ELILONGISO 15

Vangula Lekolelo

1 Va Tesalonike 1:5

CECI O SUKILA OKU LINGA: Lekisa okuti eci o kasi oku popia ocili kuenda ci kuete esilivilo.

Lipongiya ciwa. Pongiya onepa yove toke eci o kuata elomboloko liovisimĩlo via velapo. Lekisa ndomo Embimbiliya li situlula okuti alomboluilo aco ocili. Seteka oku lombolola atosi a velapo volondaka via leluka. Kũlĩhĩsa ndomo onepa yaco yi ka kuatisa olonjeveleli viove. Pinga espiritu sandu vohutililo.

Poku pongiya, tanga lolukandi oco o kuate elomboloko liwa lionepa yaco okuti, o litunda ciwa.
Vangula olondaka vi situlula ocili. Ku ka pitolole olondaka ndomo via sonehiwa vopapelo, pole vangula volondaka viove muẽle. Nõla upopi u lekisa okuti, wa kolela kueci o kasi oku popia.
Lekisa okuti wa kolela lutima wosi kueci o vangula. Vangula locileñi ci yevala. Vanja vanja kovipala viomanu nda ca sunguluka oku ci linga kocitumãlo cene.

Oku vangula lekolelo, ka ci lomboloka oku vangula lekambo liolondunge, lolonamalãla, ale oku vangula lukãlu. Ndaño ceci o vangula lutõi, vetiya omanu locisola.