Anga Suku o Ñuatisa Nda Nda Likutilila?

Etambululo Liembimbiliya

Oco, Suku o kuatisa vana vo pinga lutima wosi ovina vi likuata locipango caye. Ndaño okuti kua la likutilila, pole, ovolandu a sangiwa Vembimbiliya omanu vana va likutilila oku pinga ekuatiso ku Suku, a pondola oku ku kuatisa. Ndeci:

• “A Yehova Suku yange, ngohele. Mopele ndocisola cove ka ci pui.”—Osamo 109:26.

• “Ame puãi ndihukũi, haime ndisuke. A Suku ove uñuatisi yange.”—Osamo 70:5.

Tua kũlĩha okuti omanu va soneha olondaka evi, va kuatela ekolelo lia pama ku Suku. Ocili okuti, Suku o yevelela vosi vana va lekisa ovituwa via sunguluka poku u sandiliya, oku kongelamo “vakuavitima via teka” ale “vana va kasi lovitima via samba.”—Osamo 34:18.

Ku ka sime okuti Suku ka kapeleko ovitangi o kasi oku liyaka lavio. Embimbiliya li popia ndoco: “Yehova, ndaño unene ca piãla, haimo ivaluka olohukũi. Vakuepela puãi, o va vanjela ocipãla.” (Osamo 138:6) Eteke limue Yesu wa sapuilile olondonge viaye hati: “Esinga liovitue viene liosi lia tendiwa.” (Mateo 10:30) Suku wa kũlĩha ovina viosi via tiamẽla kokuove okuti ove muẽle kua vi kũlĩhĩle. Eye o yevelela olohutililo o linga kokuaye poku u pinga ekuatise eci o liyaka lovitangi!—1 Petulu 5:7.