Sito drio sforsarte par far de pi?

Pensemo nel esémpio de Fenando.a Dopo che el superintendente de sircuito el ga fato un per de vìsite ala so congregassion, i ansiani i ghe ga dito cossa che el podea far par gaver de pi responsabilità nela congregassion. Fernando el gavea el ogetivo de esser un ansiano, ma no l’era ancora stà designà. Adesso el superintendente el visita nantra volta la so congregassion. Poco tempo dopo, i ansiani i dise che i vol parlar con Fernando e lu el resta preocupà. Sarà che questa volta vegnarà fora qualche notìssia bona par lu?

Intanto che un dei ansiani el parla, Fernando el scolta atento. El fradel el parla de 1 Timòteo 3:1 e el dise che lu l’è stà designà come ansiano. Fernando el resta tanto maraveià e gnanca ghe crede. El fradel el dise che l’è pròpio questo che lu el gavea scoltà e lu el resta sensa parole. Dopo del anùnsio dela so designassion, tuti nela congregassion i resta tanto contenti.

Sarà che l’è sbalià voler far de pi nela congregassion? Sicuro che nò parché 1 Timòteo 3:1 dise che “se un omo l’è drio sforsarse par esser un superintendente, el vol far un laoro tanto bon”. Tanti òmini i aceta questo incoraiamento e i fà i cambiamenti che ghe ocore par far de pi. Cossita, i ze come una benedission par le congregassion, parché i serve come ansiani e servi ministeriai. Ma par causa del grando laoro in tuto el mondo, ghen’è bisogno de ancora de pi fradei par giutar. Quala che la ze la maniera giusta de farlo? Sarà quei che ancora no i ze deventadi ansiani i ga de restar avelidi?

COSSA CHE VOL DIR “SFORSARSE”?

La parola “sforsarse” la vien de un verbo greco che passa la idea de voler tanto una roba, fin gaverla. Pol far la idea che una persona la fà el meio che la pol par ciapar un fruto che l’è nela parte pi alta de una pianta. Ma se una persona la ze drio sforsarse par esser un superintendente, no vol dir che la vol farse veder. Parché? Parché la Bìblia la dise che quei che i vol servir come ansiani i vol far “una roba tanto bona”.

Se un omo el vol esser un superintendente nela congregassion el ga de far quel che l’è scrito in 1 Timòteo 3:2-7 e Tito 1:5-9. Queste le ze bele qualità. Raymond, che l’è un ansiano pi speriente, el ga dito sora queste qualità: “Par mi, la roba pi importante l’è quel che noantri semo. Saver insegnar ben e parlar polito ze importante. Ma anca se savemo come far queste robe ancora ghemo de far polito, esser echilibrà in quel che femo, gaver bon giudìssio, esser organisadi, ricever ben i altri e no esser massa duri cole persone.”

Un fradel che el vol gaver de pi responsabilità nela congregassion mostra che el fà tuto polito se l’è una persona pura e onesta. Lu anca l’è echilibrà in quel che el fà, el ga bon giudìssio, l’è organisà e no l’è massa duro coi altri. Par quela, i altri fradei i se fida in lu par liderar e giutar le persone quando vien fora qualche problema. Lu el riceve ben i altri e cossita incoraia i gióveni e anca quei che fà poco tempo che i ga imparà la verità. Lu el dà consolo e giuta quei che i ze maladi e quei che i ze pi veci parché el ama esser bondoso. Un omo che el vol esser un superintendente el ga queste qualità par giutar i altri e nò sol par ricever de pi responsabilità.b

I ansiani i ga caro de dar consili e incoraiar una persona che la vol far de pi nela congregassion. Ma l’è la persona che la ga de sforsarse par gaver de pi responsabilità. Henry, un ansiano speriente, el ga parlà sora Eclesiasti 9:10 e el ga spiegà: “Tuto quel che la to man la cata de far, fà con tuta la to forsa, o sia, fà el to meio in tuti i laori che te riceve dei ansiani, anca se l’è sol scoar par tera. Col tempo, tuti i vederà i to sforsi.” Se te vol esser un ansiano, sìpia laorador e una persona de fidarse in tuto quel che te fè. Te ghè de esser una persona ùmile e nò esser orgolioso e voler sempre de pi. — Mat. 23:8-12.

NO STÀ PENSAR E FAR QUEL CHE L’È SBALIÀ

Pol esser che qualchedun che el vol gaver de pi responsabilità nela congregassion proe influensar i ansiani. Fursi el proa parlar o far qualcossa par farghe pensar che lu el mèrita esser un ansiano. Altri no ghe piase che i ansiani i ghe dae consili. Par quela, l’è importante domandarse: ‘Sarà che mi vui massa atension par mi stesso o mi vui pròpio tender dele piégore de Geovà?’

