La Bìblia la spiega

“Sport risciosi” — Val la pena risciar?

“ANCOI SEMPRE PI PERSONE NO LE VOL SOL VARDAR, MA LE VOL FAR I SPORT PERICOLOSI COME BUTARSE DO COL PARACHEDA, BUTARSE DO PAR LE MONTAGNE, IN CANOA PAR I RII E NADAR COI TUBARONI.” — GIORNAL THE WILLOW GLEN RESIDENT.

QUESTE parole le ne fà capir cossa l’è drio suceder nel mondo del sport. Sport come el parachedismo acrobàtico, rampegarse su par i muri de gelo, zolar col parapente e butarse do col paracheda de posti firmia ne fà capir che le robe risciose le piase sempre de pi. Ghen’è anca sportivi che i dopera tole par la neve (snowboards), bissicleta de montagna (mountain bikes), patini e skate par far sempre de pi, butarse de posti sempre pi altri, ndar su par montagne sempre pi pericolose e ciaparse risci sempre pi grandi. Come dise la revista Time, “questi sport i ze sempre pi famosi parché le persone le ga sempre pi problemi, alora le se buta far queste robe ndove el perìcolo, le capassità e la paura i se miscia insieme par darghe una sensassion de forsa, de sentirse ben, che i ga passà i so limiti”.

Ma la moda de questi sport la ga causà grandi problemi a quei che i li fà. Ghen’è sempre de pi persone che le se fà mal quando le fà sport che i saria normai ma che i li fà deventar sempre pi risciosi. Nel ano 1997, nei Stati Unidi, i casi de emergensa i ga aumentà del 33 par sento par persone che le se ga fato mal a doperar el skate, del 31 par sento con quei che i dopera la tola par la neve (snowboards) e del 20 par sento con quei che i se rampega su par le montagne. In altri sport la situassion la ze ancora pedo, parché ghen’è sempre de pi persone che le ze morte par far questi sport risciosi. Chi che difende questi sport i sa ben el riscio che i ga. L’è pròpio come dise una dona che schia de maniera tanto pericolosa: “Go sempre in mente la morte rento de mi”. Una dona che de mestier la va cola tola nela neve (snowboards) la dise: “Se no te te fè mal, no te sì drio sforsarte quel che basta.”

De acordo con quel che ghemo visto fin adesso, come noantri servi de Dio ghemo de veder questi sport? Che aiuto la Bìblia la ne dà par capir se ghemo de far questi sport risciosi o nò? Par risponder a queste domande vardemo quel che Dio el pensa sora la santità dela vita.

Come Dio el considera la vita

La Bìblia la ne insegna che Geovà l’è “la fonte dela vita”. (Salmo 36:9) Dopo de crear i òmini el se ga anca ocupà de darne tuto quel che ne ocore par goder la vita. (Salmo 139:14; Ati 14:16, 17; 17:24-28) Alora, l’è anca normal capir che el se speta che tendemo de questo presente che el ne ga dato con tanto amor. Le lege e i prinsipi che el ghe ga dato ala nassion de Israel ne giuta capir questa idea.

La Lege Mosaica la disea che tuti i gavaria de far dele robe par proteger i altri. Se no se fea cossita e qualchedun moria, la persona che gavaria podesto evitar la tragèdia la gavea la colpa dela morte dela persona, o colpa de sangue. Par esémpio, el paron de casa el gavea de far su una mureta intorno del terasso. Se no lo fea e qualchedun caschea do e el se copea, quei dela casa i gavea la colpa de sangue. (Deuteronómio 22:8) Se un toro el incornea de colpo qualchedun, no se considerea che el paron el gavesse colpa. Ma invesse, se se savea che el toro l’era pericoloso e i gavea avisà el paron e lu no lo gavea tendesto, alora si che se considerea che el paron el gavea la colpa dela morte dela persona incornada, e fin el podea esser copà. (Ésodo 21:28, 29) Come la vita la ze pressiosa par Geovà, la so Lege la fea veder la importansa de proteger e tegner de conto la vita.

I servi fedeli de Dio i gavea capio che questi prinsipi gavea valor anca par i risci che un el se ciapea. Nte una stòria bìblica se conta che Davi el gavea voia de ‘bever aqua del posso de Belen’, cità che in quel momento la era soto i filistei. Quando i ga savesto quel che el volea, tre dei so soldadi i ze ndati rento a forsa el acampamento dei filistei. I ga tolto l’aqua del posso de Belen e i la ga portada a Davi. Cossa galo fato Davi? No’l ga volesto beverla, la ga butada in tera e el ga dito: ‘No ghe penso gnanca beverla! Sò come che el pensa Dio. Zela la vita de questi òmini poco importante? Parché lori i ga riscià la vita par portarme l’aqua’. (1 Cróniche 11:17-19) A Davi gnanca ghe passea par la testa meter in perìcolo la vita de qualchedun sol par una so voia.

Gesù el ga bio una reassion compagna quando el Diaol lo ga tentà, fursi nte una vision, a butarse do del parapeto del témpio, par veder se i àngeli lo gavaria protegesto. Gesù el ghe ga dito: “No stà provar Geovà, el to Dio”. (Mateo 4:5-7) Cossita capimo che Davi e Gesù i ga ricognossesto che par Dio l’è sbalià risciar la vita se pròpio no ocore.

Davanti de questi esempi podarìssino domandarse: Come podemo capir quando un sport el deventa pericoloso che se riscia la vita, o che se riscia massa? Come le diversion normali, che no ze risciose, le pol deventar pericolose? Come podemo capir fin ndove rivar?

Val la pena risciar?

Par catar la risposta, l’è meio vardar de maniera onesta quel che volemo far. Par esémpio, podarìssino domandarse: Che risci ghen’è con questo sport? Son parecià o go tuto quel che ocore par no farme mal? Cossa sucederia se casco, se sbàlio far un salto o se no funsiona ben i mestieri che go metesto su par protegerme? Saria una roba de gnente, o ghen’è la possibilità che me fae tanto mal o che mora?

Ciaparse risci che no ocore sol par divertirse podaria farne perder privilegi nela congregassion e anca la pressiosa amicìssia con Geovà. (1 Timòteo 3:2, 8-10; 4:12; Tito 2:6-8) Alora l’è ciaro che un che vol far la volontà de Dio el fà ben a pensar come el Creador sora la santità dela vita, anca quando el fà qualcossa par divertirse.

[Nota]