NDOMO KU TALAVAYIWA LOLOMBANJAILE VIOVE
Atosi a Pongolola Ovimuenyo
1 ya MBALAVIPEMBE 2021
Utala Wondavululi 1 Wevambi yunyamo 1912 wa popia hati: “Citava okuti, valua vakuakutanga, va kũlĩha omanu olomeke.” “Ovo va pondola oku kuata ocali alivulu oku tanga. . . . Alivulu aco a pangiwa lolondimbukiso viecelela okuti, olomeke vi pondola oku tanga.” Utala waco Wondavululi wamisako ndoco: “Olomeke vialua vi sole calua esapulo liokuti, eteke li komõhisa liasumũlũho voluali, li kasi oku pitĩla.”
Eci olondaka evi via sonehiwa, olofeka vi vangula Ongelesi, via enda oku soneha o braile lolonjila via litepa. Pole, Olombangi Via Yehova, via enda ale oku sandeka ocili Cembimbiliya “lolondimbukiso via mioñoluiwa” vio braile. Handi tua siata oku ci linga! Cilo, tu kuete alivulu o braile kueci ci pitahãla 50 kalimi. A siata oku pangiwa ndati?
Ovimunga viatosi oku upisa liatete toke epandu okuti vi kakata, vi lomboloka olondimbukiso viololetala. Atosi a kakata, ongotiyiwa vulala umue wolonepa epandu.
Oku kopiyala loku soneha lomakina yo braile
Enanga liatete poku panga o braile, oku soneha ulandu waco londimbukiso yo braile. Michael Millen, o talavaya Kovopange Oku Soneha Ovipama ko Patterson, ko Nova Yorke wa lombolola okuti: “Kosimbu, poku soneha ovipama vio braile, tua enda oku talavaya lo software ya pangiwa lomanu vakuavo, pole, ka tua ponduile oku talavaya layo kalimi osi tua sukilile. Cilo, tua siata oku talavaya lo Watchtower Translation System (Ocipama Coku Pongolola co Torre de Vigia) cecelela oku soneha o braile kalimi alua oluali. Ndi tava okuti, kolonepa vikuavo, ka kuli ocipama cimue ca lisoka leci.”
Valivulu o braile, ka mu sangiwa lika ovipama viaño, pole, mulivo alomboluilo oviluvialuvia. Ndeci, kociluvialuvia coñoño celivulu Sanjukili Omuenyo Otembo ka yi Pui! ca lomboluiwa ndoco: “Ulume umue o kasi oku endela vonjila yimue ya ñualiwa lovikũla via posoka, lovihulu kuenda olomunda.” Manji Jamshed oñuatisi yekongelo haeye ukundi wotembo yosi okuti omeke, wa popia hati: “Alomboluilo oviluvialuvia viaco, a kuete esilivilo lialua kokuange.”
Noke yoku soneha ovicapa viaco, vi tumiwa kolofiliale vi soneha lolomakina vio braile. Ko filiale elivulu li pangiwa lopapelo ya kõla okuti ka yi tuika poku sonehamo lomakina yo braile kuenda ka yi nyõleha poku pitolola oku ci linga. Noke, vongotiya amẽla aco loku a tokeka lonjila ya sokiyiwa ciwa kuenje a tumiwa olosãi viosi kakongelo, ale “ndovina vi eciwa ocali kolomeke” nda olokoreio vi linga upange waco. Nda ci sukiliwa, olofiliale vi angiliya lonjanga alivulu aco, oco a tumiwe ku vamanji olomeke, ale ku vana va kuete ulema vovaso okuti, va kuata alivulu va sukila oku lilongisa lao kolohongele viekongelo.
Oku linga upange wosi owu, u sukila otembo yalua kuenda olombongo. Ocili okuti, oseketa yetu yoku panga alivulu ko Wallkill, volupale luo Nova Yorke, ya siata oku panga 50.000 Kambimbiliya votembo yimuamue okuti, oyo otembo yi tumãla poku soneha lika lomakina yo braile Ambimbiliya 2. Embimbiliya Lembimbiliya lio braile ka ya lelukile Liongelesi, li kuete 25 kolonepa kuenda ondando yovikuata vi sukiliwa oco ku pangiwe olonepa viaco, yi pitahãla 123 kolonjanja okuti, vina tua siata oku panga lavio Ambimbiliya akuavo ci sule.a Ondando yoloñoño yolonepa 25, yi soka 150 kolondolale (olombongo vio ko Estados Unidos.)!
Epongoluilo Lioluali Luokaliye lio braile ka ya lelukile Liongelesi, li kuete 25 kolonepa!
