Onduko ya Yehova yi Lomboloka Nye ku Yesu?

1-2. (a) Nye Yesu a linga vuteke wa sulako osimbu handi ka file? (b) Apulilo api tu konomuisa vocipama cilo?

KETEKE 14 ya Nisana Vokuãla kunyamo 33 K.K. koñolosi, Yesu wa kala ocipepi loku pakuiwa, oku sombisiwa, oku tipuiwa kuenda oku pondiwa. Eye kumue lolondonge viaye vakuekolelo, va kala oku malusula okulia ondalelo ya Ñala vohondo yokilu yonjo yimue. Noke liondalelo yaco yilikasi, Yesu wa eca alungulo amue a sulako, oco a pongiye loku vetiya ovapostolo vaye. Pole, osimbu handi ka va endele, Yesu wa talamapo kamue kuenda wa linga ohutililo yimue lutima wosi. Upostolo Yoano wa soneha ohutililo yaco kuenda tu pondola oku yi sanga ku Yoano ocipama 17.

² Ocina cipi Yesu a sakalalele laco eci a linga ohutililo yaco? Ohutililo yaco yi tu kuatisa ndati oku kuata elomboloko lieci ca velelepo vali ku Yesu eci a kala palo posi? Tu konomuisa atambululo kapulilo aco.

“NDA VA LONGISA ONDUKO YOVE”

3. Nye Yesu a popia catiamẽla konduko ya Yehova kuenda nye eye a yonguile oku popia? (Yoano 17:​6, 26)

³ Yesu vohutililo yaye wa popia hati: “Nda va longisa onduko yove.” Eci ci situlula ocina cimue ca kuatele vali esilivilo ku Yesu, momo eye wa ci popia olonjanja vivali. (Tanga Yoano 17:​6, 26.) Nye Yesu a yonguile oku popia? Anga hẽ eye wa longisa kolondonge viaye onduko ya Suku? Olondonge via Yesu via kala va Yudea kuenje ovo va kũlĩhĩle ale okuti, onduko ya Suku Yehova. Onduko yaco, yi molẽha Vovisonehua vio Heveru ci soka 7.000 kolonjanja. Pole, eci ka ci lomboloka okuti Yesu wa yonguile lika oku popia okuti onduko ya Suku Yehova. Ocili ceci okuti, eye wa longisa eci onduko yaco yi lomboloka. Yesu wa kuatisa olondonge viaye oku kũlĩha ciwa Yehova, oku kongelamo ocipango caye catiamẽla kongongo, komanu, ovina eye a linga ale, evi a laikele oku linga kuenda ovituwa viaye. Yesu eye lika wa ponduile oku longisa ciwa ovina viaco, momo eye wa kũlĩhĩle ciwa isiaye okuti omunu ukuavo ci sule.

4-5. (a) Tukula ocindekaise cimue ndomo onduko yimue yi pondola oku kuata esilivilo lialua kokuetu. (b) Momo lie onduko ya Yehova ya kuatela elomboloko lialua kolondonge via Yesu?

⁴ Sokolola okuti vekongelo liove muli ukulu umue wekongelo o tukuiwa Daviti kuenda eye ondotolo yimue ukuakupelala. Handi vali, ove wo kũlĩha ale vokuenda kuanyamo alua. Noke, eteke limue vocipikipiki ove o kuatiwa luvei umue u ku kokela oku lupukila kosipitali, kuna manji yaco a talavaya kuenje eye o popela omuenyo wove. Omo liaco, oku upisa opo, ove o fetika oku sola calua manji yaco kuenda eci o yeva onduko yaye ove ivaluka ovina a ku lingila. Eye amamako oku kala ukulu wekongelo una ove wa kũlĩha vokuenda kanyamo alua, haeye ndotolo wa popela omuenyo wove.

⁵ Cimuamue haico okuti, olondonge via Yesu via kũlĩhĩle ale onduko ya Yehova. Pole, omo liupange wa Yesu woku kunda, onduko yaco ya fetika oku kuata elomboloko lia velapo kokuavo. Momo lie? Momo Yesu wa situlula ciwa ekalo lia Isiaye kovina viosi a popia levi a linga. Kuenje eci olondonge via enda oku mola onjila ndomo Yesu a enda oku longisa kuenda a tata omanu, ovo va tẽla oku “kũlĩha” ciwa Yehova.—Yoa. 14:9; 17:3.

