Génesi

16 Labon el gavea due fiole. La pi vècia la gavea nome Lèia, e la pi gióvena la gavea nome Rachel. 17 Lèia no la gavea bei oci. Invesse Rachel la ze deventada una dona tanto bela. 18 Giacò el se ga passionà par Rachel. Par quela, lu el ga dito a Labon: “Mi son disposto a laorar par ti durante sete ani par to fiola pi gióvena Rachel.” 19 Alora Labon el ga dito: “L’è meio darla a ti pitosto che darla a nantro. Resta qua con mi.” 20 E Giacò el ga laorà sete ani par maridarse con Rachel, ma par lu l’è stà come se fusse sol arquanti giorni, parché lu la amea tanto. 21 Dopo Giacò el ga dito a Labon: “I giorni che èrino metesti de acordo i ze belche finidi. Dame la me dona, cossita posso maridarme con ela.” 22 Alora Labon el ga convidà tuti i òmini de quel posto e el ga fato le nosse. 23 Ma quando l’è rivà note, lu el ga ciapà la so fiola Lèia e la ga portada a Giacò parché ela la deventesse so sposa. 24 Labon anca el ga dato la so serva Zilpa par esser serva de so fiola Lèia. 25 De matina, Giacò el ga visto che la era Lèia! Alora lu el ga dito a Labon: “Cossa che te me ghè fato? L’è par Rachel che mi go laorà par ti! Parché che te me ghè imbroià?” 26 Labon el ga rispondesto: “Qua no l’è mia costume dar la fiola pi gióvena vanti de dar la prima fiola. 27 Selebra la stimana de questa prima dona e dopo vao darte anca la seconda dona. Ma te toca laorar par mi par altri sete ani.” 28 Giacò el ga acetà e el ga selebrà la stimana con Lèia. Dopo, Labon el ghe ga dato la so fiola Rachel come sposa. 29 Lu anca el ga dato la so serva Bila par esser serva de so fiola Rachel. 32 Alora, Lèia la ze restada gràvida e la ga bio un fiol, e la ghe ga metesto nome Ruben e la ga dito: “L’è parché Geovà el ga vardà la me aflission e adesso el me omo ndarà amarme.” 33 Ela la ze restada gràvida nantra volta e la ga bio un fiol, e la ga dito: “Geovà el me ga scoltà parchè, mi no ero amada, cossita el me ga dato anca questo.” Par quela, la ghe ga metesto nome Simeon. 34 Ela la ze restada gràvida nantra volta e la ga bio nantro fiol, e la ga dito: “Adesso me omo restarà tacà a mi parché ghe go dato tre fioi.” Cossita ghe ga dato nome Levi. 35 E nantra volta la ze restada gràvida e la ga bio un fiol. Alora la ga dito: “Questa volta vao lodar a Geovà.” Cossita la ghe ga dato nome Giudà. Dopo de questo no la ga pi bio fioi.