‘Pamisi Ovitima Viene’

“Vu sukila okuti, eci wa linga ale ocipango ca Suku, oco vu tambula eci co likuminyiwi.”−VA HEVERU 10:36.

1, 2. (a) Nye capita Lakristão vamue kocita catete? (b) Momo lie calelukila okuti ekolelo litepuluka?

¹ Pokati kasonehi vosi Vembimbiliya, lomue otukula olonjanja vialua ekolelo ndupostolo Paulu. Kuenda olonjanja vialua, eye wavangula eci catiamela kuvana okuti ekolelo liavo laitepulukile ale liafa. Ndeci, Humaneo ala Alesandro ‘vakonyoha kekolelo liavo ndonaviyu ya teka.’ (1 Timoteo 1:19, 20) Dema wa yanduluka Paulu omo okuti ‘wasolele vali capiala oluali lulo.’ (2 Timoteo 4:10) Vamue, omo liovilinga viavo viekambo liolondunge havio ka viatiamelele Kakristão ‘valikala ekolelo liavo.’ Vakuavo omo liokukuama ukulihiso wesanda vakonyoha kuenje va “lipumbisa ekolelo.”

² Momo lie Akristão vaco ava olombuavekua vakonyohela ndoco? Momo, “ekolelo olio ociseveto covina vi lavokaiwa, hailio Ombangi ya Yehova yovina ka vi malaiha.” (Va Heveru 11:1) Etu tulekisa ekolelo kovina vina okuti katuvilete. Pole katusukila ekolelo kueci catiamela kovina viletiwe. Caleluka calua okutalavayela ovipako viletiwe, puãi okutalavayela ukuasi wespiritu kauletiwe catila. (Mateo 19:21, 22) Ovina vialua viletiwe−ndeci “oñeyi yetimba, loñeyi yovaso,”−vikoka calua etimba lietu kalialipuile kuenje eci cihonguisa ekolelo lietu.−1 Yoano 2:16.

3. Ukristão osikila okukuata ekolelo lisasoka ndati?

³ Handivo, Paulu wapopia hat, “wosi o yongola oku kolela ku Suku, co sesamẽla oku kolela okuti kuli Suku, kuenda okuti Suku eca onima kuava vo sanda.” Mose wakala lekolelo liasoka ndeli. Eye ‘watulukilile lutate kofeto yonima’ kuenje “wa pandikisa ndu o lete unda ka miwa lovaso ositu.” (Va Heveru 11:6, 24, 26, 27) Ukristão osikila okukuata ekolelo liasoka ndeli. Ndomo tuamõla ale kocipama catete, Avirahama walekisa ongangu yiwa konepa eyi.

Avirahama Eye Ongangu Yiwa Yekolelo

4. Omuenyo wa Avirahama wakuatisiwa ndati lekolelo liaye?

⁴ Avirahama wakala kofeka yo Uri eci atambula ohuminyo ya Suku yokuti eye okala isia yombuto yimue okuti yikasumuluisa omanu vokolofeka viosi. (Efetikilo 12:1–3; Ovilinga 7;2, 3) Lokukolela ohuminyo eyi Avirahama wapokola ku Yehova, wailukila tete ko Harane noke weya okuilukila ko Kanana. Ofeka yaco, oyo Yehova alikuminyile okuyeca kombuto ya Avirahama. (Efetikilo 12:7; Nehemiya 9:7, 8) Pole, ovina vialua Yehova alikuminyile viateliswaño otembo okuti Avirahama wafa ale. Ndeci, Avirahama layimue onepa yo Kanana yakala yaye muẽle−okupako eleva lia Makapela, Yehova alandele oco likale ovilangu viaye. (Efetikilo 23:1–20) Pole lopo, walekisa ekolelo kondaka ya Yehova. Capiala vali enene, eye walekisa ekolelo kotembo yokovaso ‘kimbo li kuete ociseveto cocili, okuti omesele yalio lutingi walio, Suku.’ (Va Heveru 11:10) Ekolelo liaco liokuatisa vokuenda kuomuenyo waye wosi.

