December

Jesu vwẹ oyerinkugbe rọyen vẹ ọ rẹ idibo rọyen vwo dje oyerinkugbe rọ herọ vwẹ uvwre rẹ osuigodẹ vẹ igodẹ rọyen. (Jọn 10:14) Udje yena nabọ shamu dẹn. Igodẹ na riẹn urhuru rẹ osuigodẹ na, ọtiọyena kẹ ayen kerhọ rọyen. Ọshare ọvo rọ je mrẹ emu ọtiọyen wan jovwore da ta: “Avwanre guọnọ reyọ ifoto rẹ igodẹ evo, ọtiọyena, avwanre da davwẹngba rere igodẹ na vwo sikẹrẹ avwanre. Ẹkẹvuọvo, ayen rhọnvwe bru avwanre rhe-e kidie ayen riẹn urhuru rẹ avwanre-e. Vwẹ etiyin na, omotete ọvo rọ dia osuigodẹ na da rhe, ugege ro ghwe vwo se ayen, ayen da djẹ nene.” Oborẹ ọshare yena mrẹre na nẹrhẹ avwanre karophiyọ oborẹ Jesu ta kpahen igodẹ rọyen, kọyen idibo rọyen. Ọ tare nẹ, “ayen ki nyo urhuru mẹ.” Ẹkẹvuọvo, Jesu hẹ obodjuvwu. Mavọ kọyen a sa vwọ tanẹ e nyo urhuru rọyen? Idjerhe ọghanghanre ọvo ra sa vwọ tanẹ e nyo urhuru rẹ onini rẹ avwanre na yen, siẹrẹ a da vwẹ iyono rọyen vwọba akpọ yerẹn.​—Mat. 7:​24, 25. w21.12 16 ¶1-2

Ọyinkọn Pọl ke mukpahen ji gboja kẹ iniọvo na. Ukuko na, ọ da rhe mrẹvughe nẹ obo ro ruru na chọre ji vwo owenvwe ro vwo wene uruemu rọyen kugbe oka rẹ ohwo rọ hepha. (1 Tim. 1:​12-16) Womarẹ ukẹcha ri Jihova, Pọl da rhe dia ọkpako ro vwo ẹguọnọ, ro nẹ aruẹdọn, rọ je vwomakpotọ. Ọ vwẹ uphẹn kẹ jẹgba rọyen nẹ o kpokpo ẹwẹ-ẹn, kidie o vwo imuẹro nẹ Jihova che vwo ghovwo ọyen. (Rom 7: 21-25) Ọ riẹnre nẹ ọyen gbare-e, ọnana da nẹrhẹ ọ wian gangan rere uruemu rẹ Onenikristi rọyen se vwo yovwinphiyọ, je vwẹroso ukẹcha ri Jihova vwo ruiruo rọyen fiotọ. (1 Kọr. 9:27; Fil. 4:13) Ọ dia kidie nẹ ekpako na gbare ọyen sorọ a vwọ vwẹ ayen mu-u. Dedena, Jihova guọnọre nẹ ayen rhọnvwe oruchọ rayen siẹrẹ ayen de ru chọ, ji ru yovwinphiyọ vwẹ uruemu rẹ Onenikristi rayen. (Ẹfe. 4:​23, 24) O ji fo nẹ ọkpako reyọ Baibol na vwọ fuẹrẹn oma rọyen rere ọ sa vwọ riẹn asan ro fori nẹ ọ wian phiyọ. Jihova kọ cha chọn uko vwo vwo omavwerhovwẹn je dia omamọ rẹ ọkpako.​—Jems 1:25. w22.03 29-30 ¶13-15

Die yen ofori nẹ avwanre ru, e de noso nẹ avwanre brokpakpa brorhiẹn hwe oniọvo avwanre ọvo? Ofori nẹ a karophiyọ nẹ e dje ẹguọnọ kẹ iniọvo rẹ avwanre. (Jems 2:8) O ji fo nẹ a nẹrhovwo rhe Jihova nẹ ọ chọn avwanre uko vwọ kẹnoma vwọ kẹ iguegun. A sa davwẹngba vwo ru nene ẹrhovwo ra nẹre na womarẹ a vẹ ohwo re brokpakpa brorhiẹn hwe jovwo na vwọ ghwọrọ ọke kuẹgbe. A sa vuẹ nẹ o nene avwanre yan vwẹ iruo rẹ aghwoghwo na yẹrẹ tobọ durhie vwo kpo emuọre. E vwo vughe iniọvo avwanre phiyọ ye kẹ a sa tẹnrovi asan rẹ iniọvo rẹ avwanre de ruẹ yovwẹn ọtiobo ri Jihova vẹ Jesu ruẹ. E de ruẹ ọtiọyen je djephia nẹ avwanre nyo urhuru rẹ osuigodẹ esiri na rọ tare nẹ kẹnoma kẹ iguegun. Kirobo rẹ igodẹ nyo urhuru rẹ osuigodẹ rayen ye, ọtiọyen idibo rẹ Jesu ji nyo urhuru rọyen. Te ọ dianẹ avwanre hẹ ẹbẹre ọvo rẹ “imigegede” na yẹrẹ usun rẹ “igodẹ efa” na, e jẹ avwanre vwẹ ọkineje vwọ kerhọ rẹ osuigodẹ rẹ esiri na.​—Luk 12:32; Jọn 10:​11, 14, 16. w21.12 19 ¶11; 21 ¶17-18

Ọke ra vwọ reyọ Rehoboam vwo mu ovie rẹ Izrẹl, ihwo ro suẹn na da rhe nokpẹn rẹ orọnvwọn ọvo mie. Ayen da vuẹ nẹ o ru oghwa ọhọhọhọ rẹ ọsẹ rọyen Solomọn kru nyẹ ayen na pharhe. Ọyen emu rẹ aghwanre, rẹ Rehoboam vwo bru ekpako rẹ Izrẹl na ra da ra jẹ iroro kpahen obo rọ cha vuẹ ihwo na. Ekpako rẹ Izrẹl na da vwẹ uchebro kẹ nẹ o de ru oborẹ ihwo na tare na, kẹ ayen cha ga ọkieje. (1 Ivie 12:​3-7) O phẹnre dẹn nẹ oma vwerhen Rehoboam kpahen uchebro rẹ ekpako na-a, ọ da ra nọ mie edjedje rọyen. Ayen da vuẹ nẹ ọ rhoma phi ba oghwa ọhọhọhọ rẹ ihwo na. (1 Ivie 12:​9-11) O rhe se bru Jihova ra kpahen owoẹjẹ ro fori nẹ o nene. Ukperẹ ọtiọyen, o de nene uchebro rẹ ighene na vwọ kẹ. Okpetu rẹ ọnana ghwa rhe Rehoboam vẹ ihwo rẹ Izrẹl ganre mamọ. Vwọ kẹ avwanre, ọ dia uchebro eje a vwọ kẹ avwanre yen a guọnọ nyo-o. Dedena, ọ da dianẹ Ota rẹ Ọghẹnẹ yen o nurhe e je rhiabọreyọ. w22.02 9 ¶6

