Otuakãlu Tualivulu “Tuoku Eca Uvangi Kolofeka Viosi”

Vokuenda kuekũi lianyamo a pita, ocina cimue ca siata oku vetika omanu kupange woku wetu woku kunda, otuakãlu tualivulu. Voluali luosi otuakãlu tualivulu tua siata oku limbukiwa lonjanja. Otuo ka tuvetiya lika onjongole yomanu, pole, ca leluka oku talavaya latuo. Ove citava okuti o tava kolondaka via manji umue ukãi ko Polonia wa popia hati: “Otuakãlu tualivulu tua pangiwa lonjila yimue yaleluka, pole, tua posoka calua. Otuo tua leluka oku talavaya latuo.”

Ove wa lipulile ale ndomo otuakãlu tualivulu tua pangiwa?

Upange Umue wa Fina

Kunyamo 2001, lekuatiso Liosungu Yolombangi Via Yehova, vamanjetu ko Fransa va fetika oku kuama olonjila via litepa vioku eca uvangi volokololo oku kongelamo oku talavaya lotuakãlu tualivulu. Ovo va seteka olonjila vialua. Ndeci, ovo va seteka akolombele kuenda olomesa vioku kapa alivulu. Oku sulako, o Betele yo ko Fransa ya nõlapo onjila yimue kuenje oyo akundi va kuama vokuenda kuanyamo alua.

Vamanji ko Fransa va kuata esanju lialua, omo lionima yavo yeyilila poku eca uvangi volokololo. Omo liaco, kunyamo 2011, Osungu Yolombangi Via Yehova, ya tava okuti onjila yaco yoku eca uvangi, yi kuamiwa volupale luo Nova Yorke, ko Estados Unidos, poku talavaya lotuakãlu tualivulu kuenda olomesa. Akundi votembo yosi va nõliwile vesokiyo liaco va limbuka okuti, otuakãlu tualivulu tua kuatisa calua kuenda tu kuatisa oku tunda kocitumãlo cimue loku enda kocitumãla cikuavo. Akundi votembo yosi va ecavo ocisimĩlo viwa ndomo ku mioñoluiwa otuakãlu tuaeco tualivulu. Otuakãlu tuatete tua kala tuavaya tua lemẽle calua, okuti ka ca lelukile oku londa latuo loku loka olondondelo. Ovo va sanda oku tu mioñoloho ciwa oco tulele, pole ka tupitĩla petosi liokuti tukupuka lofela. Otuakãlu tuokaliye tua kapiwavo alola anene kuenda a leñela, okuti a kuatisa oku pita vatapalo ana okuti muli ovikulungu. Handi vali, kua vokiyiwavo ongaveta yimue yecelela oku selekamo alivulu.

Eliangiliyo liaco lia kuata onima yiwa! Omo liaco, kunyamo 2012, Osungu Yolombangi Via Yehova, ya tava okuti onjila yaco yoku eca uvangi lotuakãlu tualivulu yi kuamiwa koluali luosi. Noke, va vangula lomunu umue wa panga otuakãlu tualivulu tualela pole tua kõla.

Vokuenda kuanyamo amue, kua lingiwa apongoloko amue kotuakãlu tualivulu. Ndeci, kuyamo 2015, okapa yimue yombela yomika yokuti, alivulu amõleha ya vokiyiwako. Manji Dina o kasi kofeka yo Geórgia, wa sola calua onepa yaco ya vokiyiwako. Eye wa popia hati, “okakãlu kalivulu ka kuete ‘okapaka yayo muẽle’ yoku teyuila alivulu kombela.” Kunyamo 2017, ko tuakãlu tuaco kua vokiyiwa evaya ku lamelela ocicapa okuti via eciwa kalimi amue. Manji Tomasz o kasi kofeka yo Polônia wa popia hati: “Ca sukila upange walua woku linga apongoloko kotuakãlu tualivulu. Avaya aco ku lamelela ocicapa a posoka calua. Kunyamo 2019, apongoloko alua a lingiwa kotuakãlu tualivulu ndomo tua pangiwa, oco tu kaile otembo yalua.

Oku Talavaya Lotuakãlu Tualivulu Koku Eca Uvangi

Otuakãlu tualivulu tu pangiwa lomunu umue kuenda tu tumiwa koluali luosi. Koloneke vilo okakãlu kamosi kalivulu ka landiwa leci ci soka 43 kolondolale, pole ka mua kongele olombongo vi pesiwa poku tu tumisa kolofeka vikuavo. Toke cilo kua pesiwa ale ci soka 16 kolohuluwa violondolale koku landa otuakãlu tualivulu kuenda ci pitahãla 420.000 kolohulukãi violondolale via tumiwa kakongelo osi voluali.

Oco ku talavayiwe ciwa lolombanjaile, ku pingiwa otuakãlu tualua tualivulu. Handi vali, citava okuti akongelo cilo a pondola oku pinga ovina via nyõleha kuenda oku semulula otuakãlu tua nyõleha okuti ka va sukila oku pinga otuakãlu tuokaliye.

Oku Talavaya Lotuakãlu Tualivulu Poku Eca Uvangi

Akundi voluali luosi va sanjukila oku talavaya lotuakãlu tualivulu. Manji Martina, wo ko Gana, wa popia hati: “Volonjila viosi viovocikanjo cetu, etu tu amẽla komanu vosi. Eci ndi sole koku eca uvangi lotuakãlu tualivulu ceci okuti, omanu vamẽla kokuetu. Ndaño muẽle vana va pita onjila, va pondola oku tambula uvangi.”

Kofeka yimue vo Afrika, ulume umue wa amela kokakãlu kalivulu kuenje wopa alivulu kelimi liaye. Eye noke liosemana yimosi, wa tiuka kuenda wa popia hati: “Ame nda tanga alivulu osi. Ulandu waco u kuete esilivilo lialua. Ndi ka sapuilako epata liange kimbo.” Epata liaye lia kala ocinãla ci soka 500 kolokilometulu lapa a kasi. Noke liolosãi vivali eye wa tiuka loku popia hati: “Vimbo liange omanu va tanga alivulu osi kuenda va sanjukila calua ulandu waco. Ovo va yongola oku kala Olombangi Via Yehova. Pole, va kuete atatahãi. Ndeci, ovo va kũlĩha okuti oco va papatisiwe, va sukila oku mbuitikinyiwa vovava. Pole, ka tu kuete olui ocipepi limbo lietu. Tu sukila hẽ oku iya kulo oco tu papatisiwe?” Vamanji ava vavali va lekisa ulume waco kumanji umue ukundi wotembo yosi o vangula elimi liaye. Tunde opo kavali kavo va siata oku sapela olonjanja vialua.

Ci sanjuisa calua oku mola ndomo otuakãlu tualivulu tua siata oku kuatisa koku eca uvangi wolondaka viwa “koluali luosi, ha vi lingi uvangi kolofeka viosi.” (Mate 24:14) Pole, koloneke vilo pi ku kasi oku tunda olombongo vi kuatisa kupange waco? Olombanjaile vi kuatisa kupange u lingiwa voluali luosi, olonjanja vialua via siata oku lingiwa vonumbi donate.jw.org. Tu pandula calua ocali cove.