Momo Lie Olombangi Via Yehova ka vi Pangela Onepa Kopulitika?
Olombangi Via Yehova ka vi pangi onepa kopulitika omo lialongiso avo a kunamẽla kueci Embimbiliya li longisa. Etu, ka tu nõli omunu la umue kocela, ale kocitundo cimue, ka tu liyakela ovikele viopulitika kuenda ka tu lingi lacimue coku pongolola ovisimĩlo violombiali. Tu tava okuti, Embimbiliya li tu ĩha asunga awa lieci ka tu pangela onepa kopulitika.
Tu kuãi ongangu ya Yesu una wa likala oku tava ocikele cimue copulitika. (Yoano 6:15) Eye wa longisa okuti olondonge viaye ka vi “pangi onepa koluali” kuenda wa popia okuti, ka via ponduile oku litenga kovina viopulitika.—Yoano 17:14, 16; 18:36; Marko 12:13-17.
Tua kakatela Kusoma wa Suku una Yesu a tukula poku popia hati: “Olondaka evi viwa Viusoma vi ka kundilua koluali luosi.” (Mateo 24:14) Omo okuti tulomunga Viusoma wa Suku, tu sukila oku sapula oku iya kuawo. Eli olio esunga lieci ka tu pangela onepa kovina viopulitika violofeka viosi, oku kongelamo vofeka tu kasi.—2 Va Korindo 5:20; Va Efeso 6:20.
Poku amamako oku yuvula oku panga onepa kopulitika, tu pondola oku sapela catiamẽla kolondaka viwa Viusoma wa Suku lomanu vosi, ndaño va tiamẽla kovitundo via litepa. Tu lekisa kolondaka kuenda kovilinga okuti, tua kolela okuti Usoma wa Suku owo u ka malako ovitangi viosi voluali.—Olosamo 56:11.
Omo okuti pokati ketu ka tu kuete olonepele viopulitika, tu li kuetele omunga voluali luosi. (Va Kolosai 3:14; 1 Petulu 2:17) Handi vali, atavo a siata oku litenga vopulitika, a koka olonepele pokati koloñame viavo.—1 Va Korindo 1:10.
Esumbilo kolombiali. Ndaño okuti ka tu litengi vopulitika, tua sumbila olombiali viofeka tu kasi. Eci ci likuata leci Embimbiliya li handeleka hati: “Omanu vosi va pokole kolombiali.” (Va Roma 13:1) Tu pokola kovihandeleko, tu feta elisimu kuenda tu pokola kolonjila vi nõliwa lolombiali vina vi kuatisa olonungi viavio. Ka tu pangi onepa koku kokela ohele ombiali, pole, tu kuãi onumbi Yembimbiliya yoku likutililako “olosoma kuenda vosi vana va kasi kolomangu via velapo,” ca piãla enene eci ovo va sukila oku nõla onjila yimue yi pondola oku tateka elianjo koku fendela. —1 Timoteo 2:1, 2, etosi.
Tua sumbilavo elianjo lia vakuetu lioku nõla liatiamẽla kovina viopulitika. Ndeci, ka tu tateka ocela ndaño omanu vana va yongola oku ka nõla kocela.
Anga hẽ onjila tua nõlapo yoku yuvula oku litenga kopulitika yokaliye? Sio. Ovapostolo kuenda Akristão vo kocita catete, va nõlelevo onjila yaco catiamẽla kolombiali. Elivulu losapi Beyond Good Intentions (Ca Pitahãla Ovisimĩlo Viwa) lia lekisa ndoco: “Akristão vatete ndaño va tavele okuti va kuete ekisika lioku sumbila olombiali, ovo va kuatele elomboloko liokuti ka va ponduile oku litenga kovina viopulitika.” Cimuamue haico ca lekisiwa velivulu On the Road to Civilization (Vetapalo Lioku Lekisa Esumbilo) poku popia hati: “Akristão vatete ka va endele oku tava ovikele viopulitika.”
Anga hẽ oku yuvula kuetu oku litenga vopulitika ku koka ohele kofeka yosi? Sio. Tulonungi vimue vi sole ombembua kuenda olombiali ka vi sukila oku tu kuatela ohele. Tala eci ci lekisa ulandu umue wunyamo 2001, wa pangiwa lo Academia Nacional de Ciências da Ucrânia. Catiamẽla koku yuvula kuetu oku litenga vopulitika owo wa lekisa ndoco: “Koloneke vilo omanu vamue, citava okuti ka va sola onjila ya nõliwapo Lolombangi Via Yehova. Eli olio limue pokati kasunga a velapo via lundiliwa kosimbu lovihandeleko vio nazista kuenda vio komunismu.” Ndaño ceci via kala vemẽhi liuviali wo Suvietika, Olombangi Via Yehova via “amamako oku kala omanu va sumbila ovihandeleko. Loku kala vakuacili, oku litumbika kovopange, ovio via talavaya kovapia anene, kolonjo vioku panga ovina kuenda lalimue eteke va kapele kohele ovihandeleko vio komunismu.” Cimuamue haico koloneke vilo okuti, alongiso kuenda ovilinga Violombangi Via Yehova, ka vi “kapi kohele oku kolapo, lekalo Liuviali umue,” ndomo ulandu waco wa malusula.