Osãi Yenyenye yi ka Kala Osãi Yimue Yika Ivalukiwa!

1. Upange upi u ka lingiwa voluali luosi osimbu tu lavoka oku tẽlisiwa kuocita canyamo tunde eci Usoma wa Suku wa fetika oku viala?

¹ Oku tẽlisiwa kuocita canyamo tunde eci Usoma wa Suku wa fetika oku viala, ku kasi ocipepi. Omo liaco ca sunguluka oku sivaya Yehova poku li tumbika kupange umue u li kasi! Vokuenda kuosãi Yenyenye, vosi yetu tu ka litumbika kupange u ka lingiwa voluali luosi woku eca okokanda kokaliye losapi hati: “Pi tu Pondola Oku Sanga Atambululo Avelapo Atiamẽla Komuenyo?” Okokanda kaco ka ka vetiya omanu oku limbuka okuti Embimbiliya, li eca atambululo kuenda li lombolola ndomo onumbi yetu yo jw.org, yi pondola oku va kuatisa.

2. Tu pondola ndati oku kuatisa koku “sivaya Yehova” vokuenda kupange u ka lingiwa kosãi Yenyenye?

² Oku Eca Esivayo ku Yehova: Oco akundi va papatisiwa va kuatisiwe oku vokiya upange wavo woku kunda, kua lingiwa esokiyo li likasi lioku kala akundi vasokamo, vokuenda kuosãi Yenyenye. Vokuenda kuosãi yaco, vamanji va pondola oku kala akundi va sokamo poku eca ci soka 30 kolowola. Omo okuti osãi Yenyenye yi kuete ateke atãlo o Votãlo, Oviasapalo vitãlo, kuenda Ovialumingu vitãlo, akundi valua va talavaya kupange woku sanda eteku, ale vana va tanga kosikola vokuenda kuosemana, va pondola oku kala akundi va sokamo. Nda okuti o kuete omunu umue o longisa Embimbiliya ale omõla umue okuti o yongola oku kala ukundi, citava okuti o sapela la mitavaso yakulu vekongelo. Poku limbuka ndomo vamanji va ka talavaya letu vokuenda kuosãi yaco ci ka tu vetiya calua! Ndaño okuti akundi valua votembo yosi va ka kala kepuyuko kosãi Yenyeye omo lioku tẽlisa ale olowola viavo viunyamo, pole, va pondola oku linga esokiyo oco va kuatisevo kupange waco u li kasi. Yilo oyo otembo apata va sukila oku sapela ndomo va pondola oku “sivaya Yehova” omo liupange u ka lingiwa kosãi Yenyenye.—Esera 3:11; Olosap. 15:22.

3. Elavoko lipi tu kuete liatiamẽla kupange u likasi u ka lingiwa?

³ Ndaño tua siata ale oku linga upange waco pole, tu lavoka okuti lalimue eteke tu ka ivalako osãi yaco. Anga hẽ, tu pondola oku vokiya etendelo liolowola, wakundi, kuenda wakundi vasokamo kosãi yasulako liunyamo wupange wo 2014? Ocili okuti Yehova o ka sumũluisa alikolisilo vafendeli vaye omo lioku kuatisa kupange u ka lingiwa voluali luosi vokuenda kuosãi Yenyenye!—Mat. 24:14.