‘ONDUKO YOVE YINA OVE WA NYĨHA’

6. Nye Yesu a yonguile oku popia eci a vangula okuti onduko ya Yehova ya eciwa kokuaye? (Yoano 17:​11, 12)

⁶ Yesu vohutililo yaye, wa pingilako olondonge viaye hati: “Va lava omo lionduko yove yina ove wa nyĩha.” (Tanga Yoano 17:​11, 12.) Anga hẽ eci ci lomboloka okuti onduko ya Yesu kaliye ya laikele oku tukuiwa okuti, Yehova? Sio. Momo Yesu poku tukula onduko Yehova wa popia hati ‘onduko yove.’ Eci ceca uvangi wokuti, Yesu ka fetikile oku litukula okuti Yehova. Oco hẽ momo lie Yesu a popela okuti onduko ya Suku ya eciwile kokuaye? Catete, Yesu wa kala onumiwa ya Yehova haeye Kapitiya kaye. Eye weyilile vonduko ya Isiaye kuenda wa linga ovina vi komõhisa vonduko ya Yehova. (Yoa. 5:43; 10:25) Handi vali, onduko Yesu yi lomboloka okuti “Yehova epopelo.” Omo liaco, onduko Yehova yi kuete elitokeko londuko ya Yesu.

7. Tukula ocindekaise cimue ci lekisa esunga lieci Yesu a ponduile oku vangula vonduko ya Yehova.

⁷ Oco o kuate elomboloko liwa, sokolola kocindekaise eci: Onumiwa yimue yombiali, omunu umue o situlula ombiali kuenda yi vangula vonduko yaye. Omo liaco, olondaka vionumiwa vi kuete unene umuamue levi viombiali yaco. Cimuamue haico okuti, Yesu wa situlula Isiaye kuenda wa enda oku vangula vonduko Yaye.—Mat. 21:9; Luka 13:35.

8. Lonjila yipi onduko ya Yehova ya kala “mu” Yesu ndaño muẽle ceci keyile handi palo posi? (Etundilo 23:​20, 21)

⁸ Embimbiliya li tukula Yesu okuti “Ndaka,” momo Yehova wa talavaya laye oco a pitiye esapulo liaye lolonumbi kovangelo kuenda komanu. (Yoa. 1:​1-3) Citava okuti, Yesu eye wa kala ungelo Yehova a tuma, oco a kuatise va Isareli eci va kala vekalasoko. Eci Yehova a handeleka va Isareli oco va pokole kungelo waco, Yehova wa va sapuilavo esunga liaco hati: “Momo onduko yange yi kasi vokuaye.”a (Tanga Etundilo 23:​20, 21.) Yehova wa popia olondaka viaco omo okuti, Yesu eye kapitiya kaye kuenda omunu wa velapo, koku teyuila loku lekisa okuti onduko ya Isiaye yi kola.

“A TATE, MUISA ULAMBA ONDUKO YOVE”

9. Onduko ya Yehova ya kuata esilivilo lipi ku Yesu? Ci lombolola.

⁹ Ndomo tua ci konomuisa ale, onduko ya Yehova ya kala ocina ca velapo ku Yesu, ndaño ceci handi keyile palo posi. Eci Yesu a kala palo posi, cosi eye a linga ca lekisa okuti onduko ya Yehova ya velelepo kokuaye! Yesu kesulilo liupange waye woku kunda, wa pinga ku Yehova hati: “A tate, muisa ulamba onduko yove.” Vepuluvi liaco Isiaye wa tambulula londaka yolukandi ya kala ndocilemilo yiti: “Ame nda yi muisa ale ulamba kuenda ndi yi muisa vali ulamba.”—Yoa. 12:28.

10-11. (a) Yesu wa kemãlisa ndati onduko ya Yehova? (Talavo ociluvialuvia.) (b) Momo lie onduko ya Yehova yi sesamẽlela oku sumbiwa kuenda oku kemãlisiwa?

¹⁰ Yesu wa muisavo ulamba onduko ya Isiaye. Ndamupi? Onjila yimue Yesu a ci linga, poku vangula catiamẽla kovituwa vi komõhisa via Isiaye kuenda ovina vi komõhisa eye a siata oku linga. Pole, eci hacoko lika eye a sukilile oku linga. Yesu wa sukililevo oku eca uvangi wokuti, cosi Yehova a linga ca sunguluka kuenda Onduko yaye yi kola.b Yesu wa lekisa esilivilo liaco eci a longisa kolondonge viaye oku likutilila. Eye hati: “A Isietu o kasi kovailu, onduko yove yi sumbiwe.”—Mat. 6:9.

