“Parché Dio no’l ga fato gnente?”

DOPO DE UNA DESGRÀSSIA, TE TE GHÈ BELCHE DOMANDÀ NDOVE CHE DIO L’ERA? O TE GA BELCHE SUCEDESTO UNA ROBA TANTO BRUTA E TE TE GHÈ DOMANDÀ: ‘SARÀ CHE DIO EL SE PREOCUPA CON MI?’

Fursi te te senti come Sheila, dei Stati Unidi. La so fameia sempre la ndea in ciesa. Sheila la conta: “Mi savea che Dio l’è el Creador e go volesto imparar sora lu quando ero picinina. Ma no sentia che lu l’era pròpio el me amigo. Mi no pensea che Dio el me odiea, ma mi credea che lu no’l se preocupea con mi, gnanca che me volea ben.” Parché che Sheila la pensea cossita? Ela la ga dito: “La me fameia la ga infrontà tante desgràssie una drio man l’altra. Alora, parea che Dio no’l ne badea.”

Compagno a Sheila, pol esser che anca ti te credi in Dio. Ma fursi no te sì sicuro che lu el se importa pròpio con ti. Giò, che l’era un omo bon del passà, el credea nel poder e nela sabedoria del Creador. Ma la Bìblia la dise che anca lu el se ga sentio cossita. (Giò 2:3; 9:4) Dopo che el ga sofrio una desgràssia drio man l’altra e parea che i so problemi mai ndaria finirse, lu el ga domandà a Dio: ‘Parché no te fè gnente e te sì drio tratarme come to nemigo?’ — Giò 13:24.

Cossa che la Bìblia la dise? Sarà che Dio el ga la colpa dele robe rugne che sucede? Lu el se preocupa cole persone e con cada un de noantri? Podemo esser sicuri che Dio el ne capisse? Sarà che lu el resta disgustà de vederne sofrir e el ne giuta a darghene fora coi problemi?

La maniera che Dio el ne ga creà mostra che lu el se importa con cada un de noantri. L’è questo che ndaremo veder nei pròssimi artìcoli. (Romani 1:20) Ndaremo veder anca che la Bìblia la insegna che Dio el ne ama tanto. Podemo cognosser meio a Dio quando studiemo la Bìblia e vardemo la so creassion. Cossita, saremo ancora pi sicuri che Dio ‘el tende de noantri’. — 1 Piero 5:7; 1 Gioani 2:3.