Nye ci Lomboloka Epapatiso?

Etambululo Liembimbiliya

Omunu oco a papatisiwe o sukila oku yuvikiwa etimba liosi vovava.a Embimbiliya li tukula apapatiso alua. (Ovilinga 2:41) Limue pokati ka-o, epapatiso lia Yesu, eci a papatisiwa Volui Yordão. (Mateo 3:13, 16) Noke lianyamo amue, ulume umue u Etiopia wa papatisiwa pocitumãlo cimue “pa kala ovava,” ocipepi letapalo a kala oku pita.—Ovilinga 8:36-40.

Yesu wa longisa okuti olondonge viaye viosi via sukilile oku papatisiwa. (Mateo 28:19, 20) Upostolo Petulu wa ci lombolola ciwa.—1 Petulu 3:21.

Vocipama cilo

• Epapatiso li lomboloka nye?

• Nye Embimbiliya li popia catiamẽla kepapatiso lioloñaña?

• Oku papatisiwa vonduko Yatate, Lamõla kuenda yespiritu sandu ci lomboloka nye?

• Anga hẽ ekandu oku papatisiwa onjanja yavali?

• Apapatiso akuavo a tukuiwa Vembimbiliya

• Ovisimĩlo ka via sungulukile via tiamẽla kepapatiso

Epapatiso li lomboloka nye?

Epapatiso ocina cimue omunu a linga oco a lekise ku vakuavo okuti, wa likekembela kuenda o likuminya oku linga ocipango ca Suku ndaño lovitangi. Mua kongela oku pokola ku Suku kuenda ku Yesu kovina viosi o linga komuenyo wove. Vana va yongola oku kala otembo ka yi pui, va sukila oku papatisiwa.

Oku yuvika etimba vovava, ci lomboloka epongoloko omunu umue a linga komuenyo waye. Momo lie? Momo Embimbiliya li sokisa epapatiso ndoku kendiwa. (Va Roma 6:4; Va Kolosai 2:12) Eci omunu a yuvikiwa vovava, o lekisa okuti wa siapo ekalo liomuenyo waye wosimbu. Eci omunu a tunda vovava, o lekisa okuti wa fetika omuenyo wokaliye, poku litumbika ku Suku loku linga ocipango Caye.

Nye Embimbiliya li popia catiamẽla kepapatiso lioloñaña?

Embimbiliya ka li longisa okuti oloñaña vi sukila oku papatisiwa.

Ocili okuti Embimbiliya li popia okuti kuli ovina vimue omunu a sukila oku linga oco a papatisiwe. Ndeci, eye o sukila oku kuata elomboloko lialongiso a pita pokati Ondaka ya Suku kuenda oku kapako alongiso aco komuenyo waye. Eye o sukilavo oku likekembela akandu aye loku linga ohutililo yoku tumbika omuenyo waye ku Suku. (Ovilinga 2:38, 41; 8:12) Oloñaña ka vi tẽla oku linga ovina viaco.

Oku papatisiwa vonduko Yatate, Lamõla kuenda yespiritu sandu ci lomboloka nye?

Yesu wa popia okuti olondonge viaye via sukilile ‘oku papatisa . . . vonduko Yatate, Lamõla, kuenda yespiritu sandu, loku longisa oku pokola kovina viosi a vahandeleka.’ (Mateo 28:19, 20) Ondaka “vonduko,” yi lomboloka okuti omunu o kasi oku papatisiwa wa limbuka unene kuenda ocikele ca Tate, leci Comõla. Handi vali, eye o sukilavo oku limbuka ndomo Suku a talavaya lespiritu sandu liaye. Ocindekaise cikuavo coku tukula ondaka yaco, ceci upostolo Petulu a sapuila ulume wa citiwa ocilema. “Vonduko ya Yesu Kristu u Nasara, enda!” (Ovilinga 3:6) Petulu wa yonguile oku lekisa okuti, wa limbuka unene wa Kristu kuenda ocikomo caco ca lingiwa omo liekuatiso liaye.

• Ondaka “Isia,” yi tiamisiwila ku Yehovab Suku. Eye wa velapo kunene momo eye Ululiki, Ono yomuenyo kuenda Suku Ukuonene Wosi.—Efetikilo 17:1; Esituluilo 4:11.

