La verità no la porta ‘pace, ma spada’

1, 2. (a) Che tipo de pace gavemo ancoi? (b) Parché che no ghen’è pace in tuto el mondo? (Varda la foto nel scomìnsio del stùdio.)

Tuti noantri volemo viver in pace e sensa ansietà. Par quela ringrassiemo a Geovà che ne dà ‘la so pace’, cossita gavemo tranquilità e anca semo boni de darghene fora coi bruti pensamenti e sentimenti. (Fil. 4:6, 7) Quando noantri dedichemo la nostra vita a Geovà, sentimo la “pace con Dio”, o sia, gavemo una forte amicìssia con Lu. — Rom. 5:1.

² Par intanto no ghen’è pace in tuto el mondo, parché semo ntei ùltimi giorni. Le persone le resta cative e le barufa par poco gnente. (2 Tim. 3:1-4) E ancora, gavemo una lota contra Sàtana e le so busie. (2 Cor. 10:4, 5) Nantra roba che ne dà pi preocupassion ze quando qualchedun dela nostra fameia che no serve mia a Geovà ne vien contra. Pol esser che qualchedun ne dise che semo drio spartir la fameia o anca che se seitemo obedir a Geovà no faremo pi parte dela fameia. E ghen’è de quei che parla mal de quel che credemo. Cossa podemo far se ne sucede cossita? E cossa pol giutarne a darghene fora con questa situassion?

COME DARGHENE FORA QUANDO LA FAMEIA NE VIEN CONTRA

3, 4. (a) Cossa che podaria suceder par quel che Gesù el insegnea? (b) Quando che esser dissìpoli de Gesù pol esser una dificoltà pedo ancora?

³ Gesù el savea che quei che volaria esser so seghidori gavaria bisogno de coraio, parché nò tuti ndaria acetar quel che lu insegnea e anca ghen’è de quei che vegnaria contra. Gesù el ga dito che quel che lu insegnea podaria cavar la pace anca rento dela fameia. Lu el ga dito: “No sté pensar che son vegnesto portar pace ala tera; son vegnesto portar nò la pace, ma la spada. Parché son vegnesto meter un contra el altro, el fiol contra so pare, la fiola contra so mare e la nora contra so sogra. Alora, i nemighi del omo i sarà quei dela so pròpia fameia.” — Mat. 10:34-36.

⁴ Cole parole “No sté pensar che son vegnesto portar pace”, Gesù el volea dir che gavarìssino dificoltà e quel che lu insegnea ndaria spartir le persone. Gesù l’è vegnesto ala tera par predicar la verità e nò par spartir le fameie e le persone. (Gio. 18:37) Ma savemo che par esser dissìpoli de Gesù gavaremo dificoltà e pol esser pedo ancora quando qualchedun dela nostra fameia o cari amighi i refuda la verità.

5. Cossa che ai dissìpoli de Gesù ghe ga tocà soportar?

⁵ I dissìpoli de Gesù ghe ga tocà soportar oposission dela fameia e anca altre dificoltà. (Mat. 10:38) Par ndarghe drio a Gesù Cristo ai so dissìpoli ghe ga tocà soportar de esser tolti in giro o fin refudadi dela fameia. Ma come Gesù el ghe ga prometesto, i ga bio tanto de pi de quel che i ga perdesto. — Ledi Marco 10:29, 30.

6. Cossa ghemo de ricordarse se quei dela nostra fameia i se mete contra che servimo Geovà?

⁶ Anca se quei dela nostra fameia i se mete contra che servimo Geovà, ghe volemo ben. Ma ghemo de ricordarse che prima de tuto, noantri amemo Geovà e Gesù. (Mat. 10:37) Ghemo anca de ricordarse che el Diaol el fà de tuto parché el amor che ghemo par la nostra fameia ne intrighe la nostra lealtà par Geovà. Parlemo adesso de arquante situassion che pol suceder e de come che podemo darghene fora.

QUANDO TO SPOSO O TO SPOSA NO SERVE A GEOVÀ

7. Come che te ghè de veder la to situassion se to sposa o to sposa, no serve a Geovà?

⁷ La Bìblia dise che chi che se marida i gavarà tribulassion. (1 Cor. 7:28) E se to omo o to dona no ze Testimònie de Geovà fursi te gavarè pi problemi nel matrimònio. Ma anca cossita, l’è importante che te vedi le situassion pròpio come le vede Geovà. Se un dei due no i vol servir a Geovà, no l’è un bon motivo par la separassion o el divòrsio. (1 Cor. 7:12-16) La sposa che serve a Geovà ga de rispetar el so omo come autorità anca se lu no’l tende dele robe spirituai nela fameia. E anca el contràrio, el sposo che serve a Geovà ga de amar la so dona e tenderla ben. — Efe. 5:22, 23, 28, 29.