5, 6. Ekolelo lia Avirahama liasetekiwa ndati kueci catiamela kohumiyo ya Yehova?

⁵ Eci cimuiwila calua enene kondaka yatiamela kohuminyo yokuti ombuto ya Avirahama yiakakala ofeka yinene. Oco eci citelisiwe, casukilile okuti Avirahama okuata omõla, pole eye watalamela otembo yalua oco vosumuluisa noke la umue. Katuakulihile anyamo eye akal lavo, eci ayeva onjanja yatete ohuminyo ya Suku, pole eci eye alinga ungende wunene wokuenda ko Harane, Yehova handi kowihile omõla laumue. (Efetikilo 11:30) Eye wakala otembo yalua ko Kanana, wakala 75kanyamo kuenda Sara wakala 65 kanyamo. Pole lopo handi, kavakale lomola laumue. (Efetikilo 12:4, 5) Eci Sara atelisa 70 kanyamo, wafetika okusima okuti cilo kaliye layevo wakuka calua okuti katela vali okucitila Avirahama omõla. Omo liaco, lokukuama ocisila cokotembo yaco, Sara waeca Hagare upika waye ufeko ku Avirahama kuenje, eye wacita laye omõla ukuenje. Pole omolaco, hayeko walikuminyiwile. Momo, Hagare lomõlaye Isameli, noke weya okutundisiwa. Pole, eci Avirahama apinga ku Yehova oco akuatisevo omolaye Isameli, eye walikuminya okusumuluisavo.−Efetikilo 16:1–4, 10; 17:15, 16 18–20; 21:8–21.

⁶ Kotembo yasunguluka ya Suku−eci okuti papita ale otembo yalua, tunde eci ovo vayeva onjanja yatete ohuminyo yaco−eci Avirahama akala 100 canyamo kuenda Sara 90 kanyamo vacita oñaña yulume, yatukuiwa Isake. Eci cakala ocikomo cocili avoyo! Kulume u lukai waye okuti vakukile ale calua, eci cakal ndokupinduiwa omo atimba vavo okuti ‘kavakale vali longusu’ vaneniwa vali lomuenyo wokaliye. (Va Roma 4:19–21) Vatalemela calua, pole okusulako eci ohuminyo yatelisiwa, vasumuluisiwa.

7. Ekolelo lialitokeka hẽ ndati lepandi?

⁷ Ongangu ya Avirahama yituivaluisa okuti ekolelo kacitava okuti likala ño liokatembo katito. Paulu watokekisa ekolelo lepandi ec eye asoneha hati: “Vu sukila epandi okuti, eci wa lingi ale ocipanga ca Suku, oco vu tambula eci co likuminyiwi. Etu puãi katuakuaku tokokako loku [tiukila koku] nyõleha, tuakuekolelo, haetu tu tata ovitima vietu.” (Va Heveru 10:36–39) Valua okuti vakasi okukevelela osimbu yalua okutelisiwa kuohuminyo. Vamue vasiata okukevela otembo yosi yomuenyo wavo. Ekolelo liavo liapama olio liasita okuvakuatisa. Kuenje, ndeci capita la Avirahama, ovo vatambulavo onima kotembo yasunguluka ya Yehova.−Havakuki 2:3.