Un fradel che el vol esser ansiano el ga de esser un bel “esémpio par le piégore”. (1 Pie. 5:1-3) Se el fà cossita, el sarà sempre onesto e no el ndarà imbroiar i altri. Lu el gavarà passiensa e el seitarà far el so meio anca se no l’è gnancora deventà un ansiano. Esser ansiano no vol mia dir che la persona la sarà perfeta. (Nùm. 12:3; Sal. 106:32, 33) Pol esser che un fradel fursi no el se nicorde de qualcossa sbaliada che el fà ma pol esser che i altri i veda che lu el ga de far tante robe meio. (1 Cor. 4:4) Par quela, se i ansiani i te dà consili de acordo cola Bìblia, sfòrsate par scoltarli e no stà restar inrabià. Proa meter in pràtica quel che lori te dise.

SITO DRIO SPETAR TANTO TEMPO?

Pol esser che arquanti fradei i pense che i ze drio spetar massa tempo par deventar ansiani. E ti? Fà belche un per de ani che te sì drio sforsarte par “esser un superintendente”? Rèstito preocupà dele volte? Alora, pensaghe sora le parole de Proverbi 13:12: “Quando no sucede quel che se speta, el cuor el sofre. Ma quando sucede quel che se vol, l’è come una pianta de vita.”

Quando una persona la ze premosa de far una roba, pol esser che el so cuor el sofra. Varda el esémpio de Abraon. Geovà el ghe ga prometesto un fiol, ma dopo de tanti ani lu e la so dona Sara no i gavea gnanca un fiol. (Gén. 12:1-3, 7) Quando deromai l’era vècio, Abraon el ga domandà: “Sovrano Signor Geovà, cossa che te me darè? Mi no go fioi. . . . Ti no te me ghè dato gnanca un dissendente.” Geovà lo ga assà sicuro che lu el gavaria un fiol, ma ga passà al manco 14 ani fin che Dio el ga fato quel che el ga prometesto. — Gén. 15:2-4; 16:16; 21:5.

Intanto che el spetea che Geovà el realisesse la so promessa, Abraon no l’è restà triste. Lu el se ga sempre fidà in Geovà e l’era premoso che sucedesse quel che Dio el ghe gavea prometesto. El apòstolo Paolo el ga scrito: “Cossita, dopo che Abraon el ga dimostrà che el gavea passiensa, Dio el ghe ga fato questa promessa.” (Ebr. 6:15) In final, el Dio Tuto Poderoso el ga benedio quel omo fedele tanto de pi che lu el imaginea. Cossa che ti te pol imparar de Abraon?

Se te piaseria esser un ansiano, ma dopo de tanti ani questo no ga mia sucedesto, seita fidarte in Geovà e servirlo contento. Warren, un fradel che el ga belche giutà tanti altri, el spiega: “Ghe vol tempo par deventar un ansiano. Pin pianeto i altri i vederà che un fradel l’è bon de far tante robe e che el fà i so laori polito. Arquanti i pensa che sol i ndarà ben se i ga qualche responsabilità nela congregassion. Ma pensar cossita l’è sbalià e pol esser anca una tràpola. Alora, no importa ndove te sì de star o che laoro te fè, se te sì drio servir a Geovà te sì una brava persona.”

Un fradel el ga spetà de pi de 10 ani par esser un ansiano. Lu el conta quel che el ga imparà de Ezechiel capìtolo 1: “Geovà el mena el so caro, o sia, la so organisassion, nela velocità che lu el vol. Quel che importa no l’è el tempo che mi penso che go de spetar, ma quando Geovà el cata che son pronto par esser un ansiano. Quel che importa no l’è quel che mi vui o quel che me piaseria esser, parché Geovà el sà quel che go de bisogno.”

Se te gavaria caro de esser un superintendente o gaver de pi responsabilità nela congregassion, fà el to meio par giutar i fradei dela congregassion a gaver alegria. Se par che te sì drio spetar massa tempo, porta passiensa. Raymond, che ghemo belche parlà prima, el dise: “Se te vol esser importante e gaver poder, no te sarè bon de esser felice. L’è fadiga servir a Geovà se te sì sempre drio pensar in esser ansiano.” Alora, proa gaver bele qualità, come la passiensa. Stùdia la Bìblia par esser ancora pi amigo de Geovà. Fà el to meio nela predicassion e par insegnar la Bìblia ale persone interessade. Giuta la to fameia a far la so amicìssia con Geovà pi forte e fà sempre la adorassion in fameia. Dopera tute le oportunità par star coi fradei. Cossita, te gavarè tanta alegria de servir a Geovà intanto che te te sforsi par esser un ansiano.

Geovà el vol tanto che i fradei i se sforse par esser ansiani. Ma gnanca lu, gnanca la so organisassion i vol che quei che i vol laorar de pi i reste tristi o desanimadi intanto che i se sforsa par gaver de pi responsabilità. Geovà el giuta e el benedisse tuti quei che i serve a lu de tuto el cuor. E la Bìblia la dise che Geovà no‘l ‘ghe donta gnanca un dolor ale so benedission’. — Pro. 10:22.

Anca se fà tanto tempo che te sì drio sforsarte par gaver de pi responsabilità nela congregassion, te pol far tante robe par esser ancora pi amigo de Geovà. Te pol esser sicuro che Geovà mai el desmentegarà del to sforso par gaver bele qualità e giutar la congregassion sensa assar de banda la to fameia. Alora seita servir a Geovà contento, no importa che responsabilità te ghè.