8. Cossa podemo domandarse se nostro sposo o sposa proa controlar quanto che femo par Geovà?

⁸ Pol esser che to sposo o sposa proe controlar quanto che te fè par servir a Geovà. Par esémpio, el sposo de una sorela ghe gavea dito che sol la predichesse arquanti di dela stimana. Se ghemo una situassion compagna domandemose: “Me omo l’è drio domandarme che me ferme de servir a Geovà? Se nò l’è cossita, posso mostrar che capisso e far quel che me domanda?” Esser boni de capir pol giutarne a evitar barufe. — Fil. 4:5.

9. Come che te pol giutar to fiol a darghe onor a to sposo o to sposa che no serve a Geovà?

⁹ Se to sposo o to sposa no serve a Geovà, slevar su i fioi pol esser difìcile. Par esémpio, te ghè de insegnarghe el comando dela Bìblia de mostrar “onor a to pare e to mare.” (Efe. 6:1-3) Ma cossa che sucede se un dei due no serve a Geovà? Te pol dar un bon esémpio mostrandoghe onor. Varda le bone qualità e parla dele robe bone che el fà. No stà criticarlo o parlar mal de lu davanti dei fioi. Invesse te pol spiegarghe che cada persona farà la so dessision de servir a Geovà o nò. Veder el bon esémpio de so fioi pol farghe vegner voia de imparar la verità.

10. Come che te pol insegnarghe sora Geovà ai to fioi se to sposo o to sposa no l’è Testimònia de Geovà?

¹⁰ Pol suceder che un dei due che no ze Testimònie de Geovà vol che i so fioi fassa le selebrassion che la Bìblia dise che no ze giuste, o che i impare le so false credense. Arquanti òmini fursi i proibisse ala so dona Testimònia de Geovà de insegnarghe la Bìblia ai so fioi. Ma anca in questa situassion, la sposa farà tuto quel che la pol par insegnar la verità dela Bìblia ai fioi. (Ati 16:1; 2 Tim. 3:14, 15) Par esémpio, pol esser che el omo no’l asse insegnarghe la Bìblia o menarli ale riunion ai fioi che i ga manco de 18 ani. Anca se la sposa la rispetarà questa dessision, la ndarà doperar tute le oportunità par parlar dela so fede, insegnarghe sora Geovà e sora quel che l’è giusto. (Ati 4:19, 20) Col tempo sarà i fioi che dessidirà se servir a Geovà o nò. — Deut. 30:19, 20.a

QUANDO LA FAMEIA NE VIEN CONTRA

11. Cossa che pol far vegner fora problemi con quei dela fameia che no serve Geovà?

¹¹ Quando te ghè tacà studiar la Bìblia cole Testimònie de Geovà fursi no te ghè dito gnente a nissuni in fameia. Ma dopo, quando to fede la ze deventada pi forte, te ghè visto che l’era importante ciapar coraio e parlarghe dele to credense. (Mar. 8:38) Se par far cossita te ze vegnesto fora problemi in fameia, vedemo arquante idee par mantegner la pace e seitar fedele a Geovà.

12. (a) Parché che arquanti dela fameia podaria meterse contra che semo Testimònie de Geovà? (b) Come che podemo capirli?

¹² Proemo capir i sentimenti de quei dela nostra fameia che no serve a Geovà. Sicuro che semo tanto contenti de imparar la verità dela Bìblia, ma pol esser che arquanti dela fameia i ze preocupadi e ne vien contra, parché i pensa che i ne ga imbroià o che semo parte de un grupo religioso pericoloso. Fursi i pensa anca che no ghe volemo pi ben parché no femo arquante feste con lori o anca che Dio ne castighe quando morimo. Ne ocore meterse al so posto par capir cossa che i pensa, scoltarli con atension e passiensa par capir meio parché i ze preocupadi. (Pro. 20:5) El apòstolo Paolo el se ga sforsà de capir “tuti i tipi de persone” e questo lo ga giutà a predicarghe le bone notìssie. Far compagno a lu pol giutarne a parlar anca a la nostra fameia. — 1 Cor. 9:19-23.

13. Come che gavarìssino de parlar ala nostra fameia?

¹³ Parlemo con calma. La Bìblia la dise: “Le vostre parole le ga de esser sempre bele”. (Col. 4:6) Podemo domandarghe a Geovà che el ne dae el so spìrito santo par giutarne a parlar ala nostra fameia de una forma calma e tranquila. No ghemo de star là far discussion sora cada una dele so credense false. Se i fà o i dise qualcossa che ne disgusta, podemo far compagno dei apòstoli. Paolo el ga scrito: ‘Quando i ne dise su, li benedimo. Quando semo perseghidi, soportemo con passiensa. Quando che i parla mal de noantri, rispondemo con gentilessa.’ — 1 Cor. 4:12, 13.

14. Che benefissi gheto de far polito?

¹⁴ Fà polito. Parlar con calma e creansa pol giutarne a mantegner la pace in fameia. Ma ver un bon comportamento pol giutarne ancora de pi. (Ledi 1 Piero 3:1, 2, 16.) Se femo polito e demo un bon esémpio i pol veder che le Testimònie de Geovà le ga bei matrimoni, una vita felice, le tende ben dei fioi e stà distante dele robe sporche. Anca se quei dela fameia mai deventarà Testimònie, podemo esser contenti parché savemo che ghemo fato polito pròpio come vol Geovà.

