Wa Sanjukila hẽ Oku Lavuluiwa la Yehova?

1, 2. Onjila Yehova a siata oku kuama poku tu lavulula, ya litepa ndati lolomakina vioku lavulula?

KOLOFEKA vialua, olombiali via siata oku kapa olomakina vioku lavulula kuenda vioku ngalavala, oco vi kũlĩhĩse ovitangi vi pita volupale ndeci oku litusula kuoviendelo. Nda olomakina viaco via ngalavala akãlu a litusula la akuavo, ci kuatisa olombiali oku sandiliya omanu vaco loku va kapa vokayike. Omo liekuatiso liolomakina viaco, vana va litusula lakãlu akuavo, ka va tẽla oku puluka kovitangi viaco.

² Anga hẽ olomakina vioku lavulula vi tu ivaluisa Yehova Isietu ukuacisola? Embimbiliya li tu sapuila okuti, “ovaso a Yehova a lete kuosi.” (Olosap. 15:3) Eci hẽ ci lomboloka okuti Yehova o tu lavulula lika nda tu kasi oku lueya ovihandeleko viaye? Anga hẽ o tu lavulula lika oco a tu kisike oku pokola kovihandeleko viaye locimãho coku tu kangisa? (Yer. 16:17; Va Hev. 4:13) Sio hacoko! Yehova wa siata oku tu lavulula omo liocisola a tu kuetele , kuenda wa kapako ekalo liomunyo wetu.—1 Pet. 3:12.

3. Ovina vipi vitãlo viatiamẽla ku Yehova ukuacisola tu konomuisa?

³ Nye ci tu kuatisa oku sanjukila ndomo Yehova a siata oku tu lava omo liocisola a tu kuetele? Tu konomuisi ndomo a siata oku ci linga. Eye wa siata oku ci linga, (1) poku tu lungula eci tu linga ovina ka via sungulukile, (2) poku tu ĩha olonumbi eci tu kuama onjila yimue ka ya sungulukile, (3) poku tu songuila lolonumbi vi sangiwa Vondaka yaye, (4) poku tu kuatisa eci tu liyaka lovitangi, kuenda (5) poku tu sumũlũisa eci a limbuka okuti, tu kuete ovituwa viwa.

YEHOVA UKUAKULAVULULA O TU LUNGULA

4. Ocisimĩlo cipi Yehova a kuata, eci a lungula Kaini hati, ‘ekandu li kasi puvelo’?

⁴ Catete, tu konomuisi ndomo Yehova a siata oku tu lungula, eci tu kuata ovisimĩlo ka via sungulukile. (1 Asa. 28:9) Oco tu sanjukile ocituwa ca Yehova coku tu lavulula, tu konomuisi ndomo a tendele Kaini eci ‘onyeño yaye ya wenguka,’ omo Yehova ka tavele ocilumba caye. (Tanga Efetikilo 4:3-7.) Yehova wa sapuilile Kaini hati, nda ka ‘lingile ovina viwa,’ o lueya. Momo, elinga liaco, lia kala ndu okuti, ‘ekandu li kasi puvelo’ oco a lueye. Omo liaco, Yehova wo pula hati: “Nye wa temẽla?” Yehova wa yonguile okuti, Kaini o tava kalungulo aye, oco a ‘taviwe laye.’ Nda Kaini wa tavele kolonumbi via Yehova, nda co kuatisa oku kuata ukamba laye.

5. Yehova wa siata oku tu lungula ndati catiamẽla kovituwa ka via sungulukile tu kuete?

⁵ Nye ci popiwa catiamẽla kokuetu koloneke vilo? Ovaso a Yehova a lete ovina vi kasi vutima wetu, kuenda ka tu pondola oku u tateka oco ka ka limbuke ovisimĩlo viutima wetu. Isietu ukuacisola o yongola okuti, tu kuama onjila yesunga, pole, ka tu kisika oku linga apongoloko. Eye wa siata oku tu lungula lekuatiso Liembimbiliya, eci a limbuka okuti, tu kasi vonjila ka ya sungulukile. O ci linga ndati? Poku tanga Embimbiliya eteke leteke, pamue tu sanga ovinimbu vimue vi tu kuatisa oku yuvula ovituwa ka via sungulukile. Alivulu etu a tu kuatisa oku limbuka ocitangi tu kasi oku liyaka laco, kuenda a lekisa ndomo tu pondola oku ci yula. Kolohongele vietu, vosi yetu tua siata oku tambula alungulo votembo ya sokiyiwa!

