OCIPAMA 35
Ndi Pondola Oku Kala Ndati Ekamba Lia Suku?
Jeremy noke yoku lipita locitangi cimue, wa fetika oku kuata elomboloko liesilivilo lioku livala ukamba la Suku. Eye hati, eci nda kuata 12 kanyamo, isiange wa yanduluka epata lietu. “Vuteke umue nda kala oku likutilila kohama oku pinga ku Yehova oco a vetiye isiange oku tiuka.”
Lekambo lielavoko, Jeremy wa fetika oku tanga Embimbiliya. Eci a sanga elivulu Liosamo 10:14 eye wa komõha calua. Osamo yaco yi popia eci catiamẽla ku Yehova hati: “Omunu wa hongua o lupukila kokuove; Ove wuñuatisi yomõla ka kuete isia.” Jeremy wa popia hati: “Nda liyeva okuti Yehova wa kala oku vangula lame, loku lekisa okuti oñuatisi yange haye Isiange. Onjali yipi yo velapo nda ponduile oku kuata okuti eye o sule?”
CI KAILE okuti o kasi oku lipita locitangi ndeci ca Jeremy ale sio, Embimbiliya li lekisa okuti Yehova o yongola okuti ove o kala ekamba liaye. Eli olio esunga Embimbiliya li popela hati: “Ameli ku Suku kuenje eye amela kokuene.” (Tiago 4:8) Sokolola kelomboloko liolondaka evi: ndaño okuti ku pondola oku u mola kuenda wa litepa love kovina viosi, Yehova o kasi oku ku laleka oco o kale ekamba liaye!
Pole, oco o kale ekamba lia Suku ci sukila elikolisilo konepa yove. Ndocindekaise: nda o kuete ocikũla vocikuata cimue, wa kũlĩha okuti ka ci kuli likaliaco. Oco ci kule o sukila oku ci tapela kuenda oku citata ciwa. Cimuamue haico ci pita linga ukamba la Suku. O pondola oku kuatisa ndati oco ukamba waco wamameko oku kula?
Esilivilo lioku Lilongisa Embimbiliya
Voku linga ukamba mua kongela oku sapela kuenda oku yevelela. Cimuamue haico ci pita luku linga ukamba la Suku. Oku tanga kuenda oku lilongisa Embimbiliya onjila yimue yoku yevela eci Suku a yongola oku tu sapuila.—Olosamo 1:2, 3.
Ocili okuti pamue ku sole oku lilongisa. Amalẽhe valua va sole vali oku tala o televisão, oku linga omapalo yimue, ale oku kala lakamba. Pole, nda o yongola oku linga ukamba la Suku, ka kuli onjila yi kuavo, ove o sukila oku u yevelela poku tanga Ondaka yaye.
Ku ka li sakalaise. Oku tanga Embimbiliya ka ci sukila oku kala ocilemo. Ove o pondola oku lilongisa oku sola oku ci linga, ndaño o litenda okuti ku sole oku lilongisa. Ocina catete o pondola oku linga oku sokiya otembo oco o lilongise Embimbiliya. Umalẽhe umue o tukuiwa Lais wa popia hati: “Ñuete esokiyo limue. Ocina catete ndi linga komẽle oku tanga ocipama cimue Cembimbiliya.” Maria o kuete 15 kanyamo wa linga esokiyo lia litepa. Eye hati: “Nda siata oku tanga ocinimbu cimue Cembimbiliya osimbu sia pekele.”
Oco o fetike esokiyo liove lioku lilongisa, tala o ka kasia kemẽla 292. Noke, soneha vombuelo elivala o pondola oku tumbika 30 kakukutu poku lilongisa ondaka ya Suku.
․․․․․
Oku linga esokiyo limue efetikilo lika. Noke yoku fetika oku lilongisa, o ka limbuka okuti halonjanja viosiko oku tanga Embimbiliya ca leluka. Citava okuti o tava kolondaka via Jezreel o kuete 11 kanyamo wa popia lutima wosi hati: “Olonepa vimue Viembimbiliya ka via lelukile oku vi tanga kuenda ka vi vetiya.” Nda o simavo ndoco, ku ka liwekepo. Olonjanja viosi o tanga Embimbiliya, sokolola okuti oyo otembo wa sokiya yoku yevelela Yehova Suku, ekamba liove. Nda wa likolisilako oku ci linga, o ka sola loku tenda ndesumũlũho oku lilongisa Embimbiliya!
