Ndomo tu Pondola Oku Kuatisa Omanu

UKULU umue wekongelo londuko, François wa popia hati: “Onjanja yimue eci volupale mua kala oku lingiwa ocela, omanu va fetika oku linga ombuanja ya kisika Olombangi Via Yehova oku siapo olonjo viavo. Ka kua kalele okulia, ovihemba, kuenda okulia kua tĩlile calua omo liocitangi caco. Olombango kuenda olovenda via yikiwile.”

Vamanji va kasi ko Betele, va tuma lonjanga ovina vioku kuatisa vamanji va tilila Volonjango Viusoma viofeka yaco. Ndaño okuti ovanyali va yikile atapalo, pole, va kũlĩhĩle okuti Olombangi Via Yehova ka vi litengi vopulitika. Omo liaco, va ecelela okuti, akãlu a tunda ko Betele a pita.

Manji François wa amisako hati: “Osimbu tua kala oku ka tuala ekuatiso Vonjango Yusoma, tua limbuka okuti ovanyali va fetika oku loya, pole, olosolo viaco ka via vetele vekãlu lietu. Eci tua limbuka okuti esualali limue lia kala oku iya kokuetu luta peka, tua ñualisa lonjanga ekãlu lietu, kuenje tua tiukila ko Betele. Tu eca olopandu ku Yehova, omo a tu popela kolofa. Keteke likuavo tua limbuka okuti, Vonjango yaco Yusoma mua kala eci ci soka 130 ya vamanji ka va pondiwile. Pokati ka vamanji vaco, pa kala vamue va endele ko Betele kuna va pamisiwa ekolelo liavo kuenda va tambula ovina va sukilile toke kesulilo liuyaki waco.”

Manji François wa popiavo hati: “Vamanji ko Betele va tambula ovikanda vialua violopandu via tunda kolonepa vikuavo viofeka yaco. Eci tua limbuka ndomo vamanji veya oku pinga ekuatiso, ca vokiya ekolelo liavo ku Yehova.”

Eci tu pita lovilunga ka tu sapuila lika vamanji tuti: ‘Li, kuenda lisikĩlĩli.’ (Tia. 2:15, 16) Pole, tu eca kokuavo ovina va sukila. Cimuamue haico ca pita Lakristão vo kocita catete okuti, eci va yeva esapulo liatiamẽla konjala ya laikele oku iya, ‘omunu lomunu pokati kolondonge wa eca ovina a kuete, oco va kuatise vamanji va kala vo Yudea.’—Ovil. 11:28-30.

Ndaño okuti etu tuafendeli va Yehova tu kuete onjongole yoku eca komanu ovina va sukila, pole, tu sukilavo oku va kuatisa oco va pamise ekolelo liavo. (Mat. 5:3) Oco va tambule ekuatiso liaco, Yesu wa tuma olondonge viaye oku longisa omanu oco va lingevo olondonge. (Mat. 28:19, 20) Omunu lomunu pokati ketu, wa siata oku sokiya otembo yoku linga upange Yesu a tuma. Tua siatavo oku eca olombanjaile oco vi ende komanu vana va sukila ekuatiso. Pole, olombanjaile viaco via siatavo oku eciwa oco vi kuatise kupange woku kunda olondaka viwa Viusoma. Poku ci linga, tu lekisa ocisola ku Suku, kuenda komanu vosi.—Mat. 22:37-39.

Vana va siata oku eca olombanjaile viavo kupange Wolombangi Via Yehova u kasi oku lingiwa voluali luosi, va sukila oku kũlĩha okuti, olombanjaile viaco vi kasi oku kuatisa calua. Ove hẽ o pondola oku lieca kupange woku kuatisa vamanji? O yongola hẽ oku kuatisa kupange woku kunda loku longisa omanu oco va linge olondonge? Nda o kuete onjongole yaco, ‘ku ka yuvule oku eca ekuatiso komanu va li sukila.’—Olosap. 3:27.

NDOMO VAMUE VA SIATA OKU ECA OLOMBANJAILE VIOKU KUATISA KUPANGE WOKU KUNDA VOLUALI LUOSI

Ndeci ca kala kotembo yupostolo Paulu, koloneke vilo, omanu valua va siata ‘oku seleka’ olombongo vimue oco va vi kape vokasia ya sonehiwa hati: “Olombanjaile Vioku Kuatisa Kupange Woku Kunda Voluali Luosi.” (1 Va Kor. 16:2) Olosãi viosi, vamanji va sangiwa kolonepa viosi violuali, va siata oku tuma olombanjaile viavo ko Betele Yolombangi Via Yehova yi sangiwa vofeka yavo. Citava okuti, o ka tuala ombanjaile yove ko Betele vofeka o kasi. Oco o kũlĩhe onumbi Yolombangi Via Yehova, sapela la vamanji va talavaya ko Betele vofeka yene.

