Oku Eca Ekuatiso Kunyamo 2023—“Tua Limbuka Ndomo Yehova a Lekisa Ocisola Caye Kokuetu”

Embimbiliya lia popela ale okuti “ofeka yi ka katukila ofeka” kuenda ku ka kala ovilemawe vokuenda ‘kuesulilo lioluali.’ (Mateo 24:3, 7) Tua mola oku tẽlisiwa kuocitumasuku colondaka viaco vokuenda kunyamo wupange 2023.a Pole, ndaño lovoyaki kuenda ovilemawe vi kasi oku pita kueci ci soka 100 kolofeka, olombangi Via Yehova via siata oku limbuka ocisola ca Yehova. Ndamupi?

Vokuenda kunyamo wupange 2023, vamanjetu va pita lovilunga vi pitahãla 200, oku kongelamo vina via kokiwa lomanu. Vocosi olombala violofeka vina Olombangi Via Yehova via siata oku talavaya lavio, via pesela eci ci pitahãla ekũi kolohuluwa violondolaleb vio piwa kolombanjaile viukupange u lingiwa voluali luosi oco vi kuatise kolonepa vina kua pita ovilunga. Olombanjaile viaco vina va manji va siata oku eca lutima wosi oco vi kuatise kolonepa kuna kua pita ovilunga. Limbuka ndomo kua talavayiwa lolombanjaile wa eca, oco vi kuatise omanu va pita lovilunga oku kongelamo vamanji.

“Kuli Muẽle Ocisola Cosili”

Olonepa vimue viofeka yo Nigeria via nyõliwa landunde ovava. Omo liaco, andunde a pita vofeka kosãi ya Mbalavipembe wo 2022, o-o a velapo vokuenda kuanyamo ekũi. Ci pitahãla (1.670.432) kovapia a nyõliwa kuenda ci pitahãla olohuluwa vivali viomanu, va siapo olonjo viavo. Ofiliale yo ko Nigeria lonjanga yalua, ya nõla Oloseketa Vioku Eca Kuatiso ku Vana va Pita Locilunga oco yi kuatise vamanji alume lakãi oku amamako lekolelo lia pama.

Ovitangi Vamanjetu Alume Lakãi va Liyaka Lavio

• Ci soka 7.505 kakundi va ilukila kovitumãlo vikuavo

• Ci soka 860 kolonjo via nyõliwa

• Ci soka 90 Kolonjango Viusoma kuenda onjango yimosi Yohongele Yimbo via nyõliwa landunde

Ndomo ku Talavayiwa Lolombanjaile Via Eciwa

Ci pitahãla 250.000 kolondolale via kuatisa vamanji va pita lovilunga, oku kongelamo ovina viokulia ndeci:

• Oluoso, ocipoke kuenda omasa

• Ovikuata vimue ndeci, akulusião kuenda olomoskitero

• Oku semũlũla ale oku tunga olonjo via nyõliwa

Vamanji va kuatisa ndati vakuavo oku limbuka okuti olombanjaile va talavaya lavio lolondunge? Onjila yimue oku kũlĩhĩsa lutate onjo lonjo nda ya sukilile oku semũlũiwa. Nda va limbuka okuti kuli onjo yimue ya sukilile oku semũlũiwa yosi, va ci linga poku kuama olonumbi vi lekisa ndomo olonjo vio pocitumãlo caco via tungiwavo.

Vamanjetu va tambula ekuatiso liaco, va pandula calua. Manji umue ukãi wa popia hati: “Andunde a nyõla ovimuenyo vietu momo ovapia etu osi a nyõliwa kuenda ka tu kuete olonjo. Tua kavuluisiwa eci vamanji veya keteke liaco kua pita ocilunga, oco va tu kuatise loku tu ĩha ovina tua sukilile. Tua kavuluisiwa calua eci tua tambula okulia kua tumiwa lofiliale. Tua sanjuka calua poku mola oku tẽlisiwa kuolondaka vi sangiwa kelivulu lia Yoano 13:34, 35 komuenyo wetu. . . . Ocili okuti kuli muẽle ocisola cocili. Ame kumue lepata liange liosi, tu eca olopandu vialua ku vamanji omo lioku tu ĩha ovina tu sukila.”

