Tu Amamiko Oku Kuata Uloño Kupange Woku Kunda Oco tu Kale Ekamba Limue li Kuatisa

Esunga Lieci ci Kuetele Esilivilo: Yesu wa kũlĩhĩle esilivilo lioku enda kupange woku kunda lekamba limue. Eci a tuma olondonge viaye vi soka 70 oco vi ende kupange woku kunda, wa vi tuma vivali vivali. (Luka 10:1) Ekamba tu talavaya lalio kupange woku kunda, li pondola oku eca ekuatiso li sukiliwa eci tu kuata ocitangi cimue, ale nda omunu tua sanga o linga epulilo limue okuti ka tu tẽla oku li tambulula. (Uku. 4:9, 10) Eye o pondola oku tu sapuila ovina a kũlĩha kuenda oku eca ocisimĩlo cimue ci tu kuatisa, oco tu kale ulongisi wa loñoloha. (Olosap. 27:17) Eye o pondolavo oku sapela letu ovina vi kuatisa poku tunda vonjo tua kundila.—Va Fil. 4:8.

Ndomo tu ci Linga:

Yevelela lutate eci manji wa tunda laye a kasi oku eca uvangi. (Tia. 1:19) Nda ocinimbu cimue Cembimbiliya ci kasi oku tangiwa, kuama lutate Vembimbiliya liove. Oku ci linga, ci ku ecelela oku eca ekuatiso liove.
Lavulula oco o limbuke nda o sukila oku vokiya olondaka viove vombangulo yaco. (Olosap. 25:11) Nda o kasi oku kuama elilongiso limue Liembimbiliya, citava okuti, etambululo liove li ka kuatisa ondonge. Pole, nda u kasi oku kundila konjo lanjo, manji wa tunda laye pamue o nõlapo okuti ove lika o vangula ndaño eye o kuete epuluvi lioku eca ocisimĩlo cimue. Nda eye wa fetika ndopo oku kunda, ale ka tẽla oku tambulula epulilo limue, o sanjukila ekuatiso eca kokuaye. Pole, nda u kasi kupange woku kundila konjo lanjo, oku nyula omanu wa kundili, ale oku longisa omanu Embimbiliya, ku ko tete kondaka poku li tenga vombangulo ale oku fetika ombangulo yikuavo.
Usapuila ulandu wove. Nda vepuluvi liaco o pondola oku eca onumbi yimue yi kuatisa manji o kasi oku talavaya laye kupange woku kunda, ku ka liwekepo oku eca ekuatiso liaco kokuaye. (Olosap. 3:27) Nda otembo yecelela, o pondola oku fetika ombangulo poku popia ndoco: “Nye o sima catiamẽla kupange tua linga?” “Anga hẽ o sukila ekuatiso limue?” Ale o popia ndoco: “Tala ndomo ndi fetika ombangulo.” Ivaluka okuti ndaño vakuene va sanjukila oku tambula ekuatiso vepuluvi liaco, pole, nda wa ci linga lonjila yimue ndu okuti o kasi oku va lungula, o tepulula ombili yavo.

Seteka Ndoco Vokuenda Kuosãi:

Noke yoku talavaya kupange woku kunda, sapela lamanji wa tunda laye ovina a popia levi a linga via lekisa okuti, eye ekamba limue li kuatisa.