¹¹ Oco hẽ, momo lie onduko ya Yehova yi sesamẽlela oku sumbiwa kuenda oku kemãlisiwa? Momo Vocumbo Cedene Satana wa sepula onduko ya Yehova, loku popia ovohembi atiamẽla kokuaye. Satana wa popia okuti Yehova ohembi kuenda wa kala oku limbika ocina cimue ciwa ku Adama la Eva. (Efet. 3:​1-5) Satana wa lekisavo okuti onjila ya Yehova yoku linga ovina ka ya sungulukile. Omo liovohembi a Satana, omanu va pondola oku kuata ovisimĩlo ka via sungulukile viatiamẽla ku Yehova Suku. Noke, koloneke via Yovi, Satana wa lundila vana va vumba Yehova okuti, ovo ka va kaile oku ci linga lutima wosi. Eye wa lundilavo okuti, lomue omunu o kamamako oku vumba Yehova lutima wosi poku liyaka loloseteko. (Yovi 1:​9-11; 2:4) Kuenje ca sukilile otembo oco ku limbukiwe helie wa kala ohembi, nda Yehova ale Satana.

“MESELA OMUENYO WANGE”

12. Nye Yesu a nõlelepo oku linga omo liocisola a kuetele onduko ya Isiaye?

¹² Yesu omo lioku kuatela ocisola Yehova, wa linga cosi citava oco a kemãlise onduko ya Yehova. Toke muẽle eye wa nõlelepo oku fa oco a lekise okuti, Yehova o kola kuenda onjila yaye yoku linga ovina ya velapo.c Eli olio esunga lieci Yesu a popela hati: “Mesela omuenyo wange.” (Yoa. 10:​17, 18) Omanu vatete okuti va lipuile, Adama la Eva, va likala Yehova kuenje va nõlapo oku tiamẽla ku Satana. Pole, ca litepa la Yesu ceci okuti, eye wa nõlelepo oku iya vongongo loku situlula ocisola a kuetele Isiaye. Eye wa ci linga omo lioku pokola ku Yehova kolonepa viosi viomuenyo waye. (Va Hev. 4:15; 5:​7-10) Yesu wamamako oku pandikisa lekolelo vokuenda kuomuenyo waye wosi toke kolofa, kuti wekangiso. ( Va Hev. 12:2) Lonjila eyi, eye wa situlula ocisola a kuetele Yehova kuenda onduko Yaye.

13. Momo lie Yesu eye omunu wa velapo koku situlula okuti Satana ohembi? (Talavo ociluvialuvia.)

¹³ Cosi Yesu a linga ca situlula okuti Satana eye ohembi, Yehova sio! (Yoa. 8:44) Yesu wa kũlĩhĩle ciwa Yehova okuti omunu ukuavo ci sule. Omo liaco, nda alundi Satana a lingila Yehova a kaile ocili, Yesu nda wa ci kũlĩha. Eli olio esunga lieci eye amamelako oku pandikisa, oco a teyuile onduko ya Yehova. Ndaño ceci ca molẽhele ndu okuti Yehova wo yanduluka, Yesu wa nõlelepo oku fa okuti ka yanduluka Isiaye ukuacisola.—Mat. 27:46.d

“NDA MALUSULA UPANGE WA NUMA OKU LINGA”

14. Yehova wa sumũlũisa ndati Yesu omo lioku amamako lekolelo?

¹⁴ Vohutililo Yesu a linga vuteke osimbu handi ka file, wa popia hati: “Nda malusula upange wa numa oku linga.” Yesu wa kũlĩhĩle okuti nda wamamako lekolelo ku Yehova, eye wa laikele oku u sumũlũisa. (Yoa. 17:​4, 5) Yesu ka kuatelele atatahãi Isiaye. Yehova ka ecelelele okuti Yesu amamako veyambo. (Ovil. 2:​23, 24) Yehova wa pindula Yesu kuenda wo wĩha ocikele cimue ca velapo kilu. (Va Fil. 2:​8, 9) Kuenje vokuenda kuotembo, Yesu wa linga Osoma Yusoma wa Suku. Usoma waco u ka linga nye? Yesu o tu ĩha etambululo vonepa yavali yohutililo eye a longisa yokuti: “Usoma wove wiye. Ocipango cove [okuti ca Yehova] ci lingiwe palo posi, ndeci ci lingiwa kilu.”—Mat. 6:10.

