Quando che el Regno de Dio el ga scominsià a governar? (Parte 1)

‘SEITÉ NDAR IN SERCA’ PAR CAPIR

Carlo: Me piase tanto parlar sora la Bìblia con ti, Gioani.a Nela ùltima volta, te me ghè domandà sora el Regno de Dio. Te volei saver parché le Testimònie de Geovà le crede che el Regno de Dio el ga scominsià a governar in 1914.

Gioani: Si, mi go ledesto una dele vostre publicassion che la disea che el Regno de Dio el ga scominsià a governar in 1914. Son restà curioso, parché te me ghè dito che tuto quel che valtri credé vien dela Bìblia.

Carlo: Si, l’è vera.

Gioani: Ben, mi go belche ledesto la Bìblia intiera, ma no go catà gnanca un testo che el parla del ano 1914. Alora, go proà catar el nùmero 1914 nte una Bìblia nela internet, ma no ghen’era gnente.

Carlo: Che bel che te ghè ledesto la Bìblia intiera, Gioani. Vedo che te piase tanto dela Parola de Dio.

Gioani: Si, che me piase. No ghen’è gnente compagno.

Carlo: L’è vera. Mi vui lodarte che te vè in serca dele risposte ale to domande nela Bìblia. Te sì drio far pròpio quel che ela la ne dise par far, che l’è ‘seitar ndar in serca’ par capir.b Che bon che te fè cossita.

Gioani: Gràssie. Mi vui sempre imparar de pi. E te sè che mi go dato nantra vardada in questo libro che semo drio studiar e go catà de pi informassion sora 1914. Qua parla del sogno de un rè. Me par che el se ga insognà con una pianta ben granda che la ze stata taiada e dopo la ze vegnesta su nantra volta.

Carlo: Ah, si. Questa professia la ze nel capìtolo 4 del libro de Daniel. Lì, parla de un sogno de Nabucodonosor, rè de Babilónia.

Gioani: Eco, quela pròpio. Mi la go ledesto tante volte, ma, par dir la verità, no go gnancora capio cossa che la ga de veder col Regno de Dio o con 1914.

Carlo: Ma te sè, Gioani, che gnanca el profeta Daniel el ga capio cossa volea dir tuto quel che Dio lo ga fato scriver!

Gioani: Vera?

Carlo: Si. In Daniel 12:8, lu el ga dito: “Mi go scoltà, ma no go capio.”

Gioani: Che bon che no l’è sol mi!

Carlo: Daniel no’l ga capio parché no l’era ancora el tempo che Dio el gavea scoliesto par le persone capir queste professie. Ma ancoi, podemo capirle.

Gioani: Come cossita?

Carlo: Ben, varda cossa che dise el versìcolo che vien dopo. Daniel 12:9 dise: “Queste parole le ga de restar come un segreto e serade con selo fin el tempo del fin.” Alora, sol se podaria capir queste professie tanto tempo dopo, nel “tempo del fin”. E ndaremo ancora veder nel nostro stùdio che ghen’è prove che semo drio viver in questo tempo.c

Gioani: Vera? Alora, te pol spiegarme questa professia de Daniel?

Carlo: Vao proar.

EL SOGNO DE NABUCODONOSOR

Carlo: Par scominsiar, ndemo veder cossa ghen’era nel sogno de Nabucodonosor. Dopo, ndemo veder cossa volea dir. Giusto?

Gioani: Giusto.

Carlo: Nabucodonosor el ga visto una pianta tanto granda che la rivea fin el cielo. Dopo, el ga visto un àngelo de Dio mandar butarla do. Ma Dio el ga mandà assar la soca dela pianta lì. Dopo de “sete tempi”, la pianta la vegnaria su nantra volta.d Questa professia la ze stata prima sora el rè Nabucodonosor. Lu l’era un rè poderoso, cossita come quela pianta che la rivea fin el cielo. Ma l’è stà butà do del so governo par “sete tempi”. Te ricordi de quel che ga sucedesto?

Gioani: Nò.