Ohwo rọ vwomakpotọ cha tẹnrovi obo rẹ ighene na riẹnre rẹ ayen se ru ukperẹ obo re ayen che se ru-u yẹrẹ obo rẹ ayen riẹnre-e. O che ni ayen kerẹ ihwo ri nene ọyen vwanvwan oma-a, ukperẹ ọtiọyen, o che ni ayen kerẹ ihwo re vẹ ọyen gba wian kuẹgbe. Ihwo re ghwore ni ighene kerẹ okẹ ro nẹ obọ rẹ Oghẹnẹ rhe, ayen vwo ọdavwaro kpahen obo rẹ ighene na se ruẹ. Rẹ ogangan rayen vwo shekpotọ na, oma vwerhen ihwo re ghwore na nẹ ighene herọ ri vwo owenvwe re vwọ wian ji bicha ukoko na. Udje ri Naomi vwẹ Baibol na ghwa uvi rẹ udje rẹ ohwo rọ ghwore ro rhiabọreyọ ukẹcha rẹ eghene vwọ kẹ. Ọmọshare ri Naomi vwo ghwu nu, ọ da vuẹ Rutu nẹ o rhivwin bru ihwo rọyen ra. Ẹkẹvuọvo, Rutu senre, o de nene Naomi kpo Bẹtlẹhẹm. Naomi rhiabọreyọ ukẹcha ri Rutu vwọ kẹ. (Rutu 1:​7, 8, 18) Ọnana ghene hwarhiẹ ebruphiyọ vwo rhe eya ivẹ nana. (Rutu 4:​13-16) Omaevwokpotọ cha chọn ihwo re ghwore uko vwọ vwẹrokere udje ri Naomi. w21.09 10-11 ¶9-11

Ọsẹ avwanre rọhẹ obodjuvwu ji vughe ẹdia ohwo ọvuọvo hepha. Ọkiọvo wo se ru vrẹ ihwo efa. Yẹrẹ wo se ruẹ te oborẹ ihwo efa ruẹ-ẹ, ọ sa dia fikirẹ ọghwo, jẹ omakpokpọ evwo yẹrẹ oghwa rẹ orua. E jẹ ofu dje we-e. (Gal. 6:4) Iruo esiri wẹn cha sa chọrọ Jihova ẹro-o. Ọ da dianẹ wo ruẹ asan ẹgba wẹn teri vwo nẹ oto rẹ ubiudu wẹn cha, Jihova che rhiabọreyọ. Jihova mrẹ ubiudu wẹn. Ọ guọnọre nẹ oma vwerhen owẹ kpahen obo re se ru kọyen. Ẹwẹn avwanre te otọ kidie avwanre riẹnre nẹ Jihova cha chọn avwanre uko ọke re de hirharoku ebẹnbẹn. (Aiz. 41:​9, 10) Ofori nẹ oma vwerhen avwanre ọke ra da ga Ọsẹ avwanre ro vwo ẹguọnọ ro fo ohwo “rọ reyọ urinrin kugbe ọghọ” rẹ emama rọyen ejobi!​—Ẹvwọ. 4:11. w22.03 24 ¶16; 25 ¶18

Avwanre guọnọ vwẹrokere Jesu, ẹkẹvuọvo we jẹ ofu dje ovwan siẹrẹ a rha sa vwẹrokere udje ri Jesu gbagba-a. (Jems 3:2) Ọmọ ro yono iruo cha sa riẹn iruo ru gbagba kerẹ onini rọye-en. Ẹkẹvuọvo o de yono vwo nẹ echobọ rọyen je vwẹrokere udje onini rọyen, ọ cha nẹrhẹ ọ riẹn iruo na phiyọ. Ọtiọyen ọ je hepha, avwanre de ru nene oborẹ avwanre yono vwo nẹ uyono ri Baibol rẹ avwanre je davwẹngba ra vwọ rhuẹrẹ echobọ rẹ avwanre phiyọ, ka sa nabọ yan nene udje ri Jesu kpẹkpẹkpẹ. (Une 119:59) Akpọ rọ vọnre vẹ ihwo ri vwo ọdavwẹ rẹ ihwo efa-a yen avwanre de yerẹn. Ẹkẹvuọvo, ihwo ri Jihova fẹnẹre. Uruemu rẹ omaevwoze ri Jesu te avwanre ẹwẹn mamọ, avwanre ji brorhiẹn a vwọ vwẹrokere udje rọyen. (1 Pita 2:21) A vwọ davwẹngba vwọ vwẹrokere uruemu rẹ omaevwoze ri Jesu na, a cha mrẹ aghọghọ kidie e ruẹ obo re vwerhen Jihova oma. w22.02 24 ¶16; 25 ¶18

Idjerhe ọvo rẹ Jihova vwọ reyọ odjekẹ vwọ kẹ ihwo rọyen nonẹna yen womarẹ Ota rọyen rọ dia Baibol na. Avwanre da nabọ ghwọrọ ọke ji roro kokodo kpahen obo rẹ Jihova yono avwanre, ọnana cha nẹrhẹ e nene odjekẹ rọyen, ji ruiruo aghwoghwo avwanre fiotọ. (1 Tim. 4:​15, 16) Idjerhe ọfa rẹ Jihova vwọ reyọ odjekẹ vwọ kẹ avwanre yen womarẹ “omamọ rẹ odibo esiri na.” (Mat. 24:45) Ọkiọvo odibo na sa reyọ odjekẹ re ghwe vwo ẹruọ rọye-en vwọphia. Kerẹ udje, a sa vwẹ odjekẹ kẹ avwanre nẹ emuegbe hẹrhẹ oghwọrọ ri kpregede e mi roro nẹ ọyena cha sa phia vwẹ asan avwanre dia-a. Die yen e se ru e de no nẹ ọhọ ghwa hẹ odjekẹ ra vwọphia na-a? Roro kpahen ikuegbe ri ihwo efa rẹ avwanre se kpahen vwẹ Baibol na. Ọkiọvo, ihwo rẹ Ọghẹnẹ se no nẹ ayen cha sa reyọ odjekẹ ra vwọ kẹ ayen vwo ruiruo ẹsosuọ-ọ, ẹkẹvuọvo siẹrẹ ayen da rhe reyọ vwo ruiruo re o mi sivwin arhọ rayen.​—Iguẹ. 7:7; 8:10. w22.03 18-19 ¶15-16

