O Kasi hẽ Oku Lilongisa Ovina Viosi vi Tunda ku Yehova?
1. Yipi onjongole ya Yehova yatiamẽla kelongiso?
1 Yehova “Ulongisi [wetu] wa Velapo” o yongola okuti tu longisiwa. (Isa. 30:20) Eye wa fetika oku longisa noke yoku lulika Omõlaye uveli. (Yoa. 8:28) Noke liesino lia Adama Yehova ka liwekelepo oku longisa, pole locisola wa linga eliangiliyo lioku longisa omanu ka va lipuile.—Isa. 48:17, 18; 2 Tim. 3:14, 15.
2. Eliangiliyo lipi lioku longisa li kasi oku amamako koloneke vilo?
2 Koloneke vilo, Yehova o kasi oku songola esokiyo limue linene lielongiso. Vocitumasuku ca Isaya, olohuluwa viomanu voluali luosi vi kasi oku lamanela ‘komunda [yocindekaise] yonjo ya Yehova.’ (Isa. 2:2) Momo lie tu lamanela komunda yaco? Oco tu pindisiwe volonjila via Yehova Suku loku longisiwa laye! (Isa. 2:3) Kunyamo wo 2010 Olombangi via Yehova via pesela eci ci soka 1.6 kolohuluwa violohuluwa violowola kupange woku kunda kuenda oku longisa ocili Cembimbiliya komanu. Handi vali, osemana losemana kua siata oku eciwa epindiso konepa yespiritu kueci ci soka 105.000 kakongelo a sangiwa voluali luosi. Kuenda ukuenje wa kolelua haeye wa lunguka wa siata oku panga alivulu epindiso kueci ci pitahãla 500 kalimi.
3. Wa siata oku kuatisiwa ndati lelongiso li eciwa la Yehova?
3 Upako Esilivilo: Hekuatisokuolio tu kuete li tunda koku longisiwa la Suku! Tua lilongisa okuti Suku o kuete onduko kuenda o tu tata. (Osa. 83:18; 1 Pet. 5:6, 7) Tua lilongisa atambululo apulilo amue a velapo komuenyo ndeci: Momo lie omanu va talela ohali loku fa? Ndi sanga ndati esanju liocili? Cipi ocimãho comuenyo? Yehova wa siatavo oku tu ĩha olonumbi vi tu kuatisa oco ‘onjila yetu yi sumũlũhe.’—Yeh. 1:8.
4. Alongiso api a sangiwa pokati kafendeli va Suku kuenda momo lie tu sukilila oku lilongisa ovina viosi vi tunda ku Yehova?
4 Yehova ecavo elongiso li likasi oco li kuatise etendelo lialua liafendeli vaye oku amisako upange waye. Oku upisa kemẽla 4-6 ku sangiwa apuluvi amue oku longisiwa. Nda ekalo li tu ecelela oku tambula apindiso a tukuiwa, tu kasi hẽ oku upa esilivilo kelongiso Suku a tu sokiyila? Anga hẽ, tu kasi oku kuatisa amalẽhe oku kuata ovimãho viespiritu kuenda oku longisiwa la Suku, okuti ka va vetiyiwa lalongisi oku litumbika kalongiso a velapo oluali? Oku lilongisa ovina viosi tu pondola oku tambula ku Yehova, ci tu kuatisa oku kuata esanju cilo kuenda kovaso yoloneke.—Osa. 119:105; Yoa. 17:3.
Apuluvi Amue oku Longisiwa Locisoko ca Yehova
Osikola Yava ka va Tẽla Oku Tanga Loku Soneha
• Ocimãho: Oku longisa omanu oku tanga loku soneha oco va litumbike kelilongiso Liembimbiliya kuenda oku longisavo vakuavo ocili.
• Otembo Yambata: Catiamẽla ño kesukila.
• Ocitumãlo: Vonjango Yusoma.
• Yu o Pondola Oku Lisonehisa: Akundi vosi kuenda omanu vakuavo va kuete onjongole yaco.
• Ndomo o Lisonehisa: Akulu vekongelo ovo va linga esokiyo liosikola yaco ndomo ci sukiliwa pocitumãlo, kuenda va vetiya vosi va yongola oku kuatisiwa.
