Oku Eca Ekuatiso Kunyamo 2022—Etu tu Lekisa Ocisola Cocili

Embimbiliya lia popele okuti koloneke vietu, ku ka pita ovoyaki, ovilemawe, afengi kuenda ovina “vikuavo vi komõhisa.” (Luka 21:10, 11) Vokuenda kunyamo upange 2022, tua mõla oku tẽlisiwa kuocitumasuku eci.a Ndeci, olohuluwa vialua viomanu ovina viavo via nyõleha omo liuyaki u kasi oku pita ko Ukrania. Olonepa vialua violuali, handi via kala oku liyaka lefengi lio KOVID-19. Handi vali, omanu valua ovina viavo via nyõliwa lovilemawe, ndeci, ko Haiti kuenda lahunguhungu ofeka ko America Sentral, ko lo Filipina kuenda kombuelo yo Afrika. Olombangi Via Yehova, via kuatisa ndati vana va pita lovilunga viaco?

Vokuenda kunyamo wupange 2022, ocisoko cetu ca eca ekuatiso kueci ci soka 200 kovitumãlo kua pita ovilunga! Poku eca ekuatiso liaco, ocisoko ca pesela eci ci pitahãla 12 kolohuluwa violodolale.b Tala ndomo va talavaya lolombanjaile oco va kuatise vamanji kovitumãlo vivali kua pita ovilunga.

Ovilemawe ko Haiti

keteke 14 Yenyenye 2021, ocilemawe cimue ci kuete ongusu ya 7.2 ca nyõla onepa yombuelo yo Haiti. Ci sumuĩsa ceci okuti, Olombangi vitatu via Yehova via fa okuti, vamanji akãi vavali kuenda umosi ulume. Vana va puluka, va liyaka levalo lialua ketimba lia kokiwa locilemawe caco. Manji umue o tukuiwa Stephane wa popia hati: “Volupale mua fa omanu valua okuti, vokuenda kuolosãi vivali olosemana viosi kua kala olonambi.” Manji ukuavo o tukuiwa Éliézer, wa popia hati: “Olombangi vialua via Yehova ka via kuatele vali olonjo, uwalo, olosapato kuenda ovina vikuavo vi sukiliwa. Vokuenda kuolosãi, valua va kala lusumba omo lioku lisenga senga kuongongo.”

Ocisoko cetu ca yayulako oku eca ekuatiso. O Betele ko Haiti, ya tuma eci ci pitahãla 53 kolotonelada viokulia, olombalaka, ololona, akulusião kuenda ovikuata vi kuatisa oku kapa ongusu volotelefone. Handi vali, vokuenda kunyamo wupange 2022, ca sukila oku tunga ale oku semũlũla eci ci pitãla 100 kolonjo. Oco ku eciwe ekuatiso, tua pesela eci ci pitãhala ohuluwa yimosi yolondolale.

Vamanjetu alume lakãi va ci panduila calua. Lorette hati: “Ocilemawe ca nyõla onjo yetu kuenda omĩlu yetu. Ka tua kuatele lacimue coku lia. Pole ocisoko ca Yehova, ca tu kuatisa. Ca tu ĩha ovina viosi tua sukilile.” Manji Micheline wa popia hati: “Ocilemawe ca nyõla onjo muna nda kala lomãla vange. Sia kũlĩhĩle eci ndinga. Nda likutilila ku Yehova loku pinga ekuatiso. Kuenda eye wa tambulula pocakati cocisoko caye. Cilo, tu kuete onjo ya tungiwa ciwa omu tu kasi. Nda nõlapo oku linga cosi citava, oco ndi lekise olopandu viange ku Yehova.”

Upange woku eca ekuatiso tua linga, wa limbukiwa lolombiali vio pocitumãlo. Usongui wo lupale luo L’Asile wa popia hati: “Njongola oku vu panduli omo liekuatiso wa eci lonjanga. Vu sesamẽla epandiyo, omo liesumbilo lialua wa siati oku lekisa kolombiali. Nda sanjuka calua poku mõla okuti, ene ka vu sakalala lolombongo. Pole, o njongole yene oku kuatisa omanu. Ovina viosi vu linga vu vetiyiwa locisola.”

Ehunguhungu Liofela Lia Tukuiwa Ana Lia Nyõla Onepa yo Malawi Kuenda yo Mosambique

Keteke 24 ya Susu 2022, Ofela Yalua ya Tukuiwa hati Ana ya nyõla onepa yimue yo Mosambique, noke ya lokila kutakelo wo Malawi loku nyõla onepa yimue yofeka. Ocilemawe caco ca koka ombela kuenda ofela yalua lolupesi lumue lupitahãla 100 kolokilometulu vowola. Ca teyavo oviti violusu, ayau kuenda ca koka andunde alua.

