Deuteronómio

12 “Adesso, Israel, cossa che Geovà el vol de ti? Sol che te gàpia rispeto par Geovà, el to Dio, che te camini nele so strade, che te lo ami, che te sirva a Geovà, el to Dio, con tuto el to cuor e con tuta la to ànima, 13 e che te obedissa ai so comandamenti e ale lege che mi te dao. Questo sarà bon par ti. 14 Varda! Geovà l’è el paron del cielo e dela parte pi alta del cielo, e dela tera e de tuto quel che ghen’è sora ela. 15 Ma l’è stà sol ai vostri antenati che Geovà l’è rivà darente e el ga mostrà amor. E el ga scoliesto la dissendensa de lori, o sia, valtri, de intrà tuti i pòpoli, come podé veder ancoi. 16 Gavé de far puri el vostro cuor e fermarve de esser testardi. 17 Parché Geovà, el vostro Dio, l’è Dio sora i altri dèi e l’è Signor dei signori, el grando Dio, poderoso e che ne fà gaver tanto rispeto par lu. Lu no’l fà difarensa intrà nissuni e no’l se assa comprar par gnente. 18 Lu l’è giusto coi òrfani e le védove. Lu el ama el straniero e el ghe dà de magnar e de vestir. 19 Anca valtri gavé de amar i stranieri, parché valtri sì stati stranieri nela tera del Egito. 20 “L’è a Geovà, to Dio, che ti te ghè de rispetar del tuto, a lu che te ghè de servir e star darente e par el so nome te ghè de giurar. 21 Te ghè de lodar sol a lu. Lu l’è el to Dio, che el ga fato par ti tute queste robe grande e maraveiose che te ghè visto. 22 I vostri antenati i era 70 quando i ze ndati al Egito. Adesso, Geovà, el to Dio, el te ga fato deventar tanti quanto le stele del cielo.