Ongongo yi Kasi Oku Vĩhisiwa—Nye Embimbiliya li Popia?

António Guterres usonehi wa velapo wolo Nações Unidas, vulandu wohongele yimue ya lingiwa Lolombiali yatiamẽla Kapongoloko Olotembo okuti ya lingiwa keteke 4 ya Kupupu yunyamo 2022, wa popia hati: “Omanu va kasi oku linga ovina vialua okuti, ndopo vi ka koka ocilunga cimue catiamẽla kofela. Alupale anene a ka takata vovava, ku ka kala owuya walua, andunde anene ovava, ocitenya, ovikũla kuenda ovinyama vialua vi ka taka. Eci hakuluvikiyako, ale oku ci piãlisapo. Uloño u lekisa okuti, eci oco ci ka pita omo lioku talavaya lãvi lolusu.”

“Olonoño via popia okuti vanyamo a kuãimo, oku nyõliwa kuapongoloko olotembo, ku ka pitĩla vovisenge vi laviwa violofeka okuti, [vo Estadus Unidus] muli eci ci soka 423 kovisenge viaco. Elivokiyo liowuya lia siata calua vovisenge viaco. Ulala wovitangi viaco u molẽha ndu okuti, ocitumasuku cesulilo lioluali lulo, ndeci: Oku timĩhiwa kuovisenge, andunde, oku yenguluka kuocikokoto, oku livokiya kuovava okalunga kuenda owuya walua.”—“Flooding Chaos in Yellowstone, a Sign of Crises to Come (Andunde Anene ko Yellowstone, Ondimbukiso Yovitangi vi Laika Oku Iya ),” The New York Times, 15 Yevambi yunyamo 2022.

Anga hẽ ovitangi vioku vĩhisiwa kuofela vi pondola oku tetuluiwa? Helie o pondola oku vi tetulula? Tala eci Embimbiliya li popia.

Embimbiliya lia popia okuti kua laikele oku kala ovitangi vioku vĩhisiwa kuofela

Embimbiliya li popia okuti Suku o ka “kundula vana va vĩhisa ilu lieve.” (Esituluilo 11:18) Ocinimbu eci Cembimbiliya ci tu longisa ovina vitatu:

1. 1. Omanu va siata oku linga ovina vialua vi vĩhisa ongongo.

2. 2. Oku vĩhisiwa kuoluali ka ku ka lingiwa otembo yosi.

3. 3. Suku eye o ka tetulula ovitangi vioku vĩhisiwa kuongongo okuti, omanu havoko.

Ekalo lio kovaso yoloneke liongongo li kolapo

Embimbiliya li popia okuti, “ongongo yamamako otembo ka yi pui.” (Ukundi 1:4) Otembo yosi mu ka tunga omanu.

• “Vakuesunga va ka piñala ilu lieve, kuenda va ka kalamo otembo ka yi pui.”—Olosamo 37:29.

Ovitangi viosi viongongo vi ka tetuluiwa.

• “Ekalasoko kuenda ofeka ya kukuta vi ka yolela, kuenje etapi lio vekalasoko li ka sanjuka kuenda li ka yukisiwa lolonelẽho.”—Isaya 35:1.