Ceci Onduko ya Yehova yi Lomboloka Kokuetu

1-2. Tua kũlĩha ndati okuti onduko ya Yehova yi kuete esilivilo lialua ku Yesu?

ONDUKO ya Yehova yi kuete esilivilo lialua ku Yesu. Eye wa velapo koku teyuila onduko ya Yehova. Ndomo tua ci konomuisa vocipama ca pita, Yesu wa nõlelepo oku fa oco a situlule okuti Yehova o kola kuenda cosi Isiaye a linga ca lipua. (Mar. 14:36; Va Hev. 10:​7-9) Kuenje kesulilo Liuviali Wohulukãi Yanyamo, Yesu o ka eca ocikele caye cosi ku Yehova, momo eye o yongola okuti Yehova o tambula ulamba wosi. (1 Va Kor. 15:​26-28) Esilivilo Yesu a lekisile konduko ya Yehova, ca sitululavo ocisola kuenda ekakatelo lialua Yesu a kuetele Isiaye.

² Yesu weyile palo posi oco a vanguile vonduko ya Isiaye. (Yoa. 5:43; 12:13) Eye wa sapuila onduko ya Yehova kolondonge viaye. (Yoa. 17:​6, 26) Yesu wa lingavo ovikomo kuenda wa longisa onduko ya Isiaye. (Yoa. 10:25) Yesu poku vangula catiamẽla kolondonge viaye, wa pinga ku Yehova hati: “A Tate o kola, va lava omo lionduko yove.” (Yoa. 17:11) Eci ceca uvangi wokuti ku Yesu, onduko ya Yehova yi kuete esilivilo lialua okuti, ocina cikuavo ci sule. Omo liaco, talama loku sokolola ndoco: Omunu umue o pondola oku popia ndati okuti Ukristão nda eye ka kũlĩhĩle onduko ya Yehova kuenda ka yi tukula?

3. Nye tu konomuisa vocipama cilo?

³ Omo okuti Tuakristão vocili, tu setukula ongangu ya Yesu poku lekisa ocisola kuenda esumbilo konduko ya Yehova. (1 Pet. 2:21) Vocipama cilo, tu konomuisa esunga lieci omanu vana va kunda “olondaka viwa Viusoma” va kũlĩhĩwila omo lioku ambata onduko ya Yehova. (Mat. 24:14) Tu konomuisavo ndomo tu pondola oku lekisa okuti onduko ya Yehova yi kuete esilivilo lialua komunu lomunu pokati ketu.

“OMANU VAMBATA ONDUKO YAYE”

4. (a) Eci kua kambele otembo yitito oco Yesu a tiukile kilu, nye a sapuila kolondonge viaye? (b) Epulilo lipi tu konomuisa cilo?

⁴ Eci kua kambele otembo yitito oco Yesu a tiukile kilu, eye wa sapuila olondonge viaye hati: “Eci espiritu sandu liya kokuene vu ka tambula unene, vu ka linga olombangi viange vo Yerusalãi, vo Yudea yosi kuenda vo Samaria toke kasulilo o kilu lieve.” (Ovil. 1:8) Eci ci lomboloka okuti, olondonge via laikele oku kunda olondaka viwa kolonepa viosi, okuti, hako Isareliko lika. Vokuenda kuotembo omanu vo kolofeka viosi, va ponduile oku kuata epuluvi lioku kala olondonge via Yesu. (Mat. 28:​19, 20) Pole, Yesu wa popia hati: “Vu ka linga olombangi viange.” Anga hẽ olondonge via laikele oku kala lika olombangi via Yesu, ale via sukilile oku kũlĩha onduko ya Yehova? Ocipama 15 celivulu Liovilinga ci tu kuatisa oku sanga etambululo.

5. Ovapostolo kuenda akulu vo ko Yerusalãi, va lekisa ndati esilivilo lioku kũlĩha onduko ya Yehova? (Talavo ociluvialuvia.)