Posongo, omanu va limbuka upange wetu woku eca ekuatiso. Usongui umue wo vimbo lio ko Sabagreia, Bayelsa State wa popia hati: “Voluali luosi muli ovisoko ale olonembele vialua, pole, Olombangi Via Yehova ovio lika via tẽla oku linga ovina viaco. . . . Ocisoko [Cene] oco lika ca velapo voluali.”

“Tua Limbuka Ocisola ca Yehova”

Vokuenda kunyamo 2023, kosãi ya Kayovo, etendelo liondalu lieci yi pitahãla 400, ya nyõla onepa yalua yofeka yo Chile. Ci pitahãla 1.062.553 kovapia kuenda ovina vimue via velapo kofeka yo Chile via nyõliwa. Ci panda 8.000 komanu va tumiwa kovitumãlo vikuavo. Noke yocilemawe caco, vamanji ko filiale va linga esokiyo kuenda va likolisilako oku tuma ekuatiso.

Ovitangi Vamanjetu Alume Lakãi va Liyaka Lavio

• Ci soka 222 kakundi va tumiwa kovitumãlo vikuavo

• Ci soka 20 kolonjo via nyõliwa

Ndomo ku Talavayiwa Lolombanjaile Via Eciwa

Ci pitahãla 200.000 kolondalale via kuatisa vamanji va pita lovilunga oku kongelamo:

• Okulia kuenda ovava

• Opetololiu, ovina vioku yelisa kuenda ovihemba

• Oku tunga olonjo via nyõliwa

Epata limue lia sumuile calua poku mola okuti, ovina viavo viosi va kuata via nyõliwa oku kongelamo onjo yavo kuenda olomĩlu. Eci ca koka okuti epata lia pumba upange. Koloneke viatete, epata liaco lia sumuile calua poku mola oku nyõliwa kuocitumãlo pana pa kala onjo yavo yatete. Pole, eci va limbuka okuti onjo yavo ya kala oku tungiwa vali, esumuo liavo lia fetika oku tepuluka. Poku mola ocisola vamanji va lieca olumue va lekisa, ca va kuatisa calua. Epata liaco lia sanjukile calua kuenje va vetiyiwa oku likongela ku vamanji vaco loku kuatisa oku tunga onjo yamanji ukuavo okuti ya nyõliwavo locilunga caco.

Valua pokati ka vamanji va komõha calua omo liupange waco. Manji ukuavo wa popia hati: “Esokiyo lia Yehova lioku eca Ekuatiso Omo Liovilunga, li komõhisa calua. Eci pa pita eteke limosi noke liocilunga caco, ovo va endele kocitumãlo caco loku eca ovina via sukiliwile. Ci komõhisa calua oku tanga ovolandu a tiamẽla koku eca ekuatiso kovitumãlo vikuavo violuali ku kasi oku pita ovilunga. Pole, ca litepa calua eci ocitangi caco ci pita love. Ove wa kapako calua esokiyo liaco; ndomo vamanji va siata oku setukula ovituwa viwa via Yehova; ndomo ovo va lekisa esakalalo nda tu kuete ovina tu sukila konepa yetimba kuenda konepa yespiritu. “Tua mola ocisola ca Yehova.”

Osimbu oluali lulo lu panda kesesulio, tu amamako oku liyaka lovilunga. (Luka 21:10, 11) Omo liaco, pocakati cekongelo Liakristão, tua siatavo oku mola okuti Soma yetu ukuacisola, Yesu Kristu o kasi letu, “oloneke viosi, toke kesulilo lioluali.” (Mateo 28:20) Olombanjaile viove wa siata oku eca locisola vioku kuatisa kupange u lingiwa voluali luosi levi vi eciwa vo donate.jw.org, levi vieciwa volonepa via litepa, oku kongelamo otembo kuenda ongusu yove, vi lekisa okuti o kasi oku kuatisa Kusoma kumue Losoma yaluo. Tu pandula calua omo liocituwa cove coku eca.