• Ondaka “Omõla,” yi tiamisiwila ku Yesu Kristu, wa tu ĩha omuenyo waye. (Va Roma 6:23) Etu tu popeliwa lika nda tua kuata elomboloko kuenda oku tava kocikele ca velapo Yesu a kuete vocipango ca Suku catiamẽla komanu.—Yoano 14:6; 20:31; Ovilinga 4:8-12.

• Ondaka “Espiritu sandu,” ongusu yapama ya Suku, ale unene waye woku linga ovina.c Suku wa talavaya lespiritu sandu oco a lulike omuenyo kuenda ovina viosi vi kasi voluali, poku pitiya esapulo liaye komanu loku eca unene kokuavo oco va linge ocipango caye. (Efetikilo 1:2; Yovi 33:4; Va Roma 15:18, 19) Suku wa talavayavo lespiritu sandu oco a lekise kasonehi Vembimbiliya eci va sukilile oku soneha.—2 Petulu 1:21.

Anga hẽ ekandu oku papatisiwa onjanja yavali?

Ca siata calua omunu oku nõla ketavo a yongola oku tiamẽla. Pole, nda eye wa papatisiwile ale ketavo a kala? Anga hẽ ekandu nda eye o papatisiwa onjanja yikuavo? Vamue va tambulula hati oco, omo lioku sokolola kukanda ku Va Efeso 4:5, ku popia ndoco: “Kuli Ñala umosi, ekolelo limosi, epapatiso limosi.” Pole, ocisonehua eci ka ci lekisa okuti omunu ka pondola oku papatisiwa onjanja yavali. Momo lie?

Ulandu. Ulandu ku Va Efeso 4:5 u lekisa okuti upostolo Paulu wa kala oku vangula catiamẽla kesilivilo Liakristão vocili oku likuata omunga ketavo kuenda kekolelo liavo. (Va Efeso 4:5, 1-3, 16) Omunga yaco ya ponduile oku amamako nda ovo va kuamele Ñala umuamue, Yesu Kristu. Nda va kuatele ekolelo limuamue ale elomboloko lieci Embimbiliya lilongisa kuenda oku kuama eci olio li popia catiamẽla kepapatiso.

Upostolo Paulu wa vetiya vana vapapatisiwile ale oco va papatisiwe onjanja yavali. Va sukilile oku papatisiwa onjanja yavali, momo ka va kuatele elomboloko lialongiso Akristão.—Ovilinga 19:1-5.

Esunga lia velapo lioku papatisiwa. Epapatiso li taviwa lika la Suku nda lia kunamela kukũlĩhĩso wa suapo wocili Cembimbiliya. (1 Timoteo 2:3, 4) Nda omunu umue wa papatisiwa omo lialongiso amue ka a likuata leci Embimbiliya li popia, epapatiso liaco ka litaviwa la Suku. (Yoano 4:23, 24) Pamue omunu o sima okuti, o kasi oku linga eci ciwa. Pole, eye ka lingile eci ci likuata “lukũlĩhĩso wa suapo.” (Va Roma 10:2) Oco omunu a taviwe la Suku, o sukila oku lilongisa ocili ci sangiwa Vembimbiliya, oku kapako eci eye a lilongisa, oku tumbika omuenyo waye ku Suku kuenda oku papatisiwa onjanja yavali. Lonjila ndeyi, hekanduko nda omunu o papatisiwa onjanja yavali. Ocili okuti, eci oco ocina ca sunguluka omunu a sukila oku linga.

Apapatiso akuavo a tukuiwa Vembimbiliya

Embimbiliya li tukula apapatiso amue a kuata elomboloko lia litepa lepapatiso liolondonge via Kristu lioku yuvikiwa vovava. Tala amue pokati ka-o.

Epapatiso lia lingiwa la Yoano Upapatisi.d Va Yudea kuenda omanu vakuavo va likongelele kokuavo, va papatisiwa la Yoano oco va lekisa okuti va likekembela akandu avo omo lioku lueya ocihandeleko Suku a ecele ku va Isareli pocakati ca Mose. Apapatiso Yoano a lingaile a yi kuila onjila omanu oco va limbuke loku tava Mesiya okuti, Yesu u Nasara.—Luka 1:13-17; 3:2, 3; Ovilinga 19:4.