Okuyevelela Suku

8. Oloneke vilo tuyevelela ndati Suku, kenda momo lie tuyonguila okuti ekolelo lietu lipama?

⁸ Pokati kovina vialua pali ovina vikuãla okuti ovio viapamisa ekolelo lia Avirahama, kuenda ovina viaco citava okuti vitukuatisavo etu. Tete, eye walekisa ‘ekolelo okuti kuli Suku’ lokuyevelela lutata eci Yehova akala lokuvangula. Omo liaco, Avirahama kalisokele la va Yudea vokoloneke via Yeremiya, okuti vatavele ku Yehova pole vakolelele kolondaka viaye. (Yeremiya 44:15–19) Oloneke vilo, Yehova ovangula letu pokati Kembimbiliya, okuti oyo Ondaka yaye yafuimilua, eci Petulu atukula hati yasoka ‘ndocinyi cituila vowelema vovitima viene.’ (2 Petulu 1:19) Eci tutanga Embimbiliya lutate walua, etu tukasi ‘okulitekula lolondaka viekolelo.’ (1 Timoteo 4:6; Va Roma 10:17) Handi vali, oloneke vilo viasulako, “ukuenje wakolelua haeye wa lunguka” okasi okueca “okulia [kuespiritu] kotembo yatukuiwa, ” lokutosonguila lovihandeleko Viembimbiliya kuenda elomboloko viovitumasuku visangiwa Vembimbiliya. (Mateo 24:45–47) Okuyevelela Yehova pokati kavo cisukiliwa cocili oco ekolelo lietu lipame.

9. Nye ciyilila kokukolela kuetu locili muẽle elavoko Liakristão?

⁹ Ekolelo lia Avirahama liatiamelele calua kelavoko liaye. “[“Omo lielavoko, NW] wa pandikisa ño–o lekolelo liaye liokuti o linga isia yolofeka via lua.” (Va Roma 4:18) Eci oco ocina cavali cipondola okukukuatisa. Lalimue eteke katukavailiko okuti Yehova “eca onima kuava vo sanda.” Upostolo Paulu wapopia hati: “Oco ocimãho tua loña, haico tu yekela, momo elavoko lietu li kasi ku Suku o kasi lomuenyo.” (1 Timoteo 4:10) Nda okuti etu tuakolela muẽle ocili elavoko lietu Liukristão, ovina viosi tulinga vomuenyo wetu vikalekisa ekolelo lietu, ndeci cakal Avirahama.

Okuvangula la Suku

10. Olohutililo vipi vipamisa ekolelo lietu?

¹⁰ Avirahama wavangula la Suku, kuenje eci oco ocina catatu capamisa ekolelo liaye. Oloneke vilo etu citavavo okuti tuvangula la Yehova, lokukuama ombanjaile yohutililo vonduko ya Yesu Kristu. (Yoano 14:6; Va Efeso 6:18) Noke yokuta okusapo lumue lulekisa esilivilo liokulikutilila olonjanja viosi, Yesu wapula hati: “Eci Mõlomanu eya, o[ka] sanga ekolelo kilu lieve?” (Luka 18:8) Ohutililo yipamisa ekolelo hayinako kayisokoluiwa vali ciwa ale yonjanga. Eci cikuate esilivilo liocili. Ndeci, ohutililo yilingiwa lutima wetu wosi, yisukiliwa, cocili nda tuyongola okunõla okulinga cimue cikuete esilivilo liocili ale ceci tusangiwa lesakalalo limue.−Luka 6:12, 13; 22:41–44.

11. (a)Avirahama wakolisiwa ndati eci ayuluila utima waye ku Suku? (b) Nye etu tulilongisila kueci capita la Avirahama?

¹¹ Eci outi Avirahama wakuka ale pole otembo yaco Yehova kowihile handi ombuto olikuminyile, eye wavangula la Suku catiamela kesakalalo liaye. Kuenje Yehova wakolisa okut cikatelisiwa muẽle. Lipi hẽ liakala esulilo liaco? Avirahama “wa kolela Yehova kuenje wo ci tendela ndesunga.” Noke, Yehova walekisa yimue ondimbukiso yokukolisa olondaka viaye. (Efetikilo 15:1–18) Nda etu tuayuluila ovitima vietu ku Yehova vohutililo, lokukelela ohuminyo ya Yehova yisangiwa Vondaka yaye, Embimbiliya, kuenda tuapokola kokuaye lekolelo liocili, Yehova okapamisavo ekolelo lietu.−Mateo 21:22; Yuda 20, 21.

12, 13. (a)Avirahama wasumuluiwa ndati eci akuama olonumibi viosi vi Yehova? (b) Olovandu vapi citava okuti vakapamisa ekolelo lietu?