Vẹ imuẹro kokoroko, Jesu da ta eta rehẹ isese ri kẹdẹ kẹdẹ ri nonẹna. Jesu riẹnre nẹ arhọ rọyen hẹ obọ ri Jihova, o ji vwo imuẹro nẹ Ọsẹ rọyen cha karophiyọ ọyen. Die yen e se yono vwo nẹ eta ri Jesu rhe? Vwo owenvwe wo vwo phi arhọ wẹn phiyọ obọ ri Jihova. Wo se vwo ru ọtiọyen, ku wọ “vwẹ udu wẹn ejobi vwọ kpahe Ọrovwohwo.” (Isẹ 3:5) Roro kpahen udje ri Joshua rọ dia Oseri ri Jihova rọhẹ ẹgbukpe 15 rọ họvwọn ọga re che se sivwi-in. Ọ rhọnvwe rhiabọreyọ omaesivwo rọ vwọso urhi rẹ Ọghẹnẹ-ẹ. Ọmọke krẹn tavwen o ki ghwu, ọ da ta kẹ oni rọyen: “Oni mẹ, Jihova cha vwẹrote vwe. . . . Me sa vuẹ wẹ vẹ imuẹro nẹ Jihova cha rhọvwọn ovwẹ nushi rhe. Ọ riẹn obo rehẹ ubiudu mẹ, mi ghini vwo ẹguọnọ rọyen.” E jẹ ohwo ọvuọvo nọ oma rọyen, ‘Siẹrẹ mi de hirharoku ọdavwini ro phi arhọ mẹ phiyọ ẹdia rẹ imuoshọ, me sa fuevun kẹ Jihova je vwẹrosuọ nẹ ọ cha karophiyọ ovwẹ?’ w21.04 12-13 ¶15-16

Iruo rẹ aghwoghwo na bọn idibo ri Jihova gan. Oma vwerhen avwanre siẹrẹ a da vuẹ ihwo efa kpahen oborẹ Baibol na tare, o torori sẹ ayen kerhọ yẹrẹ sen ovuẹ na-a. Fikirẹ ẹdia rẹ ayen hepha, ihwo evo se no nẹ ẹgbaẹdavwọn rayen vwẹ iruo rẹ aghwoghwo na teri-i. Wo de vwo ẹwẹn tiọyen, karophiyọ nẹ oma vwerhen Jihova siẹrẹ wo de ru asan rẹ ẹgba wẹn teri. Jihova vwo ọdavwaro kpahen oruru rẹ avwanre vwo kpahen iruo rẹ aghwoghwo na, ọ da tobọ dianẹ avwanre se vrẹn nẹ uwevwi-in. Ọ sa gbẹn idjerhe kẹ avwanre re vwo ghwoghwo ota kẹ inọsu vẹ ihwo efa re vwẹrote avwanre. Ofu se dje avwanre siẹrẹ a da vwẹ oborẹ avwanre ruẹ enẹna vwọ vwanvwe oborẹ avwanre ruru vwẹ ọke rọ wanre. Ẹkẹvuọvo, avwanre da riẹn ukẹcha rẹ Jihova vwọ kẹ avwanre asaọkiephana, ke se chirakon rẹ koka koka rẹ ebẹnbẹn je sẹro rẹ aghọghọ rẹ avwanre. Usun rẹ ubi rẹ uyota na eje rẹ avwanre kọnre, avwanre riẹn ọ rọ cha tọn awọ muotọ je djẹ-ẹ.​—Aghwo. 11:6. w21.05 24-25 ¶14-17

Jihova kẹ Ovie Devid efe, otitivwe, kugbe ophikparobọ vwẹ enu rẹ ivwighrẹn rọyen, ẹkẹvuọvo urhuru evwo da nẹrhẹ enana ejobi chọrọ ẹro. Devid tare nẹ okẹ rẹ Ọghẹnẹ “bunọ obo re se keri!” (Une 40:5) Jẹ, ọke ọvo rhi vwo te, oborẹ Jihova ru kẹ Devid da rhe chọrọ ẹro. Devid vwo eya buebun, ẹkẹvuọvo o de rhi vwo urhurusivwe ọbrabra kpahen Batsheba rọ dia aye rẹ ohwo ọfa. Yuraya rọ dia ohwo ri Het yen ọshare ri Batsheba. Devid de nene Batsheba vwerhẹn, ọ da mrevun. A ta ọyena obọ, Devid de hwe Yuraya! (2 Sam. 11:​2-15) Die yen Devid roro? O roro nẹ Jihova cha sa mrẹ ọye-en? Devid rọ fuevun ga Jihova jovwo na, de she ufi rẹ urhuru evwo, ọ da je rioja rọyen. Jẹ, ọ vwerhoma nẹ ọke evo vwọ wan nu, Devid da fan umwemwu rọyen ji kurhẹriẹ. Oma vwerhenrọ mamọ nẹ Jihova vwo ghovwo!​—2 Sam. 12:​7-13. w21.06 17 ¶10

Avwanre se roro nẹ avwanre che se yono ohwo na-a. Ọkiọvo avwanre niro nẹ e che vwo erianriẹn kpobarophiyọ yẹrẹ nabọ tẹn ona rẹ uyono, tavwen e ki se yono ohwo ọfa. Ẹwẹn tiọna de rhe we, gbe vwo oniso rẹ erọnvwọn erha ri se toroba uduefiogbere wẹn. Ẹsosuọ, Jihova niro nẹ wo muwan wo vwo yono ihwo efa. Ọrivẹ, Jesu ra vwẹ “ogangan ejobi re hẹ odjuvwu vẹ akpọ” na kẹ, yen vwẹ iji kẹ wẹ nẹ wo re yono ihwo efa. (Mat. 28:18) Ọrerha, wọ sa nokpẹn rẹ ukẹcha mie ihwo efa. Jesu vwẹ oborẹ Jihova yoniro vwo yono ihwo efa; wo ji se ru ọtiọyen. (Jọn 8:28; 12:49) Vwọba, wọ sa vuẹ oniruo rọ vwẹrote ẹko rẹ iruo aghwoghwo rẹ wọ hepha, ọkobaro, yẹrẹ oghwoghwota rọ tẹn ona nẹ o yono uwe oborẹ wọ sa vwọ vwẹ uyono ri Baibol mu kẹ ohwo, ji yono ohwo na. Idjerhe ọvo wo se vwo vwo uduefiogbere ọyen wo vwo nene iniọvo tiọyena kpo asan rẹ ohwo rẹ ayen yono. w21.07 6 ¶12

