Ocitumasuku Cimue Cosimbu Okuti ci Kuete Esilivilo Kokuove

1. Nye Yehova a linga noke lia Adama la Eva oku linga ekandu? (Efetikilo 3:15)

NOKE lia Adama la Eva oku linga ekandu, Yehova wa eca elavoko kovitumbulukila viavo pocakati cocitumasuku cimue ci kuete esilivilo lialua. Olondaka Yehova a popia vi sangiwa Kefetikilo 3:15.—Tanga.

2. Momo lie ocitumasuku eci ci kuetele esilivilo?

² Velivulu liatete Liembimbiliya mu sangiwa ocitumasuku cimue. Pole, alivulu akuavo Embimbiliya akuetevo elitokeko liocitumasuku caco. Ndeci oku longekiwa kuamela alua ku tokeka elivulu limue, olondaka vi sangiwa kelivulu Liefetikilo 3:15, vi kuete elitokeko lalivulu akuavo Embimbiliya, okuti Suku wa laikele oku tuma Onjovoli yimue ya ponduile oku kundula Eliapu kuenda oloñameb viaye viosi. Eci ci ka kala esumũlũho limue linene ku vosi vana va sole Yehova!

3. Nye tu konomuisa vocipma cilo?

³ Vocipama cilo, tu tambulula apulilo atiamẽla kocitumasuku Cefetikilo 3:15: Velie va tukuiwamo? Ndamupi ocitumasuku ca tẽlisiwa? Kuenda ndamupi tu kuatisiwa laco?

VELIE VA TUKUIWA VOCITUMASUKU?

4. Helie “onyõha” kuenda tua ci kũlĩha ndati?

⁴ Vana va tukuiwa kulandu u sangiwa Kefetikilo 3:14, 15, mua kongela “onyõha” yimue, ‘ocitumbulukila’ conyõha, “ukãi” umue kuenda ‘ocitumbulukila’ cukãi. Embimbiliya li tu kuatisa oku va limbuka.c Tu fetiki lonyõha. Onyõha yimue yocili, ka ya ponduile oku kuata elomboloko lieci Yehova a popia vocumbo Cendene. Omo liaco, esombiso lia Yehova lia kala oku lingiwa kociluvo cimue ca lunguka calua. Helie wa kala ociluvo caco? Elivulu Liesituluilo 12:9, lilombolola eci catiamẽla konyõha. Olio li popia okuti “Ocinyõha cinene” Satana Eliapu. Pole, velie ocitumbulukila conyõha?

5. Velie ocitumbulukila conyõha?

⁵ Eci Embimbiliya li popia catiamẽla kocitumbulukila, ci lomboloka vana va lekisa ovituwa vimuamue ndevi via isiavo wocindekaise. Ocitumbulukila conyõha, ovangelo vana va lekisavo esino kuenda omanu vana va lekisa ovituwa ndevi via Satana, okuti va sinĩla Yehova Suku kuenda va lambalala afendeli Vaye. Mua kongela angelo vana va siapo ocikele cavo kilu koloneke via Noha kuenda omanu olondingaĩvi va li soka la isiavo Eliapu.—Efet. 6:1, 2; Yoa. 8:44; 1 Yoa. 5:19; Yuda 6.

6. Momo lie Eva haiyeko ukãi wa tukuiwa?

⁶ Cilo, tu sukila oku kũlĩha elie ukãi. Ukãi waco ka ponduile oku kala Eva. Momo lie? Tu konomuisi esunga limue. Ocitumasuku ca popia okuti, ocitumbulukila cukãi ca ponduile oku “sasõla” utue wonyõha. Ndomo tua ci konomuisa, onyõha okuti ungelo ũvi Satana, ka ponduile oku sasũiwa locitumbulukila ca Eva cokuti omanu ka va li puile. Pole, ca sukilile ocina cikuavo.