¹² Ocina ca kuãla capamisa ekolelo lia Avirahama, ekuatiso Yehova aeca kokuaye eci eye akuama olonumbi via Suku. Eci Avirahama aendele kokupopela Lote kolosoma viañilile lundululu vofeka yavo, Yehova wowiha eyulo. (Efetikilo 14:16, 20) Ndaño okuti Avirahama wakala ocingendeleyi vofeka yeya okupiñaliwa lombuto yaye, lopo Yehova wosumuluisa lovipako vialua. (Cisokisa Lefetikilo 14:21–23) Yehova wasonguila akalei ka Avirahama kelikolisilo liaya liokusanda ukãi wasunguluka oco akale ukãi wa Isake. (Efetikilo 24:1) Omo liekolelo liaye liapamele kuenda elitokeko liaye la Yehova Suku, oco Yehova otukuila hati ‘ekamba liaye.’−Isaya 41:8; Tiago 2:23.

¹³ Citava okuti oloneke vilo etu tukuatavo ekolelo liapama ndeli liaye? Citava. Nda etu kuakuama ongangu ya Avirahama, okuti tuseteka Yehova lokupokola kovihandeleko viaye, eye okatusumuluisavo, kuenda okapamisa ekolelo lietu. Ndeci, nda tuavanja Korelatoriu Yunyamo Wupange wo 1998, yilekisa okuti valua vamanjetu vasumuluisiwa calua omo liokupokola kocihdandeleko cokukunda olondaka viwa.−Marko 13:10.

Elekiso Liekolelo Oloneke Vilo

14. Yehova wasumuluisa ndati upange walingiwa lo Notícisas do Reino No. 35?

¹⁴ Lokutiukila konyima kosãi ya Mbalavipembe yunyamo wo 1997, upange walingiwa voluali luosi lo Noticias do Reino No. 35, waenda calua ciwa, cosi cilingiwa omo liombili kuenda esanju lialekisiwa lolohulukai Violombangi via Yehova. Cimõhisa ceci capita kofeka yo Ghana. Kuaciwa eci cisoka 2,5 kolohulukãi viotuikanda tuaco valimi akuala, kuenje esulilo liaco 2.000 kalilongiso Embimbiliya vafetikiwa. Ko Chipre Olombangi via Yehova viakala lokueca o Noticias do Reino, noke vialimbuka okuti cimue ocitunda cetavo limue cikasi okuvakuama. Noke yokatembo kamue, ovo vowavelapo yimue o Notícias do Reino. Pole eye watambuile ale yimue, kuenje noke wapopia hati: “Ame ndakomõha calua ondaka yisangiwa vokokanda aka, omo liaco ndiyongola okueca olopandu komanu vakapongiya.” Kofeka yo Dinamarka, kuaciwa 1,5 kolohulukãi vio Notícias do Reino kuenda vakuata elomboloko liayo, hayo yivetiya, kuenda yikuiha onjongole yokukuliha vali. Oyo yiveta muẽle ocili kutiama!”

15. Ovolandu vapi valekisa okuti Yehova wasumuluisa elikolisilo liomanu vaye liokuvangula lomanu kolonepa viosi vasangiwa?

