Yevelela Oco o Lilongisiwe
1. Momo lie eci tu enda kohongele yofeka tu sukilila oku yevelela lutate?
1 Ndopo ohongele yofeka yunyamo wo 2013, yi ka fetika. Kua lingiwa upange walua woku pongiya ovipama vi ka vetiya vamanji voluali luosi. Ove hẽ wa linga ale esokiyo lioku kala koloneke viosi vitatu? Omo okuti kolohongele viofeka kua siata oku kala omanu valua, citava okuti ovina vimue vi tu talula. Omo liaco, tu sukila oku yevelela ciwa ovipama viosi. Ndaño muẽle ovipama vi lingiwa vekongelo oku yevelela ku kuete esilivilo. Handi vali, oku linga ovongende, lovina vikuavo ci pondola oku tu kokela ekavo. Nye ci tu kuatisa oku yevelela oco tu longisiwe?—Esin. 31:12.
2. Tu pongiya ndati utima wetu oco tu ende kohongele yofeka?
2 Ceci Handi Ohongele Yofeka ka ya Fetikile: Vonumbi yetu yo Internet www.pr418.com, mu sangiwa ovipama viohongele yofeka, oku kongelamo olosapi viosi violohundo kuenda ocisonehua cimosi ale vivali via velapo. Nda tu kuete okombutadore ya tokekiwa vo Internet, oku konomuisa olonumbi viaco, ci ka tu kuatisa oku pongiya ciwa utima wetu oco tu kale kohongele yofeka. (Esera 7:10) Anga hẽ Kefendelo liene Liepata, vu pondola oku konomuisa ovipama viaco?
3. Nye ci ka tu kuatisa oku yevelela lutate?
3 Vokuenda Kuohongle: Ciwa oku enda vonjo yuhayele osimbu ovipama ka via fetikile handi. Yika otelefone yove yo peka, oco ka yi ka tateke vamanji oku yevelela ovipama. Nda okuti ku yongola oku yika otelefone yove, o sukila oku yi sokiya ciwa okuti eci umue a ku vilikiya, ka yi tateka vamanji oku yevelela. Nda wa ambata okombutadore okuti o talavaya layo vokuenda kuovipama, ci linga okuti, ku tateka omanu vakuavo oku yevelela. Vokuenda kuovipama, yuvula oku lia kuenda oku nyua ovina vimue. (Uku. 3:1) Osimbu ohundi yi vangula, tulukila kokuayo. Kuama oku tangiwa kuovisonehua Vembimbiliya liove. Soneha atosi a velapo.
4. Olonjali vi kuatisa ndati omãla vavo oku yevelela oco va longisiwe?
4 Tu yongolavo okuti, omãla vetu va yevelela oco va longisiwe. Elivulu Liolosapo 29:15, li popia ndoco: “Omõla wa pañuiwa o kutisa inaye osõi.” Omo liaco, ca sunguluka okuti epata li tumãla pamosi oco olonjali vi lavulule ciwa omãla vavo, loku va vetiya oku yevelela ciwa ovipama okuti ka va tendi ohango, ale oku tumisa asapulo votelefone, ndaño oku ñuala ñuala. Nda okuti va kuete ale utunga u va ecelela oku kuata elomboloko liovina vimue vi kasi oku lomboluiwa, omãla vaco va sukila oku pindisiwa oco va yevelele ciwa.
5. Momo lie ci kuetele esilivilo oku pitulula ovipama vimue viohongele yofeka, kuenda tu ci linga ndati?
5 Ceci Ovipama ka Via Fetikile Kuenda Kesulilo Lieteke Leteke: Ku ka suñinye calua. Pekela selo oco o kuate otembo yalua yoku puyuka. Oku pitulula ovipama ku kuatisa oku patekela ovina tua lilongisa. Omo liaco, eteke leteke koñolosi, ca sunguluka oku sapela kumue lepata atosi a velapo vakukutu amue. Poku enda vo bare kumue lakamba vove, momo lie ku vanguila lavo atosi amue wa sola? Poku tiukila konjo noke yohongele, sandiliya otembo yoku sapela kumue lepata Kefendelo liene atosi vu yongola oku kapako. Omo liaco, sandiliya otembo okuti, osemana losemana vu kũlĩhĩsa onepa yimue yalivulu wa tambuili.
6. Anga hẽ oku enda ño olivova kohongele yofeka ci kuatisa? Ci lombolola.
6 Okulia ku kuata lika esilivilo vetimba nda kua liwa ciwa, kuenda oku tulumuinya. Cimuamue haico ci pita loku tekula ekolelo lietu poku kala kohongele yofeka. Tu kuatisiwa lika lovipama viohongele vi ka lingiwa vateke atatu, nda tu yevelela lutate kuenda tu kapako ovina tu lilongisa.