje ka kuata vali epondolo lioku sokolola ciwa. (Olosapo 23:33) Allen, una wa tukuiwa vocipama catete okuti wa kala oholua, wa popia hati: “Uholua ka u lomboloka lika uveyi wetimba, pole, u lomboloka uveyi umue u nyõla olondunge kuenda ovituwa viomunu. Ove eci o kolua, ku sokolola vali esumuo o kokela vakuene.”

Oku nyua calua evi vi koluisa ci tepulula osõi yomunu. Ovisonehua vi lungula hati: ‘Ovinyua vi koluisa vi nyẽha olondunge.’ (Hosea 4:11) Ndamupi? Lunene wuholua, ovisimĩlo kuenda oloñeyi vina tua siata oku yuvula, vi fetika oku molẽha okuti via sunguluka. Onjongole yetu yoku linga eci ciwa yi fetika oku hongua. Ovinyua vi koluisa vi nyõla epondolo lietu lioku lekisa ovituwa viwa, kuenje tu likokela ovitangi vialua loku nyõla ekalo lietu kespiritu.

Kũlĩhĩsa ulandu wa John wa lihoya lukãi waye, kuenje wa enda lonyeño vonjo yimue yoku nyuila evi vikoluisa. Noke yoku nyua oco a tulumũle onyeño yaye, ukãi umue weya kokuaye. Osimbu va kala oku sapela, wa nyuapo vali kamue. Kuenje eci va tunda lukãi waco, va linga ukahokolo. John wa lisiõsiõla calua omo lioku linga ocina cimue ci kutisa osõi ca kokiwa luholua okuti lalimue eteke a ci simĩle.

Oku nyua calua evi vi koluisa ci tuala omunu koku vangula ovina vĩvi kuenda koku linga ovina ka via sungulukile. Embimbiliya li pula hati: “Elie o lisiõsiõla? Ukuavama helie? Ovo vana va tumãla osimbu lovinyu, vana va nyuanyua ovinyu via tengiwa.” (Olosapo 23:29, 30) Oku nyua calua, ci ku lingisa oku kala “ndomunu wa pekela pokati kokalunga, pamue ndu wa tumãla kongunji yonaviyu.” (Olosapo 23:34) Omunu o nyua calua evi vi koluisa, o pasuka lekavo ndu okuti wa ‘vetiwa loku totiwa olombole pole, ka muile ndomo ca pita.’—Olosapo 23:35.

Oku nyua calua evi vi koluisa ci nyõla uhayele. Ovinyua vi koluisa, “kefulilo vi lumana ndonyoha, vi lumana muẽle ndenyenya.” (Olosapo 23:32) Olondotolo via limbuka ocili colondaka evi violosapo. Ovinyua vi koluisa vi nena ovitangi vimue ndeci: Uveyi wo anemia, oku lenda komuma, oku lenda kefẽ, oku livokiya kuosuka vosonde kuava va kuete uvei wo diambete. Handi vali, nda onjali yi kasi latimba avali kuenje yi nyua calua evi vi koluisa, oñaña yaco yi citiwa okuti ya seluka. Oku nyua calua ku nenavo uveyi wesuka kuenda uveyi wo kapuvi. Ndaño okuti omunu onyua lika calua olonjanja vimue, ci tualavo kovitangi viuhayele ale kolofa. Ovitangi vikuavo vi tunda koku nyua calua evi vi koluisa, ka via tukuiwile valivulu olondotolo.

Ocitangi cinene. Ndaño omunu ka kolua, pole, oku nyua calua ci nyõla ekalo liaye kespiritu. Embimbiliya li lombolola hati: “Ava va pasuka ociteketeke ha va sandi evi vi koluisa, ngongo yavo! Haivo va tembaika toke kuteke kuenje ovinyu vi va tokotisa.” Momo lie? Isaya wa lombolola ndomo uholua u nyõla ekalo liomunu kespiritu. Eye wa popia hati: “Ka va tendi upange wa Yehova, kuenda ovilinga viovaka aye ka va vi sokolola.”—Isaya 5:11, 12.

Ondaka ya Suku yi tu lungula hati, “ku ka kale pokati koloholua.” (Olosapo 23:20) Akãi vana okuti akulu vendamba va lunguiwa oco va yuvule oku kala “apika vovinyu.” (Tito 2:3) Momo lie? Momo, omanu va siata oku linga oloholua vokuenda kuotembo eci va fetika oku vokiya onjongo yavo yoku nyua evi vi koluisa. Noke va pekela loku sokolola hati, “Otembo yipi masuka si vi sandi vali?” (Olosapo 23:35) Nda omunu o sandiliya ovinyua vi koluisa komẽle oco a liupe uholua weteke lia pita, o kasi kohele yocili.

Embimbiliya li lungula hati, vana vatiamisila utima koku ‘kolua ovinyu, layele, loku pilula, vaka li lombolola ku una o tãilili oku tetuluila ava va kasi lomuenyo lava va fa.’ (1 Petulu 4:3, 5) Catiamẽla koloneke vilo viohali, Yesu wa lungula hati: “Lilavi sanga ovitima viene vi vulua lelelele luholua kuenda ovikele viokomuenyo wokilu lieve, kuenje eteke [lia Yehova] liu wili ocipikipiki ndulivi.”—Luka 21:34, 35.

Omanu vana va nyua calua, va sukila oku linga nye oco ‘ovitima viavo ka vi ka vulue lelelele luholua’?

[Atosi pombuelo yamẽla]

[Elitalatu kemẽla 4]

Oku nyua calua evi vi koluisa ci nena ovitangi