¹⁵ Kunyamo wo 1998 kualingiwa elikolisilo liokukundila omanu kolonepa viosi vasangiwa okuti hakolonjo viavoko lika. Kofeka yo Cote d’Ivoire vimue olomisionariu okuti ulume lukãi waye, vanyula 322 kolombaluku viakala kocitumãlo cokuviyeka. Ovo vaeca 247 kalivulu, 2.284 kolorevista, 500 kolombrochura, ovita lovita violotratado, kuenda olovideo oco vakuakuendisa olombaluku vavitale osimbu vakasi vungende vokalunga. Kofeka yo Kanada yimue Ombangi ya Yehova yandele vonjo yokusemulula akãlu. Muẽle yaco walekisa onjongole, kuenje manji wakalamo alivala akuãla kakukutu akui atatu, pole otembo aeca uvangi yatela ño elivala limosi omo likutalayama okusia evelo komanu veya okusemuluisa ovina viavo. Okusulako, kuefeitikiwa limue elilongiso Liembimbiliya liasokiyiwila kelivala 10:00 kuteke. Olonjanja vimue, pole, vanda lokufetikaño vokati kelivala liavali komele. Esokiyo liaco eli liasukila okulikolisalako calua, pole kuatunda olonima viwa. Ulume waco wanõlapo okuyika onjo yaco eyi, Vovialumingu oco andaende kolohongele. Eye kumosi lepata liaye vakasi lokuamamako ciwa.

16. Ovolandu vapi valekisa okuti Ombrochura Suku Oyongola kuenda elivulu Ukulihiso ovimaleho vimue viwa kupange wokukunda keunda wokulongisa?

¹⁶ Ombrochura Suku Oyongola Nye Kokuetu? kuenda elivulu Ukulihiso Utuala Komuenyo Ko Pui vikasi okuamamako okukala ovimãho vimue viwa kupange wokukunda kuenda wokulongisa. Kofeka yo Itália umue mandele wakala lokutalamela okalela, watava okutambula yimu o Notícias do Reino. Eteke liakuamamo, eye weya vali kuenje watava okutambula ombrochura Suku Oyongola. Tunde opo, eye eteke leteke walilongisa Embimbiliya vakukutu 10 ale 15 pocitumãlo caco muẽle cokukevelila okalela. Eci papita osãi yimosi loloneke ekui lavitalo, wanõlapo okusiapo onjo yolomandele eye akala noke waenda konjo yavo kofeka yo Guatemala kuenje wamamako lelilongiso liaye. Kofeka yo Malawi umue waendalendale olonjanja viosi konembele otukuiwa okuti Lobina, wasepuile omãla vaye vakãi eci ovo vafetika okulilongisa Embimbiliya Lolombangi via Yehova. Pole, afeko vaco lopo vanda lokusapuila ocili cisangiwa Vembimbiliya ku inavo eci kuamõlahele epuluvi. Kosãi Yevambi yunyamo wo 1997, Lobina wasanga elivulu Ukulihiso kuenje ondaka yalinga hati “Ukulihiso Utuala” yo katanga calua. Kosãi Yevambi Linene eye watava okulilongisa Embimbiliya. Kosãi Yenyenye eye wandele kohongele yofeka kuenda wayevelela ciwa lutate ovipama viosi vialomboluiwa vohongele. Kesulilo liosãi, eye wasiapo etavo liaye kuenje walinga asokiyo vosi vasukiliwa noke walinga ukundi kapapatisiwile. Eye wapapatisiwa kosai ya Kuvala yunyamo wo 1997.

17, 18. Olovideo Viovisoko vikasi okukuatisa ndati omanu “okutala” ovina viespiritu?

¹⁷ Olovideo Viocisoko vikasi okukuatisa valua “okutava” ovina viespiritu. Kofeka yo Mauricia ulume umue wasiapo etavo liaye omo okuti vetavo liaco kamuli ongongela. Umue Misionariu wolekisa ongongela yikasi pokati Kolombangi via Yehova, loku ulekisa o video yitukuiwa okuti Unidos pelo Ensino Divino. Lokukomõha, ulume wapopia hati: “Ene Ulombangi via Yehova ukasi Vofeka yelau!” Yehova watava okulilongisa Embimbiliya. Umue manji kofeka yoko Japão walekisa kulume waye okuti hukuetavoko, o video yitukuiwa hati As Testemunhas de Jeová−A Organização por Detrás do Nome, kuenje ulume waco covetiya okutava okulilongisa Embimbiliya olonjanja viosi. Noke yokutala o video yitukuiwa hati Unidos pelo Ensino Divino, eye walekisa onjongole yokukalavo Ombangi ya Yehova. Kuenje noke o video yolonepa vitatu yitukuiwa okuti A Bíblia−Um livro de Factos e Profecias, yokuatisa okukapako ovihandeleko visangiwa Vembimbiliya vomuenyo waye. Okusulako, o video yitukuiwa okuti As Testemunhas de Jeová Resistem Ao Ataque Nazista, yolekisa okuti Yehova okuatisa omanu Vaye eci vapita vatiekengo a Satana. Ulume waco wapapatisiwa kosãi ya Mbalavipembe yunyamo wo 1997.