⁵ Kunyamo wa 49 K.K., ovapostolo kuenda akulu, va liongoluila ko Yerusalãi oco va konomuise eci catiamẽla ku va Yudea vana ka va seviwile evamba ovina va sukilile oku linga oco va kale Akristão. Kesulilo liohongele yaco, Tiago manji a Yesu wa popia hati: “[Petulu], wa tu sapuila ndomo Suku a ivaluka omanu vo kolofeka vikuavo kuenda pokati kavo eye wa fetika oku nõla omanu vambata onduko yaye.” Pole, Tiago wa kala oku tukula onduko yelie? Poku tukula olondaka viuprofeto Amosi, eye wamisako hati: “Oco okuti, omanu vana va supapo, va sandiliya Yehova lutima wosi kumue lomanu vo kolofeka viosi okuti, omanu vana va tukuiwa londuko yange, oco Yehova a popia.” (Ovil. 15:​14-18) Olondonge viaco viokaliye, ka via laikele oku lilongisa lika catiamẽla ku Yehova, pole, via ponduilevo oku ‘tukuiwa londuko yaye.’ Eci ci lomboloka okuti, ovo va ponduile oku longisa onduko ya Yehova ku vakuavo kuenda via laikelevo oku kũlĩhĩwa londuko yaco.

6-7. (a) Momo lie Yesu eyilila palo posi? (b) Esunga lipi likuavo lia kongelamo?

⁶ Onduko ya Yesu yi lomboloka okuti “Yehova Eye Upopeli.” Kuenje Yesu pocakati ca Yehova wa yovola vana va kuete ekolelo. Yesu weya palo posi oco a ece omuenyo waye ndocisembi komanu. (Mat. 20:28) Yesu poku feta ondando yocisembi wa ecelela okuti, vosi va kuata epuluvi lioku popeliwa kuenda oku kuata omuenyo ko pui.—Yoa. 3:16.

⁷ Pole, momo lie omanu va sukililile oku popeliwa? Momo liovina via lipita Vocumbo Cedene. Ndomo tua lilongisa vocipama ca pita, ohueli yatete Adama la Eva, ya sinĩla Yehova. Omo liaco, va pumba esumũlũho lioku kala komuenyo otembo ka yi pui. (Efet. 3:​6, 24) Pole, Yesu weya palo posi oco a linge ocina ca velapo vali okuti, oku yovola lika omanu ci sule. Satana wa lundila Yehova ovina ka via sungulukile. (Efet. 3:​4, 5) Kuenje omanu va sukilile oku kũlĩha okuti Yehova ka lingile lacimue cĩvi kuenda onduko yaye yi kola. Omo okuti Yesu wa kala onumiwa ya Yehova, wa tẽlisa ocipango ca Isiaye lonjila yimue ya lipua. Eli olio esunga lieci okuti, Yesu eye omunu wa velapo koku lekisa okuti onduko ya Yehova yi kola.

8. Olondonge viosi via Yesu via sukilile oku limbuka nye?

⁸ Vosi vana va yonguile oku kala olondonge via Yesu, Ci kaile va Yudea kuenda va kualofeka, va sukilile oku limbuka okuti Yehova Isia ya Yesu eye wa kala ono yepopelo liavo. (Yoa. 17:3) Handi vali ndeci ca lipita la Yesu, ovo va laikele oku tukuiwa londuko ya Yehova. Ovo va sukililevo oku limbuka esilivilo lioku lekisa okuti onduko yaco yi kola. Momo epopelo liavo liatambele kocina caco. (Ovil. 2:​21, 22) Omo liaco, olondonge viosi via Yesu vakuekolelo, va sukilile oku lilongisa catiamẽla ku Yehova kuenda ku Yesu. Eli olio esunga lieci Yesu a malusuila ohutililo yaye kelivulu lia Yoano 17 lolondaka viokuti: “Nda va longisa onduko yove kuenda ndi yi longisa vali, oco ocisola o ndi sole laco, ci kale vokuavo kuenda ame ñala vomunga lavo.”—Yoa. 17, 26.

“ENE VULOMBANGI VIANGE”

9. Tu lekisa ndati okuti onduko ya Yehova yi kola?

⁹ Ndomo tua ci konomuisa toke cilo, tua limbuka okuti olondonge viosi via Yesu vi sukila oku tenda onduko ya Yehova okuti yi kola. (Mat. 6:​9, 10) Onduko ya Yehova yi sukila oku kuata esilivilo lia velapo kokuetu. Oco hẽ nye tu sukila oku linga oco tu lekise okuti onduko ya Yehova yi kola loku situlula okuti ovina Satana a popia viatiamẽla ku Yehova viuhembi?

10. Esombiso lipi lia tukuiwa kocipama 42 toke 44 celivulu lia Isaya? (Isaya 43:9; 44:​7-9) (Talavo ociluvialuvia.)

¹⁰ Kelivulu lia Isaya ocipama 42 toke 44, tua lilongisa eci tu sukila oku linga oco tu lekise okuti onduko ya Yehova yi kola. Vocipama caco Yehova o laleka omanu oco va liongolole, ndu okuti va kasi kekanga limue kombonge. Eye o pinga komanu ka vo vumbi oco va ece uvangi nda olosuku viavo viocili ale sio. Yehova o pingavo kolombangi viavo oco vi iñile okuti vi lekisa ovovangi nda olosuku viavo vi kasiko muẽle. Pole, lomue o tẽla oku ci linga! —Tanga Isaya 43:9; 44:​7-9.