7. Ndomo ca lekisiwa Kesituluilo 12:1, 2, 5, 10, elie ukãi wa tukuiwa Kefetikilo 3:15?

⁷ Elivulu lia sulako Liembimbiliya, li tu situluila eci catiamẽla kukãi wa tukuiwa Kefetikilo 3:15. (Tanga Esituluilo 12:1, 2, 5, 10.) Ukãi waco hawapaloko posi! Momo Osãi yi kasi vemẽhi liolomãhi viaye kuenda kutue waye kuli ekolowa li kuete 12 kolombungululu. Eye wa cita omõla umue ulume okuti, Usoma wa Suku. Usoma waco wokilu, omo liaco, ukãi wa ponduilevo oku kala wokilu. Eye o lomboloka onepa yocisoko ca Yehova kilu covangelo vakuekolelo.—Va Gal. 4:26.

8. Helie ocitumbulukila catete cukãi kuenda otembo yipi eye a situluiwa? (Efetikilo 22:15-18)

⁸ Ondaka ya Suku yi tu kuatisa oku limbuka ocitumbulukila catete cukãi. Oco ca laikele oku kala ocitumbulukila ca Avirahama. (Tanga Efetikilo 22:15-18.) Ocitumasuku ca popele okuti, Yesu wa laikele oku tunda kocitumulukila culume waco ukuekolelo. (Luka 3:23, 34) Pole, ocitumbulukila caco, ca laikele oku velapo kunene, momo ca ponduile oku sasõla Satana Eliapu okuti ka kalako vali. Kuenje eci Yesu a tẽlisa 30 kanyamo, eye wa wavekiwa lespiritu sandu. Eci Yesu a wavekiwa wa linga onepa yatete yocitumbulukila cukãi. (Va Gal. 3:16) Noke liolofa via Yesu kuenda epinduko, Suku “wo futisa lulamba, lesumbilo” kuenda wa eca kokuaye “unene wosi wo kilu lowu wo posi,” oku kongelamo unene woku ‘nyõla ovilinga Vieliapu.’—Va Hev. 2:7; Mat. 28:18; 1 Yoa. 3:8.

9-10. (a) Velie vali va panga onepa kocitumbulukila cukãi kuenda otembo yipi ovo va situluiwa? (b) Nye tu konomuisa vovina vi ka kuamamo?

⁹ Pole, kuli vakuavo va ponduile oku panga onepa kocitumbulukila eci. Upostolo Paulu wa situlula onepa yocitubulukila caco eci a sapuila Akristão va Yudea la Vakualofeka olombuvekua hati: “Nda wa tiamẽli ku Kristu, vucitumbulukila muẽle ca Avirahama kuenda vukapiñala ndomo ci likuata lohuminyo yimue.” (Va Gal. 3:28, 29) Eci Yehova a waveka umue lespiritu sandu, omunu waco o panga onepa kocitumbulukila cukãi. Vocitumbulukila caco, mua kongela Yesu kuenda 144.000 vana va ka viala laye. (Esit. 14:1) Vosi yavo va likolisilako oku sokolola loku lekisa ovilinga ndevi via Isiavo, Yehova Suku.

¹⁰ Omo okuti cilo tua limbuka vana va tukuiwa kelivulu Liefetikilo 3:15, tu kũlĩhĩsa ndomo Yehova kamue kamue a siata oku tẽlisa ocitumasuku eci kuenda ndomo tu kasi oku kuatisiwa laco.

NDAMUPI OCITUMASUKU CA SIATA OKU TẼLISIWA?

11. Ndamupi ocitumbulukila cukãi ca lumaniwa ‘kocisendemãhi’?

¹¹ Ndomo ca lekisa ocitumasuku kelivulu Liefetikilo 3:15, onyõha ya laikele oku lumana “kocisendemãhi” cocitumbulukila cukãi. Satana wa ci linga eci a vetiya va Yudea kuenda va Roma oku ponda Omõla a Suku. (Luka 23:13, 20-24) Eci umue a lemehiwa kocisendemãhi, ka tẽla vali oku enda ciwa vokatembo kamue, cimuamue haico okuti, vokatembo kamue Yesu ka tẽlele oku linga vali cimue eci a fa momo wa kala veyambo oloneke vitatu.—Mat. 16:21.