Oba rẹ eyeren nana vwo siẹkẹrẹ na, ofori nẹ avwanre vwẹroso oborẹ Jihova ruẹ erọnvwọn wan enẹna vrẹ obo ri jovwo. Diesorọ? Vwẹ ọke rẹ ukpokpogho rode na, a sa kẹ avwanre odjekẹ evo re cha dia gedegede vwọ kẹ avwanre, a sa tobọ no nẹ a cha sa vwẹ ayen vwo ruiruo dede-e. Vwọrẹ uyota, Jihova cha ta ota kẹ avwanre komobọ-ọ. Ẹkẹvuọvo, ọ cha womarẹ ihwo ro vwo mu vwẹ ukoko na vwọ vwẹ odjekẹ kẹ avwanre. Ọyena rha cha dia ọke e che vwo vwo ẹwẹn ivivẹ kpahen odjekẹ a cha vwọphia yẹrẹ ni ayen gedegede-e, yẹrẹ kẹ ọke a cha vwọ vwẹ ẹwẹn roro sẹ, ‘Obọ ri Jihova yen odjekẹ nana ghini nurhe gbanẹ iniọvo re vwo mu na yen vwẹ ayen phia komobọ?’ Wọ cha vwẹroso Jihova vẹ ukoko rọyen vwẹ ọke ọgangan yena? Oka rẹ ẹro ru wo vwo nẹ odjekẹ ro nẹ ukoko ri Jihova cha enẹna yen cha chọn wẹ uko vwọ kpahenphiyọ onọ nana. Wọ da dia ohwo rọ vwẹrosua odjekẹ ro te avwanre obọ je yan nene ayen nonẹna, ku wo ji se ru ọtiọyen vwẹ ọke rẹ ukpokpogho rode na. w22.02 6 ¶15

Jihova nẹrhẹ Gidiọn vẹ eshare 300 rọyen phikparobọ vwẹ idjerhe rẹ igbevwunu rọ sa nẹrhẹ ayen kparoma jovwo. Eshare rẹ Ifrem de bru Gidiọn ra, re nene kunu, ukperẹ ayen vwo jiro kidie nẹ vwẹ ẹsosuọ e se ayen ba họnre na-a. (Iguẹ. 8:1) Gidiọn de djunute emu ride rẹ Jihova reyọ ihwo rẹ Ifrem vwo ru. Ukuotọ rọyen, “ophu ro mu ayen jovwo de fue.” (Iguẹ. 8:3) Gidiọn vwomakpotọ rere ọ sa vwọ sẹro rẹ ufuoma rẹ ihwo rẹ Ọghẹnẹ. Vwẹ ẹbẹre rẹ ihwo rẹ Ifrẹm, avwanre yonori nẹ ofori nẹ a vwẹ ọghọ ri Jihova vwọ kobaro kẹ ọ rẹ avwanre. Die yen igbuyovwin rẹ orua vẹ ekpako se yono mie Gidiọn. Ohwo ọvo de muophu fikirẹ emu ọvo rẹ avwanre ruru, e jẹ avwanre davwẹngba vwo vwo ẹruọ rẹ oboresorọ ophu vwo muo. E ji se jiro fikirẹ emu esiri evo ro ruru. Omaevwokpotọ yen cha nẹrhẹ e se ru ọtiọyen, ma rho ọ da dianẹ ohwo na yen ru chọ. Ẹkẹvuọvo, ofori nẹ a vwẹ ufuoma vwọ kobaro. w21.07 16-17 ¶10-12

Jihova brọghọ phiyọ avwanre oma, rọ vwọ ma avwanre họhọ oma rayen. Kidie nẹ Jihova ma avwanre họhọ oma rọyen, kẹ avwanre se vwo iruemu iyoyovwin kerẹ ẹguọnọ, arodọnvwẹ, kugbe evun-ẹfuọn, avwanre je sa dia evwata. (Une 86:15; 145:17) Avwanre vwọ davwẹngba vwo vwo iruemu iyoyovwin nana ye, jẹ avwanre brọghọ phiyọ Jihova oma, ji dje ọdavwaro phia kẹ. (1 Pita 1:​14-16) Oma vwerhen avwanre siẹrẹ avwanre de ru obo re nẹrhẹ ubiudu ri Jihova ghọghọ. Avwanre sa dia oka rẹ ihwo rẹ Jihova guọnọre vwẹ orua rọyen, kidie ọ ma avwanre họhọ oma rọyen. Jihova muegbe rẹ asan oghẹresan kẹ avwanre. Jihova muegbe rẹ otọrakpọ na phiyotọ ọke grongron tavwen ọ ke ma ọshare rẹsosuọ na. (Job 38:​4-6; Jer. 10:12) Jihova kẹ avwanre erọnvwọn iyoyovwin buebun, kidie ọyen ohwo esiri rọ kokẹ ghwologhwolo. (Une 104:​14, 15, 24) Ọ ghwọrọ ọke evo vwo roro kpahen obo rọ mare, ọ “da mrẹ nẹ oyoma.”​—Jẹn. 1:​10, 12, 31. w21.08 3 ¶5-6

Avwanre eje vwo iruo re vwo ghwoghwo ji gbe odibo. (Mat. 28:​19, 20; Rom 10:14) Wọ guọnọ nabọ tẹn ona rẹ iruo nana rọ pha ghanghanre na? Gbe yono ibroshọ rẹ Eyono na, wo mi ji bru ẹkẹn evo kiriguo kẹ oma re se chọn wẹn uko vwo ru nene obo wo yonori. Wọ de roro kpahen ẹkẹn ru wo che bru kẹ oma wẹn, karophiyọ nẹ ọvo usun rẹ ẹkẹn rọ ma ghanre kparobọ yen, wo vwo ru obo re cha nẹrhẹ oma vwerhen Ọghẹnẹ. (Kọl. 3:12; 2 Pita 1:​5-8) Aphro herọ-ọ, avwanre eje guọnọ ru bunphiyọ vwẹ ẹga ri Jihova vwọ vrẹ oborẹ avwanre ruẹ enẹna. Vwẹ akpọ kpokpọ na, avwanre cha nabọ ga vọnvọn. Tavwen ọke yena ki te, e jẹ avwanre ru oborẹ avwanre se ru eje, ọnana che toroba aghọghọ rẹ avwanre je nẹrhẹ a kẹnoma kẹ ofudjevwe. Marho kparobọ, avwanre cha ghwa urinrin vẹ ọghọ vwo rhe Jihova rọ dia “Ọghẹnẹ rẹ oma vwerhan na.” (1 Tim. 1:11) Ọtiọyena, e jẹ a mrẹ aghọghọ vwo nẹ kuphẹn kuphẹn rẹ ẹga avwanre vwori! w21.08 25 ¶18-20

