“Ongolola Omanu Vosi”
1. Olohongele viofeka kuenda ohongele violofeka vi sokisiwa ndati levi va Isareli va enda oku linga eci va tunda Kegito?
1 Eci va Isareli va tunda Kegito, Yehova wa handeleka Mose oku “ongolola omanu vosi” oco va yevelele olonumbi via Yehova Komunda Sinai okuti, vo sumbila kuenda va longisa olonumbi Viaye komãla vavo. (Esin. 4:10-13) Epuluvi liaco, lia kala liesanju halio lia pamisa calua ekolelo liavo! Vokuenda kuolosãi vi keya, afendeli va Yehova va ka enda kohongele yofeka kuenda kohongele violofeka oco va longisiwe Laye. Nye tu pondola oku linga oco tu kuatisiwe lulandu waco?
2. Nye tu sukila oku linga oco tu “lipongiye ciwa” kohongele yetu yofeka?
2 “Lipongiya Ciwa”: Yehova wa sapuila va Isareli “oku lipongiya” oco va liongoluile Komunda Sinai. (Etu. 19:10, 11) Koloneke vilo, tu sukilavo oku li pongiya ciwa, oco tu ende kolohongele viofeka ndaño okuti ka tu kuete onepa kohongele yaco. Vamanji valua va ka sukila oku sokiya ciwa otembo yavo kupange woku sanda eteku. Citava okuti ekalo liove li sokisiwa leli lia Nehemiya. Eye wa yonguile oku pinga kupange waye woku avela ovinyu Soma Aretasesete oco a tiukile ko Yerusalãi loku kuatisa koku tumbulula ovimbaka viaco, pole wa kũlĩhĩle okuti epingilo liaco ka li sanjuisa Soma. Nehemiya wa tukula ondaka yaco vohutililo, kuenda wa lekisa utõi poku linga epingilo liaye. Soma wa tava kepingilo lia Nehemiya, kuenda wo wĩha ekuatiso lioku ka tumbulula ovimbaka. (Neh. 2:1-9) Anga hẽ, o sukila oku pinga epuyuko kucime cove, oku sokiya ungende, ale oku sanda ocitumãlo o ka kala? Akulu vekongelo va ka sanjukila oku eca ekuatiso li sukiliwa komunu una o sukila ekuatiso. Linga esokiyo lioku pitĩla selo, oco o ‘yevelele lutate’ kovina o ka li longisa kolonepa viosi violohongele, kuenda lipongiya ciwa.—Va Hev. 2:1.
3. Nye ci ka tu kuatisa oku pongiya utima wetu oco tu yevelele ovipama viosi viohongele yaco?
3 Onjila yikuavo ya velapo, oku pongiyila utima wetu kovina tu ka yevelela levi tu ka li longisa. (Esera 7:10) Ulandu wohongele yofeka, u ka kapiwa vonumbi yetu yo Internet jw.org, kuenda mu ka kapiwavo olosapi violohundo viosi kumue locinimbu cimosi Cembimbiliya ale vivali violohundo viaco. Eliangiliyo liaco, li ka tu kuatisa oku linga Efendelo lietu Liepata vokuenda kuolosemana ku ka lingiwa ohongele yetu yofeka. Akundi vamue va siata okupa olokopia viulandu wohongele yofeka loku sonehamo atosi amue vokuenda kuohongele yaco.
4. Olonjali vi pondola ndati oku konomuisa ulandu wohongele yofeka oco vi longise omãla vavo?
4 ‘Longisa Omãla Vove’: Ohongele ya lingiwa Komunda Sinai ya kuatele ocimãho cokuti, olonjali va Isareli “va longisa omãla vavo.” (Esin. 4:10) Koloneke vilo, ohongele yofeka yecavo kolonjali epuluvi lioku linga ovina viaco. Olonjali vi sukila oku tumãla lomãla vavo vokuenda kuohongele oco vi kuatise omãla oku yevelela ciwa. Kesulilo lieteke leteke liohongele yaco, vosi va sukila oku konomuisila kumosi ovina va lilongisa vokuenda kuefendelo liavo liepata.
5. Tu ka kuatisiwa ndati poku enda kohongele yofeka yi ka lingiwa?
5 Ohongele ya lingiwa Komunda Sinai, ya kuatisa va Isareli oku sanjukila esumũluho lilikasi lioku kala afendeli va Suku. (Esin. 4:7, 8) Ohongele yetu yofeka yi laika oku lingiwa, ya sokiyiwavo oku tu kuatisa. Vokuenda kuoloneke vitatu tu ka kala kohongele yofeka, ka tu ka yapuisiwa loluali lua Satana, momo tu ka kala pokati ka vamanji loku sanjukila ombembua tu kuete lavo. (Isa. 35:7-9) Omo okuti eteke linene lia Yehova li kasi ocipepi, ka tu ka pumbi epuluvi lioku liongoluila pamosi oco tu li kuatise pokati!—Va Hev. 10:24, 25.