ẸBẸRE 9
Orua na Eje Kuomakugbe Ga Jihova
“Gọ ohwo ro ma odjuvwu vẹ akpọ.”—Ẹvwọphia 14:7
Kirobo wo yonori vwẹ ibroshọ nana, Baibol na ghene vọn vẹ uchebro re sa vwẹ ukẹcha kẹ wẹ vẹ orua wẹn. Jihova guọnọre nẹ wo vwo omavwerhovwẹn. O veri nẹ, siẹrẹ wo de phi ẹga rọyen phiyẹ ẹdia ẹsosuọ, “kọ vwẹ emu na ejobi ba kẹ wẹ.” (Matiu 6:33) Ọghẹnẹ guọnọ dia ugbeyan wẹn. Reyẹ kuphẹn kuphẹn ro rhiephiyọ eje vwọ bọn ugbeyan wẹn vẹ Ọghẹnẹ gan. Ọnana yen uphẹn rọ ma rho kparobọ rẹ ohwo se vwo.—Matiu 22:37, 38.
1 BỌN OYERINKUGBE WẸN VẸ JIHOVA GAN
OBO RI BAIBOL NA TARE: “Ke me dia ọsẹ kẹ ovwan, ovwan ke dia emeshare mẹ vẹ emetẹ mẹ, eriyin Ọrovwohwo ro vwo Ẹgba na tare.” (2 Kọrẹnt 6:18) Ọghẹnẹ guọnọre nẹ wọ dia uvi ugbeyan rọyen. Ẹrhovwo-ẹnẹ, ọyen idjerhe ọvo re se vwo ru ọnana. Jihova durhiuwe nẹ wọ “nẹ ẹrhovwo kẹdẹ kẹdẹ.” (1 Tẹsalonaika 5:17) Jihova vwo owenvwe rọ vwọ kerhọ rẹ obo rọhẹ ubiudu wẹn. (Filipae 4:6) Siẹrẹ wẹ vẹ orua wẹn da nẹrhovwo kuẹgbe, kẹ ayen se vughe Ọghẹnẹ kerẹ ohwo rẹ ayen rhiẹro mrẹ.
O ji fo nẹ wọ kerhọ rẹ Ọghẹnẹ, ọ ghwa dia ẹrhovwo-ẹnẹ ọvo-o. Wo se ru ọnana siẹrẹ wo de yono Ota Ọghẹnẹ vẹ ẹbe sansan revwo yono Baibol na. (Une Rẹ Ejiro 1:1, 2) Roro kpahen obo wo yono. (Une Rẹ Ejiro 77:11, 12) Ravwọ kerhọ rẹ Ọghẹnẹ ji churobọ si revwo kpẹ emẹvwa rẹ Inene-ri-Kristi kọke kọke.—Une Rẹ Ejiro 122:1-4.
Ravwọ vuẹ ihwoefa kpahen Jihova, ọyen idjerhe ọghanghanre ọfa ra sa vwọ bọn oyerinkugbe rẹ avwanre vẹ Jihova gan. Wo de ruẹ ọnana kọke kọke, wẹ vẹ ọyen ke cha kpẹkpẹ phiyọ.—Matiu 28:19, 20.
OBO WO SE RU:
Vwo ọrhuẹrẹphiyotọ wo vwo se Baibol na je nẹrhovwo kẹdẹ kẹdẹ
E jẹ orua na vwẹ ẹga rẹ Ọghẹnẹ vwọ kobaro kẹ akpọẹriọ vẹ omaerovwon
2 RIAVWERHEN RẸ ẸGA ORUA WẸN
OBO RI BAIBOL NA TARE: “Si kẹrẹ Ọghẹnẹ, rere o si kẹre owẹ.” (Jems 4:8) Ofori nẹ ovwan vwo ọrhuẹrẹphiyotọ rẹ ẹga orua, ovwan ji yan mu ọrhuẹrẹphiyotọ yena. (Jẹnẹsis 18:19) Ẹkẹvuọvo, ọyena ọvo teri-i. E jẹ Ọghẹnẹ dia ẹbẹre ọvo rẹ akpeyeren wẹn. Wọ sa bọn oyerinkugbe rẹ orua wẹn vẹ Ọghẹnẹ gan ọke wọ da tota kpahọn, “siẹ wo de tidia vwẹ uwevwi wẹn vẹ ọke ru wọ da yan vwẹ idjerhe, vẹ ọke wo de shevwerhe totọ, kugbe ọke wo de vrẹn.” (Urhi Rivẹ 6:6, 7) Brorhiẹn wọ vwọ vwẹrokere Joshua rọ tare nẹ, “vwọ kẹ vwẹ vẹ uwevwin mẹ, Ọrovwohwo ọvo ọyen avwanre ga.”—Joshua 24:15.
OBO WO SE RU:
Vwo ọrhuẹrẹphiyotọ rẹ ovwan vwọ tota kpahen ọdavwẹ rẹ ohwo vuọvo vwevunrẹ orua na