Carlo: Sensa problema. La Bìblia la mostra che Nabucodonosor l’è restà mato par sete ani, sensa poder governar. Nel fin de questi sete tempi, lu l’è restà sano nantra volta e l’è tornà a governar.e

Gioani: Fin qua, mi go capio. Ma cossa che tuto quel lì el ga de veder col Regno de Dio e el ano de 1914?

Carlo: L’è che questa professia la se ga realisà de due maniere. La prima la ze stata quando el governo del rè Nabucodonosor el se ga fermà. La seconda la ze stata quando el governo de Dio el se ga fermà. E l’è questa seconda maniera dela professia realisarse che la ga de veder col Regno de Dio.

Gioani: Come che savé che questa professia la se realisa de due maniere?

Carlo: Prima, parché la pròpia professia la parla cossita. In Daniel 4:17 vedemo che la professia la ze stata fata parché “tuti quei che i vive i ga de saver che el Altìssimo l’è el Governante nel regno dela umanità” e che “lu lo dà a chi el vol”. Gheto visto qua la spression “regno dela umanità”?

Gioani: Si. Dise lì che “el Altìssimo l’è el Governante nel regno dela umanità”.

Carlo: Giusto. E par ti, chi che l’è “el Altìssimo”?

Gioani: Go idea che l’è Dio.

Carlo: Eco. Alora, vedemo che la professia no la ze solche sora Nabucodonosor. La ze anca sora Dio, che l’è “el Governante nel regno dela umanità”. E podemo capir cossita quando studiemo la professia insieme dele altre professie del libro de Daniel.

Gioani: Come cossita?

EL ASSUNTO PRINSIPAL DEL LIBRO DE DANIEL

Carlo: El libro de Daniel el ga un assunto prinsipal. El parla tante volte sora quando el Regno de Dio el scominsiaria a governar con Gesù come rè. Par esémpio, tornemo a Daniel 2:44. Te pol leder par noantri?

Gioani: Si. Qua dise: “Nei giorni de questi rè, el Dio del cielo el farà governar un regno che mai el sarà finio fora. E questo regno no’l sarà passà a nissun altro pòpolo. El ndarà farli a tochi e el finirà tuti questi regni, e sol lu el restarà par sempre.”

Carlo: Gràssie. Te cati che questo versìcolo el parla sora el Regno de Dio?

Gioani: Hmm, no sò mia dirte.

Carlo: Varda che dise lì che el Regno “el restarà par sempre”. Sarà che un governo umano pol restar par sempre?

Gioani: Go idea de nò.

Carlo: Giusto. Varda qua nantra professia nel libro de Daniel che parla sora el Regno de Dio. La ze in Daniel 7:13, 14. Qua parla sora un rè che ndaria governar nel futuro. Dise cossita: “El ga ricevesto autorità, onor e un regno, par che tuti i pòpoli, nassion e léngue i lo servisse. La so autorità la ze de durassion eterna, che no ndarà finirse, e el so regno noʼl sarà mia rovinà.” Gheto visto qualcossa in questa professia che l’era anca in quelaltra?

Gioani: Ela la parla de un regno.

Carlo: Pròpio quela. Ma no l’è qualche regno. Gheto visto che dise che el Regno el gavaria autorità sora “pòpoli, nassion e léngue”? O sia, questo Regno el ndaria governar la Tera intiera.

Gioani: L’è vera, mi no gavea mia capio quel lì.

Carlo: Anca, varda cossa che la professia la dise dopo: “La so autorità la ze de durassion eterna, che no ndarà finirse, e el so regno noʼl sarà mia rovinà.” La se someia tanto ala professia de Daniel 2:44, mia vera?

Gioani: Si.

Carlo: Alora, ndemo capir quel che ghemo visto fin adesso. La professia de Daniel capìtolo 4 la ze stata fata par che le persone le savesse che “el Altìssimo l’è el Governante nel regno dela umanità”. Queste parole belche le mostra che la ga una maniera de realisarse pi importante che quela sora Nabucodonosor. E, in tuto el libro de Daniel, catemo professie sora quando el Regno de Dio el ndaria scominsiar a governar con Gesù come rè. Cossita, podemo dir che la professia del capìtolo 4 de Daniel la ga anca de veder col Regno de Dio, mia vera?

