Go bio tanta alegria de servir a Geovà

COME LA ERA LA ME FAMEIA

Son nassesto in 1934. Me pare e me mare i ze vegnesti dela Suìssa e i ze ndati viver nela cità de Timmins, in Ontario, nel Canadà. In quela cità, se laorea tanto con minerassion. Intorno del ano 1939, la me mare la ga scominsià a leder la revista La Sentinela e ndar ale riunion dele Testimònie de Geovà. Mi e me sei fradei ndeino insieme, e poco tempo dopo, ela la se ga batesada come Testimònia de Geovà.

Me pare no ghe ga piasesto mia quando la me mare la ze deventada una serva de Geovà. Ma ela la amea pròpio quel che la gavea imparà e la ga seità leal a Geovà. Anca nei ani 1940, quando le persone le ze state proibide de adorar a Geovà nel Canadà, ela la ga seità leal. Me mare sempre la ga tratà me pare con bontà e rispeto, anca se dele volte lu ghe disesse su. Ela la ze stata un bel esémpio par mi e par i me fradei, par quela, anca noantri semo deventadi servi de Geovà. Col tempo, me pare el ga cambià e el ga scominsià a tratarne meio.

GO SCOMINSIÀ A FAR DE PI PAR GEOVÀ

In agosto de 1950, son ndato nela assemblea “Aumento da Teocracia” in Nova York. Dopo de parlar con arquanti fradei e sorele de altri paesi e scoltar la intervista de arquanti che i gavea fato la Scola de Gileade, anca mi go volesto tanto far de pi par Geovà. Quel che lori i ga dito me ga giutà a dessider cambiar la me vita, e quando son rivà casa, go fato la me petission par esser pioniero regolar. Alora, el Betel del Canadà el me ga rispondesto che saria meio che prima de tuto mi fusse batesà. Cossita, in 1 de otobre de 1950, son stà batesà e, un mese dopo, son deventà pioniero regolar e son stà mandà ala cità de Kapuskasing. Questo l’è stà el primo laoro che go fato nela organisassion de Geovà. E l’era nte un posto distante de ndove mi ero de star cola me fameia.

Nel ano 1951, Betel el ga convidà tuti i fradei che i parlesse francese par ndar de star in Quebec, ndove le persone le parlea el francese. In quel posto ghe ocorea pròpio tanto de aiuto nela predicassion. Come mi parlea francese e inglese da picinin, i me ga mandà par la cità de Rouyn. Mi sol gavea el indirisso de un fradel e no cognossea nissuni. Alora, son ndato a quela casa, come go belche spiegà, e l’è ndà tuto ben. Mi e Marcel semo deventadi boni amighi e me ga piasesto tanto restar in Quebec par 4 ani. L’è stà lì che go scominsià come pioniero spessial.

GO FATO GILEADE E GO IMPARÀ CHE DELE VOLTE NE TOCA SPETAR TANTO

Intanto che mi ero in Quebec, son stà convidà par far parte dela turma 26 dela Scola de Gileade, in South Lansing, Nova York. Son restà pròpio contento! La formatura la ze stata nel giorno 12 de febraro de 1956, e i me ga mandà ndar de star in Gana,b nela parte oeste dela Àfrica. Ma vanti de ndar, me ga tocà tornar al Canadà e gaver permission del governo par ndar de star in Gana.

Me ga tocà spetar in Toronto par 7 mesi, fin che el governo el me ga dato tuti i documenti. In questo tempo, son restà nela casa dela cara fameia Cripps. Mi go cognossesto la so fiola, Sheila, e se ghemo passionà. Alora, quando mi ndaria domandar se ela la volea maridarse con mi, el governo el me ga dato i documenti par ndar de star in Gana. Noantri due ghemo pregà tanto e ghemo dessidio che saria meio che mi fusse servir in Gana. Anca ghemo dessidio che ndarìssino seitar parlarse par meso de carte e veder se podarìssino maridarse pi avanti. No l’è stà mia fàcile far questa dessission, ma ghemo visto che l’è stà la meio roba de far.

Dopo de viaiar de tren, navio e avion par un mese, son rivà in Accra, in Gana. Son deventà superintendente de distrito e me tochea viaiar par tuto el paese, anca nela Costa del Marfin (Côte d’Ivoire), e Togolandia (Togo). Quasi sempre, mi viaiea mi mi sol con un gipe de Betel. Me piasea pròpio tanto viaiar e catarme coi fradei!

