Olondaka Viwa Viusoma Ovio Hẽ Nye?
Unyamo wa pita 235 kolofeka voluali luosi, 6.035.564 komanu omãla lakulu, va talavaya eci ci soka 1.171.270.425 kolowola poku sapuila omanu eci catiamẽlako. Loku vokiyako vali kueci catiamẽla koku sapula Usoma volombangulo, ovo vaeca peka liomanu eci ci pitahãla 700 kolohuluwa vialivulu a pangiwila oku sandekiwa kuenda oku lombolola Usoma. Ovo vaecavo ci soka olohulukãi violo audiocassettes kuenda violo videocassettes poku sandeka eci catiamẽlako. “Evi” puãi ovio hẽ nye?
“Evi” olondaka viwa Viusoma wa Suku. Ocili, etendelo tu lete etaili lalimue eteke vesapulo liomanu lia kaleleko lioku kundiwa ‘kuolondaka viwa Viusoma wa Suku.’—Mateo 24:14.
Omanu vosi vakasi loku linga upange woku kunda voluali luosi kuenda oku longisa, vosi valieca olumue koku linga upange waco. Komanu vakualuali, ovo vamõleha ndomanu vamue ka va kuete eloñoloho lioku linga upange waco oco puãi, nye ci popiwa catiamẽla kutõi wavo kuenda koku litunda kuavo ciwa? Unene wolondaka viwa Viusoma oco ocina ca velapo okuti cokaliye mekonda liasumuluho a ka neniwa komanu. Asumuluho a yonguiwa lomanu vosi ya: esanju, oku kuata eyovo kovitangi viasiliya, ombiali yiwa, ombembua lokukolapo, kuenda cimue cikuavo okuti omanu va lua ka va ci kolela ndocili, okuti omuenyo ko pui! Evi ovio olondaka viwa komanu va kasi loku sandiliya elomboloko kuenda ocimãho comuenyo. Ocili, asumuluho ava osi kuenda ovina vikuavo vi pondola oku kala viove nda o tambuluiya kuenda o kapako cocili esapulo liolondaka viwa Viusoma.
Usoma Owo hẽ nye?
Usoma u kasi loku sapuiwa ndolondaka viwa owo nye? Usoma waco, wuna wa siata oku longisiwa kolohuluwa viomanu oku u likutililila volondaka evi ndeti via kulihiwa lomanu valua okuti: “A Isietu o kasi kilu. Onduko yove yi sumbiwe. Usoma wove wiye. Ocipango cove ci lingiwe posi ndeci ci lingiwa kilu.”—Mateo 6:9, 10.
Owo Usoma wa vanguiwa luprofeto Daniele u Heveru ci soka ovita 25 kanyamo konyima eci eye asoneha hati: “Suku yokilu o katula usoma, kuenje ka u nyolẽha, ka u tambuiwa lomanu vofeka yiñi; puãi owo u nyõla loku lia ovosoma aco osi, haiwo u kala muẽle hu oloneke ka vi pui.”—Daniele 2:44.
Omo liaco, olondaka viwa viatiamẽla Kusoma ale kuviali okuti owo Suku a ka kundula lawo ungangala wosi kuenda oku viala ongongo yosi lombembua. Eci cika nena ekalo liocili, liocipango catete Cululiki catiame?la komanu kuenda kongongo.ˉEfetikilo 1:28.
“Usoma Wokilu u Kasi Ocipepi”
Ci soka 2.000 kanyamo apita, olondaka viwa Viusoma wa Suku tete via sapuiwa kowiñi pokati komunu umue wa litumbikile okuti wa kala locisetahãi kumosi locituwa cimue ca komohiwa ca lua. Ulume waco wa kala Yoano Upapatisi, omõla ocitunda coko Yudea Sakariya kuenda ukãi waye, Elisavete. Yoano wa kala luwalo wovonya ongamelo, luvia wocipa wañuala ombunda yaye, ndocituwa cuprofeto Eliya, wa kala ocisetahãi caye catete. Pole esapulo liaye lia vetiya oku kapelako kuomanu va lua. Eye wa va sapuila hati: “Likekembeli, momo usoma wokilu u kasi ocipepi.”—Mateo 3:1–6.