Osikola Yupange Wakristão
• Ocimãho: Oku pindisa akundi ‘oco va loñolohe koku kunda olondaka viwa loku longisa.’
• Otembo Yambata: Ka yi kuete esulilo.
• Ocitumãlo: Vonjango Yusoma.
• Yu o Pondola Oku Lisonehisa: Akundi vosi. Oku kongolamo vana va endaenda kolohongele olonjanja viosi okuti va tava kalongiso Embimbiliya, haivo vambata omuenyo u likuata lolonumbi Viembimbiliya.
• Ndomo o Lisonehisa: Vangula lusongui Wosikola Yupange Wakristão.
Osikola Yelimi Liofeka Yikuavo
• Ocimãho: Oku longisa akundi ndomo va kunda olondaka viwa kelimi likuavo.
• Otembo Yambata: Olosãi vikuãla ale vitãlo. Elongiso liaco olonjanja vimue li lingiwa Vocasapalo komẽle vokuenda kuowola yimosi ale vivali.
• Ocitumãlo: Olonjanja vimue li lingiwila Vonjango Yusoma yi kasi ocipepi.
• Yu o Pondola Oku Lisonehisa: Akundi vana vakuavituwa viwa okuti va yongola oku kunda velimi likuavo.
• Ndomo o Lisonehisa: Osikola yaco yi sokiyiwa lo filiale ndomo ci sukiliwa pocitumãlo.
Oku Tunga Olonjango Viusoma
• Ocimãho: Oku tunga kuenda oku tumbulula Olonjango Viusoma. Oyo hasikolako pole, vana va lieca olumue kupange waco va longisiwa ovoloño alua a va kuatisa oku tunga olonjango viusoma.
• Otembo Yambata: Catiamẽla ño komunu lomunu o lieca olumue.
• Ocitumãlo: Kocitumãlo cosi ca nõliwa Locisoko Coku Tunga Olonjango Viusoma. Vana va lieca olumue ci tava okuti va lalekiwa oco va kuatise kocitumãlo cimue kua pita ocilunga.
• Ceci ci Kisikiwa: Vamanji alume lakãi va papatisiwa haivo va taviwa lakulu vekongelo. Ci kale okuti va kuete ovomesele ale sio.
• Ndomo o Lisonehisa: Soneha o Petição para o Serviço Voluntário em Construções de Salões do Reino (S-82) Yeciwa lakulu vekongelo.
Osikola Yakundi Votembo Yosi
• Ocimãho: Oku kuatisa akundi ‘oku tẽlisa ciwa upange wavo woku kunda.’—2 Tim. 4:5.
• Otembo Yambata: Olosemana vivali.
• Ocitumãlo: Ci nõliwa lo filiale, Vonjango Yusoma yi kasi ocipepi.
• Ceci ci Kisikiwa: Vamanji vana va tẽlisa ale unyamo umosi ndakundi vavelapo.
• Ndomo o Lisonehisa: Ku nõliwa akundi votembo yosi kuenje manji o nyula akongelo vocikanjo cavo o va sapuilako.
Osikola Yava va Iñila Ndopo Kupange wo Betele
• Ocimãho: Osikola eyi yi sokiyiwa lo filiale, ocimãho cayo oku kuatisa vana veya ndopo ko Betele oco va tẽlise ciwa upange wavo.
• Otembo Yambata: Yi lingiwa owola yimosi vosemana losemana kuenda yi tumãla ekũi lepandu kolosema.
• Ocitumãlo: Ko Betele.
• Ceci ci Kisikiwa: Vamanji va kasi ko Betele otembo yalua ale vana va yongola oku kalako okatembo kamue ño (okuti unyamo ale anyamo alua).
• Ndomo va Lisonehisa: Vakuepata lio Betele va nõliwa loseketa yo Betele.
Osikola Yupange Wusoma
• Ocimãho: Oku pindisa akulu vekongelo kuenda oloñuatisi viekongelo oku tẽlisa ciwa ovikele viavo kuenda ovikele viocisoko. (Ovil. 20:28) Yi lingiwa noke yanyamo amue ndomo ca sokiyiwa Losungu Yolombangi Via Yehova.
