Olombangi Via Yehova Via Siata Oku Pindisiwa Ndati Oco vi Tẽlise Upange Wavo Woku Kunda?

Olombangi Via Yehova via siata oku tambula epindiso kovina viosi vi linga oku kongelamo upange woku kunda. Upange woku kunda, ocikundi cimue Yesu a eca kolondonge viaye, oco va u linge okuti oku kunda loku longisa olondaka viwa Viusoma wa Suku. (Mateo 24:14; 28:19, 20) Tua siata oku tambula epindiso liaco kolohongele viovokati kosemana kuenda kolohongele viofeka levi vimbo, vi lingiwa unyamo lunyamo. Olombangi Via Yehova vi kuete ovikele vekongelo, vi pindisiwa kolosikola poku tambula epindiso limue li likasi, lia kunamẽla Vembimbiliya.

Vocipama cilo

Epindiso lipi Olombangi Via Yehova via siata oku tambula?

Olohongele viekongelo. Olosemana viosi, tua siata oku enda kolohongele vivali kocitumãlo cetu cefendelo ci tukuiwa okuti, Onjango Yusoma. Yimue pokati kavio yi lingiwa vokati kosemana; yikuavo yi lingiwa kesulilo liosemana. Vosi citava okuti va enda kolohongele viaco, pole, lomue o kisikiwa oku eca olombongo.

Ohongele yovokati kosemana. Tu lilongisa ndomo tu mioñoloha koku tanga, koku sapela, oku vanguila kovaso yowiñi, oku kunda loku longisa. Epindiso liaco, li eciwa lekuatiso liolohundo, liovindekaise kuenda liolovideo vi lekisiwa. Epindiso liaco li tu kuatisa oku loñoloha koku kunda esapulo Liembimbiliya kuenda loku longisa omanu va lekisa onjongole. Vosi va enda kolohongele viaco, va kuatisiwa lepindiso lieciwa. Olohongele vietu vi pamisa ekolelo lietu ku Suku, ocisola tu u kuetele kuenda ocisola tu kuetele vamanjetu.
Ohongele yokesulilo liosemana. Ohongele yaco yolonepa vivali, yi fetika lohundo yowiñi yi tiamisiwila komanu vosi. Onepa yavali, elilongiso liocipama Cutala Wondavululia mua kongela oku linga apulilo kuenda atambululo. Ovipama viaco vi lombolola olosapi kuenda olonumbi Viembimbiliya, vi tu kuatisa kupange woku kunda kuenda komuenyo wetu weteke leteke.

Olohongele vimbo kuenda viofeka. Unyamo lunyamo tu kuete olohongele vitatu kuenda kolohongele viaco, kua siata oku kala akundi va tunda kakongelo a litepa. Olohongele viaco viesanju, vi kuete osapi yimue yopiwa kocinimbu cimue Cembimbiliya oku kongelamo olohundo, ovindekaise, oku pula kuenda olovideo. Ndeci ci pita lolohongele vietu vi lingiwa vokuenda kuosemana, olohongele vimbo kuenda viofeka, vi vokiya ukũlĩhĩso wetu Wembimbiliya kuenda vi tu kuatisa oku mioñoloha koku kunda olondaka viwa. Ndeci ci pita kolohongele vi lingiwa vokati kosemana, omanu vosi citava okuti va enda kohongele yimbo ale yofeka, pole, ka va kisikiwa oku eca olombongo.

Olosikola Viembimbiliya Violombangi Via Yehova

Vamanji valua va siata oku lalekiwa oco va pindisiwe kolosikola Viembimbiliya. Olosikola viaco vi lomboloka nye? Cipi ocimãho cavio kuenda vi tumãla oloneke viñami? Helie o pondola oku pindisiwa kolosikola viaco?

Osikola Yakundi Votembo Yosi

Ocimãho: Oku pindisa vamanji va litumbika kupange ulikasi va tukuiwa okuti akundi votembo yosi,b oco va loñolohe kupange woku kunda kuenda woku longisa. Vepindiso liaco mua kongela olohundo vi lingiwila vohondo yelilongiso, ovindekaise kuenda oku lingila kumosi ovopange amue vokuenda kuepindiso liaco.
Otembo yi tumãla: Oloneke epandu.
Oku lisonehisa: Vosi va tẽlisa unyamo tunde eci va linga akundi votembo yosi, va lalekiwa oku pindisiwa kosikola yaco. Akundi votembo yosi okuti tunde eci va pindisiwa pa pita ale anyamo atãlo, va lalekiwa vali oco va pindisiwe.