6, 7. (a) Uvangi upi u lekisa okuti, Yehova wa siata oku tata locisola omunu lomunu pokati kafendeli vaye? (b) O pondola ndati oku sanjukila ekuatiso Yehova a siata oku eca komunu lomunu?

⁶ Alungulo osi a sangiwa Vembimbiliya a lekisa okuti, Yehova o sole omunu lomunu pokati ketu. Ocili okuti, olondaka vi sangiwa Vembimbiliya, valivulu etu a pongiyiwa locisoko ca Yehova, kuenda alungulo a eciwa kolohongele vietu, via siata oku kuatisa omanu valua. Pole, Yehova o yongola okuti, o tiamisila utima wove Kondaka yaye, oco o pongolole ovisimĩlo ka via sungulukile. Ovina via tukuiwa ndeti, vi eca uvangi wokuti, Yehova wa siata oku ku tata locisola.

⁷ Oco tu kuatisiwe lalungulo a Yehova Suku, tete, tu sukila oku limbuka okuti, wa tu kapako. Omo liaco, tu sukilavo oku kapako Ondaka ya Yehova, poku yuvula ovisimĩlo viosi viu sumuisa. (Tanga Isaya 55:6, 7.) Nda tua pokola kalungulo tu tambula, ci tu kuatisa oku yuvula ovina vi nena esumuo. Citava okuti tu tiamisila utima wetu kovina ka via sungulukile. Pole, ekuatiso lipi Isietu ukuacisola a pondola oku tu ĩha?

ISIETU UKUACISOLA O TU LUNGULA

8, 9. Nda umue o tu ĩha elungulo li tunda Vembimbiliya, ceca ndati uvangi wokuti, Yehova o tu tata ciwa? Tukula ulandu umue.

⁸ Pamue tu lekisa esakalalo eci tu tambula elungulo li tunda ku Yehova. (Tanga Va Heveru 12:5, 6.) Ocili okuti, pamue tu sumua eci va tu lungula, ale ceci tu pindisiwa. (Va Hev. 12:11) Pole, sokolola ovina omunu o tu ĩha elungulo a sukila oku konomuisa. Eye, o sukila oku kũlĩhĩsa ovina tu kasi oku linga okuti, vi pondola oku tepa ukamba wetu la Yehova Suku. O sukilavo oku kapako ovisimĩlo vietu, oku sandiliya otembo yoku lekisa Vembimbiliya okuti, tu limbuka ndomo tu pondola oku linga apongoloko, oco tu sanjuise Yehova. Tua sumbila alungulo aco, momo a tunda ku Yehova.

⁹ Tu konomuisi ulandu u lekisa ndomo vakuakueca alungulo va pondola oku kuama ongangu ya Yehova, yoku lekisa esakalalo poku eca alungulo. Manji umue osimbu ka fetikile oku lilongisa Embimbiliya, wa enda oku tala omanu va kasi epolõla haivo va linga ukahonga, noke wa yula ocituwa caco. Pole, wa enda oku sokolola ovina viaco, kuenje onjongole yoku vi tala vali, ya kala ndondalu kutima waye. Onjongole yaco yeya oku livokiya, eci a landa otelefone yokaliye. (Tia. 1:14, 15) Kuenje, wa fetika vali oku tala omanu va kasi epolõla haivo va linga ukahonga vo Internet. Eteke limue eci a kala oku kundila omanu lekuatiso lio telefone, wa yeca kukulu umue wekongelo, oco o kuatise oku sanga ovitumãlo ku sangiwa omanu vamue. Osimbu ukulu wekongelo a kala oku sandiliya ovitumãlo viaco, kua molẽha omanu va kasi epolõla vo Internet. Kuenje, ukulu wekongelo wa kuata epuluvi lioku eca elungulo ku manji yaco. Omo okuti wa tava kelungulo a tambula, co kuatisa oku yuvula ocituwa caco. Yehova wa siata oku mola akandu ana ka tua situluile, kuenda o pondola oku tu lungula osimbu ka tua nyõlele ukamba wetu laye!

