Ocivaluka?

Ove hẽ wa sola oku tanga ovipama Viutala Wondavululi via sandekiwa volosãi via pita? Nda wa vi sola, seteka oku tambulula apulilo a kuãimo:

• Tu pondola ndati oku vangula “upopi wa pua esanda,” watiamẽla ku Suku kuenda kocipango caye? (Sof. 3:⁠9)

Oco tu vangule ciwa “upopi wa pua esanda,” tu sukila oku yevelela lutate, oku kuama ongangu ya vana va vangula ciwa elimi liaco, oku patekela olonduko vialivulu kuenda ovinimbu vimue Viembimbiliya. Tu sukilavo oku pitolola eci tua lilongisa, oku tanga lolukandi, oku kũlĩhĩsa elomboloko liolondaka, oku amamako loku loñoloha, kuenda oku sokiya otembo yoku lilongisa oku “vangula” upopi wa pua esanda.​—⁠15/8, kemẽla 21-25.

• Nye ca kongeliwa voku kũlĩha ndomo Suku a tuwa?

“Yehova oyo onduko yaye,” kuenda o yongola okuti, omanu vosi vo kũlĩha. (Etu. 15:⁠3) Yehova eye “Suku yocisola lombembua.” (2 Va Kor. 13:​11) Handi vali, eye “Suku yukũlĩhiso,” kuenda “yeyovo.” (1 Sam. 2:3; Osa. 25:⁠5) Omo liaco, Suku o kuete ukamba lomanu vaye.​—⁠1/9, kemẽla 4-7, kelimi Lioputu.

• ‘Ukolo wa ketikiwa lutatu’ u tiamisiwila ndati kolohuela?

‘Ukolo wa ketikiwa lutatu,’ upopi umue wocindekaise. (Uku. 4:​12) Ondaka yaco yi lomboloka okuti, ulume lukãi va kongela Suku volohuela viavo. Nda va ci linga, Suku o va kuatisa oku tetulula ovitangi via siata volohuela, kuenda va kuata esanju.​—⁠15/9, kemẽla 16.

• Ondaka oku “kapa ovaka,” ya tukuiwa kelivulu lia Va Heveru 6:​2, yi lomboloka nye?

Ondaka yaco, ka yi tiamisiwila lika kakulu vekongelo, pole, yi tiamisiwilavo koku eca olombanjaile viespiritu. (Ovil. 8:​14-17; 19:⁠6))​—⁠15/9, kemẽla 32.

• Isia uwa, o limbuka ndati ovina omõla a sukila?

Omãla va sukila ovina vimue ndeci: (1) Oku lekisa ocisola kokuaye. (2) Oku lekisa ongangu yiwa. (3) Oku kuata ekalo liwa. (4) Oku va longisa esilivilo liovina viespiritu. (5) Oku va pindisa. (6) Kuenda oku va teyuila.​—⁠1/10, kemẽla 18-21, kelimi Lioputu.

• Vamanji va kuete ovikele vekongelo va pondola ndati oku sumbila vakuavo?

Va ci linga, poku yuvula oku kisika vakuavo ovina ovo ka va yongola oku linga. Ovo va lekisavo esumbilo, poku lombolola esunga lieci va tumila oku linga upange umue.​—⁠15/10, kemẽla 22.

• Ovina vipi vi kuatisa oku pamisa olohuela?

Kuli ovina vivali ndeci: (1) Oku velisapo olohuela viene. (2) Oku yuvula ovina vi nyõla olohuela. Nda u kasi ciwa, ale u kuete ovitangi vepata, u sukila oku kũlĩha ovina vi pondola oku pamisa olohuela viene. Nda wa pokoli katosi avali a tukuiwa ndeti, u kuata esanju lialua.​—⁠1/11, kemẽla 18-21.

• Akulu vekongelo va pondola ndati oku kuama ongangu ya va Isareli yoku teyuila olomeme lohunya?

Kotembo ya va Isareli, angombo va enda oku ambata ohunya yoku teyuila olomeme viavo. Olomeme poku iñila vocunda, ‘via enda oku pita vemehi liohunya’ oco vi tendiwe lungombo. (Ovis. 27:​32) Cimuamue haico ukulu wekongelo a sukila oku linga poku kũlĩha olomeme via Suku, kuenda oku vi tata ciwa.​—⁠15/11, kemẽla 9.

• Onjali yukãi yi pondola ndati oku limbuka esilivilo lioku liyelisa?

Omo okuti, ovikulia vi pondola oku kuatiwa lovovei alua, osimbu onjali ka ya fetikile oku teleka okulia, yi sukila oku pusa peka kuenda oku tuvika okulia. Yi sukila oku yelisa onjo oco a yuvule olomuku, lovipuka vikuavo. Mua kongelavo oku sukula uwalo, kuenda oku yua olonjanja viosi. Momo Embimbiliya li tu vetiya oku linga ovina viaco.​—⁠1/12, kemẽla 9-11, kelimi Lioputu.