15. Cossa che pol giutarne a evitar che de una ciàcola vegna fora una discussion?

¹⁵ Pensa vanti. Pensar vanti ntele situassion e in quel che podaria suceder, pol giutarte a star distante dele barufe cola to fameia. (Pro. 12:16, 23) Una sorela dela Austràlia la ga contà: “Me sogro l’era pròpio contra la verità. Vanti de ciamarlo par veder come lu stea, mi e me sposo feino una orassion a Geovà parché ne giutesse a no risponderghe inrabiadi, erino ben intesi vanti sora cossa parlar e quando finir la ciàcola par no tirarla massa longa. Cossita podeino parlar ben calmi sensa far discussion sora religion.”

16. Cossa che ne giutarà a sentirse meio se ghemo un problema con un dela fameia?

¹⁶ L’è normal che no se possa evitar tute le discussion con quei dela fameia che no i ze Testimònie. Fursi ne despiase par quel che sucede o se sentimo in colpa, parché ghe volemo tanto ben e ne piaseria che le robe ndesse sempre polito. Se se sentimo cossita, ricordemo che la lealtà a Geovà ze pi importante che la lealtà ala nostra fameia. In questo modo fursi giutaremo quei dela nostra fameia a capir che far le robe come dise la Bìblia vol dir vita o morte. Spetemo sempre che i veda el nostro bon esémpio e i capissa che servir a Geovà l’è la meio roba. E ricordemo che tuti ga la possibilità de dessider de servir a Geovà o nò. Geovà no’l vol che femo le robe par forsa. Alora anca quei dela nostra fameia gavarà la stessa oportunità che ghemo noantri, servir Geovà o nò. — Isa. 48:17, 18.

QUANDO UN DELA FAMEIA ABANDONA GEOVÀ

17, 18. Cossa che pol giutarte se un dela fameia abandona Geovà?

¹⁷ Se un dela fameia el vien parà via dela congregassion o el domanda par ndar via, o sia, l’è desassossià o el se ga dissossià, restemo tanto mal come se ne rivasse una corteada nel cuor. Cossa che podemo far se sucede?

¹⁸ Sfòrsate sempre par far pi forte la to fede. Par gaver una fede forte ghemo de leder sempre la Bìblia, pareciarse ben par le riunion e ndarghe, ndar predicar le bone notìssie e domandar a Dio la forsa par resister. (Giuda 20, 21) Ma cossa te pol far se te scominsi far le robe sensa sentimento e no te ghè pi alegria? No stà renderte. Pensa nel to servìssio a Geovà. Questo te giutarà a controlar to pensamenti e to emossion. Vardemo quel che ga sucedesto al scritor del Salmo 73, che el gavea scominsià veder tuto de maniera sbaliada, negativa e questo ghe fea vegner fora tanta ansietà, invesse ndar ala casa de Geovà lo ga giutà a cambiar la so maniera de pensar. (Sal. 73:16, 17) Ne giutarà tanto anca a noantri se femo cossita.

19. Come che te mostri che te ghè rispeto par la dissiplina de Geovà?

¹⁹ Gàpia rispeto par la dissiplina de Geovà. Anca se al scomìnsio la dissiplina fà mal, dopo se pol veder che la fà ben a tuti, prima de tuto par quei che i ga pecà. (Ledi Ebrei 12:11.) Par esémpio Geovà ne dise par ‘assar de star insieme’ coi pecadori che no i vol ciamarse grami. (1 Cor. 5:11-13) Se pròpio no ocore, ghemo de molar de star insieme con un dela fameia che ga abandonà a Geovà, o sia, l’è stà desassossià. Anca se ne fà mal no lo ciamaremo par telèfono, no mandaremo messagi, carte, e-mail e gnanca parlaremo par le rede sossiai.

20. Che speransa no te ghè mai de perder?

²⁰ No stà mai perder la speransa. El amor “el ga speransa in tute le robe” e par questo motivo, spetemo sempre che quei che i ga abandonà a Geovà i torne a Lu. (1 Cor. 13:7) Se vedemo che un dela nostra fameia scomìnsia cambiar la so maniera de viver, podemo domandar e pregar a Geovà che la Bìblia ghe dae forsa de acetar el so convite de tornar a Lu. — Isa. 44:22.

21. Cossa che te gavarissi de far se un dela to fameia te vien contra?

²¹ Gesù el ga dito che ghemo de amarlo pi che a tuti i altri, anca quei dela nostra fameia. Se no lo femo no meritemo de esser so dissìpoli. Lu l’era sicuro che i so dissìpoli i gavaria el coraio de esser leai anca se la fameia l’era contra. Se te sucede cossita anca a ti parché te ghe vè drio a Gesù, fìdate che Geovà te giutarà a infrontar el to problema. (Isa. 41:10, 13) Pensa che Geovà e Gesù i ze contenti de ti e che i te ricompensarà par la to lealtà.