¹⁸ Ava vamue ño pokati kovolandu vakahandangalala vawa vapita vokuenda kunyamo wapita wupange. Ovolandu vaco ava valekisa okuti Olombangi via Yehova ekolelo liavo likasi okulekisiwa lovilinga kuenda Yehova okasi okupamisa ekolelo liaco omo liokusmuluisa upange wavo.−Tiago 2:17.

Okuamisako Ekolelo Oloneke Vilo

19. (a) Etu tukasi ndati lekalo limue viwapo vali okuti Avirahama cisule? (b) Omanu vañami valiongoluile konjivaluko yolofa via Yesu unyamo wapita? (c) Olofeka vipi vikauta etendelo limue likomõhisa liava vakala Konjivaluko unyamo wapita? (Tala ulala usangiwa kemẽla 26 toke lia 29.)

¹⁹ Volonepa vialua okuti etu oloneke vilo tukasi vekalo limue liwapo vali okuti eli Avirahama akal cisule. Etu tuakuliha okuti cosi Yehova alikuminyile Avirahama catelisiwa. Ocitumbulukila ca Avirahama capiñalele muẽle ofeka yo Kanana, kuenda cakala muẽle ofeka yinene. (1 Olosoma 4:20; Va Heveru 11:12) Handi vali, eci papita 1.971 kanyamo, pana okuti Avirahama wasiapo ofeka yo Harane, Yesu, umue ukuambuto yaye, wapapatisiwa vovava la Yoano Upapatisi kuenda noke wapapatisiwa lespiritu sandu lia Yehova kuenje walinga Mesiya, Ombuto ya Avirahama, vekalo liasuapo liespiritu. (Mateo 3:16, 17; Va Galatia 3:16) Veteke 14 liosãi ya Nisana, kunyamo 33 K.K., Yesu waeca omuenyo waye ndocisembi komanu vana okuti valekisa ekolelo kokuaye. (Mateo 20:28; Yoano 3:16) Olohulukãi vialua viomanu cilo, citava okuti vasumuluha vonduko ya Yesu. Unyamo wapita, veteke 14 lia Nisana, etendelo lisoka 13.896.312 komanu ovo valiongoluile okuivaluka elekiso liaco eli likomõhisa liocisola. Eci cilekisa uvangi wokuti Yehova, eye muẽle Utelisi Wavelapo wolohuminyo!

20, 21. (a) Omanu vokofeka viosi vasumuluhila ndati Kombuto ya Avirahama kocita catete canyamo, kuenda oloneke vilo vasumuluisiwa ndati?

²⁰ Kocita catete canyamo, omanu valua vatunda kolofeka viosi−vatiamelele ko Isareli yetimba−valekisa ekolelo Kombuto yaco eyi ya Avirahama kuenje valinga omãla vawavekiwa va Suku, okuti ovimatamata vio Isareli yokaliye yespiritu “Isareli wa Suku.” (Va Galatia 3:26–29; 6:16; Ovilinga 3:25, 26) Ovo vakuete elavoko liasuapo liokukuata omuenyo wespiritu okuti kavafi kuenda vakakala olombiali Vusoma wa Suku. Etendelo lisoka 144.000 ovo lika vakasumuluisiwa ndoco, cilo puãi pasupaño etendelo limue litito liavo. (Esituluilo 5:9, 10:4) Unyamo wapita, 8.756 olio etendelo liava valekisa uvangi welavoko liavo okuti ovo vatiamela ketendelo eli omo liokulia kolondimbukiso eci kualingiwa ocipito Conjivaluko.

