Ndomo tu Pongiya Ciwa Olondaka Vioku Fetika Ombangulo

1. Momo lie ci kuetele esilivilo oku pongiya ciwa olondaka vioku fetika ombangulo?

¹ Ndeci elemba liokulia kupepa li vetiya onjongole yomunu, olondaka via pongiyiwa ciwa vioku fetika vi tu ĩhavo epuluvi lioku kuata ombangulo yiwa Yembimbiliya. Ndaño okuti poku vangula olondaka vioku fetika tu teta onimbu, ndeci okulia kupepa ci sukila oku pongiyiwa ciwa, oco ombangulo yetu yi kuate onima yiwa tu sukila oku pongiya ciwa olondaka vioku fetika. (Olosap. 15:28) Oco olondaka vioku fetika ombangulo vi kuate onima yiwa, nye ci sukiliwa?

2. Tu pongiya ndati olondaka vioku fetika ombangulo, okuti vi vetiya onjongole?

² Nõla Atosi a Vetiya Onjongole: Olondaka vietu vioku fetika ombangulo vi pondola oku vetiya onjongole yomunu tua sanga ale oku tu teta kondaka. Omo liaco, poku lipongiya tu sokololi ovina vi sakalaisa omanu vocikanjo. Anga hẽ, omanu vocikanjo cetu va yongola ombiali yiwa, oku kuata esanju vepata, ale va yongola okuti uyaki u pua? Omanu valua va sanjukila oku situlula ovisimĩlo viavo, omo liaco, poku lipongiya sokolola apulilo a va vetiya oku vangula. O pondola hẽ oku kuama ovindekaise vimue vioku fetika ombangulo vi sangiwa Vupange Wetu Wusoma loku vi kuama vocikanjo cove? Momo lie ku pongiyila ovindekaise vimue Kefendelo liene Liepata?

3. Poku pongiya olondaka vioku fetika ombangulo, momo lie tu sukilila oku sokolola ekalo liomanu vocikanjo cetu?

³ Kũlĩhĩsa Oku Omunu a Citiwila Kuenda Ovituwa Viavo: Kovitumãlo vimue ca sunguluka okuti eci o pitĩla o vangula ondaka ya ku nena. Pole kovitumãlo vikuavo, ka ca sungulukile okuti omunu weya o fetika tete ombangulo, okuti ka kũlĩhĩsa ndomo omunu a sanga a kasi kuenda oku sapela ovina viatiamẽla komuenyo waye. Handi vali kovitumãlo vimue okuti valua va tiamẽla ketavo limue, omanu va ecelela okuti onjanja yatete tu li sanga lavo tu vangula eci catiamẽla Kembimbiliya. (Ovil. 2:14-17) Pole kovitumãlo vina okuti omanu Hakris­tãoko, ale ka kuli etavo limue, ka ca sungulukile oku tukula Embimbiliya onjanja yatete, pole, ciwa oku ci linga kepasu likuavo.—Ovil. 17:22-31.

4. Utate upi tu sukila oku kuata poku pongiya olondaka vioku fetika?

⁴ Olondaka Vioku Fetika: Pongiya lutate olondaka viove vioku fetika. Ci kuete esilivilo nda wa pongiya olondaka vina okuti via leluka kuenda ku vangula calua. Onjila tu kuama ndomo tu fetika olondaka viaco ci kuetevo esilivilo. Lekisa esanju poku sapela. Lekisa esumbilo, kuenda olondaka viove vi lekise okuti wa kapako omunu wa sanga. Poku kuama olonumbi evi ci tu kuatisa oku pongiya ciwa olondaka vioku fetika vi vetiya omanu vocikanjo cetu oco va lie ‘komesa ya Yehova.’—1 Va Kor. 10:21.