Ọ da dianẹ a yọnrọn owẹ ghwanre kerẹ Oseri ri Jihova, kọyen vwo nẹ ọke rẹ emọ rhe yen wo vwo yono kpahen Jihova. E yono uwe nẹ ọyen Ọmemama na, o vwo iwan iyoyovwin, ọ je guọnọ ru akpọ na phiyọ Iparadaisi. (Jẹn. 1:1; Iruo 17:​24-27) Ihwo buebun vwo imuẹro nẹ Ọghẹnẹ herọ vwo siẹvo kẹ ọyen re ma erọnvwọn eje-e. Ayen vwo imuẹro nẹ ememerha arhọ tonphiyọ, o de rhi hirhephiyọ erọnvwọn ri vwo arhọ ri vwo ẹbẹre sansan. Evo usun rẹ ihwo ri vwo imuẹro nana yono ẹbe kodo. Ayen sa ta nẹ egberianriẹn djerephia nẹ oborẹ Baibol na tare gbare-e, nẹ ihwo ghevweghe re riẹn emuọvo-o ra sa fobọ phiẹn yen vwo imuẹro kpahen Ọmemama na. Otoro ikpe rẹ avwanre dia Iseri ri Jihova re-e, ofori nẹ a vwẹ ọkieje vwọ bọn esegbuyota rẹ avwanre gan. E de ru ọtiọyen, “erianriẹn vẹ uyono rẹ efian” rẹ ihwo re vwọso oborẹ Baibol na tare gbe sa phiẹn avwanre-e.​—Kọl. 2:8. w21.08 14 ¶1-3

Ebẹl, Noa, Ebraham, vẹ Job dje ẹguọnọ vẹ ọghọ vwọ kẹ Jihova womarẹ ẹmienyo, esegbuyota vẹ izobo rayen. Avwanre riẹnre nẹ Jihova rhiabọreyọ ẹga rayen kidie ayen ru asan ẹgba rayen teri. Ọke vwọ yanran na, Jihova da vwẹ Urhi na vwọ kẹ emọ rẹ Izrẹl womarẹ Mosis. Urhi na vwo odjekẹ ri shekpahen oborẹ Jihova guọnọre nẹ a ga ọyen wan. Vwo nẹ ọke rẹ Jesu vwo vrẹn nushi nu, Jihova rhe rhẹro rọyen nẹ ihwo ga ọyen vwo nene Urhi rẹ Mosisi-i. (Rom 10:4) Urhi kpokpọ kọyen Inenikristi che nene, rọ dia “urhi ri Kristi” na. (Gal. 6:2) Re vwo nene “Urhi” nana churobọ si a vwọ vwẹrokere udje ri Jesu ji nene iyono rọyen, ọ dia e vwo se ayen ku afọnrhe yẹrẹ nene irhi ibuebu-un. Nonẹna, Inenikristi je davwẹngba vwo nene Jesu rere ayen se vwo ru obo re vwerhen Jihova oma je “mrẹ ufuoma” romobọ.​—Mat. 11:29. w22.03 20-21 ¶4-5

Jihova kerhọ kẹ emọ rọyen. Ọ kerhọ kẹ ẹrhovwo buebun ri Jesu nẹre ọke rọ vwọ hẹ akpọ na. O nyo ẹrhovwo rọ nẹre ọke ro che vwo bru orhiẹn ọghanghanre ọvo kerẹ ọke rọ cha vwọ sane idibo 12 rọyen na. (Luk 6:​12, 13) Jihova ji nyo ẹrhovwo ri Jesu ọke rọ vwọ hẹ ẹdia ebẹnbẹn. Ọmọke krẹn a ke shẹ Jesu, ọ je nẹrhovwo rhe ọsẹ rọyen nẹ ọ chọn ọyen uko vwo hirharoku ebẹnbẹn na. Ọ dia Jihova di nyo ẹrhovwo ri Jesu ọvo-o, ẹkẹvuọvo o ji amakashe rọyen ra bọn ọmọ ọghanghanre rọyen na gan. (Luk 22:​41-44) Nonẹna, ọkieje yen Jihova je vwọ kerhọ rẹ ẹrhovwo rẹ idibo rọyen, je kpahanphiyọ ayen vwẹ ọke ro fori kugbe idjerhe ro me shephiyọ. (Une 116:​1, 2) Roro kpahen oborẹ oniọvo aye ọvo rọ dia India vwo rhiẹromrẹ ọnana komobọ. O hirharokuẹ ẹdia ẹnwan ọgangan vwẹ ọke evo re, ọ da nẹrhovwo ro nẹ ọtọ rẹ udu rọyen rhe vwo rhe Jihova kpahen ẹdia na. O de si: “JW Broadcasting^® ri May 2019 rọ ta ota kpahen obore se vwo nene ẹnwan muabọ ghwa oborẹ me guọnọre vwẹ ọke yena. Ọyena ghwa ẹkpahọnphiyọ vwọ kẹ ẹrhovwo mẹ.” w21.09 21-22 ¶6-7

Wọ sa vwẹ ẹwẹn roro obo rọ bẹn te vwọ kẹ Inenikristi yena vwẹ ikpe ujorin ẹsosuọ rẹ ayen vwọ yanjẹ oborẹ ayen vwori eje vwo, je ton akpeyeren kpokpọ phiyọ vwẹ asan rẹ ayen djẹ ra na? Ofori nẹ ayen vwo esegbuyota tavwen ayen ke sa vwẹroso Jihova nẹ ọ cha kẹ ayen erọnvwọn kiriguo rẹ ayen ghene guọnọ. Ẹkẹvuọvo o vwo obo re sa chọn ayen uko. Ẹgbukpe iyorin tavwen ihwo ri Rom ke gbariariẹ Jerusalẹm phiyọ, ọyinkọn Pọl da vwẹ uchebro ọghanghanre vwọ kẹ ihwo ri Hibru na: “Si oma wẹn nẹ urhuru si vwe rẹ igho, jo obo wo vwori da wẹ ẹro. ‘Kidie ọ tarọ nu re nẹ: Me sa phiẹn wẹ-ẹ eyẹ me sa sen wẹ-ẹ.’ Kẹ avwanre sa vwẹ obọ sa udu nẹ: Ọrovwohwo hẹ ọchuko mẹ, oshọ gbi mu uvwe-e; kidie ohwo se ru kẹ vwẹ? (Hib. 13:​5, 6) Aphro herọ-ọ nẹ ihwo re reyọ uchebro nana rẹ Pọl vwọphia na vwo ruiruo tavwen ihwo ri Rom ke rhe gbariariẹ Jerusalẹm phiyọ, mrẹrẹ lọlọhọ ayen vwo yerin akpọ ri kekpe vwẹ asan rẹ ayen djẹ ra na vwọ vrẹ ihwo re reyerọ vwo ruiruo-o. Ayen vwo imuẹro nẹ Jihova cha vwẹrote ọdavwẹ rẹ erọnvwọn kiriguo rẹ ayen guọnọre vwẹ akpeyeren. w22.01 4 ¶7, 9

