Hulda wa Tẽlisa Ocimãho Caye

Nda okuti wa nyulile ale ocifuka cimue co ko Sangir Besar kofeka yo Indonesia kanyamo a pita, citava okuti wa muile ale vamanji vatatu vakãi kokalunga. Ovo va kũlĩhĩwa calua kocifuka caco omo liupange wavo woku kunda poku kuatisa omanu oku kuata elomboloko Liembimbiliya. Pole, keteke liaco, va kala oku linga ocina cimue ca litepa.

Catete, ovo va iñila vokalunga kuenda vopamo ovawe kuenje wa vambata. Ovawe amue a kala anene calua ndombunje yoku tasula. Noke, va tumãla kovialo vimue via vaya kuenje va kuata olomalatelo oco va tetole ovawe votuinimbu tutito. Kuenje va longeka otuvawe tuaco volombaliti, yu va ambata kocitumãlo va kala. Noke, ovo va kapa ovawe vonjeke yimue yinene yina ya laikele oku ambatiwa lekãlu linene oco va talavaye la-o kupange woku tunga.

Umue pokati ka vamanji vaco o tukuiwa Hulda. Ekalo liaye lia ecelela okuti eye o pita otembo yalua oku linga upange waco okuti vakuavo ci sule. Eye wa enda oku talavaya lolombongo viosi a nganyala oco a lande ovina vi sukiliwa vepata. Pole, konjanja eyi eye wa yonguile oku seleka onepa yolombongo kocina cikuavo. Eye wa yonguile oku kuata o tablet yimue oco a kapemo ovipama vio JW Library^®. Hulda wa kũlĩhĩle okuti olovideo kuenda ovipama vikuavo vi sangiwa vocimalẽho caco, via laikele oku u kuatisa oku mioñolola upange waye woku kunda kuenda elomboloko liaye Liembimbiliya.

Hulda wa enda oku talavaya olowola vivali kolomẽle viosi vokuenda kuosãi lomeyu oku tetola ovawe, oco a yukise okalosaliya kekalu limue litito. Kuenje wa kuata olombongo vi tẽla oco a lande o tablet.

Hulda wa popia hati: “Ndaño loku kava calua kuenda oku yeva evalo omo lioku tetola ovawe, vocipikipiki nda ivalako evalo nda kuata omo lioku talavaya lo tablet yaco yokaliye, oco yi ndi kuatise kupange woku kunda kuenda oku pongiya olohongele lonjila ya leluka.” Eye wa popiavo hati, o tablet ya kuatisa vokuenda kuefengi, momo ovopange osi ekongelo a kala oku lingiwa pocakati covimalẽho. Tu sanjukili kumosi la Hulda omo a tẽlisa ocimãho caye.