Ocituwa ca Velapo Culongisi Uwa
1. Ocituwa cipi ci kuatisa omunu oku kala ulongisi uwa?
1 Ocituwa cipi ci kuatisa omunu oku kala ulongisi uwa Wembimbiliya? Elilongiso lia velapo? Ukũlĩhĩso womuenyo? Ale uloño tua citiwa lawo? Ocili okuti, ocituwa cina ci tẽlisa Ocihandeleko, okuti ondimbukiso yolondonge via Yesu, haico ocituwa ca velapo ca Yehova. (Yoa. 13:35; Va Gal. 5:14; 1 Yoa. 4:8) Ocituwa caco ocisola. Ulongisi uwa Wembimbiliya o lekisa ocisola ku vakuavo.
2. Momo lie ci kuetele esilivilo kokuetu oku lekisa ocisola komanu?
2 O Sole Omanu: Yesu Ulongisi wa Velapo, wa lekisa ocisola komanu, kuenda ocituwa caco ca va vetiya oku u yevelela. (Luka 5:12, 13; Yoa. 13:1; 15:13) Nda tua kapako omanu tu ka kuata apuluvi alua oku eca uvangi. Ovitangi vimue ndeci alambalalo, ale ceci omanu ka va tava kesapulo lietu, ka vi tu tateka. Tu ka lekisa ocisola komanu vana tu kundila, loku pongolola olonjila vietu vioku kunda oco tu kũlĩhĩse ovina vi va sakalaisa. Omo liaco, ka tu sokiya lika otembo yoku ka longisa ondonge londonge Yembimbiliya, pole tu sandavo otembo yoku pongiya elilongiso liavo.
3. Oku sola ocili Cembimbiliya ci tu kuatisa ndati kupange woku kunda?
3 O Sole Ocili Cembimbiliya: Yesu wa solele ocili Cembimbiliya kuenda wa ci tendele ndukuasi. (Mat. 13:52) Nda tua sola ocili Cembimbiliya, tu ci kunda lesanju, kuenda ci vetiya omanu va tu yevelela. Ocisola caco ci tu kuatisa oku kapako esapulo liaco okuti ka tu tiamisila utima kekambo lietu lioku lipua, kuenda tu tula utima eci tu kasi kupange woku kunda.
4. Tu lekisa ndati ocisola komanu?
4 Lekisa Ocisola: Tu lekisa ndati ocisola komanu? Tu ci linga poku sokolola ocisola Yehova Lomõlaye va siata oku tu lekisa, kuenda oku sokolola ekalo lĩvi konepa yespiritu liomanu vana va kasi vocikanjo cetu. (Mar. 6:34; 1 Yoa. 4:10, 11) Ocisola cetu kocili Cembimbiliya ci ka livokiya nda tua amamako lelilongiso lio pokolika kuenda oku sokolola ovina tua lilongisa. Ocisola onepa yimue yepako liespiritu. (Va Gal. 5:22) Omo liaco, tu pondola oku likutilila ku Yehova oku pinga espiritu sandu liaye oco li tu kuatise oku vokiya ocisola cetu. (Luka 11:13; 1 Yoa. 5:14) Handi vali, ci kale nda tua lilongisa kosikola, nda tu kuete ukũlĩhĩso wocili Cembimbiliya, ale uloño woku linga cimue, tu pondola oku kala alongisi vawa Vembimbiliya nda tua lekisa ocisola komanu.