Kala Oñuatisi Yimue yi Sapela
1. Tu kuama ndati ongangu yupostolo Paulu poku talavaya lavakuetu kupange woku kunda?
1 Otembo upostolo Paulu a kala la vamanji, wa yi tendele ndepuluvi lioku “likolisa pokati.” (Va Rom. 1:12) Eci o talavaya lukundi umue kupange woku kunda, wa siata hẽ, oku sanda epuluvi lioku u pamisa loku u kuatisa? Osimbu u kasi kupange woku kunda, momo lie ka u sapelela ovina vi kuatisa ukuene oku kala ukundi wa loñoloha?
2. Nye tu sukila oku linga oco tu kolise manji tua tunda laye kupange woku kunda kuenda momo lie ci kuetele esilivilo?
2 Yuvula Oku Kuata Ohele: Akundi vamue usumba wavo u limbukiwila pupolo ale kocileñi condaka. Tu pondola oku u kolisa poku u pandiya lutima wosi. Yipi onjila yikuavo yoku u kuatisa oku yuvula ohele? Manji umue ukuakunyula akongelo wa sapela la manji a tunda laye kupange woku kunda catiamẽla ku sumba a kuatele kuenda ndomo ohutililo yo kuatisa oku yula usumba waco. Manji ukuavo wa tukula ovina viu kuatisa oku yuvula ohele: “Ndi fetika loku memenako. Olonjanja vimue ndi sukila oku likutilila oco ndi vangule olondaka via leluka.” Anga hẽ, kuli ocina cimue ca ku kuatisa oku yuvula ohele kupange woku kunda? Sapela ovina viaco lukundi wa tunda laye kupange woku kunda.
3. Nye tu sukila oku vangula lukundi tua tunda laye oco cu kuatise oku loñoloha kupange woku kunda?
3 Ulongisa Olonjila wa Siata Oku Kuama: Wa sangele ale olondaka via leluka ale epulilo limue liatiamẽla kocilunga cimue ca pita posongo, ci ku kuatisa oku fetika ombangulo? Ove okuete hẽ, ulandu umue okuti poku vokiya olondaka vimue via leleluka kovindekaise vi kuamiwa kupange woku kunda via eca onima yiwa? Sapuilako ukundi wa tunda laye. (Olosap. 27:17) Eci wendi koku linga epasu, lombolola ocimaho cepasu liaco kuenda ndomo o pondola oku tẽlisa ocimaho caco. Noke yoku linga elilongiso Liembimbiliya, o pondola oku lombolola esunga lieci wa nõlela etosi liaco, ocisonehua, ale onjila wa kuama yoku kuatisa omunu o longisa kovina a sukila.
4. Momo lie tu lekisila onjongole yoku kuatisa vamanji va tunda letu kupange woku kunda?
4 Akundi vokocita catete, ka va lekisile lika onjongole yoku kuatisa vana ka va kaile akristão. Ovo va kapeleko esilivilo lioku li vetiya kuenda oku li pamisa pokati. (Ovil. 11:23; 15:32) Upostolo Paulu wa pindisa umalẽhe Timoteo kuenda wo vetiya oco a kuatise vakuavo lovina a lilongisile. (2 Tim. 2:2) Eci ka tu ivalako oku lingila eci ciwa vamanji kupange woku kunda, ka tu vokiya lika esanju liavo kuenda oku loñoloha kupange woku kunda, pole tu sanjuisavo Isietu wo kilu.—Va Hev. 13:15, 16.