Ohutililo yi Kuete Esilivilo
Tu pondola oku sapela la Suku pocakati cohutililo. Sokolola kombanjaile yi komohĩsa yohutililo! O pondola oku sapela la Yehova Suku va livala osi ci kale lutanya ale luteke. Eye o yongola oku yevelela ovina o yongola oku popia. Olio esunga lieci Embimbiliya livetiyila ndoco: “Kovina viosi lolohutililo kuenda apingilo kumue loku eca olopandu, apingilo ene a kũlĩhĩwe la Suku.”—Va Filipoi 4:6.
Ndomo ca lekisiwa kocinimbu eci, kuli ovina vialua o pondola oku sapela la Yehova. Vovina viaco mua kongela ovitangi viove, asakalalo kuenda ovina o sukila oku eca olopandu. Kua siatele hẽ oku eca olopandu kakamba vove omo liovina viwa ovo va ku lingila? Omo liaco, ecavo olopandu ku Yehova wa linga ale ovina vialua kokuove, okuti lalimue ekamba nda lia ci linga.—Olosamo 106:1.
Soneha pombuelo ovina vimue o yongola oku eca olopandu ku Yehova.
․․․․․
Ocili okuti kuli usumba kuenda asakalalo okuti olonjanja vimue vi kala ndocilemo kokuetu. Osamo 55:22 yi popia hati: “Imba ocilemo cove ku Yehova. Kuenda eye o ka ku kuatisa. Eye lalimue eteke a ka ecelela okuti, ukuesunga o kupuka.”
Vulala u kasi pombuelo sonehamo ovina vi ku sakalaisa okuti o pondola oku vi kongela vohutililo.
․․․․․
Ulandu Womuenyo
Kuli ocina cikuavo catiamẽla kukamba wove la Suku okuti ka citava oku ci ivala. Ukualosamo Daviti wa soneha ndoco: “Seteki kuenda limbuki okuti Yehova uwa.” (Olosamo 34:8) Eci Daviti a soneha Osamo 34, wa kala oku liyaka locitangi cimue ci saluisa. Eye wa kala oku tila oco ka ka pondiwe la Soma Saulu, okuti ca kala o seteko yinene. Pole noke, wa sukilile oku sanda ocitililo pokati kovanyali vaye va filisiti. Ndaño ca molehele okuti wa laikele oku fa, Daviti, wa talavaya luloño woku sokolola poku likembisa oku kala eyui kuenje wa tẽla oku puluka.—1 Samuele 21:10-15.
Daviti wa tẽla oku puluka, pole, ka li sivayele eye muẽle omo liuloño wa lekisa. Wa eca esivayo liaco ku Yehova. Kefetikilo Liosamo ya tukiwa konano wa soneha ndoco: “Nda likutilila ku Yehova kuenje eye wa nambulula. Eye wa ndi yovola kusumba wange wosi.” (Olosamo 34:4) Omo liaco, ulandu Daviti a li pita lawo wo kuatisa oku vetiya vakuavo oku ‘limbuka okuti Yehova uwa.’a
O tẽla hẽ oku ivaluka ocina cimue ca li pita love ci lekisa okuti Yehova o kasi oku kutata? Nda oco, soneha ovina viaco pulala u kasi pombuelo. Ocisimĩlo: Ulandu wove ka u sukila oku komohĩsa. Seteka oku sokolola ka sumũlũho eteke leteteke, ana okuti ca leluka oku a kapako.
․․․․․
Citava okuti olonjali viove ovio via ku longisa Embimbiliya. Nda oco, eli esumũlũho limue. Pole, ove muẽle o sukila oku kuata ukamba la Suku. Nda kua ci lingile handi, ulandu wocipama cilo u pondola oku kuatisa oku ci fetika. Yehova o ka sumũlũisa a likolisilo ove. Embimbiliya hati: “Lipiliki oku pinga kuenje va ko wĩhi; lipiliki oku sandiliya kuenje vu ka sanga.”—Mateo 7:7.
TANGA VALI CATIAMẼLA KULANDU OWU VONEPA 1, KOCIPAMA 38 KUENDA 39
KOCIPAMA CI KUAĨMO
Osima hẽ okuti ka ca lelukile kokuove oku vangula catimẽla ku Suku ku vakuẽle? Lilongisa ndomo o teyuila ekolelo liove.
[Etosi]
a Ambimbiliya amue va pongolola olondaka “Seteki kuenda limbuki” ndoco, “sanda oku limbuka ove muẽle”, “kũlĩhĩsa loku ci limbuka” kuenje “o ka ci mola.”—Bıblia na Linguagem de Hoje, O Livro: A Bıblia para Hoje kuenda The Bible in Basic English.
OCISONEHUA CA VELAPO
“Va sumũlũha vana va kuete enyona liukũlĩhĩso wa Suku.”—Mateo 5:3.