Ofela yaco, ya nyõla ovina vi eci ci pitahãla 30.000 kolohukãi Violombangi Via Yehova ko Malawi kuenda ko Mosambique. Charles, manji umue wa panga onepa kupange woku eca ekuatiso, wa popia hati: “Eci nda mõla ohali ya vamanji kuenda ovina via nyõleha, ca ndi sumuisa calua kuenda sia kũlĩhĩle eci ndinga.” Ci sumuisa vali enene ceci okuti, ovikũla via vamanji kuenda okulia va kuatele, cosi ca nyõleha. Valua olonjo viavo via teka. Manji umue, ukãi waye kuenda omãla vavali vafeko va fa, eci owato woku popela omanu wa tinguka.

Ofela yaco ya kalẽle calua. Kowola 1:00 komẽle, volupale luo Nchalo, ko Malawi, epata lia manji Sengeredo lia yeva ocileñi ci lingisa usumba cendunde liovava. Olondui vivali vieyukile calua! Manji Sengeredo lepata liaye, va nõlapo oku tunda vonjo yavo. Ya kala onjila yiwa va nõlapo momo, ka pa pitile otembo yalua onjo ya kupuka omo liendunde. Ovina viosi va kuatele via nyõleha kuenda vi ambatiwa lovava. Epata lia nõlapo oku enda Konjango Yusoma, ya kala ocinãla ci soka 30 kakukutu lonjo yavo. Pole, onjanja eyi, papita olowola vivali oco va pitĩle. Ovo va pitĩla tupu va yula kuenda va kava pole, va kolelepo.

O Betele yo ko Malawi kuenda yo ko Mosambique, haico via fetika oku linga eliangiliyo lioku eca ekuatiso. Va pinga ku vamanji va nyula akongelo kuenda kakulu vekongelo, oco va kũlĩhĩse ovina vamanji va sukila, loku va ĩha ekuatiso konepa yespiritu. Kua sokiyiwa ovimunga vialua vioku eca ekuatiso oco vi songuile upange waco. Tu pandula calua ovimunga viaco, momo vamanji va tambula lonjanga okulia kuenda ovina vikuavo va sukilile. Kua pesiwa eci ci soka 33.000 yolondolale koku eca ekuatiso kuenda 300.000 yolondolale koku semũlũla kuenda koku tumbulula olonjo.

Ovimunga viaco via talavaya ciwa lolombongo kuenda ca kuatisa calua omo lioku livokiya kuondando yovina. Ndeci, kolosãi epanduvali viatete vioku eca ekuatiso, ondando yosema ko Malawi, ya livokiya eci ci soka 70 kolopusendu. Ondando yopetololio ya li vokiyavo. Oco vamanji va tetelẽle olombongo, ovo va landa okulia kuenda ovina vioku tunga pocitumãlo, vatendelo alua. Kuenje poku landa va va tepululamo kuenda ka va sukilile vali oku fetela oviendelo.

Ekuatiso liaco lia vetiya calua ovitima viafendeli va Yehova. Felisberto, manji umue ko Mosambique, wa popia hati: “Ame lalimue eteke nda muĩle ocisoko cimue ci lekisa ohenda ndeci. Oco ci tu ĩha ovina vioku tunga, oviendelo, ekuatiso koku tunga, okulia kuenda olonumbi vi sukiliwa. Ekuatiso liaco li komõhisa, lia situlula olondaka Yesu a tukula kelivulu lia Yoano 13:34, 35.” Ester, manji umue ocimbumba ko Malawi okuti, onjo yaye ya nyõliwa wa popia ndoco: “Ame nda sakalalele calua momo sia kuatele olombongo vioku tungisa onjo yokaliye. Omo liaco, eci vamanji veya kuenda va tunga onjo yange, nda liyaka ndu okuti ñasi voluali luokaliye.”

Osimbu tu panda ocipepi loluali luokaliye lua likuminyiwa, ovilunga vi kamamako oku livokiya. (Mateo 24:7, 8) Omo liaco, tu pandula calua omo liolombanjaile viove viohenda kuenda tua kolela okuti afendeli va Yehova, va ka tambula ekuatiso li sukiliwa. Olonjila via litepa vioku eca olombanjaile via tukuiwa vonumbi donate.jw.org. Tu pandula calua omo liocali cove.