12. Utue wonyõha u ka sasũiwa ndati kuenda otembo yipi?

¹² Ocitumasuku celivulu Liefetikilo 3:15, ca lekisa okuti Yesu ka ponduile oku kala veyambo otembo yosi. Momo lie? Ndomo ca lekisa ocitumasuku caco, ocitumbulukila ca laikele oku sasõla utue wonyõha. Eci ca lombolokele okuti Yesu wa sukilile oku kaya kapute aye o kocisendemãhi. Kuenje eye wa ci linga! Keteke liatatu noke liolofa viaye, Yesu wa pinduiwa vetimba liespiritu lina ka lifi. Votembo ya sokiyiwa ya Suku, Yesu o ka sasõla Satana okuti ka ka kalako vali. (Va Hev. 2:14) Kristu la vana va ka viala laye palo posi, va ka kundula ovanyãli vosi va Suku okuti ocitumbulukila conyõha.—Esit. 17:14; 20:4, 10.d

TUA SIATA OKU KUATISIWA NDATI LOCITUMASUKU ECI?

13. Tua siata oku kuatisiwa ndati koku tẽlisiwa kuocitumasuku eci?

¹³ Nda ove ufendeli umue wa Suku, o kasi oku kuatisiwa koku tẽlisiwa kuocitumasuku eci. Yesu wa kala palo posi vetimba liositu. Kuenje eye wa setukula ovituwa via Isiaye lonjila ya lipua. (Yoa. 14:9) Poku lilongisa ovina viatiamẽla ku Yesu, tu kũlĩha kuenda tu sola Yehova Suku. Tu kuatisiwavo lalongiso a Yesu kuenda olonumbi viaye osimbu a songuila ekongelo Liakristão koloneke vilo. Eye wa siata oku tu longisa oku ambata omuenyo lonjila yimue yi tu kuatisa oku taviwa la Yehova. Vosi yetu tu pondola oku kuatisiwa lolofa via Yesu okuti oku lumaniwa kocisendemãhi caye. Ndamupi? Eci Yesu a pinduiwa, ca lekisa okuti Yehova wa tava osonde Yomõlaye ndocilumba ca lipua ‘ci tu yelisa kakandu etu osi.’—1 Yoa. 1:7.

14. Tua kũlĩha ndati okuti ocitumasuku Yehova a ecele vocumbo Cedene ka ca tẽlisiwile kotembo yaco? Ci lombolola.

¹⁴ Olondaka Yehova a tukula vocitumasuku eye a ecele vocumbo Cedene, via lekisa okuti oco ka ca ponduile oku tẽlisiwa kotembo yaco. Ca sukilile oku ambata otembo oco ku molẽhe ocitumbulukila cukãi wa likuminyiwa, osimbu Eliapu liongolola oloñame viaye kuenda ukuse, ale esuvu vi livokiya pokati kovimunga evi vivali. Tu kuatisiwa poku kũlĩha ocitumasuku eci, momo oco ci tu lungula okuti oluali lua vialiwa la Satana lua ponduile oku suvuka afendeli va Yehova. Noke, Yesu wa ecelevo elungulo limuamue kolondonge viaye. (Mar. 13:13; Yoa. 17:14) Etu tua siatavo oku mola oku tẽlisiwa kuonepa yimue yocitumasuku, ca piãla enene vokuenda kueci ci pitahãla 100 canyamo. Ndamupi?

15. Momo lie oluali lua suvukila ocitumbulukila cukãi, kuenda esunga lipi tu kuete lioku yuvula oku kuatela usumba Satana?

