WA CI KŨLĨHA?

Kosimbu, nda omunu wa tola uwalo waye ocipango, ca kuatele elomboloko lie?

EMBIMBILIYA li lombolola ovolandu a litepa atiamẽla komanu va tola uwalo wavo. Ndaño okuti koloneke vilo ocituwa caco ci molẽha ndu okuti ka ca sungulukile, pole, ku va Yudea ocituwa coku tola uwalo ca lombolokele esumuo, oku kutisiwa osõi, kuenda oku kuata onyeño.

Ulandu wa Ruvene u lekisa okuti, “wa tola tola uwalo waye,” eci a limbuka okuti, ocisimĩlo a kuata coku yovola manjaye Yosefe ka ca tẽlisiwile. Momo, Yosefe wa landisiwile kupika. Isiavo Yakoba, ‘wa tola tolavo uwalo waye,’ eci vo sapuila okuti, omõlaye Yosefe wa liwa locinyama cimue ca tema. (Efet. 37:18-35) Yovi “wa tola tola uwalo waye,” eci vo sapuila hati, omãla vaye vosi va pondiwa. (Yovi 1:18-20) Eteke limue, omunga yimue ya molẽha Kocitunda Cinene Eli ‘luwalo wa toka toka,’ kuenje, wo sapuila hati, va Isareli va yuliwa kuyaki, omãla vove vavali va pondiwa, kuenda ocikasia covisila ca ambatiwa. (1 Sam. 4:12-17) Eci Yosiya vo tangela olondaka Viocihandeleko, noke yoku limbuka ovina vĩvi omanu va kala oku linga, co vetiya oku “tola tola uwalo waye.”—2 Olos. 22:8-13.

Eci Yesu a kala oku talisiwa ohali, Kayafa una wa kala Ocitunda Cinene, “wa tola tola uwalo waye,” omo lioku yeva okuti, wa linga esombiso limue ka lia sungulukile. (Mat. 26:59-66) Ocihandeleko ca va Rambei ca lekisile okuti, omunu wosi o popia etonãi onduko ya Suku, o kisikiwa oku tola uwalo waye. Ocihandeleko cikuavo ca kapiwile la va Rambei noke yoku nyõliwa kuonembele yo Yerusalãi ca popia ndoco: “Koloneke vilo, nda wa yeva omunu umue o popia etonãi onduko ya Suku, ka sukila oku tola uwalo waye. Momo, nda ca lingiwa uwalo womunu waco u toluiwa toke eci u linga ocinyaña.”

Ocili okuti, oku tola uwalo ku kuata lika esilivilo kovaso a Suku, nda omunu waco poku ci linga o lekisa esumuo lutima waye wosi. Omo liaco, Yehova wa sapuilile afendeli vaye hati, va sukilile ‘oku tola ovitima viavo, pole, uwalo wavo hawoko, oco va taviwe vali laye.’—Yoe. 2:13.