Kuatisa Olomeke Oku Lilongisa Eci Catiamẽla ku Yehova

1. Yesu wa lekisa ndati ohenda kolomeke?

¹ Eteke liolofa via Yesu lia kala ocipepi. Osimbu Yesu a kala oku enda volupale luo Yeriko, olomeke vivali via pinga kokuaye lolukandi viti: “A Ñala, ... tu linge ohenda”! Ndaño okuti Yesu wa kala oku sokolola ovitangi a laikele oku liyaka lavio, pole, wa talama, kuenje wa vi vilikiya, kuenda wa vi sakula. (Mat. 20:29-34) Tu pondola oku setukula ndati ohenda Yesu a lekisa kolomeke?

2. Tu pondola oku kundila ndati omunu umue omeke tu sanga volokololo?

² Kala Ukuakukuatisa: Nda wa sanga omunu umue omeke volokololo, u sapuila onduko yove, kuenje eca ekuatiso a sukila. Omo okuti olomeke pamue via siata oku lavisiwa, nda omunu umue o sapela lavio onjanja yatete, vi kuata ohele. Pole, ukamba kuenda onjongole o lekisa kokuavio, pamue yi va vetiya oku lianja love. Oku ivaluka okuti olomeke via litepa, ci ku kuatisa oku limbuka ndomo eca ekuatiso li sukiliwa. Noke lioku eca ekuatiso, sapuila komunu waco okuti, wa siata oku linga upange woku longisa Embimbiliya. Kuenje tangela omunu waco ovinimbu vimue Viembimbiliya ndeci: Osamo. 146:8, ale Isaya. 35:5, 6. Nda omunu waco o tẽla oku tanga elimi lio Braile, u pulisa nda o yongola oku tambula elivulu limue kelimi lio Braile, oco a lilongise ovina viatiamẽla Kembimbiliya. O pondolavo oku u kuatisa lovina via ngalavaliwa viopiwa vo jw.org. Nda o kombutador yove yecelela oku kapamo ovipama via ngalavaliwa okuti citava oku vi yevelela, omunu waco omeke o sanjuka calua nda ove wa eca kokuaye ovipama viopiwa vo jw.org, kumue lalivulu akuavo tu pondola oku tapa vo RTF (Rich Text Format).​—Tala pokakasia losapi hati: “Ceci tu Kuatisa Omunu Umue Omeke . . .”

3. Tu pondola oku sandiliya ndati olomeke vocikanjo cetu?

³ Sandiliya Olomeke: Eci tu enda kupange woku kundila konjo lanjo ka tua siatele oku sanga olomeke vialua. Momo, ka vi lianji poku sapela lomunu umue ka va kũlĩhĩle weya konjo yavo. Omo liaco, tu sukila oku likolisilako oku vi ‘sandiliya’ oco tu vi kundile. (Mat. 10:11) Anga hẽ kupange wove woku sanda eteku ale kosikola o tangela kuli omunu umue omeke? Sanda epuluvi lioku fetika oku sapela laye. Nda vocikanjo cove muli osikola yolomeke, eca alivulu etu kelimi lio Braile, oco a kapiwe vociseleko calivulu osikola yaco. Ove hẽ wa kũlĩha omunu umue okuti vepata liaye muli umue omeke? Vocikanjo cene mua lingiwa hẽ esokiyo lioku kuatisa omanu vana okuti olomeke, ale muli onjo yimue yoku kuatisa olomeke? Sapela la umue ukuepata liomunu omeke, la umue ukuakutambula akombe vonjo yaco, ale lusongui wonjo yaco poku popia ndoco: Olombangi Via Yehova vi yongola oku kuatisa olomeke, loku eca kokuavo alivulu kelimi lio Braile, ale ovipama vimue via ngalavaliwa. Lekisa kokuaye ohuminyo yi sangiwa Vembimbiliya yokuti, ndopo Suku o ka malako ocitangi coku kala omeke. U sapuilavo okuti o yongola oku lekisa ovideo yopiwa vo jw.org losapi hati “Sem Ela, eu me Sentiria Perdido.” Ovideo yaco yi lombolola ulandu wulume umue omeke okuti wa kuatisiwa Lembimbiliya kelimi lio Braile. Nda wa lombolola esunga lieci weyilila konjo yaco, cecelela oku lisanga lolomeke viaco oco o sapele lavio.

4. Ulandu wa manji Janet u tu longisa nye?

⁴ Manji umue ukãi o tukuiwa hati Janet wa nyula onjo yimue yoku kuatisa olomeke. Eye wa fetika oku sapela lufeko umue. Kuenje manji Janet wo sapuila hati: “Yesu wa sakula olomeke oco a lekise ovina a ka lingila omanu vana okuti olomeke.” Noke manji wa tangela ufeko waco elivulu Liesituluilo 21:3, 4, kuenje wa lombolola ndomo ohuminyo yaco yi ka tẽlisiwa lekuatiso Liusoma wa Suku. Noke ufeko waco wa yevelela lutate kuenje wa popia hati: “Lalimue eteke nda yevele omunu omeke o popia ovina viatiamẽla kondaka eyi. Omanu valua okuti halomekeko va tava kondaka yokuti, omanu vamue olomeke omo va linga ocina cimue, ale vakukululu yavo ovo va ci linga.” Noke, manji Janet wa tumisa kufeko waco elivulu Embimbiliya li Longisa Nye?, liopiwa vo Internet, kuenje cilo wa siata oku u longisa Embimbiliya olonjanja vivali vokuenda kuosemana.

5. Ndaño okuti ka tu pondola oku sakula olomeke ndeci Yesu a linga, onjongole tu lekisa kolomeke yi ka nena asumũlũho api?

⁵ Ndaño okuti ka tu tẽla oku sakula olomeke ndeci Yesu a linga, pole, tu pondola oku kuatisa omanu vosi va tekãvisiwa kovitima losuku yoluali lulo, oku kongelamo vana okuti olomeke tunde vutila, oco va kuate elomboloko liocili ci sangiwa Vondaka ya Suku. (2 Va Kor. 4:4) Yesu wa sakula alume vavali va kala olomeke ocipepi lolupale luo Yeriko, momo wa “va kuatela ohenda.” (Mat. 20:34) Nda tua lekisavo onjongole komanu vana okuti olomeke, tu sanjukila ocikele cetu coku kuatisa vamue oku lilongisa catiamẽla ku Yehova una o ka malako upeke.