Nei fin de stimana, mi gavea designassion nele assemblee de sircuito. Come no ghen’era mia un Salon de Assemblea, ghe tochea a noantri far su un posto par la assemblea. Alora, dopereino canele e foie de palmere par far un posto ndove ghen saria ombria par proteger i fradei e le sorele del sol. Come no ghen’era mia un frigider par meter el magnar, i fradei i assea le béstie lì darente e le copea quando l’era ora de magnar.

Nele assemblee, dele volte sucedea robe che ne fea rider pròpio tanto. Par esémpio, una volta el fradel Herb Jennings,c un missionàrio, l’era drio far un discorso quando una vaca la ga scampà via. Ela la ga tacà corer in meso i fradei e el palco. Alora, el fradel Herb el ga fermà el so discorso, e la vaca la ze restada inseminia. Cossita, quatro fradei che i era ben forti i la ga ciapada e la ga menada via. Tuti i fradei e sorele che i era lì i ga osà de contenti!

Nei altri giorni dela stimana, mi mostrea el filme A sociedade do Novo Mundo em Ação nei postesei che ghen’era intorno. Par mostrarghe el filme, mi stirea un strasso bianco intrà due palanchi o due piante. Le persone le restea pròpio contente de veder quel filme. Questo l’è stà el primo filme che tanti de lore le ga visto. Quando el filme el mostrea el batésimo, tanti i batea palma de contenti che i era. Questo filme el ga giutà tante persone a veder che la nostra organisassion in tuto el mondo la ze unida.

Dopo due ani nela Àfrica, son restà tanto contento parché son ndato nel congresso internassional in Nova York, in 1958. Son restà ancora pi contento quando me go catà con Sheila, che adesso la era pioniera spessial e la era vegnesta de Quebec. Noantri se gaveino parlà par meso de carte, ma adesso èrino insieme. Go domandà se la volea maridarse con mi, e ela la ga acetà. Alora, go scrito una carta al fradel Knorrd par domandar se Sheila la podaria far la Scola de Gileade, e dopo ndar par la Àfrica insieme a mi. E lu el ga acetà. Quando Sheila la ze rivada in Gana, se ghemo maridà in Accra, nel giorno 3 de otobre de 1959. Se ghemo sforsà de meter Geovà in primo posto nela nostra vita e ghemo visto che lu el ne ga benedio tanto.

GHEMO SERVIO IN CAMARON

In 1961, i ne ga mandà par el Camaron. Mi gavea tanto de far parché me tochea rangiar tuto par un novo Betel che ghen saria lì. Mi ero el superintendente, e ghen’era tante robe che me tochea imparar. Alora, in 1965, la Sheila la se ga ciapada gràvida! Ancora che fusse fadiga pensar in tender de un bambin, semo restadi contenti. Ma, quando èrino drio rangiar tuto par tornar al Canadà ne ga sucedesto un bruto colpo.

El bambin l’è morto vanti de nasser. El dotor el ga dito che el saria un tosatel. Ga sucedesto de pi de 50 ani indrio, ma ancora pensemo in quel che ghemo passà. L’è vera che semo restadi pròpio disgustadi, ma ghemo seità in Camaron parché ne piasea tanto laorar par Geovà.

I fradei in Camaron i infrontea tanta perseghission parché no i se metea nela polìtica. E quando l’era època de scòlier chi che saria el presidente, le robe le deventea ancora pedo. Alora, in 13 de maio de 1970, ga sucedesto pròpio quel che gaveino paura. El governo el ga proibio le Testimònie de Geovà de far la so adorassion. Fea sol 5 mesi che gaveino scominsià a laorar in quel bel Betel, e el governo lo ga tolto. In manco de una stimana, mi, Sheila e tuti i missionari semo stati paradi via del Camaron. No l’è stà mia fàcile assar indrio i nostri cari fradei parché se preocupeino con lori e no saveino quel che ancora i ndaria infrontar.

Semo restadi nel Betel dela Frància par sei mesi. Lì son stà bon de seitar a giutar i fradei del Camaron. Ma in disembre de quel ano, noantri semo stati mandadi nel Betel dela Nigèria, e questo Betel el ga scominsià a tender del laoro in Camaron. I fradei dela Nigèria i ne ga ricevesto tanto ben, e ghemo laorà lì par tanti ani.