¹⁵ Noke lia Yesu oku tumbikiwa nda Mesiya o Soma kunyamo 1914, Satana wa tundisiwa kilu. Cilo, eye o kasi mulo vongongo oku talamẽla oku kunduiwa kuaye. (Esit. 12:9, 12) Pole, o kasi oku linga ovina vialua vĩvi. Satana o kasi lonyeño yalua kuenje omo lionyeño yaco, wa siata oku ñualilapo afendeli va Suku. (Esit. 12:13, 17) Omo liaco, eli olio esunga lieci oluali lua suvukila calua afendeli va Suku. Etu ka tu kuete esunga lioku kuatela usumba Satana kuenda oloñame viaye. Tu pondola oku kuata ekolelo limuamue ndeli liupostolo Paulu wa soneha hati: “Nda Suku o kasi letu, helie o tu katukila?” (Va Rom. 8:31) Tu pondola oku kuata ekolelo liocili ku Yehova momo, ndomo tua ci mola, onepa yalua yocitumasuku ci sangiwa kelivulu Liefetikilo 3:15, ya siata oku tẽlisiwa.

16-18. Ndamupi vamanji Curtis, Ursula, kuenda Jessica va kuatisiwa poku kuata elomboloko lielivulu Liefetikilo 3:15?

¹⁶ Ohuminyo yi sangiwa kelivulu Liefetikilo 3:15, yi pondola oku tu kuatisa oku liyaka lovitangi viosi tu li pita lavio komuenyo. Manji Curtis, o kasi oku talavaya ndomisionalia ko Guam, wa popia hati: “Olonjanja vimue, nda lipita lovitangi vialua vomuenyo wange okuti ceya oku ndi tĩlila oku amamako lekolelo ku Yehova. Pole, oku sokolola kocitumasuku celivulu Liefetikilo 3:15, ci ñuatisa oku pamisa ekolelo liange ku Isiange wokilu.” Manji Curtis, o lavoka eteke Yehova a ka malako ovitangi vietu viosi.

¹⁷ Manji umue ko Baviera o tukuiwa Ursula, wa popia hati, oku kuata elomboloko lielivulu Liefetikilo 3:15, co kuatisa oku kolela okuti Embimbiliya liatumiwa muẽle la Suku. Eye wa limbuka ndomo ovitumasuku vikuavo vi kuete elitokeko locitumasuku eci kuenje co komõhisa calua. Eye wa popiavo hati: “Nda kuata esanju lialua eci nda kũlĩha okuti Yehova lonjanga wa linga cimue oco omanu va kuate elavoko.”

¹⁸ Manji Jessica, wo ko Micronesia, wa popia hati: “Ame handi ndi ivaluka ndomo nda liyeva, eci nda limbuka onjanja yatete okuti nda sanga ocili! Ocitumasuku celivulu Liefetikilo 3:15, ca kala oku tẽlisiwa. Ca ñuatisa oku ivaluka okuti ekalo tu kuete cilo halioko omuenyo wocli. Ocitumasuku eci, ca ñuatisavo oku pamisa ekolelo liange liokuti, oku vumba Yehova ci pondola oku tu kuatisa oku kuata omuenyo wesanju cilo kuenda omuenyo wa velapo kovaso.”

19. Ekolelo lipi tu pondola oku kuata liokuti onepa yasulako yocitumasuku yi ka tẽlisiwa?

¹⁹ Ndomo tua siata oku ci mola, elivulu Liefetikilo 3:15 cilo lia siata oku tẽlisiwa. Ocitumbulukila cukãi kuenda ocitumbulukila conyõha ca siata oku limbukiwa. Yesu okuti eye onepa yatete yocitumbulukila cukãi, epute liocisendemãhi caye lia kaya, cilo wa linga Osoma yimue ukuonene ka yi fi. Oku nõliwa kuocitumbulukila ca vana va panga onepa yavali, ci kasi oku pitĩla kesulilo. Omo okuti onepa yatete yocitumasuku ya tẽlisiwa, tu kuetevo esunga lioku kolela okuti, onepa yasulako yoku sasõla utue wo nyõha, yi ka tẽlisiwavo. Afendeli va Suku va ka kuata esanju lialua eci Satana a ka kunduiwa! Amamako oku pandikisa toke eci otembo yaco yi pitĩla. Suku yetu, wa koleliwa. Pocakati cocitumbulukila cukãi, eye o ka nena asumũlũho alua ‘kolofeka viosi vio kilu lieve.’—Efet. 22:18.