1 Corinti

8 E se la trombeta no la sona de maniera ciara, chi che ndarà pareciarse par la guera? 9 Dela medèsima maniera, se valtri no doperé parole fàcile de capir, come che i altri i ndarà saver quel che volé dir? Valtri saré drio parlar al vento. 20 Fradei, no gavé mia de esser bambini nela vostra maniera de pensar. Gavé de esser bambini sora la perversità, ma gavé de esser adulti nela vostra maniera de pensar. 21 Nela Lege l’è scrito: “‘Mi parlarò a questo pòpolo cola léngua dei foresti e coi lavri dei foresti, ma ancora cossita lori no i me scoltarà’ el dise Geovà.” 22 Par quela, le léngue no le ze un segnal par quei che i crede, ma par quei che no i crede; ma la professia no la ze par quei che no i crede, ma par quei che i crede. 23 Quando tuta la congregassion la se riune nel medèsimo posto, se tuti i parla in altre léngue e vien rento persone sémplisse che no le crede mia, no le dirà che valtri sì mati? 24 Ma se tuti i profetisa e vien rento un che no’l crede o un omo sémplisse, questo el pensarà che tuti i ze drio ciamarghe la atension e esaminarlo. 25 Sarà mostradi i segreti del so cuor, e lu el se indenociarà cola fàcia par tera e el adorarà a Dio, disendo: “Dio l’è pròpio intrà de valtri.” 26 Alora, fradei, cossa che se pol far? Quando sì riunidi, un el canta un salmo, un el insegna, un el fà rivelassion, nantro el ga el don dele léngue, nantro el don de far tradussion. Fé tuto par tirar su i altri. 27 E se qualchedun el parla in léngue, sol due o tre i fassa cossita, e i parli un ala volta; e qualchedun el fassa la tradussion. 28 Ma se no ghen’è nissun par far la tradussion, quel che el parla in léngue el ga de taser nela congregassion e parlar a si stesso e a Dio. 29 Ga de parlar sol due o tre profeti, e i altri i ga de capir quel che lori i vol dir. 30 Ma se qualchedun intrà de quei sentadi el riceve una rivelassion, quel altro che l’era drio parlar el ga de taser. 31 Tuti i pol profetisar un ala volta, cossita che tuti i pol imparar e i pol esser fati pi forti. 32 E i profeti i ga de controlar come che i dopera el don che el spìrito el dà ai profeti. 33 Parché Dio no l’è mia un Dio de disòrdine, ma de pace. Come in tute le congregassion dei santi, 34 le done le ga de taser nele congregassion, parché lore no le pol mia parlar; pitosto le ga de star soto la autorità, come la dise anca la Lege. 35 Se una dona la vol saver qualcossa, la ga de domandar al so omo casa, parché l’è una vergogna par una dona parlar nela congregassion. 36 Zela vegnesta fora de valtri la parola de Dio? O fursi la ze rivada sol a valtri? 37 Se qualchedun el pensa de esser un profeta o de gaver ricevesto un don del spìrito, el ga de ricognosser che quel che ve scrivo l’è un comandamento del Signor. 38 Ma se qualchedun no lo ricognosse mia, no’l sarà ricognossesto gnanca lu. 39 Alora, me fradei, seité profetisar, ma no sté mia proibir de parlar in léngue. 40 Ma tuto el ga de suceder con dignità e òrdine.