• Otembo Yambata: Koloneke vilo, ca siata oku lingiwa okuti akulu vekongelo eteke lomeyu, kuenda oloñuatisi viekongelo eteke limosi.
• Ocitumãlo: Olonjanja vimue yi lingiwila Vonjango Yusoma yi kasi ocipepi ale Vonjango Yolohongele Vinene.
• Ceci ci Kisikiwa: Te lika akulu vekongelo ale oloñuatisi viekongelo.
• Ndomo va Lisonehisa: Akulu vekongelo kuenda oloñuatisi viekongelo, va lalekiwa lamanji o nyula akongelo.
Osikola Yakulu Vekongelo*
• Ocimãho: Oku kuatisa akulu vekongelo oku tata ciwa ovikele viavo vekongelo.
• Otembo Yambata: Ateke atãlo.
• Ocitumãlo: Yi sokiyiwa lo filiale; olonjanja vimue yi lingiwila Vonjango Yusoma yi kasi ocipepi ale Vonjango Yolohongele Vinene.
• Ceci ci Kisikiwa: Te lika akulu vekongelo.
• Ndomo va Enda Kosikola Yaco: Akulu vekongelo va lalekiwa lo filiale.
Osikola Yolomitavaso vi Nyula Akongelo Kumue Lakãi Vavo*
• Ocimãho: Ya sokiyiwila olomitavaso vi nyula akongelo vimbo kuenda olomitavaso vi nyula akongelo vofeka oco va kuatise ciwa akongelo ‘koku kunda loku longisa’ kuenda oku lava ocunda ca va kundikiwa.—1 Tim. 5:17; 1 Pet. 5:2, 3.
• Otembo Yambata: Olosãi vivali.
• Ocitumãlo: Ci sokiyiwa lo filiale.
• Ceci ci Kisikiwa: Vana okuti olomitavaso vi nyula akongelo vimbo, ale olomitavaso vi nyula akongelo vofeka.
• Ndomo va Lisonehisa: Vamanji va nyula akongelo kuenda akãi vavo va lalekiwa lo filiale.
Osikola Yembimbiliya ya Vamanji Alume ka va Kuelele*
• Ocimãho: Oku pongiya akulu vekongelo kuenda oloñuatisi viekongelo ka va kuelele oku kuata ovikele vikuavo. Vana va pindisiwa ci tava okuti va tambula ocikele coku talavaya kocitumãlo kuli esukila vofeka yavo. Vamue pokati kavo citava okuti va tambula ocikele coku talavaya kofeka yikuavo nda va yongola oku ci linga.
• Otembo Yambata: Olosãi vivali.
• Ocitumãlo: Ci sokiyiwa lo filiale; olonjanja vimue yi lingiwila Vonjango Yolohongele Vinene ale Vonjango Yusoma.
• Ceci ci Kisikiwa: Vamanji alume ka va kuelele va kuete oku upisa 23 toke 62 kanyamo haivo va kuete uhayele uwa okuti va yongola oku kuatisa vamanji kuenda oku litumbika kovopange Wusoma kovitumãlo kuli esukila. (Mar. 10:29, 30) Kuenda haivo va kasi ale ndakulu vekongelo ale olokuatisi viekongelo vokuenda kuanyamo avali.
• Ndomo o Lisonehisa: Nda osikola yaco ya siata oku lingiwa vofeka yene, ohongele ya vana va yongola oku lisonehisa yi lingiwa vokuenda kuohongele yimbo. Olonumbi vikuavo vi eciwa vokuenda kuohongele yaco.
Osikola Yembimbiliya ya Vamanji Olohueli*
• Ocimãho: Yeca epindiso li likasi kolohueli oco vi linge olondingupange viwa via Yehova kuenda viocisoko caye. Vana va pindisiwa ci tava okuti va tambula ocikele coku talavaya kocitumãlo kuli esukila vofeka yavo. Vamue pokati kavo citava okuti va tambula ocikele coku talavaya kofeka yikuavo nda va yongola oku ci linga.
• Otembo Yambata: Olosãi vivali.