TU KUATISIWA POKU KAPAKO OLONUMBI VIEMBIMBILIYA

10, 11. (a) O pondola ndati oku pinga ekuatiso ku Yehova oco a ku songuile? (b) Ulandu wepata limue u lekisa ndati esilivilo lioku pokola kolonumbi via Yehova?

¹⁰ Ukualosamo wa imbila ocisungo Yehova hati: “O ndi songuila lelungulo liove.” (Osa. 73:24) Tu pondola oku ‘limbuka’ olonumbi via Yehova, poku tanga Embimbiliya. Nda tua ci linga, tu kũlĩha ovisimĩlo viaye, loku kuama olonumbi viaye, kuenda oku amamako oku kuata ukamba laye. Oku kapako olonumbi Viembimbiliya, ci pamisa ukamba wetu la Yehova, kuenda oku tata ciwa epata lietu.—Olosap. 3:6.

¹¹ Uvangi u lekisa ndomo Yehova a siata oku songuila omanu vamue, tu u limbukila kulandu wulume umue lepata liaye okuti, va fetela epia limue li sangiwa kolomunda vio Masbate, kofeka yo Filipina. Eye kumue lukãi waye, va kala akundi votembo yosi, osimbu va tekula epata liavo linene. Eteke limue, va tambuile esapulo lia va sumuisa lia tunda ku muẽle yepia wa popia hati, va sukila oku tunda vepia liaco. Momo lie? Momo, kua kala umue wa va lundila hati, olohembi. Ndaño okuti manji yaco wa kuatele esakalalo lioku sanga ocitumãlo coku kala lepata liaye, pole, wa popia hati. “Yehova o ka tu kuatisa. Olonjanja viosi wa siata oku tu ĩha ovina tu sukila, ndaño lovitangi.” Manji yaco wa kuata onima omo liekolelo a lekisa. Noke lioloneke vimue, muẽle ukuepia, wa va sapuila oco vamameko oku kala vepia liaco. Momo lie? Momo, muẽle ukuepia wa komõha calua, poku limbuka ovituwa viwa epata lia lekisa omo lioku songuiwa lolonumbi Viembimbiliya, ndaño wa va lundilile. Omo liaco, wa pongolola ovisimĩlo viaye, kuenje, wa va ĩhavo ovapia akuavo oco vamameko oku a lima. (Tanga 1 Petulu 2:12.) Ocili okuti, Yehova wa siata oku tu songuila lekuatiso Liondaka yaye, oco tu tẽle oku liyaka lovitangi komuenyo wetu.

EKAMBA LIMUE LI TU KUATISA POKU LIYAKA LOVITANGI

12, 13. Kovina vipi omanu vamue va siata oku lipula nda Yehova ka lete ovitangi va siata oku liyaka lavio?

¹² Olonjanja vimue, tua siata oku liyaka lovitangi. Citava okuti, tu liyaka luvei umue ka u kuete ovihemba vioku u sakula, elambalalo li tunda kepata lietu, ale kolonepa vikuavo. Nye ci popiwa catiamẽla koku pandikisa kovitangi vamanji vamue va siata oku liyaka lavio vekongelo, omo liekalo lia litepa?

¹³ Pamue o sumua omo lia manji umue wa ku popia ondaka yimue ka ya sungulukile. Kuenje, o sima ndoco: ‘Ka ca sungulukile okuti vocisoko ca Yehova mu pita ocitangi eci!’ Pole, noke o limbuka okuti, manji una wa ku sumuisa o tambula ovikele vialua vekongelo, kuenje, omanu vakuavo va sima okuti, omunu umue uwa. Omo liaco, ci ku vetiya oku lipula ndoco: ‘Momo lie a tambuila ovikele? Anga hẽ Yehova ka lete ovitangi viaco? Ka pondola hẽ oku vi tetulula?’—Osa. 13:1, 2; Hav. 1:2, 3.

