Ovinjonde Viovina Ka Vi Muiwa Kovailu

YEHOVA UKUONENE WOSI

“Ocalo cimue ca tumbikiwa pocitumãlo cayo kilu kuenda umue wa tumãla kocalo caco. U wa tumãlako wa setahãla ewe lio jaspe lewe lio sardio kuenda ocalo ca ñualiwa lolukongolo lua setahãla ewe lio emeralda.”—Esituluilo 4:2, 3.

“Locinyi co ñuala. Ndemolẽhẽlo liolukongolo velende eteke liombela oco ca kala emolehelo liocinyi ca ñualako. Oco ca kala emolẽhẽlo liocisetahãi culamba wa Yehova.”—Esekiele 1:27, 28.

Ovijonde evi via eciwa kupostolo Yoano kuenda kuprofeto Esekiele, vi situlula eposo lia Yehova Suku Ukuonene Wosi, lovina tu pondola oku mola ndeci, ewe liyela, olukongolo, kuenda ocalo ca ñualiwa lolukongolo. Ovo va tu sapuila okuti, emolẽho lia Yehova, lia fina calua, liohenda kuenda liwa.

Ovindekaise viaco via lingiwa ku Suku, vi li kuata lolondaka viukualosamo wa soneha ndoco: “Momo Yehova unene, kuenje wa posokela esivayo lia piãla. Wa posokela esumbilo lia piãla, okuti olosuku viosi ci sule. Olosuku viosi viomanu ovina viaño, Yehova puãi wa lulika ilu. Kovaso aye ku li ulamba lunene. Vonembele yaye mu li upami lunumbu.”—Osamo 96:4-6.

Yehova eye Ukuonene Wosi, kuenje o tu laleka oco tu amẽle kokuaye vohutililo kuenda o tu yeva. (Osamo 65:2) Suku o tu sole, kuenda o tu tata. Omo liaco, upostolo Yoano wa soneha ndoco: “Suku eye ocisola.”—1 Yoano 4:8.

YESU O KASI LA SUKU

“[Ndonge Stefano] omo a yukisua lespiritu sandu, wa vanja kilu kuenje wa mola ulamba wa Suku kuenda Yesu o tãi kondio ya Suku, loku popia hati: ‘Tali! Ndi lete ilu lia yikuka kuenje Mõlomunu o tãi kondio ya Suku.’”—Ovilinga 7:55, 56.

Osimbu Stefano ka kuatele ocinjonde caco, Yesu wa pondiwile ale la vana va kuata Stefano okuti asongui va va Yudea. Ocinjonde ci lekisa okuti Yesu wa kala lomuenyo kuenda wa pinduiwa loku kemãlisiwa. Catiamẽla kovina viaco, Upostolo Paulu wa soneha ndoco: “[Yehova] wa pindula [Yesu] kuava va fa, loku u tumalisa kondio yaye kilu, kuenda wo kapa kilu liuviali wosi, lomoko yosi, lunene wosi, lusoma wosi, londuko yosi, ci kale eyi yi tukuiwa voluali lulo, ci kale eyi yi tukuiwa voluali lu laika oku iya.”—Va Efeso 1:20, 21.

Catiamẽla kocikele caye, Ovisonehua vi lekisa okuti Yesu, la Yehova, va kapako omanu vosi. Yesu vokuenda kupange waye woku kunda palo posi, wa sakula olombeyi, ovilema kuenda wa pindula vana va file. Omo lioku lieca kolofa, wa lekisa ocisola cocili ku Suku kuenda komanu. (Va Efeso 2:4, 5) Yesu omo okuti o kasi kondio ya Suku, noke o ka lekisa unene waye poku sumũlũisa vosi vana va pokola.

ANGELO OLOMUNGA VIA SUKU

“Ame [uprofeto Daniele] nda mõla ovialo via tumbikiwa, kuenje umue Ukuasimbu okuti [Yehova] wa tumãla. . . . Ohulukãi yolohulukãi vo vumba, ohuluwa yohuluwa va talama kovaso aye.”—Daniele 7:9, 10.

Vocinjonde Daniele a kuata cokilu, ka muile lika ungelo umosi pole wa mola owiñi. Ocili okuti ca kala ocinjonde cimue ci komõhisa! Angelo oviluvo vi kola, via loñoloha kuenda vi kuete unene walua. Pokati kovangelo vaco mua kongela va serafi kuenda va keruvi. Embimbiliya li tukula angelo eci ci soka 250 kolonjanja.

Ovangelo ka va kuete etimba ndeli lietu okuti va kala palo posi. Osimbu Suku ka lulikile omanu tete wa lulika ovangelo. Eci oluali lua sevetiwa, ovangelo voluila onjolela.—Yovi 38:4-7.