Epapatiso lia Yesu. Yesu eci a papatisiwa la Yoano Upapatisi, ca kuata elomboloko lia litepa lapapatiso akuavo. Yesu wa kala ulume umue wa lipua kuenda ka kuatele ekandu. (1 Petulu 2:21, 22) Omo liaco, vepapatiso liaye ka mua kongelele oku likekembela ale oku linga ‘epingilo ku Suku liowanji wutima wa yela.’ (1 Petulu 3:21) Pole, eci Yesu a papatisiwa, wa lekisa okuti wa lieca ku Suku oco a linge ocipango caye nda Mesiya wa li kuminyiwa, ale Kristu. Mua kongelele oku eca omuenyo waye oco a tu yovole.—Va Heveru 10:7-10.

Oku papatisiwa lespiritu sandu. Ci kaile Yoano Upapatisi kuenda Yesu Kristu, va kala oku vangula catiamẽla koku papatisiwa lespiritu sandu. (Mateo 3:11; Luka 3:16; Ovilinga 1:1-5) Epapatiso liaco lia litepa lepapatiso li lingiwa vonduko yespiritu sandu. (Mateo 28:19) Ndamupi?

Vamue pokati kolondonge via Yesu ovo lika va papatisiwa lespiritu sandu. Ovo va wavekiwa lespiritu liaco, momo va nõliwa oco va ka viale kumue la Kristu kilu ndolosoma kuenda ndovitunda.e (1 Petulu 1:3, 4; Esituluilo 5:9, 10) Ovo va ka viala olohuluwa violondonge via Yesu, vi ka kala otembo ka yi pui Vocumbo Celau palo posi.—Mateo 5:5; Luka 23:43.

Oku papatisiwa vonduko ya Kristu Yesu kuenda volofa viaye. Vana va papatisiwa lespiritu sandu, va ‘papatisiwilavo vu Kristu Yesu.’ (Va Roma 6:3) Omo liaco, epapatiso liaco li tiamisiwila kolondonge via Yesu via wavekiwa lespiritu, vi ka viala laye kilu. Eci va papatisiwa vonduko ya Yesu, ovo va panga onepa kekongelo Liakristão olombuavekua. Yesu eye utue wekongelo liaco kuenda ovo, ovo etimba liaco.—1 Va Korindo 12:12, 13, 27; Va Kolosai 1:18.

Akristão olombuavekua va “papatisiwilavo voku fa [kua Yesu.]” (Va Roma 6:3, 4) Ndeci Yesu a linga, ovo va likolisilako calua oco va tiamisile omuenyo wavo koku linga ocipango ca Suku. Ovo va kũlĩhavo okuti ka va kala otembo ka yi pui palo posi. Epapatiso liaco liocindekaise li sulila eci ovo va fa kuenda va pinduiwa oco va ka kaile kilu ndoviluvo viespiritu.—Va Roma 6:5; 1 Va Korindo 15:42-44.

Oku papatisiwa londalu. Onjanja yimue Yoano Upapatisi wa popia hati: “Eye [Yesu] o ko papatisi lespiritu sandu kuenda londalu. Ocipekulo caye ci kasi peka liaye kuenda o ka yelisa ciwa ocimbandi caye kuenje o kongoluila otiliku yaye vosila, pole, ovinene o ka vi timĩha londalu yina okuti ka yimiwa.” (Mateo 3:11, 12) Wa limbuka he oku litepa ku kasi pokati kepapatiso liondalu kuenda oku papatisiwa lespiritu sandu? Nye Yoano a yonguile oku popia locindekaise eci?

Otiliku yi lomboloka vana okuti, va yevelela kuenda va pokola ku Yesu. Omo liaco, va pondola oku papatisiwa lespiritu sandu. Ovinene, vi lomboloka vana okuti ka va yevelela Yesu. Omo liaco, va ka papatisiwa londalu ale va ka nyõliwa otembo ka yi pui.—Mateo 3:7-12; Luka 3:16, 17.