Gioani: Cato che si. Ma ancora no go mia capio parché del ano 1914.

“SETE TEMPI”

Carlo: Tornemo al rè Nabucodonosor. Nela prima maniera de questa professia realisarse, lu l’è stà rapresentà par la pianta. Questa pianta la ze stata butada do e no la ga podesto pi cresser par sete tempi. Questa parte dela professia la se ga realisà quando el rè Nabucodonosor l’è restà mato e no’l ga podesto governar par un tempo. Questo tempo el se ga finio quando el rè l’è restà sano e l’è tornà a governar. Nela seconda maniera dela professia realisarse, el governo de Dio anca el se ga fermà par un tempo. Ma no l’è stà mia parché Dio el ga fato qualcossa de sbalià.

Gioani: Come che el se ga fermà?

Carlo: Nei tempi dela Bìblia, i rè de Israel che i governea in Gerusalen i se sentea nel ‘trono de Geovà’,f o sia, lori i governea come rapresentanti de Dio. Ma, col tempo, la pi granda parte de quei rè i ze stati desobedienti a Dio, e la pi granda parte dei israeliti i ga fato compagno a lori. Par via de questa desobediensa, Dio el ga assà i babiloni vinserli e deventar i so paroni in 607 vanti de Cristo. De quel tempo avanti, no ga bio gnanca un rè par rapresentar Geovà in Gerusalen. Cossita, el Regno de Dio el se ga fermà. Gheto capio fin qua?

Gioani: Si, go capio.

Carlo: Alora, i sete tempi che el governo de Dio el restaria fermà i ga scominsià in 607 vanti de Cristo. Nel fin dei sete tempi, Dio el ndaria scòlier un novo governante par rapresentarlo, adesso nel cielo. E, de lì avanti, le altre professie de Daniel le ndaria realisarse. Ma quando che saria el fin dei sete tempi? La risposta la ne giuta a saver quando che el Regno de Dio el ga scominsià a governar.

Gioani: Go capio, go idea che lo sò. El fin dei sete tempi l’è stà in 1914?

Carlo: Giusto! Te ghè capio.

Gioani: Ma come che podemo saver de quel lì?

Carlo: Quando Gesù l’era nela Tera, lu el ga mostrà che i sete tempi no i gavea ancora finio.g Cossita vedemo che i sete tempi i saria tanto tempo. I ga scominsià sècoli vanti de Gesù vegner ala Tera e i ga seità par un tempo dopo che lu l’è tornà al cielo. Ricòrdate che sol se podaria capir le professie de Daniel nel “tempo del fin”h. Intorno del ano 1870, studianti dela Bìblia che i volea capir la verità i ga scominsià a studiar queste professie con tanta atension. Lori i ga capio che i sete tempi i ndaria finirse in 1914. De quel ano avanti, tante robe importante le ga sucedesto nela Tera. Queste robe le mostra che el Regno de Dio el ga pròpio scominsià a governar nel cielo in 1914. L’è stà in quel ano che i ùltimi giorni, o el tempo del fin, i ga scominsià. Ma mi sò che l’è tante robe par imparar de un colpo sol . . .

Gioani: Eco. Mi vao leder nantra volta tuto quel lì par capir meio.

Carlo: No stà preocuparte. Mi anca no go capio ben nela prima volta. Ma el pi importante l’è che te capissi che quel che credemo vien dela Bìblia.

Gioani: Sicuro. Sempre me ga assà maraveià de veder come valtri ciapé tuto quel che credé dela Bìblia.

Carlo: E mi go visto che anca ti te vol far cossita. Ma, come go dito vanti, l’è tante robe par imparar de un colpo sol. E fursi te ghè ancora tante domande de far. Par esémpio, ghemo visto che i sete tempi i ga de veder col Regno de Dio e i ga scominsià in 607 vanti de Cristo. Ma come savemo che i sete tempi i se ga finio in 1914?i

Gioani: L’è pròpio quel che mi volea saver.

Carlo: La Bìblia la ne giuta a saver quanti ani i ga questi sete tempi. Cossa te cati de veder questo nela pròssima volta?j

Gioani: Bona idea.