Osikola Yakundi Vusoma

Ocimãho: oku eca epindiso limue li likasi ku vamanji va litumbika kupange wotembo yosi. Olondonge vi pindisiwa oco vi loñolohe koku kunda loku longisa kuenda oku kũlĩha ciwa Embimbiliya. Vamanji valua noke yepindiso liaco, va tumiwa kovikanjo vina kuli esukila liakundi.
Otembo yi tumãla: Olosãi vivali
Oku lisonehisa: Akundi votembo yosi, va pondola oku lisonehisa nda va tẽlisa olonumbi vi kisikiwa kuenda nda ekalo liavo li va ecelela oku ka kundila oku kuli esukila.

Osikola Yakulu Vekongelo

Ocimãho: Oku kuatisa akulu vekongelo oku tẽlisa ovikele viavo vekongelo, ndeci oku longisa oku nyula vamanji loku vokiya ocisola cavo va kuetele Suku kuenda vamanji.—1 Petulu 5:2, 3.
Otembo yi tumãla: Oloneke vitãlo.
Oku lisonehisa: Ci kaile vamanji va tambula ndopo ocikele coku kala akulu vekongelo, ale vana va kasi ale otembo yalua okuti, tunde eci va pindisiwa kosikola yaco pa pita ale anyamo atãlo, citava okuti va lalekiwa.

Osikola ya Vamanji va Nyula Akongelo Lakãi Vavo

Ocimãho: Oku pindisa vamanji va nyula akongeloc oco va loñolohe koku tẽlisa ovikele viavo. (1 Timoteo 5:17) Epindiso liaco, li kuatisavo akulu vaco vekongelo kuenda akãi vavo oku vokiya ukũlĩhĩso Wovisonehua.
Otembo yi tumãla: Osãi yimosi.
Oku lisonehisa: Vamanji va tambula ndopo ocikele coku nyula akongelo kuenda akãi vavo noke yoku tẽlisa unyamo umosi, va lalekiwa oku pindisiwa kosikola yaco. Noke yoku pita anyamo atãlo, va lalekiwa vali.

Osikola Yupange Wusoma

Ocimãho: Oku kuatisa akulu vekongelo kuenda oloñuatisi viekongelo,d oco va tẽlise ciwa ovikele viavo ndomo ci likuata lekalo kuenda asukila o koloneke vilo. (2 Timoteo 3:1) Anyamo osi kua siata oku lingiwa osikola yaco.
Otembo yi tumãla: Yi lingiwa veteke limosi, ca tamba lika kekalo.
Oku lisonehisa: Oku pindisa vamanji va nyula akongelo, akulu vekongelo kuenda oloñuatisi viekongelo.

Osikola ya Vamanji va Iñila Ndopo ko Betele

Ocimãho: Oku kuatisa vamanji va iñila ndopo ko Betelee, oco va tẽlise ciwa upange wavo loku vokiya ocisola va kuetele Suku kuenda omunu lukuavo.
Otembo yi tumãla: Oloneke vitãlo lomeyu.
Oku lisonehisa: Vamanji va iñila ndopo ko Betele va kisikiwa oku pindisiwa kosikola yaco. Vamanji vana va kasi osimbu ko Betele okuti tunde eci va pindisiwa kosikola yaco pa pita ale anyamo atãlo, va pondola oku lalekisa oco va pindisiwe vali.

Osikola yo Gileada

Ocimãho: Oku kuatisa olondonge oco vi kuate elomboloko liasuapo Liembimbiliya, loku vi kuatisa oku kapako ovina va lilongisa. (1 Va Tesalonike 2:13) Vamanji alume lakãi va pama kekolelo va pindisiwa kosikola yo Gileada va pondola oku kuatisa kocisoko ca Yehova kuenda kupange woku longisa Embimbiliya koluali luosi. Vamanji va pindisiwa, va pondola oku tumiwa vocikanjo ale ko Betele vofeka yavo ale kofeka yikuavo.
Otembo yi tumãla: Olosãi vitãlo.
Oku lisonehisa: Vamanji ko Betele ovo va nõla pokati ka vamanji kupange wotembo yosi ulikasi. Osikola yaco yi lingiwa ko Centro Educacional da Torre de Vigia ko Patterson, Nova York.

Ulongisi umue wosikola wo Gileada o kasi oku talavaya locindekaise conembele yo Yerusalãi oco a longise olondonge.

Osikola Yocisoko Cakulu vo Betele Lakãi Vavo

Ocimãho: Oku pindisa vamanji vatiamẽla kosungo yakulo vo Betele,f oco va songuile ciwa upange woko Betele kuenda upange woku kunda vofeka ale olofeka vina okuti, upange woku kunda usonguiwa lo Betele yavo.
Otembo yi tumãla: Olosãi vivali.
Oku lisonehisa: Ombala Yolombangi Via Yehova Voluali Luosi oyo yi laleka vamanji vatiamẽla kosungo yakulo vo Betele lakãi vavo oco va pindisiwe kosikola, ko Centro Educacional da Torre de Vigia ko Patterson, Nova York.

