Cossa Gesù el pensea dela polìtica?

I VANGELI i parla dele robe che le ga sucedesto nel ministero de Gesù che ne mostra cossa che Gesù el pensea sora la polìtica. Par esémpio, pena dopo del batésimo de Gesù, quando lu el gavea intorno de 30 ani, el Diaol el ghe ga dato la oportunità de deventar el governante del mondo. Pi tardi, una mùcia de gente la ga volesto farlo deventar rè. Poco tempo dopo, le persone le ga proà farlo cambiar el governo de quel tempo. Cossa che Gesù el ga fato? Ndemo veder.

Governante del mondo. I Vangeli i dise che el Diaol el ga mostrà a Gesù e ghe ga dato la oportunità de gaver “tuti i regni del mondo”. Pensa in tute le bone robe che Gesù el podaria gaver fato par giutar la umanità se lu el fusse el governante del mondo! Sicuro che una persona che gavesse interesse nela polìtica e che volesse de cuor giutar la umanità la acetaria questa oportunità. Ma Gesù no la ga acetà. — Mateo 4:8-11.

Rè. Nel tempo de Gesù le persone le volea pròpio tanto gaver un governante che risolvesse so problemi econòmichi e polìtichi. Come le ze restade maraveiade cole abilità de Gesù, lore le ga volesto farlo deventar un polìtico. Cossa che Gesù el ga fato? Gioani el ga scrito nel so Vangelo che quando Gesù el ga savesto “che i era drio vegner ciaparlo par farlo rè, l’è scampà via nantra volta su nel monte, lu sol”. (Gioani 6:10-15) Cossita vedemo che Gesù no’l ga volesto partissipar nela polìtica.

Cambiar el governo. Pochi giorni vanti de Gesù esser copà, i dissìpoli dei farisei che i volea che Israel fusse libertà del Impèrio Romano, insieme con persone del partido de Erode che ghe dea apoio a Roma, i ze vegnesti fin Gesù e ghe ga domandà se i giudei i gavea de pagar imposti a Roma. Cossita lori i ga proà farlo mostrar a che governo Gesù el ghe dea apoio.

Marco el ga scrito la risposta de Gesù: “‘Parché sì drio meterme a prova? Porteme qua un denàrio che vui veder.’ Lori i ghe ga portà un denàrio e lu el ghe ga domandà: ‘De chi che l’è questa imàgine e de chi che l’è el nome scrito?’ I ghe ga rispondesto: ‘De Cesar.’ Alora Gesù el ghe ga dito: ‘Paghé a Cesar quel che l’è de Cesar, ma a Dio quel che l’è de Dio.’” (Marco 12:13-17) El libro A Igreja e o Estado — A História de Dois Reinos (Church and State — The Story of Two Kingdoms) el ga dito questo sora el motivo dela risposta de Gesù: “El se ga ricusà a esser come che un messia polìtico e el ga pròpio volesto assar ben ciara la difarensa intrà Cesar e Dio”.

No l’è che Gesù no’l se preocupea con problemi come ingiustìssia, corussion e che ghen’è tanti poareti nel mondo. In fati, la Bìblia la mostra che el gavea tanta compassion par via dela bruta situassion dele persone darente de lu. (Marco 6:33, 34) Ma Gesù no’l ga fato gnanca un progeto par finir fora cola ingiustìssia del mondo, anca se par tante volte le persone le ga proà farlo partissipar nei assunti che ghe fea vegner fora tanti confliti in quela època.

Questi esempi i ne mostra de maniera ciara che Gesù no’l ga volesto partissipar nei assunti polìtichi. Ma e ancoi, sarà che i cristiani i ga de partissipar nela polìtica?