²¹ Etendelo liavelapo Lilombangi vi Yehova oloneke vilo, liava vatiamela ‘kowiñi wakahandangala’ watukuiwa vocitumasuku cisangiwa kelivulu Liesituluilo 7:9–17. omo okuti vasumuluhila vonduko ya Yesu, ovo vakuete elavoko liokukuata omuenyo kopui vofeka yalau palo posi. (Esituluilo 21:3–5) Etendelo lisoka 5.888.650 liava vakuata onepa kupange wokukunda kunyamo wo 1998 lilekisa uvangi wokuti owu owuñi “wakahandangala” muẽle ocili. Cikomõhisa calua okutala olorelatoriu vivali yoko Russia kuenda yoko Ukrania eyi onjanja yatete vatelisa eci cipitahãla 100.000 kakundi. Yikomohisavo orelatoriu yoko Estados Unidos−1.040.283 kakundi vosãi Yenyenye! Evi ovio olofeka vitatu pokati kolofeka 19 viasapula eci cipitahãla 100.000 kakundi unyamo wapita. Handi vali, etendelo liolohulukãi lolohulukãi viomanu vakuavo vakala Konjivaluko lilekisa okuti owiñi waco owu wukalivokiya vali calua.

Elavoko Ndopo Likatelisiwa

22, 23. (a) Momo lie tusukilila okupamisa ovitima vietu oloneke vilo? (b) Tulekisa ndati okuti etu tukasi ndeci cakala Avirahama, kuenda katukasi ndomanu vana ka vakale lekolelo vatukuiwa la Paulu?

²² Omanu vakala Konjivaluko vavaluisiwa okuti tukasi ale ocipepi lokutelisiwa kuolohuminyo via Yehova. Kunyamo wo 1914, Yesu wavialekiwa Ndosoma Kusoma wa Suku kilu, kuenje wafetika etukuluko liaye kunene Wusoma. (Mateo 24:3; Esituluilo 11:15) Oco muẽle, Ombuto ya Avirahama cilo yaviala ale kilu! Tiago wapopisile Akristão vokoloneke viaye hati: “Pandikisivo. Pamisi vovitima [viene] momo etukuluko lia Ñala li kasi ocipepi.” (Tiago 5:8) Oco muẽle, etukuluko liaco eli kaliye lialinga ale ocili! Omo liaco Tukuete esunga liapiala liokupamisa ovitima vietu!

²³ Ekolelo lietu kolohuminyo via Suku likamamako lokulivokiya nda tualilongisa Embimbiliya otembo yosi lokulinga olohutililo vialomboloka ciwa. Lalimue eteke katukaliwekipo okumala asumuluho va Yehova veyilila kokupokola kuetu Kondaka yaye. Nda tualinga ndoco tukakala nda Avirahama, kuenda katukakala ndomanu vana Paulu atukula okuti ekolelo liavo liatepulukile ale liafa. Lacimue cikatutepa kekolelo lietu likola. (Yuda 20) Tulikutilila oktui eci cikala muẽle ocili komanu vosi va Yehova vokuenda kunyamo wupange wo 1999 kuenda kotembo yenda ño hu kovaso.

Ocitela Okutambulula?

Ndamupi tuyevelela Suku koloneke vilo?

Ekuatiso lipi litunda kolohutililo vilingiwa lutima wosi ku Suku?

Nda okuti tuakuama olonumbi via Yehova, ekolelo lietu likapamisiwa ndati?

Onepa yipi yovo relatoriu yisangiwa (kemẽla 26 toke lia 29) yakukomohisa vali calua?

[Elitalatu Kemẽla 24]

Nda tuayevelela Ondaka ya Yehova, ekolelo lietu kolohuminyo viaye likavokiya

[Elitalatu Kemẽla 31]

Yehova osumuluisa omanu vosi vana okuti vakuama ovihandeleko viaye kuenda opamisa ekolelo liavo