15. Nye vali Yesu a ka linga?

¹⁵ Ndopo, Yesu o ka linga uyaki lovanyãli va Suku loku kundula olondingaĩvi ko Harmagedo. (Esit. 16:​14, 16; 19:​11-16) Noke Yesu o ka imba Satana “vekungu” muna eye ka ka linga vali cimue. Satana o ka kala ndocivimbi. (Esit. 20:​1-3) Yesu o ka nena vali ombembua palo posi kuenda o ka kuatisa omanu oku lipua vokuenda Kuviali Wohulukãi Yanyamo. Eye o ka pindulavo omanu va fa, loku lingisa okuti ongongo yosi yi kala Ocumbo Celau. Oku sulako, ocipango ca Yehova ci ka tẽlisiwa!—Esit. 21:​1-4.

16. Omuenyo u ka kala ndati kesulilo Liuviali Wohulukãi Yanyamo?

¹⁶ Omuenyo u ka kala ndati kesulilo Liuviali Wohulukãi Yanyamo? Ekandu kuenda ekambo lioku lipua, ka vi ka kalako vali. Omanu ka va ka sukila vali oku pinga ongecelo yakandu avo. Ovo ka va ka sukila vali ocisembi, ale mitakati kuenda ovitunda, oco va kale akamba va Yehova. Noke, “unyãli o sulako oku kunduiwa, kufa [kuna kua piñaliwa ku Adama.]” Ayambo a ka kala upolokoso kuenda vana va fa va ka pinduiwa. Omanu vosi palo posi va ka lipua!—1 Va Kor. 15:​25, 26.

17-18. (a)  Nye ci ka lipita kesulilo Liohulukãi Yanyamo Yuviali wa Kristu? (b)  Nye Yesu a ka linga kesulilo liuviali waye? (1 Va Korindo 15:​24, 28) (Talavo ociluvialuvia.)

¹⁷ Ku ka pitavo ocina cimue cilikasi kesulilo Liuviali Wohulukãi Yanyamo. Ocina caco nye? Lomue vali o ka tatãla okuti, Yehova o Suku yimue yi kola haeye ukuesunga. Momo lie? Vocumbo Cedene, Satana wa lundila Yehova okuti ka tẽla oku viala omanu locisola kuenda eye ohembi. Pole, tunde kotembo yaco, onduko ya Yehova ya kemãlisiwa ale olonjanja vialua la vana vo kemainya kuenda vo sumbila. Omo liaco, kesulilo Liohulukãi Yanyamo Yuviali wa Kristu ekalo lia Yehova li ka kemãlisiwa o tembo ka yi pui. Eye o ka lekisa okuti Isia umue wokilu ukuacisola.

¹⁸ Oku sulako, ku ka situluiwa okuti alundi osi Satana a lingila Yehova, uhembi. Nye Yesu a ka linga eci uviali waye u ka sulila? Anga hẽ eye o ka kuama ongangu ya Satana kuenda oku sinĩla Yehova? Sio! (Tanga 1 Va Korindo 15:​24, 28.) Yesu o ka tiula usoma ku Isiaye kuenda o ka pokola kuviali wa Yehova. Ca litepa la Satana Yesu o ka sanjukila oku eca ocikele caye ku Yehova, omo okuti eye u sole calua.

19. Onduko ya Yehova yi kuete esilivilo lipi ku Yesu?

¹⁹ Yehova wa kuata asunga alua oku eca onduko Yaye ku Yesu! Yesu wa siata oku kala onumiwa ya lipua ya Isiaye. Oco hẽ onduko ya Yehova yi lomboloka nye ku Yesu? Yi kuete esilivilo lialua okuti ovina vikuavo vi sule. Toke muẽle Yesu wa eca omuenyo waye omo lionduko yaco. Kesulilo Liuviali Wohulukãi Yanyamo, eye o ka eca ovina viosi ku Isiaye. Tu setukula ndati ongangu ya Yesu? Tu konomuisa etambululo liaco kocipama ci ka kuamamo.