A da ta ota kpahen ohwo ro gbe arodọnvwẹ, avwanre sa vwẹ ẹwẹn vwo roro ohwo ro ruẹ ẹse, ro vwo erorokẹ rọ je pha ghwologhwolo. Ikuegbe ri Jesu kpahen ohwo ri Sameria na sa djẹ ro ẹwẹn rẹ avwanre. Ọshare ri Sameria ọvo vwọ mrẹ ohwo ri Ju rẹ iji hweri o de “ni arodọvwẹ ke.” Fikiridie nẹ “aro rọye” dọn ọshare na, o de ru ọrhuẹrẹphiyotọ rọ vwọ vwẹrote. (Luk 10:​29-37) Udje nana ghwa odjephia rẹ uruemu oyoyovwin rẹ arodọnvwẹ ri Jihova. Uruemu yena ọyen ẹbẹre ọvo rẹ ẹguọnọ rẹ Ọghẹnẹ, o dje ọnana phia kẹdẹ kẹdẹ womarẹ obo ro nene avwanre yerẹn wan. O ji vwo ẹbẹre rẹ arodọnvwẹ ọfa rọ je sa djẹ ro ẹwẹn rẹ avwanre. Ọnana churobọsi ra vwọ kpairoro vrẹ oja ro fori nẹ e gbe kẹ ohwo. Ọ da dia ọtiọyen kọyen Jihova ghini gbe arodọnvwẹ kẹ avwanre. Ọbuine na tare: “O nene avwanre yerẹ kirobo rẹ umwemwu rẹ avwanre epha-a.” (Une 103:10) Dedena o vwo ọke ri Jihova je vwọ vwẹ ọghwọku ro fori vwọ kẹ ohwo ro ruchọ. w21.10 8 ¶1-2

Ihwo re vẹ Jihova gbe vwo oyerinkugbe rọ kpẹkpẹre ọvo yen o dje ẹguọnọ ro jẹ rhẹriẹ rọyen na kẹ​—idibo rọyen. Avwanre sa mrẹ odjephia rẹ ọnana vwo nẹ oborẹ Ovie Devid kugbe ọmraro Daniẹl tare. Kerẹ udje, Devid tare: “E, phi obọ phihọ ẹguọnọ wẹn rọ rhẹriẹ-ẹ na kẹ otu re riẹn wẹn.” “Ẹguọnọ ro jẹ rhẹriẹ rẹ Ọrovwohwo na herọ rhiri bẹdẹ bẹdẹ vwẹ enu rẹ otu re djẹ oshọ rọye.” Daniẹl da rha ta: “E Ọrovwohwo Ọghẹnẹ, [ro dje] ẹguọnọ ro jẹ rhẹriẹ kẹ ihwo re guọnerọ re da rha yọnre irhi rọye.” (Une 36:10; 103:17; Dan. 9:4) Kirobo rẹ eta nana rẹ ẹwẹn ọfuanfon rẹ Ọghẹnẹ mu ihwo nana vwo si na djerephia, Jihova dje ẹguọnọ rọyen ro jẹ rhẹriẹ na vwọ kẹ idibo rọyen kidie nẹ ayen riẹnrẹ, ayen djoshọ rọyen, ayen vwo ẹguọnọ rọyen, ayen je yọnrọn irhi rọyen. Ihwo re ga vwọrẹ uyota ọvo yen Jihova dje ẹguọnọ rọyen ro jẹ rhẹriẹ na vwọ kẹ. Tavwen avwanre ke ton ẹga ri Jihova phiyọ, avwanre ji rhiẹromrẹ ẹguọnọ rẹ Ọghẹnẹ djephia vwọ kẹ ihworakpọ eje. (Une 104:14) Ẹkẹvuọvo, kerẹ egọghẹnẹ ruyota, avwanre je mrẹ erere vwo nẹ ẹguọnọ rọyen ro jẹ rhẹriẹ na cha. w21.11 4 ¶8-9

O vwo oborẹ omukpahen na gan te-e, avwanre che ru nene ota ri Jesu rọhẹ obenu na. Nonẹna, omavwerhan ihwo buebun rẹ ayen vwọ kerhọ rẹ ilori rẹ ẹga ra nabọ vughe. Ayen joma vwẹ ẹga kẹ iIori rẹ ẹga na dede kidie ayen vwo ẹguọnọ rayen mamọ. Ihwo buebun kpo uvwevwin rẹ ẹga rayen, dẹ ẹbe rayen, ji toro okpigho vwọ kẹ ayen. Ihwo evo se oborẹ ayen tare eje gbuyota. Omavwerhan ayen kpahen ilori rẹ ẹga rayen na kerẹsiẹ ra da mrẹ nẹ Jesu yen ayen mrẹ. Vwọ fẹnẹ ayen, ihwo re ga Ọghẹnẹ vwẹ ọ rẹ uyota vwo ilori rẹ ẹga-a. Dedenẹ avwanre muọghọ vwọ kẹ ihwo ri muẹ usiokọ rẹ owian na, avwanre rhiabọreyọ uyono ri Jesu rọ vwọ tanẹ, “ovwan na eje iniọvo.” (Mat. 23:​8-10, NW ) Avwanre ga ihworakpọ-ọ, owenẹ ọ dia ilori rẹ ẹga yẹrẹ ihwo rehẹ ẹgba rẹ usuon. Avwanre biẹcha oborẹ ayen vwọ tua vwẹ ẹga rayen yẹrẹ usuon raye-en. Ukperẹ ọtiọyen, Avwanre ka ẹbẹre vuọvo rẹ akpọ na-a. Vwẹ enana eje re djunute na, avwanre fẹnẹ ẹga efa re tanẹ ayen je Inenikristi.​—Jọn 18:36. w21.10 20 ¶6-7

