Tu Amamiko Oku Kuata Uloño Kupange Woku Kunda Oco tu Sokolole Ciwa Olondaka Vioku Fetika Ombangulo

Esunga Lieci ci Kuetele Esilivilo: Nda olondaka vietu vioku fetika ombangulo ka vi vetiya onjongole yomanu, va pondola oku tu teta kondaka osimbu handi ka tua sapelele lavo. Omo liaco, tu sukila oku kũlĩhĩsa olondaka vietu vioku fetika ombangulo, momo vi kuete esilivilo eci tu sanga omanu tu kundila. Ndaño okuti tu pondola oku sanga olondaka vimue vioku fetika ombangulo Vupange Wetu Wusoma kuenda velivulu Raciocínios, pole, ka vi pondola oku eca olonumbi viosi vioku fetika ombangulo lonjila yimue ya leluka. Ndaño okuti kuli olondaka vimue via leluka, pole, akundi va pondola oku nola ale oku pongiya olondaka vikuavo vioku fetika ombangulo. Tu pondolavo oku loñoloha kupange woku kunda nda tua pongiya ciwa olondaka vioku fetika ombangulo okuti, ka tu popi lika ovina tu sima eci tu sanga omunu umue o lekisa onjongole.—Olosap. 15:28.

Ndomo tu ci Linga:

Nõla osapi yimue. O pondola oku upa osapi yaco velivulu o yongola oku eca nda omanu vocikanjo cove va lekisa onjongole.
Pongiya ciwa ondaka yimosi ale vivali o ka popia, noke yoku lama omunu wa sanga. O pondola oku popia ndoco: “Ndeya kulo omo. . . ,” “Omanu valua va sakalala lo. . . ,” “ Ndi yongola oku kũlĩha ocisimĩlo cove catiamẽla ko. . . ,” ale oku popia ovina vikuavo. Olondaka vi teta onimbu vi kuete esilivilo lia velapo. Akundi vamue va nõlapo oku patekela olondaka vioku fetika ombangulo.
Pongiya epulilo limue li ka vetiya omunu o ka sanga oku likongela vombangulo. (Mat. 17:25) Ivaluka okuti, pamue omunu o sanga wa kala oku sokolola ovina vimue osimbu kua endele handi konjo yaye. Omo liaco, ku ka linge epulilo limue okuti, ka tẽla oku litambulula.

Seteka Ndoco Vokuenda Kuosãi:

Osimbu u kasi oku linga efendelo liepata, sanda otembo yoku lipongiya ciwa, kuenda oku linga ovindekaise violondaka vioku fetika ombangulo kupange woku kunda.
Vokuenda kupange woku kunda, sapuila manji okasi laye ovina wa sokiya oku popia. (Olosap. 27:17) Nda okuti olondaka viove vioku fetika ombangulo ka vi vetiya omanu kupange woku kunda, linga apongoloko.