Olonjeveleli via Yoano via kala va Yudea, vana va vangowaile okuti afendeli va Suku yocili, Yehova. Ndomanu vakuete ofeka, ovo va tambuile ocisila Cocihandeleko pokati ka Mose ci soka 1.500 kanyamo okonyima. Ko Yerusalãi handi kuakala onembele yinene omu va lingaila ovilumba ndomo ca kisikaile Ocihandeleko. Va Yudea va kala oku liyeva okuti efendelo liavo lia sungulukile kovaso a Suku.
Kuenje, loku yevelela Yoano, omanu vamue va fetika oku limbuka okuti etavo liavo ka lilikuata leci ovo va ka loku sima okuti oco. Ovituwa via va Helasi kuenda uloño waño via li yombekela valilongiso etavo lia va Yudea. Ocihandeleko va tambuile ku Suku pokati ka Mose va ci pengisa, toke muẽle va ci siapo mekonda liatavo kuenda ovihõlo via lingiwa lomanu. (Mateo 15:6) Loku pambuisiwa omo liolonamalãla viavo kuenda asongui vetavo ka va kuete ocisola, valua omanu ka va kalele vali oku fendela Suku ndomo muasunguluka. (Tiago 1:27) Ovo va sukilile oku likekembela akandu va lingila ocisila Cocihandeleko.
Vokuenda kuotembo, va lua va Yudea va kala loku lavoka oku mõleha kua Mesiya wa likuminyiwa, ale Kristu, kuenda vakuavo vaenda loku lipula eci catiamẽla ku Yoano hati: “Anga eye Kristu? NW “Kuenje Yoano wa likala okuti eye hayeko kuenda handi vali wa vatukuila omunu ukuavo, una eye a vangula eci catiamẽla komunu waco okuti: “Ame si sesamela oku itula olonjita violohaku viaye.” (Luka 3:15, 16) Yoano poku lekisa Yesu kolondonge viaye, wa lombolola hati: “Kameme ka Suku, u upa akandu oluali, yo.”—Yoano 1:29.
Ocili, evi via kala muẽle olondaka viwa, omo liaco Yoano wa lekisa komanu vosi onjila yomuenyo kuenda yesanju okuti Yesu, eye omunu “u upa akandu oluali.” Ndombuto ya Adama kuenda Heva, omanu vosi va citiwila vemẽhi liesino liekandu kuenda liolofa. Elivulu lia Va Roma 5:19 lia lombolola okuti: “Ndeci va lua va lingisua vakuakandu lesino liomunu umuamue, haico va lua va lingisua vakuesunga lepokolo liomunu umuamue.” Yesu ndokameme kocilumba, ‘wopa ekandu’ kuenje wa nena apongoloko ekalo liovitangi viomanu. Embimbiliya li lombolola okuti: “Onima yekandu okufa, puãi ocali ca eciwa la Suku oco omuenyo ko pui vu Kristu Yesu Ñala yetu.”—Va Roma 6:23.
Ocili okuti ndomunu wa lipua, ulume wavelapo wa kala ale, Yesu, wa kunda olondaka viwa. Elomboluilo Liembimbiliya kelivulu lia Marko 1:14, 15 li tu sapuila okuti: “Eci Yoano a kuatiwa, oco Yesu weya ko Galilea, yu wa kunda ondaka yiwa ya Suku, hati, kaliye otembo ya tẽlisua, usoma wa Suku u kasi ocipepi. Likekembeli akandu ene. Tavi kondaka yiwa.”
Vosi va tava esapulo lia Yesu kuenda va lekisa ekolelo kolondaka viwa, va kuata esumuluho lia velapo. Elivulu lia Yoano 1:2 liti: “Vosi vo tambula, kuenda va kolela onduko yaye, wa va iha omoko yoku linga omãla va Suku.” Poku kala omãla va Suku, ovo va kuata omoko yoku tambula onima yomuenyo ko pui.—1Yoano 2:25.
Pole, omoko yoku tambula asumuluho Usoma ka a sulilile lika komanu vokocita catete. Ndomo ca lomboluiwa tete, olondaka viwa Viusoma wa Suku vi kasi oku kundiwa kuenda oku longisiwa kolofeka viosi cilo. Omo liaco handi kuli asumuluho Usoma. Nye ove o kuete oku linga oco o tambule asumuluho aco? Cika lomboluiwa vocipama ci kuãimo.