Ofori nẹ Inenikristi eje re guọnọ dia fuanfon vwo imuẹro nẹ orọnvwọn ọvuọvo yẹrẹ ohwo ọvuọvo gbowọ phiyọ oyerinkugbe rayen vẹ Jihova-a. Kidie nẹ avwanre Iseri ri Jihova, avwanre vwo owenvwe ra vwọ kẹnoma kẹ kemu kemu ro che miovwo odẹ ọfuanfon rẹ Ọghẹnẹ. (Liv. 19:12; Aiz. 57:15) Ihwo rẹ Izrẹl vwo djephia nẹ ayen mrẹ Jihova kerẹ Ọghẹnẹ rayen ko fori nẹ ayen nene irhi rọyen. Livitikọs 18:4 da ta: “Ovwan ru obo ri mi vwo ji urhi rere ovwan yọnre iji mẹ rere ovwan yan vwẹ evun rayen. Mẹvwẹ Ọrovwohwo Ọghẹnẹ rẹ ovwan.” Uyovwin 19 djunute evo usun rẹ “iji” ri Jihova vwọ kẹ ihwo rẹ Izrẹl. Kerẹ udje, awọreta 5-8, 21, 22 ta ota kpahen izobo rẹ eranvwe. Ayen cha vwẹ izobo na phia vwẹ idjerhe rẹ ayen vwo jẹ ‘emu ọfuanfon ri Jihova emiovwo.’ E jẹ ẹkpo ri Baibol nana mu avwanre vwo vwo owenvwe ra vwọ vwẹ izobo rẹ Ọghẹnẹ che rhiabọreyọ vwọ kẹ kirobo rẹ Hibru 13:15 jiro kẹ avwanre nẹ e ru. w21.12 5-6 ¶14-15

Eya gbe eshare re dia ighene se yono vwo nẹ ikuegbe rẹ ihwo re vwẹroso Jihova. Eya gbe eshare evo hẹ evunrẹ ẹga ọkieje na vwẹ ikpe buebun re. Wọ sa nokpẹn rẹ ukẹcha rayen siẹrẹ wo de roro kpahen obo wọ vwọ tua vwẹ ẹga ri Jihova. Ọyena idjerhe ru wo se vwo djephia nẹ wọ vwẹroso Jihova. (Isẹ 22:​17, 19) Karophiyọ nẹ orọnvwe ọyen okẹ ro nẹ obọ ri Jihova rhe. (Mat. 19:​5, 6) Ọ guọnọre nẹ ihwo re rọvwọnre riavwerhen rẹ okẹ yena. Ihwo re rọvwọnu obọ, ovwan fuẹrẹn oborẹ ovwan cha vwẹ akpeyeren rẹ ovwan vwo ru. We ruẹ asan rẹ ẹgba rẹ ovwan teri eje ovwan vwo djephia nẹ we vwo ọdavwaro kpahen okẹ rẹ Jihova vwọ kẹ ovwan na? Nẹrhovwo rhe Jihova. Se kpahen obo re sa chọn ovwan uko vwẹ ẹdia ovwan na vwẹ Baibol na. Ovwan je yan nene uchebro rẹ Jihova vwọ kẹ ovwan. Jo mu ovwan ẹro nẹ oma cha vwerhen ovwan ọ da dianẹ ovwan tẹnrovi ẹga ri Jihova vwẹ orọnvwe rẹ ovwan. w21.11 19 ¶16, 18

Jems vwẹ ẹro rẹ abavo vwo ni oma rọyen. Jems niro nẹ ọyen yovwin nẹ iniọvo rẹ ukoko na fikirẹ uphẹn rẹ ẹga ro vwori yẹrẹ orua ro nurhe-e. O se iniọvo rẹ ukoko na “imoni mẹ re ghare.” (Jems 1:​16,19; 2:5) O dje oma rọyen nẹ ọyen pha gbagba-a. Obo re yono no rhe: Karophiyọ nẹ avwanre eje irumwemwu. E jẹ a vwẹ ọke vuọvo vwo roro nẹ e yovwin nẹ ihwo ra vwẹ Baibol yono-o. Diesorọ? E de ru obo re cha nẹrhẹ ohwo re yono roro nẹ e vwo ekan vwẹ oma-a, ọ sa nẹrhẹ o roro nẹ ọyen che se ru oborẹ Ọghẹnẹ guọnọre-e. E de jẹ ayen riẹn nẹ o ji vwo ọke rọ vwọ bẹn kẹ avwanre ra vwọ yan nene iji ri Baibol na je vuẹ ayen kpahen oborẹ Jihova vwọ chọn avwanre uko vwo phi ebẹnbẹn na kparobọ, ka sa chọn ohwo re yono na uko vwọ riẹn nẹ ọ je sa ga Jihova. w22.01 11-12 ¶13-14

E de roro kerẹ Jesu, kẹ avwanre sa vwẹrokere ji vwo oka rẹ iruemu ro vwori. (Hib. 1:3) E se roro: ‘Jesu ohwo ọgbagba. Me cha sa vwẹrokere gbagba-a!’ Wo de vwo oka rẹ iroro tiọyen, karophiyọ iroro erha nana. Ẹsosuọ, a ma wẹ vwọ họhọ Jihova vẹ Jesu. Ọtiọyena, wo se brorhiẹn wọ vwọ vwẹrokere ayen, wọ ghene sa vwẹrokere ayen tẹdia evo. (Jẹn. 1:26) Ọrivẹ, ẹwẹn ọfuanfon rẹ Ọghẹnẹ yen ẹgba rọ ma rho kparobọ vwẹ akpọneje. Womarẹ ukẹcha rọyen, wo se ru erọnvwọn wo rorori nẹ wo che se ru jovwo-o. Ọrerha, ọ dia Jihova rhẹro rọyen nẹ wo dje omamọ rẹ ẹwẹn ọfuanfon na phia gbagba enẹna-a. Vwọrẹ uyota, Ọsẹ rẹ avwanre ro vwo ẹguọnọ na rhuẹrẹ ẹgbukpe 1,000 phiyọ vwọ kẹ ihwo re cha dia otọrakpọ na ayen sa rhe vwọ dia ihwo re gbare. (Ẹvwọ. 20:​1-3) Asaọkiephana, Jihova guọnọre nẹ a davwẹngba vwọ vwẹroso ọyen ọke a da guọnọ ukẹcha. w22.03 9 ¶5-6