11. Nye Yehova a sapuila kafendeli vaye ndomo ci lekisiwa ku Isaya 43:​10-12?

¹¹ Tanga Isaya 43:​10-12. Yehova poku sapela lafendeli vaye wa popia hati: “Ene vulombangi viange, . . . kuenda ame Suku.” Noke eye o va pinga oco va tambulule epulilo li kuãimo liokuti: “Anga hẽ kuli Suku ukuavo okuti ameko lika?” (Isa. 44:8) Kuenje kokuetu esumũlũho linene oku tambulula epulilo eli. Pocakati colondaka vietu kuenda ovilinga, etu tu eca uvangi wokuti, Yehova eye lika Suku yocili. Onduko yaye ya velapo olonduko vikuavo. Onjila ndomo tu ambata omuenyo wetu ci sukila oku eca uvangi wokuti, tu sole Yehova kuenda tua kakatela kokuaye ndaño Satana o seteka oku tu tateka. Lonjila eyi, tu kuete epuluvi lioku lekisa okuti onduko ya Yehova yi kola.

12. Ocitumasuku ca Isaya 40: 3, 5 ca tẽlisiwa ndati?

¹² Eci tu lekisa okuti onduko ya Yehova yi kola, tu kasi oku setukula Yesu Kristu. Vocitumasuku cimue, Isaya wa popia hati umue wa laikele oku ‘Pongiya onjila ya Yehova!’ (Isa. 40:3) Ca laikele oku tẽlisiwa ndati? Yoano upapatisi wa pongiya onjila ya Yesu una weyilila vonduko ya Yehova, haeye wa vanguila vonduko ya Yehova. (Mat. 3:3; Mar. 1:​2-4; Luka 3:​3-6) Isaya wa popiavo hati: “Ulamba wa Yehova u ka situluiwa.” (Isa. 40:5) Ca lipita ndati? Eci Yesu eya palo posi, wa situlula Isiaye lonjila yimue ya lipua calua, ndu okuti Yehova eye weya palo posi.—Yoa 12:45.

13. Tu setukula ndati Yesu?

¹³ Ndeci ca linga Yesu, etu Tulombangi Via Yehova, tu teyuila onduko ya Yehova. Etu tuambata onduko yaye kuenda tu vangula la vosi catiamẽla kovina vi komõhisa eye a siata oku linga. Pole, oco tu kale olombangi viwa via Yehova, tu sukila oku amamako oku sapuila komanu ovina viosi Yesu a linga oco a lekise okuti onduko ya Yehova yi kola. (Ovil. 1:8) Yesu eye ombangi ya velapo ya Yehova yina ya litumbikile calua koku teyuila onduko ya Yehova kuenda etu tu kuãi ongangu yaye. (Esit. 1:5) Pole, nye vali tu sukila oku linga oco tu lekise okuti, onduko ya Yehova yi kuete esilivilo lialua kokuetu?

TU LEKISA NDATI OKUTI ONDUKO YA YEHOVA YI KUETE ESILIVILO LIALUA KOKUETU?

14. Ndomo ca tangiwa Kosamo 105:3 tu liyeva ndati catiamẽla konduko ya Yehova?

¹⁴ Etu tu sole calua onduko ya Yehova. (Tanga Osamo 105:3.) Yehova o sanjuka calua eci tu lipandela onduko yaye. (Yer. 9:​23, 24; 1 Va Kor. 1:31; 2 Va Kor. 10:17) Kokuetu esumũlũho linene oku eca esivayo konduko ya Yehova kuenda oku teyuila ekalo liaye. Lalimue eteke ka tu ka kuati osõi yoku sapuila ku vana tu talavayela kumosi, tu tangela kumosi, vana tu lisungue kuenda omanu vakuavo okuti, Tulombangi Via Yehova! Eliapu li yongola okuti etu tu liwekapo oku vangula eci catiamẽla konduko ya Yehova ku vakuetu. (Yer. 11:21; Esit. 12:17) Ocili okuti, Satana kumue lovaprofeto vaye vesanda, va yongola okuti omanu va ivalako onduko ya Yehova. (Yer. 23:​26, 27) Pole, omo liocisola tu kuetele onduko ya Yehova, etu tu amamako oku eca esivayo kokuaye “eteke liosi.”—Osa. 5:11; 89:16.

