8 Esémpio

COSSA VOL DIR

I genitori che i dà el esémpio i fà quel che lori i insegna. No se pol spetar che i fioi i diga la verità quando ti te disi una busia. Vedi questo esémpio: ti te sì casa e qualchedun el sona el campanel. Ti te disi al to fiol: “Dighe a quel che l’è nela porta che mi no son casa.” Se te fè cossita, te sì drio insegnarghe dir busie.

“Le persone le dise: ‘Fà quel che mi digo, no stà far quel che mi fao’. Ma no l’è mia bon far questo coi fioi. Compagno a una sponga che la ciapa tuta la àqua, i fioi i ciapa tuto quel che disemo e femo. Se noantri ghe insegnemo una roba, ma femo nantra, lori i se nicorde.” — David.

COSSA LA BÌBLIA LA DISE: “Ti che te predichi de no ciavar, te ciavi?” — Romani 2:21.

PARCHÉ L’È IMPORTANTE

I genitori i ga de pi influensa sora i picinini e i gióveni che qualche altre persone, anca de pi che i coleghi de scola. L’è par quela che valtri genitori sì le meio persone par insegnar ai vostri fioi a far quel che l’è giusto. Ma sicuro che l’è importante che valtri meté in pràtica quel che ghe insegné.

“Noantri podemo dir mila volte la medèsima roba par i nostri fioi e no savaremo se lori i ze drio scoltar. Ma, se sol una volta ti no te fè quel che te gavei insegnà, lori i va dìrtelo. Lori i vede tuto quel che noantri femo, anca quando noantri pensemo che lori no i ze drio vardarne.” — Nicole.

COSSA LA BÌBLIA LA DISE: “La sabedoria che la vien de sora la ze . . . sensa ipocrisia.” — Tiago 3:17.

COSSA TE POL FAR

Pènsaghe sora i valori che orienta la to vita. Che tipo de programi e filmi te piase veder? Come che ti te trati la to fameia? Gheto che tipo de amighi? Ti te preocupi coi altri? In poce parole, te ghè de domandarte: “Sarà che mi son el tipo de persona che mi vui che i me fioi i devente?”

“Mi e el me sposo no domandemo ai nostri fioi de far quel che noantri no femo.” — Christine.

Domanda scusa quando te sbali. I to fioi i sà che ti no te sì perfeto. Se, quando ghe vol, ti te domandi scusa ala to fameia, ti te darè pròpio un bon esémpio de una persona ùmile e onesta.

“I nostri fioi i ga de veder quando noantri disemo che ghemo sbalià e domandemo scusa. Se no femo questo, lori i ndarà sconder i sbali che lori i fà.” — Robin.