UNA DESSISION PRÒPIO FADIGA

In 1973, ne ga tocà far una dessision che no l’è stà mia fàcile. Sheila la gavea tanti problemi de salute. Alora, quando èrino nte un congresso in Nova York, ela la ga scominsià a piander de tanto stufa che la era, e la me ga dito: “Mi son sempre fiaca e malada, no son pi bona de ndar avanti.” Ghemo servio inisieme nela Àfrica par de pi de 14 ani. Mi ero pròpio contento col laoro che la gavea belche fato. Ma adesso, ne tochea cambiar la nostra vita. Cossita, dopo che se ghemo parlà e pregà tanto insieme, ghemo dessidio tornar al Canadà, ndove sarìssino boni de tender meio dela salute de Sheila. Assar de esser missionari e de doperar tuto el nostro tempo par laorar par Geovà l’è stà la dessision pi fadiga che ghemo fato in tuta la nostra vita.

Quando semo rivadi nel Canadà, un amigo che mi gavea fea tanto tempo el me ga dato un laoro darente de Toronto. Lu l’era el paron de un posto ndove se vendea auti. Mi e me dona semo ndati de star nte un apartamento e, par sparagnar, ghemo comprà tute robe doperade. Se ghemo sforsà par gaver una vita sémplisse parché la nostra voia la era doperar tuto el nostro tempo par servir a Geovà nantra volta. Quel che voleino far el ga sucedesto tanto presto.

Go scominsià a laorar come volontàrio nela costrussion de un novo Salon de Assemblea in Norval, Ontàrio, tuti i sabi. Dopo un tempo, i me ga convidà par esser superintendente de quel Salon de Assemblea. Come la salute dela Sheila la era meio, ghemo acetà questo convite. Cossita, in giugno de 1974, se ghemo cambià par el Salon de Assemblea. Èrino pròpio contenti de doperar tuto el nostro tempo par laorar par Geovà nantra volta!

La salute dela Sheila la ga seità restar meio. Cossita, due ani dopo ghemo acetà el convite par laorar nel sircuito in Manitoba, nel Canadà. Quel posto l’è pròpio fredo. Ma ne ga piasesto tanto star insieme a quei cari fradei e sorele che i ne ga mostrà tanto amor. Ghemo imparà che no importa mia ndove semo drio servir a Geovà, el pi importante l’è seitar far el nostro meio ndove semo.

GO IMPARÀ UNA LESSION TANTO IMPORTANTE

Dopo arquanti ani come superintendente de sircuito, in 1978 semo stati convidadi par laorar nel Betel del Canadà. Poco tempo dopo, go imparà una roba tanto importante, ma che no l’è stà mia fàcile par mi. Son ndato far un discorso in francese, de una ora e mesa, in Montreal, nte una riunion spessial. Ma no l’è stà mia fàcile par i fradei e le sorele seitar atenti al me discorso. Par quela, un fradel del Departamento de Servìssio de Betel el me ga dato un consìlio sora i me discorsi. Mi gavaria de esserme nicorto che no son mia bon de far bei discorsi. Ma no go mia acetà quel consìlio. Son restà cativo parché go pensà che quel fradel sol gavea vardà i sbali e le robe brute che gavea fato e no’l me gavea lodà gnanca una volta. Go sbalià parché no go acetà quel consìlio. Invesse son restà disgustà par la maniera che quel fradel el gavea parlà e par quel che mi pensea de lu.

Arquanti giorni dopo, un fradel dela Comission de Filial l’è vegnesto parlar con mi sora quel che gavea sucedesto. Ghe go dito che me gavea ciamà gramo de no gaver acetà quel consìlio. Dopo, go parlà col fradel che me gavea dato quel consìlio, ghe go domandà scusa e lu el ga acetà. Quel che ga sucedesto me ga insegnà come l’è importante seitar sempre ùmile. Mai vao desmentegarme de quel che go imparà. (Pro. 16:18) Go pregà tanto a Geovà sora questo e, de lì avanti, sempre me sforso de acetar de cuor quando qualchedun el me dà un consìlio.

Son drio laorar nel Betel del Canadà fà de pi de 40 ani. De 1985 in qua, fao parte dela Comission de Filial. In febraro de 2021, la me cara Sheila la ze morta. No l’è stà mia fàcile parché go perso la me cara dona e anca go de dàrghene fora coi me problemi de salute. Ma far el me meio par Geovà me giuta a seitar contento. Cossita, no seito pensar nei pochi giorni che go in questa vita. (Ecl. 5:20) Go bio arquante dificoltà, ma go bio ancora de pi alegria. In questi 70 ani che son drio doperar tuto el me tempo par servir a Geovà, lu l’è stà la roba pi importante dela me vita. Mi prego che i nostri cari gióveni fradei e sorele i seite a meter Geovà in primo posto nela so vita. Son sicuro che anca lori i gavarà una vita pròpio contenta, o sia, una vita che sol quei che i serve a Geovà i ga.