• Ocitumãlo: Ovisoko vimue viatete via sokiyiwa oku lingiwila ko Centro Educacional da Torre de Vigia, Patterson, Nova Yorke. Ocitumãlo pa ka lingiwila osikola yaco, ci sokiyiwa lo filiale, citava okuti yi lingiwila Vonjango Yolohongele Vinene ale Vonjango Yusoma.
• Ceci ci Kisikiwa: Olohueli vi kuete 25 toke 50 kanyamo haivio vi kuete uhayele uwa, okuti ekalo liavo li va ecelela oku talavaya kuosi kuli esukila kuenda va lekisa ocituwa coku popia hati, “Ame ulo, va nume ño.” (Isa. 6:8) Handi vali, vana okuti tunde eci va kuela pa pita ale anyamo avali kuenda va kasi ale kupange wotembo yosi ci soka anyamo avali okuti ka va la liwekapo.
• Ndomo o Lisonehisa: Nda osikola yaco ya siata oku lingiwa vofeka yene, ohongele ya vana va yongola oku li sonehisa yi lingiwa kete liohongele yilikasi. Olonumbi vikuavo vi eciwa vokuenda kuohongele yaco.
Osikola yo Gileada yo Torre de Vigia
• Ocimãho: Oku pindisa ava va kasi kupange wotembo yosi kuenda olondingupange vikuavo oco va ende kupange wumisionaliu.
• Otembo Yambata: Olosãi vitãlo.
• Ocitumãlo: Ko Centro Educacional da Torre de Vigia, Patterson, Nova Yorke.
• Ceci ci Kisikiwa: Olohueli vina okuti tunde eci via papatisiwa pa pita ale anyamo atatu kuenda eci va tuma epingilo liavo liatete va kuata 21 toke 38 kanyamo. Handi vali, te vana okuti va vangula Ongelesi, haivo okuti tunde eci va kuela pa pita ale anyamo avali kuenda va kasi ale kupange wotembo yosi ci soka anyamo avali okuti ka va la liwekapo. Vana va lisonehisa va sukila oku kuata uhayele uwa. Akundi votembo yosi va kasi oku kundila kofeka yikuavo (oku kongelamo vana va kasi oku talavaya ndolomisionaliu) vakuakunyula akongelo; vana va talavaya ko Betele; vana va pita Kosikola Yoku Pindisa Olondingupange, vana va pita kosikola Yembimbiliya Yoku Pindisa Vamanji Alume ka va Kuelele, kuenda Osikola Yembimbiliya Yoku Pindisa Akristão va Kuele, citava okuti va lalekiwa nda va tẽlisa ovina viaco.
• Ndomo o Lisonehisa: Kolo filiale via nõliwa, ohongele ya vana va yongola oku li sonehisa kosikola yaco, yi lingiwa kohongele yofeka. Olonumbi vikuavo vi eciwa vokuenda kuohongele yaco. Nda kohongele yofeka volupale luove ka mua lingiwile ohongele yaco pole o yongola oku lisonehisa, sonehela ko filiale oco o tambule olonumbi vikuavo.
Osikola Yocisoko Cakulu vo Filiale Kumue Lakãi Vavo
• Ocimãho: Oku kuatisa Ocisoko Cakulu vo Filiale oco va tẽlise ciwa upange wavo woku songuila o Betele, oku kũlĩhĩsa ovopange atiamẽla kakongelo, vamanji va nyula akongelo vimbo kuenda vamanji va nyula akongelo vofeka vovikanjo viavo, loku kũlĩhĩsa upange woku pongolola, woku panga alivulu, loku a tumisa kuenda oku songola ovopange akuavo.—Luka 12:48b.
• Otembo Yambata: Olosãi vivali.
• Ocitumãlo: Ko Centro Educacional da Torre de Vigia, Patterson, Nova Yorke.
• Ceci ci Kisikiwa: Oku kala ukuacisoko Cakulu vo Filiale ale ukuacisoko Cakulu Vofeka, ale una o panda oku panga onepa kocisoko caco.
• Ndomo va Lisonehisa: Vamanji alume kuenda akãi vavo, va lalekiwa Losungu Yolombangi Via Yehova.
Osikola eyi ka yi lingiwila kolofeka viosi.