Onjila yimue ovangelo vakuekolelo vakuãi yoku vumba Suku, oku kuatisa kupange wa velapo u kasi oku lingiwa koloneke vilo okuti, oku kunda olondaka viwa Viusoma wa Suku. (Mateo 24:14) Ekuatiso va siata oku eca kupange waco, lia situluiwa vocinjonde upostolo Yoano a kuata, wa soneha hati: “Kuenje nda mola ungelo ukuavo o palãla vokati kilu, wambata olondaka viwa viotembo ka yi pui kuava va tunga kilu lieve okuti, kolofeka viosi, kapata osi, kalimi osi kuenda komanu vosi.” (Esituluilo 14:6) Ndaño okuti ovangelo koloneke vilo ka va vangula lomanu ndeci va ci lingaile kosimbu, ovo va kuatisa vana va kunda olondaka viwa komanu vakuavitima via sunguluka.

SATANA O YAPUISA OMANU VALUA

“Kuenje kilu kueya uyaki: Mingeli okuti [Yesu Kristu] lovangelo vaye va liyaka locinyoha kuenda ocinyoha lovangelo vaye va yakavo, pole, ka va tamãlalele kuenda kilu ka kua kaile vali ocitumãlo cavo. Puãi ocinyoha cinene ca imbiwa posi, okuti onyoha yosiahũlu yi tukuiwa Eliapu haeye Satana, una o kasi oku yapuisa oluali luosi; eye wa imbiwa kilu lieve kuenda ovangelo vaye va imbiwa kumue laye posi.”—Esituluilo 12:7-9.

Kilu ka kua kaile ombembua. Tunde kefetikilo, umue pokati kovangelo wa yapuisiwa lonjongole yoku fendeliwa yu wa sinĩla Yehova kuenje wa linga Satana, ci lomboloka “Unyali.” Ovangelo vakuavo va likongelavo kesino liaye kuenje veya oku kũlĩhiwa hati, olondele. Omo lioku sinĩla Yehova, ovo va yapuisavo omanu oco ka va ka tave oku songuiwa la Yehova.

Satana kumue lolondele viaye, vakuevĩho kuenda olongangala. Ovo ovanyali vomanu kuenda va siata oku koka ohali yalua kulo kilu lieve. Satana wa ponda ovinyama kuenda akuenje va Yovi, ulume umue ukuekolelo. Noke, wa ponda omãla vosi va Yovi va soka ekũi poku koka “ocipepe” cimue okuti ca teya onjo ovo va kala. Noke, Satana wa koka okuti Yovi o kuata apute “ãvi tunde pomãi toke ponumbutue.”—Yovi 1:7-19; 2:7.

Ndopo Satana o ka kunduiwa. Tunde eci a imbiwa palo posi, eye wa kũlĩha okuti ‘o kuete otembo yitito.’ (Esituluilo 12:12) Olondaka viokuti, Satana ndopo o ka kunduiwa, esapulo limue liwa!

VANA VA TUNDA KOLOFEKA VIOSI

“Ove okuti [Yesu], wa landela Suku omanu va tunda kapata osi, kalimi osi, komanu vosi, lo kolofeka viosi, kuenje wa va lingisa olosoma lovitunda via Suku yetu kuenda va ka viala ndolosoma koluali luosi.”—Esituluilo 5:9, 10.

Ndeci Yesu a pinduiwa palo posi loku kuata vali omuenyo kilu, kuli vamue okuti va ka pinduiwavo locimãho coku enda kilu. Yesu wa sapuila olondonge viaye hati: “Ngenda ho wangiliyili ocitumãlo, . . . kuenda ndi tiuka vali kuenda ndu vu upilili okuti, oku ndi kala haiko ene vu kalavo.”—Yoano 14:2, 3.

Vana va ka enda kilu va enda locimãho cimue. Ovo kumue la Yesu, va ka kala olombiali Viusoma loku viala ongongo yosi kuenda oku yi sumũluisa. Owu owo Usoma Yesu a vetiya olondonge viaye oku likutilila hati: “A Isietu o kasi kilu, onduko yove yi sumbiwe. Usoma wove wiye. Ocipango cove ci lingiwe palo posi, ndeci ci lingiwa kilu.”—Mateo 6:9, 10.

CECI VANA VA ENDA KILU VA KA LINGA

“Ame [upostolo Yoano] nda yeva ondaka yolukandi ya tunda kocalo yiti: ‘Tala! Ombalaka ya Suku yi kasi lomanu, . . . Eye o puenya asuelẽla osi vovaso avo, oku fa ka ku kalako vali, ndaño oku lila loku liyula lupongo ka vi ka kalako vali. Ovina viatete via pita.’”—Esituluilo 21:3, 4.

Ocinjonde caco ci tukula ovina usoma wa Suku u ka linga pocakati ca Yesu kuenda vana va ka pinduiwa palo posi, oku malako luviali wa Satana kuenda oku pongolola ongongo ha yi lingi ocumbo celau. Ovina via siata oku kokela ohali yalua kuenda esumuo komanu vi ka pita. Ndaño oku fa ka ku ka kalako vali.

Nye ci popiwa catiamẽla ku vana va fa pole, eci va pinduiwa ka va endi kilu? Ovo va ka kala vocumbo celau palo posi otembo ka yi pui.—Luka 23:43.