15. Oku vilikiya onduko ya Yehova ci lomboloka nye?

¹⁵ Etu tuamamako oku vilikiya onduko ya Yehova. (Yoe. 2:32; Va Rom. 10:​13, 14) Oku vilikiya onduko ya Yehova, mua kongela ovina vialua okuti oku yi kũlĩha lika kuenda oku yi tukula ci sule. Etu tua kũlĩha ndomo Yehova a tuwa, tuo kolela, tu sanda ekuatiso liaye kuenda olonumbi kokuaye. (Osa. 20:7; 99:6; 116:4; 145:18) Tua siatavo oku vangula catiamẽla konduko yaye, lovituwa viaye ku vakuetu, oku kuatisa omanu oku linga apongoloko komuenyo wavo oco va sanjuise Suku loku popeliwa.—Isa. 12:4; Ovil. 2:​21, 38.

16. Tu lekisa ndati okuti Satana ohembi?

¹⁶ Etu tua likapelako oku tala ohali omo lionduko ya Yehova. (Tia. 5:​10, 11) Eci tu liyaka lovitangi, pole, tu amamako lekolelo ku Yehova, tu lekisa okuti Satana ohembi. Koloneke via Yovi, Satana wa popele eci catiamẽla kuava va vumba Yehova hati: “Omunu o ka eca cosi a kuete oco a teyuile omuenyo waye.” (Yovi 2:4) Satana wa popiavo okuti omunu umue wa ponduile lika oku fendela Suku nda ekalo liaye li kasi ciwa, pole, nda o liyaka lovitangi o yanduluka Yehova. Yovi wa situlula okuti olondaka viaco viuhembi. Kuenje etu tu kuetevo esumũlũho lioku lekisa ku Satana okuti cosi eye a pondola oku tu linga, lalimue eteke tu ka yanduluka Yehova. Tu pondola oku kolela okuti, Yehova o kamamako oku tu tata kuenda oku tu lava omo lionduko yaye.—Yoa. 17:11.

17. Ndomo ca tangiwa 1 Petulu 2:​12, lonjila yipi yikuavo tu pondola oku eca ulamba ku Yehova?

¹⁷ Etu tua sumbila onduko ya Yehova. (Olosap. 30:9; Yer. 7:​8-11) Omo okuti tulonumiwa via Yehova kuenda tuambata onduko yaye, ovilinga vietu vi pondola oku eca ulamba konduko yaye, ale oku yi sepuisa. (Tanga 1 Petulu 2:12.) Omo liaco, tu yongola oku linga cosi citava, oco tu sivayi Yehova kovina tu popia levi tu linga. Lonjila eyi, ndaño ka tua lipuile tu pondola oku eca ulamba konduko ya Yehova.

18. Lonjila yipi yikuavo tu lekisa okuti onduko ya Yehova yi kuete esilivilo kokuetu? (Talavo etosi.)

¹⁸ Etu tu lisakalaisa vali calua londuko ya Yehova, okuti ovina omanu va sima catiamẽla kokuetu ci sule. (Osa. 138:2) Momo lie ci kuetele esilivilo? Momo ocisola tu kuetele onduko ya Yehova ci pondola oku vetiya omanu oku tu sepula.a Kũlĩhĩsa eci ca lipita la Yesu. Eye wa likapeleleko oku fa lonjila yimue yi kutisa osõi ndongangala, oco a kemalise onduko ya Yehova. Yesu “wa pembula osõi,” momo ka sakalalele lovina omanu vakuavo va ponduile oku sima catiamẽla kokuaye. (Va Hev. 12:​2-4) Ocimãho caye ca kala oku linga ocipango ca Yehova.—Mat. 26:39.

19. Ocisimĩlo cipi ove o kuete catiamẽla konduko ya Yehova?

¹⁹ Etu tu sole calua onduko ya Yehova kuenda tu ci tenda okuti esumũlũho linene oku tukuiwa okuti Tulombangi Via Yehova. Omo liaco, tua nõlapo oku popiwa lãvi kuenda oku sepuiwa lomanu vakuavo. Kokuetu onduko ya Yehova yi kuete esilivilo lialua okuti ovisimĩlo viomanu viatiamẽla kokuetu ci sule. Kuenje ndaño Satana o likolisilako oku tu tateka, etu tua nõlapo oku amamako oku eca ulamba konduko ya Yehova. Nda tua ci linga, tu lekisa okuti onduko ya Yehova oyo ya velapo kokuetu, ndeci Yesu a linga.