Vwọ vrẹ ẹrhovwo, o ji vwo erọnvwọn efa re sa kpuriẹnphiyọ oyerinkugbe avwanre vẹ Jihova. Eyono rẹ Ota rẹ Ọghẹnẹ vẹ uyono ẹra sa chọn avwanre uko vwo sikẹre Ọghẹnẹ phiyọ. O vwo obo wo se ru vwọ reyọ ọke wẹn vwo ruiruo vwẹ idjerhe rẹ aghwanre siẹrẹ wo de ruẹ uyono romobọ vẹ ọke wọ da hẹ uyono? Nọ oma wẹn, ‘Die yen se gbowọphiyọ erhọ ẹka mẹ ọke me da hẹ uyono vẹ ọke mi de ru uyono romobọ?’ Ọ sa dia use yẹrẹ ovuẹ re siẹ rhe we? Nẹrhovwo rhe Jihova vwọ kẹ ukẹcha siẹrẹ wo de noso nẹ wo roro kpahen erọnvwọn efa ọke wo de ruẹ uyono romobọ yẹrẹ wọ da hẹ uyono rere ọ chọn wẹ uko vwo mu ẹwẹn wẹn phiyọ obo wo ruẹ. Ọ ghwa lọhọ a vwọ kpairoro vrẹ ẹnwan na ji mu ẹwẹn phiyọ Ota rẹ Ọghẹnẹ-ẹ, ẹkẹvuọvo, ọyen obo ro fori nẹ e ru. Yare ufuoma rẹ Ọghẹnẹ rere ọ sẹro rẹ ubiudu wẹn kugbe ẹgba “iroro” wẹn.​—Fil. 4:​6, 7. w22.01 29-30 ¶12-14

Ovie Uzaya sen uchebro. Ọ da ro asan ọvo vwẹ uwevwin rẹ ẹga ri Jihova ro fori nẹ irherẹn ọvo ro, kọ guọnọ torhẹ izobo rẹ insens vwẹ etiyin. Irherẹn ri Jihova da ta kẹ: “Ọ dia iruo wẹ-ẹn, Uzaya, re wọ vwọ torhẹ insens kẹ Ọrovwohwo-o, ẹkẹvuọvo irherẹn na.” Die kọyen Uzaya ruru? Ọ da dianẹ ọ vwomakpotọ reyọ uchebro ra vwọ kẹ na, ji vrẹ nẹ uwevwin rẹ ẹga na kpakpata, ọkiọvo Jihova rhe vwo ghovwo. Ukperẹ ọtiọyen, “Ivun de miovwo Uzaya.” Diesorọ ọ vwọ sen uchebro na? Kidie kerẹ ovie o rorori nẹ ọyen vwo ẹgba rẹ ọyen vwo ru obo rọ guọnọre. Ẹkẹvuọvo ọ dia ọtiọyen yen Jihova niro-o. Fikirẹ orharhe rẹ uruemu nana rẹ o djephia na, a da vwẹ oti vwo muo, “Uzaya kẹ ọhọnvwoti re te ẹdẹ rẹ ughwu rọye.” (2 Ikun 26:​16-21) Udje rẹ Uzaya na yono avwanre nẹ o toro oka rẹ ohwo rẹ avwanre hepha-a, a da sen uchebro ri Baibol na, oyerinkugbe avwanre vẹ Jihova sa va avwanre abọ. w22.02 9 ¶7

Ohwo ro ruẹ nene iruemu rẹ “ohwo rẹ awanre na” roro ji nenesi rẹ ojevwe rẹ ugboma. (Kọl. 3:9) Ohwo tiọyena sa dia ọvwurhuru, ohwo rọ fobọ muophu, ohwo rọ riẹn ẹse-e kugbe ohwo ro phuoma. O se vwo omavwerhovwẹn kpahen re vwo nẹ ihoho rẹ ihwo re banphiyọ vẹ ighe rẹ ozighi yẹrẹ ọfanrhiẹn. O muẹro nẹ ohwo ọtiọyena ji vwo iruemu iyoyovwin evo, ọ je sa dianẹ ẹwẹn obrorhiẹn rọyen kpokpo kpahen erọnvwọn ebrabra rọ ta yẹrẹ ruẹ. Ẹkẹvuọvo, owenvwe o vwori ro vwo wene iroro vẹ iruemu ebrabra rọyen ghwa gan te-e. (Gal. 5:​19-21; 2 Tim. 3:​2-5) Avwanre ihwo eje gbare-e, ọtiọyena e che se si iroro vẹ urhurusivwe echọchọ nẹ udu vẹ ẹwẹn avwanre kare kare-e. Ọkievo, a sa ta yẹrẹ ru erọnvwọn evo re cha rhoma da avwanre obọ. (Jẹr. 17:9; Jems 3:2) Ẹkẹvuọvo, siẹrẹ e de siobọnu ohwo rẹ awanre na vẹ iruemu rọyen, ojevwe rẹ ugboma na rhe che se sun iruemu vẹ iroro rẹ avwanre-e. Ọnana cha nẹrhẹ avwanre rhe dia ihwo re fẹnẹ oka rẹ ohwo rẹ avwanre hepha jovwo.​—Aiz. 55:7. w22.03 3 ¶4-5

Ekpako, ovwan nẹ omamọ rẹ iruemu rẹ iniọvo na vwori. Ayen ohwo ọvuọvo gbare-e; dedena, ayen ọvuọvo vwo uruemu rẹ a sa vwẹrokere. Vwọrẹ uyota, nọke ra ruọke ekpako sa reyọ ọghwọku vwọ kẹ iniọvo eya yẹrẹ eshare. Jẹ kerẹ ọyinkọn Pọl, e jẹ ekpako na tẹnroviẹ erharhe iruemu vẹ eta raye-en. Ukperẹ ọtiọyen, e gbe jẹ ekpako na tẹnrovi ẹguọnọ rẹ ohwo vuọvo vwo kpahen Jihova, ro vwo chirakon vwọ ga Ọghẹnẹ, vẹ ẹgbaẹdavwọn ro vwo ru obo ri yovwinrin. Ọkpako rọ tẹnrovi asan rẹ ihwo efa de ruẹ yovwẹn vwo ukẹcha kẹ iniọvo na vwọ riẹn nẹ ihwo rẹ ukoko na vwo ẹguọnọ rayen. Karophiyọ nẹ oborẹ Jihova guọnọ mie ovwan yen evun-ẹfuọn; ọ dia a vwọ dia ihwo egbagba-a. (1 Kọr. 4:2) O muẹro dẹn nẹ Ọghẹnẹ nẹ obo rẹ avwanre ruẹ vwẹ ẹga rọyen ghanghanre. Jihova “dia orharhe rẹ ohwo ro jẹ iruo esiri kugbe ẹguọnọ rẹ ovwan vwo kẹ odẹ rọye ẹkarohọ, ri we ru kẹ ihwo efuanfon na fiki rọye, kirobo rẹ ovwan ji ruẹ na.”​—Hib. 6:10. w22.03 31 ¶19, 21