TU ECI LUTIMA WOSI OVINA TU KUETE

Pokati Kolombangi Via Yehova, pali vamanji valua okuti, olohukũi, vakuavo va siata oku liyaka lovitangi vioku sanga olombongo. Poku eca olombanjaile vioku kuatisa kupange woku kunda Usoma, tu sukila oku yuvula ocisimĩlo cokuti, olombanjaile vietu ka vi kuete esilivilo. Eci Yesu a mõla ukãi ocimbumba haeye ohukũi wa kapa ombanjaile yaye vokasia yo vonembele, ko pembuile. Eye, wa popia hati: ‘Ndu sapuili siti, ocimbumba eci, haico osuke, ca imbamo calua, vosi vakuavo ci sule. Momo ava vosi kukuasi wavo wa lua, vopako lika eci va eca, eye puãi ndaño wa kala ohukũi, pole, wa imbamo cosi a kala laco, haico eteku liaye.’ (Luka 21:1-4) Ndaño okuti ukãi wa tukuiwa ndeti wa eca ombanjaile yimue yitito, pole, wa yeca lutima waye wosi, momo wa eca ovina viosi a kuatele.

Vamanji vosi va sukila oku linga esokiyo lioku eca olombanjaile viavo vekongelo. Eci Akristão vo ko Yudea va sukilile ekuatiso, vamanji vo ko Korindo va eca ekuatiso liavo. Poku ci linga, va tambula onumbi yiwa kupostolo Paulu, eci a va sonehela ndoco: “Poku eca olombanjaile vioku kuatisa omanu va Suku, lingi ndeci nda lomboluila kakongelo o ko Galatia. Eteke liatete kosemana, omunu lomunu pokati kene, a seleke cimue a pondola oku eca, okuti eci ndi pitĩla, ka vu kongola vali olombongo.”—1 Va Kor. 16:1, 2, NW.

Omanu vamue va siata oku seleka olombongo vioku tetulula ovitangi viavo. Olombangi Via Yehova via siatavo oku seleka olombongo vioku kuatisa kefendelo liocili. Omo liaco, vamanji voluali luosi, va siata oku eca olombanjaile viavo oco vi kuatise kupange woku kunda Usoma wa Suku. Olosãi viosi, omunu lomunu o pongiya olombongo a yongola oku eca. Omanu vamue okuti Halombangiko Via Yehova, va siatavo oku eca olombanjaile vioku kuatisa kupange woku kunda. Omo liaco, va sanjukila oku eca lutima wosi ovina va kuete.

Vamanji va kasi ko Betele, noke yoku tambula olombanjaile viaco, va siata oku tuma ovikanda violopandu kakongelo.

Ovo va sanjukila oku tambula olombanjaile vi eciwa la vamanji vakongelo oco vi kuatise kupange woku kunda olondaka viwa Viusoma wa Suku. Olombanjaile viaco, vi kuatisa olomisionaliu vi kasi kolofeka vialua, kuenda via siata oku kuatisavo koku landa olomakina vioku panga alivulu, oco a tumiwe kakongelo. Handi vali, vi kuatisa vamanji va nyula akongelo vovikanjo, kuenda vofeka, oco vi pamise ekolelo lia vamanji. (Va Rom. 1:11, 12) Vamanji va litumbika kupange wakundi votembo yosi, va siatavo oku kuatisiwa lolombanjaile viaco.

Kocita catete, omanu vana va enda oku eca olombanjaile viavo oco vi kuatise kefendelo liocili, va tambula asumũlũho alua, omo lioku sivaya Yehova lovina va kuete. Nda tua eca ekuatiso kupange woku kunda u kasi oku lingiwa voluali luosi koloneke vilo, tu tambulavo asumũlũho alua. Omo liaco, tu amamiko oku lekisa onjongole yoku eca lutima wosi ovina tu kuete.

Nda umue o yongola oku eca olombanjaile vioku kuatisa kupange woku kunda u kasi oku lingiwa voluali luosi, citava oku vi tuma ko:

Associação das Testemunhas de Jeová

Rua Talatona N.°1

Luanda Sul ale,

Caixa Postal 6877

Luanda—Angola