14. Ovina vipi vi lekisa esunga lieci Yehova ka tetuluila lonjanga ovitangi vietu?

¹⁴ Citava okuti Yehova o kuete esunga lieci ka tetuluila lonjanga ocitangi cimue. Ndaño pamue o sima okuti omunu ukuavo eye o kuete ekandu lia lua, pole, Yehova o tenda ovina lonjila ya litepa. Momo, pamue Yehova oku tenda okuti, ove o kuete ekandu lia lua, pole, ku tẽla oku ci limbuka. Olondaka vina o sima okuti, vi pondola oku ku nenela esumuo, ovio o sukila oku kũlĩhĩsa lutate. Manji Karl Klein, una wa pangele onepa kocimunga Cosungu Yolombangi Via Yehova, eci a lombolola ulandu womuenyo waye wa lekisa okuti, onjanja yimue wa tambuile elungulo ku Manji J. F. Rutherford okuti lio sumuisile calua. Noke liotembo yimue, eci manji Rutherford a lama lesanju manji Klein hati: “O kasi ciwa?” Ko tambuluile lesanju, omo lielungulo ka solele. Pole, Manji Rutherford wa limbuka okuti Manji Klein wa sumua omo lielungulo a ecele kokuaye. Omo liaco, Manji Rutherford wo lungula vali oco ka ka yapuisiwe Leliapu. Noke, Manji Klein wa soneha ndoco: “Nda tu kuatela ocikumbiti manji umue, ca piãla enene eci a tu ĩha elungulo limue, ci leluka oku yapuisiwa Leliapu.”a

15. Nye ci tu kuatisa oku yuvula oku pua epandi poku liyaka lovitangi vi sukila ekuatiso lia Yehova?

¹⁵ Pamue tu pua epandi eci tu liyaka lovitangi vi molẽha ndu okuti, ka vi kuete esulilo. Tu pondola oku vi yula ndati? Sokolola ndeci okuti, o kasi oku endisa ekãlu limue vetapalo lie yuka akãlu alua. Pole, kua kũlĩhĩle otembo o kala vetapalo liaco. Nda wa kuata onyeño, kuenje, o ñualela konele yikuavo, citava okuti o nyelẽla, kuenje, o pesela otembo yalua oco o pitĩle kocitumãlo o yongola oku enda. Pole, nda wa pandikisa loku endela vetapalo li kuete akãlu alua, citava okuti, o pitĩla lonjanga kocitumãlo o yongola oku enda. Cimuamue haico ci pita letu poku liyaka lovitangi. Nda tua kuata epandi loku ecelela oku songuiwa lolonumbi Viembimbiliya, Yehova o tu kuatisa oku pandikisa.

16. Esunga lipi li lekisa okuti, pamue Yehova ka tetuluila lonjanga ovitangi vietu?

¹⁶ Yehova pamue ka tetulula lonjanga ovitangi vietu, momo o yongola okuti, vi tu kuatisa oku tambula epindiso tu sukila. (Tanga 1 Petulu 5:6-10.) Pole, Yehova hayeko wa siata oku tu kokela ovitangi. (Tia. 1:13) ‘Unyãli wetu Eliapu,’ eye wa siata oku tu kokela ovitangi. Pole, Yehova o pondola oku ecelela okuti, ocitangi cimue ci tu kuatisa oku pamisa ukamba wetu laye. Eye, wa siata oku mõla ovitangi tu liyaka lavio, kuenda ‘o tu tata ciwa.’ Momo, wa kũlĩha okuti, ohali yaco ka yi ka amamako ‘otembo yalua.’ Wa siata hẽ oku sanjukila oku lavuluiwa la Yehova eci o liyaka lovitangi, kuenda wa kolela okuti ndopo o ka vi malako?—2 Va Kor. 4:7-9.