Vana va kuatisa koku panga alivulu o braile, va liyevite ndati catiamẽla kupange wavo? Nadia o talavaya ko Betele yo Afrika do Sul wa popia hati: “Vamanjetu olomeke ale vana va kuete ulema vovaso, omuenyo wavo ka wa lelukile, kuenje ndi ci tenda ndesumũlũho oku linga ocina cimue ci va kuatisa. Eci, ci situlula okuti, Yehova o va sole calua.”
Lilongisa Oku Tanga o Braile
Nye ci popiwa nda omunu umue omeke ka tẽla oku tanga o braile? Vanyamo amue a pita, tua sandeka ombrochura Lilongisa Oku Tanga o Braile okuti, onepa yimue muli o braile kuenda ovinimbu viopiwa olokopia. Lia pangiwila omunu o lete lomunu omeke oco va likuatise. Ombrochura yaco yi panga onepa kovimalẽho mua kongela ovina omunu omeke a pondola oku soneha lavio o braile. Ondonge yo braile yi talavaya lovimalẽho viaco, oco yi li sonehele oyo muẽle lomakina yo braile olondimbukiso vio braile. Upange waco woku soneha lomakina yo braile, u kuatisa ondonge oku patekela ondimbukiso londimbukiso yo braile, poku yi lamba.
“Si Tẽla Oku ‘Liwekapo’ Oku a Tanga”
Vamanji olomeke, ale vana va kuete ulema vovaso, va kuatisiwa ndati lalivulu aco? Ernst o kasi ko Haiti, wa enda oku enda kolohongele viekongelo, pole, ka kuatele elivulu lalimue lio braile. Omo liaco, wa sukilile oku kolela calua koku patekela ovipama a linga konepa yosikola kuenda oku eca atambululo vokuenda kuolonepa viapulilo kolonjeveleli. Eye wa popia hati: “Cilo, ndi tulika eka liange loku eca etambululo vepuluvi nda seya. Ndi liyevite okuti, ndi likuete omunga la vamanji. Vosi tu kasi oku tambula okulia kumuamue konepa yespiritu!”
Jan ukulu umue wekongelo ko Austria okuti o kuete ulema vovaso haeye ukuakuendisa elilongiso Liembimbiliya Liutala Wondavululi, wa popia hati: “Alivulu etu a leluka calua oku kuata elomboloko okuti, akuavo nda siata oku tanga ci sule. Ndeci, tu kuete atendelo kemẽla lemẽla, atosi a leluka oku a sanga kuenda alomboluilo a sukiliwa oviluvialuvia.”
Seon-ok, ukundi wotembo yosi wo ko Korea do Sul, omeke kuenda ocisitatũi. Kosimbu oco a kuate elomoloko kolohongele, wa sukilile olondimbukiso vioku papayata, pole, cilo o tẽla oku tanga Embimbiliya lio braile oco a lilongise. Eye wa popia hati: “Ka ca lelukile oku tanga alivulu akuavo o braile omo okuti, mua kamba atosi amue, ovolala a penga penga, ale opapelo yaco ya pelevela calua. Pole, Olombangi Via Yehova vi talavaya lopapelo yiwa yina yecelela okuti, atosi a limbukiwa ciwa, kuenje ci leluka kokuange oku tanga.” Eye wamisako ndoco: “Kosimbu, nda enda lika oku lilongisa alivulu a kunamẽla Vembimbiliya lekuatiso liomunu ukuavo. Pole, cilo ndi pondola oku lilongisa lika liange. Ndi sanjuka omo lioku pongiya olohongele vietu Viakristão vio vokati kosemana loku eca atambululo. Nda siata oku tanga alivulu etu osi o braile. Ove o pondola oku popia okuti, si tẽla oku ‘liwekapo’ oku a tanga.”
Ndeci ci kasi valivulu etu akuavo, valivulu o braile mua sonehiwavo olondaka viokuti: “Elivulu lilo ka li landisiwa. Olio lia sandekiwila oku kuatisa kupange woku longisa Embimbiliya u kasi oku lingiwa voluali luosi, lekuatiso liolombanjaile.” Tu ku pandula omo wa siata oku eca olombanjaile viaco pocakati colonjila via lekisiwa vonumbi donate.jw.org. Ocituwa cove coku eca, cecelela okuti, ku pangiwa okulia kuespiritu ku sandekiwila vosi, oku kongelamo olomeke kuenda vana va kuete ulema vovaso.
a Ovipama vimue vioku soneha o braile, vi teta onimbu olondaka oco vi tẽtelele opapelo. Ndeci, o braile ka ya lelukile calua, olondaka via kũlĩhĩwa ciwa letokeko liololetala, vi tetiwa onimbu. Omo liaco, elivulu limue lio braile ka ya lelukile, litito oku li sokisa lelivulu limuamue lio braile ya leluka.