OCISISIMĨLE
Tanga lika amẽla akuãla Embimbiliya veteke kuenje o ka li mala oku li tanga vokuenda kunyamo umosi.
WA CI KŨLĨHA . . . ?
Omo okuti o kasi oku tanga elivulu eli, loku kapako alungulo Embimbiliya a sangiwamo o kasi oku lekisa okuti Yehova wa ku kapako.—Yoano 6:44.
ESOKIYO LIOKU CI LINGA!
Oco njupe esilivilo kelilongiso liange lio pokolika Liembimbiliya ndi linga ․․․․․
Oco ndi likutilile olonjanja viosi ndi linga ․․․․․
Njongola oku pulisa kolonjali viange catiamẽla kondaka eyi: ․․․․․
O TAMBULULA NDATI
● O kuata ndati elilongiso limue lio pokolika li sanjuisa?
● Momo lie Yehova a yonguila oku yevelela olohutililo viomanu ka va lipuile?
● O mioñolola ndati olohutililo viove?
[Olondaka vi teta onimbu]
“Eci nda kala omõla, olohutililo viange via kala vioku pitolola. Cilo, ndi seteka oku likutilila ovina viwa levi vĩvi vieteke leteke. Momo oloneke ka via li sokaile, eci ci ñuatisa oku yuvula oku popia ovina vimuame olonjanja viosi.’—Eve
[Okakasia/Ociluvialuvia kemẽla 292]
Kũlĩhĩsa ondongosi Embimbiliya liove
1. Nõla ulandu umue Wembimbiliya o yongola oku tanga. Likutilila oku pinga olondunge oco o kuate elomboloko liulandu.
2. Tanga ulandu waco lutate. Ku ka ci linge lonjanga. Talavaya luloño woku sokolola osimbu o tanga. Likongela vulandu waco: seteka oku limbuka ovina vi kasi oku pita, oku yevelela olondaka viomanu va tukuiwa vulandu, oku yeva elemba vofela, oku litoviwa okulia kuenda ovina vikuavo. Lekisa ndu okuti wa kongeliwa vulandu waco.
3. Sokolola kueci wa mala oku tanga. Lipula ovemuẽle ndoco:
● Momo lie Yehova a kongelela ulandu owu Vondaka yaye?
● Omanu vapi va sesamẽla oku setukuiwa kuenda ovolandu api elungulo?
● Ovina vipi ndi lilongisila ko ku tanga ulandu owu?
● Ulandu owu u ndi liongisa nye catiamẽla ku Yehova kuenda konjila ndomo eye a linga ovina?
4. Linga ohutililo ku Yehova ya teta onimbu. Sapuila kokuaye ovina wa lilongisa kelingiso wa linga kuenda ndomo o yongola oku kapako ukũlĩhĩso waco komuenyo wove. Olonjanja viosi pandula Yehova omo liombanjaile a ku ĩha—Ondaka yaye Embimbiliya likola!
[Ociluvialuvia]
“Ondaka yove oyo ondiyelo yomãhi yange, Kuenda ocinyi conjila yange.”—Olosamo 119:105.
[Okakasia/Ociluvialuvia]
Catete Ovina via Velapo
Ku kuete otembo yoku likutilila? Ku kuete otembo yoku lilongisa Embimbiliya? Ovina evi via tamba konjila ndomo o tenda ovina wa pitisa kovaso
Linga o seteko yimue: Kuata ocihenjo cimue kuenda kapamo ovawe anene. Ci yukisa leseke toke kemẽla. Cilo, wa ci yukisa lovawe kuenda eseke.
Kaliye pesela ovina viaco, pole ku ka vinasi. Kuenje ci linga lonjila yikuavo: Yukisa ociyenjo leseke noke seteka oku kapamo ovawe. Ka a suimo? Esunga liaco lieli okuti, onjanja eyi wa kapa tete eseke.
Nye tu lilongisilako? Embimbiliya liti: ‘kũlĩhi ovina via velapo vali.’ (Va Filipoi 1:10) Nda wa pitisa kovaso ovina vitito ndeci ovitalukilo, lalimue eteke o ka kuata otembo yoku linga ovina via velapo ndeci ovopange espiritu. Pole, nda wa kuama onumbi eyi Yembimbiliya o ka limbuka okuti o kuete otembo yoku linga ovina Viusoma kuenda yoku linga olomapalo. O sukila lika oku kũlĩha ovina o kapa tete vociyenjo.
[Ociluvialuvia]
Ndeci ocikũla ci kasi vo cikuata cimue ukamba la Suku u sukila oku tatiwa oco wamamako oku kula.