ASUMŨLŨHO A TUNDA KU YEHOVA

17. Momo lie Yehova a siatela oku kũlĩhĩsa ovina vi kasi kovitima viomanu vosi?

¹⁷ Yehova wa siata oku kũlĩhĩsa ovitima vietu volonepa via litepa. Uprofeto Hananiya wa sapuila Soma Hasa hati: “Ovaso a Yehova a vanja vanja kuosi kilu lieve ha lekisa unene waye kuvakuavitima vio sungulukila.” (2 Asa. 16:9) Ndaño okuti Yehova ka muile ovina viosi via kala kutima wa soma Hasa, pole, o pondola oku “lekisa unene waye” kokuove, nda wa linga ovina via sunguluka.

18. Nda wa limbuka okuti, lomue wa sanjukila ovina wa siata oku linga, nye o sukila oku ivaluka catiamẽla ku Yehova? (Tala elitalatu kefetikilo liocipama cilo.)

¹⁸ Yehova o ‘sandiliya ovina viwa,’ o ‘sole ovina viwa,’ kuenda ‘o linga ovina viwa’ oco a ‘lekise ohenda’ kokuetu. (Amo. 5:14, 15; 1 Pet. 3:11, 12) Yehova wa kapako vakuesunga, kuenda o va sumũlũisa. (Osa. 34:15) Sokolola ulandu wakãi vavali vo ko Heveru, ndeci Sifira, la Puwa okuti, va kuatele ocikele coku kuatisa akãi poku cita. Eci va Isareli va kala kupika kofeka Yegito, akãi vaco vavali, va sumbilile calua Suku okuti Fareo una wa va kisikile oku ponda omãla vosi valume vo ko Heveru poku citiwa, ci sule. Omo okuti va sumbilile Suku, va nõlelepo oku yuvula oku ponda oloñaña viaco. Omo okuti Sifira la Puwa va lekisa ovituwa viwa, Yehova wa ecele kokuavo esumũlũho ‘lioku cita omãla.’ (Etu. 1:15-17, 20, 21) Yehova ka ivaleleko ovilinga viavo viwa. Olonjanja vimue tu sima okuti, lomue o lete ovina viwa tua siata oku linga. Pole, Yehova o lete ovina viosi tu linga. Eye, wa siata oku mola ovina viosi viwa tu u lingila, kuenda o ka tu ĩha onima.—Mat. 6:4, 6; 1 Tim. 5:25; Va Hev. 6:10.

19. Manji umue ukãi, wa limbuka ndati okuti, Yehova wa kapako ovina viosi viwa tu linga?

¹⁹ Manji umue ukãi wo kofeka yo Austria, wa limbuka okuti, Yehova wa kapako upange walua a siata oku linga. Omo okuti wa tiamẽla kepata lio ko Hungria, wa tambula onumbi yomunu umue o vangula elimi lio ko Hungria, oco o kuatise oku lilongisa Embimbiliya. Vepuluvi liaco, wa endele konjo yaco, pole, ka sangeleko omunu. Eye wa nyula konjo yaco vokuenda kunyamo umosi lolosãi epandu, loku sia alivulu, ovikanda, kuenda etendelo liotelefone yaye. Olonjanja vimue eci a pitĩla konjo yaco, wa enda oku sima okuti, kuli omunu, pole, lomue wo yuluila epito! Eteke limue, eci a endele konjo yaco, wa sangako ukãi umue wo yuluila epito, kuenje wa popia hati: “Citava oku iñila. Nda tanga ovina viosi wa enda oku nena, kuenje, ndi kasi oku ku kevelela.” Omo okuti ukãi waco wa kala oku sakuiwa uvei umue, wa simĩle okuti, ka citava oku sapela lomanu. Kuenje, wa tava oku lilongisa Embimbiliya. Omo liaco, manji wa limbuka okuti, Yehova wa mola alikolisilo aye, kuenje wo sumũlũisa!

20. Nye o sima catiamẽla ku Yehova omo a lete ovina viosi o linga?

²⁰ Yehova o lete ovina viosi o linga, kuenda o ka ku sumũlũisa. Ku ka sime okuti, Yehova wa siata oku sandiliya ovina vĩvi o linga, ale ongalavala vomakina yimue akulueya ove. Pole, tu vetiyiwa oku kuata ukamba laye omo lioku limbuka okuti, wa siata oku tu tata ciwa, o yongola oku tu kuatisa, kuenda o tu ĩha onima omo liovina viwa tu linga!