Ocivaluka?

Ove hẽ wa sola oku tanga ovipama Viutala Wondavululi via sandekiwa volosãi via pita? Nda wa vi sola, seteka oku tambulula apulilo a kuãimo:

• Suku o pondola ndati oku ku kuatisa oco o linge ohuasi?

Kosimbu Yehova wa sumũlũisile Avirahama, la Salomone, oco va kuate ukuasi. Pole, Suku o kuatisa omunu oku kuata ovokuasi ana okuti, mua kongela ekolelo, lombembua kuenda esanju. Omo liaco, Akristão vosi va sukila oku likolisilako oku kuata ovokuasi aco.​—⁠1/9, kemẽla 3-7, kelimi Lioputu.

• Ulandu wa Yesu woku popela Petulu eci a kala oku vomba vokalunga, u tu longisa nye? (Mat. 14:​28-31)

Nda tua limbuka okuti, manji umue wa hongua kespiritu, tu sukila oku u kuatisa oco a pamise ekolelo liaye.​—⁠15/9, kemẽla 8.

• Nye Yehova a linga oco a tu yovole?

Yehova wa pandikisa calua eci Omõlaye a talisiwa ohali, loku sepuiwa. Ndomo ca lekisiwa vulandu waco, Avirahama wa tava oku eca omõlaye ndocilumba. Cimuamue haico Yehova a linga okuti, wa pandikisa calua eci Omõlaye a pondiwa ndondingaĩvi.​—⁠15/9, kemẽla 28-29.

• Momo lie o Côdice yo Vatikanu yi kuetele esilivilo?

O côdice yaco, yi lomboloka ociña cimue ca va Helasi okuti, tunde eci ca sangiwa ka papitile 300 kanyamo noke yoku malusuiwa kuoku sonehiwa Kuembimbiliya. Ociña caco, ci kuete Ovisonehua viosi Viotestamento Yale kuenda Yokaliye. Oyo ya kuatisa olonoño oku kuata elomboloko liovina vi sangiwa Vembimbiliya.​—⁠1/10, kemẽla 18-19, kelimi Lioputu.

• Elivulu Liolosapo 24:27 li tu longisa nye catiamẽla koku ‘sokiya epata’?

Ulume wosi o yongola oku kuela, o sukila oku li pongiya oco a tẽlise ovikele viatiamẽla kolohuela. Vovikele viaco, mua kongela oku kuatisa epata liaye ketimba kuenda oku tẽlisa ovikele viaye konepa yespiritu.​—⁠15/10, kemẽla 12.

• Momo lie ka ca sungulukile oku popia okuti, Olombangi Via Yehova viatiamẽla ketavo lio Postande?

Etavo lio Postande, lia fetikila ko Europa kunyamo wa 1.600. Olio lia sokiyiwa oco va pongolole alongiso amue Vetavo lio Katolika. Ondaka yokuti, “Postande,” yi tiamisiwila komanu vana ka va yonguile vali oku kuama alongiso etavo lio Katolika. Olombangi Via Yehova, ka vi tava kondaka yokuti, papa o kuete omoko yoku tumila oluali luosi, kuenda o tava okuti ovina vi sangiwa Vembimbiliya via velapo. Olombangi Via Yehova ka vi tavavo kalongiso ana ka a sangiwa Vembimbiliya, kuenda ovituwa vĩvi via siata vetavo lio Postande.​—⁠1/11, kemẽla 19, kelimi Lioputu.

• Anga hẽ, omunu o sukila oku lilongisa elimi lio Helasi kuenda lio Heveru oco a kuate elomboloko Liembimbiliya?

Sio ka sukila. Oku kũlĩha alimi aco, ka ci kuatisa omunu oku kuata elomboloko liovina vi sangiwa Vembimbiliya. Omunu o lilongisa alimi aco, o sukila oku kũlĩhĩsa ovina vi sangiwa vondisionaliu kuenda valivulu akuavo. Yehova wa ecelela okuti, olondaka Viomõlaye vi pongoluiwa kelimi lina omanu va enda oku vangula kotembo yaco. Eci ci lekisa okuti, omunu o pondola oku lilongisa ovina vi sangiwa Vembimbiliya lia pongoluiwa kelimi liaye.​—⁠1/11, kemẽla 20-23, kelimi Lioputu.

• Ongangu ya Yehova leyi Yomõlaye yoku lekisa ovituwa viwa, yi tu longisa nye?

Ndaño Yehova wa velapo voluali luosi, pole, wa siata oku lekisa ohenda lesumbilo komanu. Eye poku vangula la Avirahama kuenda Mose, wa tukula ondaka yimue okuti, kelimi lio Heveru ya pongoluiwa hati, ‘ndinge ohenda.’ (Efet. 13:14; Etu. 4:⁠6) Yehova wa siata oku yevelela omanu. (Efet. 18:​23-​32) Yesu wa kuama ongangu ya Isiaye, kuenda wa kuatisa omanu va kala ponele yaye. Olonjanja vimue, wa enda oku va tukula kolonduko.​—⁠15/11, kemẽla 25.

• Momo lie Akristão vocili ka va lingila ovipito vioku Fetika Unyamo Wokaliye?

Tunde kosimbu, omanu va kapako ocipito coku Fetika Unyamo Wokaliye, ndomo ca lekisiwa volokalendaliu kofeka yo Asia. Vocipito caco, mua kongela oku li vetiya oku kuata o sande vokuenda kunyamo, kuenda oku lekisa esumbilo kaspiritu ãvi. Ndaño Akristão va sumbila olonjali viavo, pole, ka va li kongela kovipito viaco vioku fendela vana va fa osimbu oco a va teyuile ale oku fendela olosuku vi teyuila olonjo viavo.​—⁠1/12, kemẽla 20-23, kelimi Lioputu.