O Pondola hẽ Oku Kuatisa Ohueli Yimue Okuti Hambangiko ya Yehova?
1. Momo lie Akristão vana okuti olohueli viavo Halombangiko via Yehova, havoko lika va kuete onjongole yoku kuatisa olohueli viavo oku likongela kefendelo liocili?
1 Vekongelo liove muli hẽ akundi vamue alume ale akãi okuti olohueli viavo Halombangiko via Yehova? Nda muli, ocili okuti akundi vaco va yongola okuti olohueli viavo vi likongela kokuavo kefendelo liocili. Pole, havoko lika va kuete onjongole yaco. Suku kuenda vamanji vekongelo va yongola okuti “omanu vosi va popeliwa ha veya kukũlĩhiso w’Ocili.” (1 Tim. 2:4) Nda vekongelo lietu muli akundi vamue okuti olohueli viavo Halombangiko via Yehova, tu kuatisa ndati olohueli viaco?
2. Tu lekisa ndati olondunge poku kuatisa ohueli yina okuti Hambangiko ya Yehova?
2 Catete, tu sukila oku kũlĩhĩsa ocisimĩlo cohueli yina okuti Hambangiko ya Yehova. Olohueli vialua okuti Halombangiko via Yehova, va sole apata avo, va likolisilako oku kala ohueli yiwa, kuenda onjali yiwa, pole, va kuete alongiso amue okuti a litepa lalongiso etu. Citava okuti ovo ka va kũlĩhĩle ciwa Olombangi via Yehova omo liovina vĩvi va siata oku yeva ku vakuavo. Vamue va temẽla ohueli yavo omo liotembo va pesila kupange wa Suku, ina nda va pesila koku kala lepata. Oku kuata olondunge ci tu kuatisa oku lekisa ocisola lesumbilo kohueli yina okuti Hambangiko ya Yehova loku yuvula oku tema eci tu kasi lavo.—Olosap. 16:20-23.
3. Onjila yipi ya velapo yoku kuatisa ohueli yina okuti Hambangiko ya Yehova?
3 Lekisa Ocisola: Oco tu kuatise ohueli yina okuti Hambangiko ya Yehova oku kũlĩha ocili, tu sukila oku lekisa ovituwa viwa okuti ka tu va longisa lika Embimbiliya. (1 Pet. 3:1, 2) Ocina ca velapo, oku lekisa ocisola kokuavo. Vamanji akãi vekongelo va sukila oku lekisa ocisola kohueli yukãi okuti Hambangiko ya Yehova, kuenda vamanji alume va lekisevo ocituwa caco kohueli yulume okuti Hambangiko ya Yehova. Ndamupi?
4. Ndamupi tu lekisa ocisola?
4 Nda ove o yongola oku sapela lohueli yina okuti Hambangiko ya Yehova, tete o sukila oku u pulisa kohueli yaye Ombangi ya Yehova. Ku ka sumue nda kefetikilo ohueli yina okuti Hambangiko ya Yehova ka ya ku tambuluile ciwa. Citava okuti ukamba kuenda ocisola tu lekisa kokuaye, cu vetiya oku kuata ocisimĩlo ca sunguluka catiamẽla Kolombangi via Yehova. (Va Rom. 12:20) Vamanji vamue va siata oku laleka epata limue Liakristão okuti umue pokati kolohueli Hambangiko ya Yehova, oco va li le kumosi ondalelo, loku kuatisa ohueli yaco oku kuata ovisimĩlo via sunguluka viatiamẽla Kolombangi via Yehova. Ovo va vangula ovina vi va sanjuisa kuenda va yuvula oku tiamisila lika ombangulo kovina viespiritu. Eci vamanji va limbuka okuti ohueli yina Hambangiko ya Yehova ya lianja, va fetika oku kongela volombangulo viavo ovina vimue viatiamẽla Kovisonehua. Citava okuti ohueli yaco yi lekisa onjongole kelaleko lioku enda kolohongele vietu oco yi kũlĩhe eci ukãi waye a kasi oku lilongisa, ca piãla enene nda eye wa kũlĩha ale vamanji vamue vekongelo. Ndaño okuti ka yongola handi oku kũlĩha ocili, eye o sesamẽla epandiyo omo liekuatiso a kasi oku eca kohueli yaye okuti Ombangi ya Yehova.
5. Akulu vekongelo va pondola oku kuatisa ndati ohueli yina okuti Hambangiko ya Yehova?
5 Akulu vekongelo va kuete ocikele ca velapo coku kuatisa olohueli vina okuti Halombangiko via Yehova, kuenda oku sanda apuluvi oku va ĩha uvangi. Ohueli yina Hambangiko ya Yehova, okuti lalimue eteke a tavele kesapulo Liembimbiliya, o pondola oku tava kelembeleko li tunda Kovisonehua eci a sangiwa vosipitali ale ceci a liyaka locitangi cimue coku vela. Nda manji o kuete ohueli okuti Hambangiko ya Yehova o pita locitangi coku fisa umue vepata, akulu vekongelo poku eca elembeleko, va sukila oku kongelamo ohueli yaco.
6. Momo lie tu kuatisila olohueli vina okuti Halombangiko via Yehova?
6 Hesanjukuolio manji ukãi ale ulume a pondola oku kuata eci ohueli yaye okuti Hambangiko ya Yehova, yi tava oku lilongisa ocili! Yehova, kuenda ovangelo la vamanji vosi vekongelo, va kuatavo esanju. (Luka 15:7, 10) Nda okuti ohueli yina Hambangiko ya Yehova ka lekisa onjongole kocili, ka tu sumua momo alikolisilo etu a sanjuisa Yehova una “ka yongola okuti umue o nyõleha, puãi o yongola okuti vosi va likekembela akandu avo.”—2 Pet. 3:9.
[Etosi lia velapo kemẽla 6]
Oco tu kuatise ohueli yina okuti Hambangiko ya Yehova oku kũlĩha ocili, tu sukila oku lekisa ovituwa viwa okuti ka tu va longisa lika Embimbiliya