Lilongisila Kakundi va Loñoloha

Etu tua kolela kukũlihiso wakundi va loñoloha va sangiwa vekongelo lietu. Vamue pokati kavo va kasi oku vumba Yehova vokuenda kuanyamo alua. Vakuavo va siata oku mioñolola cilo uloño wavo kupange woku kunda. Akundi vaco va siata oku limbuka ndomo Yesu a songuila ekongelo Liakristão koloneke vilo via sulako poku kunda loku longisa omanu oco va linge olondonge. (Mat. 28:19, 20) Omo lioku panga onepa kupange woku kunda, va siata oku tambula “unene wa piãla” eci va liyaka lovitangi ale lalambalalo. (2 Va Kor. 4:7) Tu pondola oku lilongisa ovina vialua lakundi vaco va loñoloha. Nda tu ecelela oku talavaya lavo, ovo va lekisa onjongole yoku longisa omanu ovina ovo va lilongisa. (Osa. 71:18) Omo liaco, tu sukila oku sanda epuluvi oco tu lilongise ovina vialua kokuavo. Tu ci linga ndati?

Kupange Woku Kunda. Oco tu loñolohe kupange woku kunda, tu sukila oku pindisiwa lakundi va loñoloha. Ocina ca velapo, oku luluvala ndomo akundi va loñoloha va siata oku tẽlisa upange wavo woku kunda. (Tanga Vutala Wondavululi 15, wosãi ya Kayovo wo 2015, ocipama losapi hati, “Amamako Oku Lekisa Ombili Kupange Woku Kunda,” vemẽhi liokasapi hati “Kuatisa Vana va Fetika Ndopo Oku Kunda.”) Wa siata oku kuatisiwa ndati poku talavaya lavo kupange woku kunda?

Ove hẽ o pondola oku laleka ukundi umue wa loñoloha oco o talavaye laye kupange woku kunda? Nda manji umue o vela, olonjanja vimue o pondola oku laleka omunu o longisa Embimbiliya oco u li longisili konjo ya manji o vela. Noke yoku lilongisa, pinga kokuaye oco a ku kuatise loku eca alungulo kokuove.

Sanda Otembo Yoku Kala Lavo: Likolisilako oku kũlĩha akundi va loñoha poku sanda otembo yoku kala lavo. Laleka vamue pokati kavo oco va kale kumue love kefendelo liepata loku linga apulilo amue kokuaye. Nda ukundi umue o vela, ove hẽ o pondola oku linga esokiyo lioku kala laye kefendelo liepata konjo yaye? Kũlĩhisa ndomo a fetika oku lilongisa ocili. Asumũlũho api eye a kuata? Evokiyo lipi a siata oku limbuka pocitumãlo a kasi? Nye a yevite poku vumba Yehova?

U yevelela kuenda kapako ovisimĩlo viaye. Ocili okuti vosi yetu, tu kuete ovolandu a litepa atiamẽla kupange woku kunda. (Va Rom. 12:6-8) Vamanji vamue va kuka ka va pondola oku linga vali calua kupange woku kunda ale oku linga ovina vikuavo. Omo liaco, vosi yetu tu pondola oku lilongisa kokuavo omo liotembo yalua va kasi yoku vumba Yehova.