Epindiso Liombangi Via Yehova lia kunamẽla pi?

Epindiso Olombangi Via Yehova vi tambula, lia kunamẽla Vembimbiliya. Etu tu tava okuti Embimbiliya lia tunda ku Suku kuenda mu sangiwa olonumbi viosi via velapo, vi songuila omuenyo Wakristão.—2 Timoteo 3:16, 17.

Anga hẽ Olombangi Via Yehova via siata oku feta epindiso liavo?

Sio. Epindiso liaco li lingiwa ocali. Ovopange Olombangi Via Yehova, a kuatisiwa lolombanjaile vi eciwa lutima wosi.—2 Va Korindo 9:7.

a Embimbiliya kuenda ovindekaise via kunamẽla Kembimbiliya, oku kongelamo olovideo, ovina viaco viosi vi sangiwa vonumbi yetu yo internet jw.org.

b Ukundi wotembo yosi, omunu umue wa papatisiwa ci kaile ulume ale ukãi, o kuete ocimãho coku talavaya olohola vialua vosãi oco a longise omanu esapulo Liembimbiliya.

c Manji o nyula a kongelo omunu umue o kasi kupange wotembo yosi ulikasi locimãho coku nyula akongelo a litepa, vocikanjo caye o semana losemana. Eye o pamisa vamanji pocakati colohundo via kunamẽla Vembimbiliya loku enda lavo kupange woku kunda.

d Oloñuatisi viekongelo via siatavo oku linga ovopange alua oco vi kuatise vamanji. Omo liupange ovo va linga, akulu vekongelo va kuata otembo yalua yoku longisa kuenda oku nyula vamanji locimãho coku va pamisa.

e Ondaka o Betele, onduko yimue ya eciwa kolofiliale Violombangi Via Yehova. Vamanji va kasi kupange wotembo yosi ulikasi, va kuatisa kovopange a lingiwa ko filiale yavo.

f Vamanji va panga onepa kocimunga ci songuila ofiliale, va soka alume vatatu va loñoloha ale ceci ci pitahãla etendelo liaco.

Olombangi Via Yehova via siata oku kuatisiwa ndati lepindiso liavo?

“Omo okuti ndukuasõi ca tilĩle calua kokuange oku sapela lomanu va tunda kolofeka vikuavo catiamẽle Kembimbiliya. Pole, epindiso nda tambula kohongele yovokati kosemana lia ndi kuatisa oku kuata ekolelo lialua loku kala ulongisi uwa. Cilo, nda siatavo oku sapela ciwa la vamanji vekongelo kuenda kupange wange.”—Natasha ko Estados Unidos.
“Oku pindisiwa Kosikola Yakundi Vusoma, ca ñuatisa oku kuata ovituwa viwa ndeci, ocisola, epandi kuenda ohenda. Omo liaco, nda kuata onima yiwa poku kala Ukristão umue uwa kuenda ekamba limue liwa. Osikola yaco ya ndi kuatisa ndomo ndi linga a konomuiso atosi amue Embimbiliya kuenda ndomo ndi lombolola Ondaka ya Suku lonjila yimue yi lomboloka komanu vana va yongola oku kũlĩha Yehova loku u vumba.”—Stephen, wo ko Nigeria.
“Osikola yakulu vekongelo ya ñuatisa oku kala embombe oco ndi kale ukulu umue wekongelo o tẽlisa ciwa ovikele viaye. Olohundo via ndi vetiya oku kuama ongangu ya Yesu.”—Luka, ko Italia.
“Osikola Yupange Wusoma, ya ndi longisa esilivilo lioku ecelela okuti, omanu va lianja lame, oku kala omunu umue uwa kuenda oku linga ukamba la vosi. Nda lilongisa okuti eci ndi lingila cimue ciwa vakuetu ndi sukila oku vetiyiwa locisola okuti, sikisikiwa.”—Samuel, ko Reino Unido.
“Osikola yo Gileada ya tu kuatisa oku likonomuisa etu muẽle lekuatiso Liondaka ya Suku. (Tiago 1:22-25) Kuenje tua limbuka kolonepa vipi viomueyo wetu tu sukila oku linga apongoloko kuenda kupange tu lingila Yehova. Tua lilongisa oku pitisa kovaso olonjongole via vakuetu okuti, vietu ci sule loku ecelela okuti ocisola ci tu songuila kovina viosi tu popia levi tu linga.”—Elnathan, ko Filipina.