El nostro Grandioso Istrutor el ne ga insegnà tante bele robe

I ME GENITORI I ME GA DATO UN BEL ESÉMPIO

Nel fin dela dècada de 50, i me genitori i ze ndati via dela Itàlia par Kindersley, in Saskatchewan, nel Canadà. Poco tempo dopo, lori i ga imparà la verità e servir a Geovà l’è deventà la roba pi importante dela nostra vita. Mi me ricordo che quando ero giovenoto, mi laorea tanti giorni nela predicassion insieme dela me fameia. Alora, mi podaria dir che go scominsià a laorar come pioniero aussiliar quando gavea oto ani.

Come me genitori i gavea sempre pochi soldi, lori i ne ga dato un bel esémpio de come viver con manco. Par esémpio, nel ano de 1963, lori i ga vendesto arquante robe par gaver soldi par ndar nte un congresso internassional nela Califòrnia, Stati Unidi. In 1972, semo ndati de star in Trail, nela Colómbia Britànica, intorno de mila chilòmetri distante de ndove steino, par giutar a predicar in italiano. Me pare el ga scominsià a laorar par netar e rangiar su le robe nte un mercà pròpio grando. Anca se lu el gavaria podesto ciapar de pi soldi in quel laoro, lu el ga scoliesto seitar a far el so meio nel laoro a Geovà.

Mi dao tanto valor al esémpio che i me genitori i ga dato a mi, al me fradel e ale me sorele. El so esémpio me ga parecià par el me laoro a Geovà. Lori i me ga insegnà che se metemo el Regno in primo posto, Geovà el ndarà sempre tenderne. Mi mai vao desmentegarme de questo. — Mat. 6:33.

GHEMO SCOMINSIÀ A FAR DE PI NEL LAORO A GEOVÀ

Nel ano de 1980, mi me go maridà con Debbie, che la era una bela sorela che la volea far de pi par Geovà compagno a mi. Alora, tre mesi dopo de maridadi, ela la ga scominsià a laorar come pioniera. Un ano dopo, semo ndati giutar nte una congregassion che gavea bisogno de aiuto, e anca mi go scominsià a laorar come pioniero.

Dopo de un tempo, semo restadi desanimadi e ghemo dessidio che l’era meio ndar via de là. Ma prima, ghemo parlà col superintendente de sircuito, e el ne ga giutà con amor. Lu el ne ga dito: “Valtri sì drio restar desanimadi parché vardé sol quel che ghen’è de bruto. Se ve sforsé de vardar le robe bone, ndaré veder tante.” Quel consìlio l’è stà tanto bon par noantri. (Sal. 141:5) Dopo che lo ghemo metesto in pràtica, ghemo visto che ghen’era tante robe bone. Ghen’era nela congregassion tanti che i volea far de pi par Geovà. Par esémpio, arquanti gióveni e fradei e sorele che i era maridadi con persone che no le servia a Geovà. Cossita, ghemo imparà che ne ocore vardar quel che ghen’è de bon e fidarse che Geovà el ndarà giutarne a dàrghene fora cole dificoltà. (Mic. 7:7) Dopo, semo restadi contenti nantra volta, e la situassion la ze vegnesta meio.

I istrutori dela nostra prima scola par pionieri i era stati missionari in altri paesi. Lori i ne ga mostrà ritrati e i ne ga contà le benedission e le dificoltà che i gavea infrontà. Alora, ghemo scominsià a gaver tanta voia de servir come missionari.

Come voleino esser missionari, nel ano de 1984, semo ndati de star in Quebec, che l’era intorno de 4 mila chilòmetri distante de ndove steino. Semo ndati lì par giutar a predicar in francese. Alora, ne tocaria imparar una nova léngua e una nova cultura. In quela època, gaveino pròpio pochi soldi, e un omo che el piantea patate el assea che ciapessino quele che le vansea. Cossita, par un tempo, ghemo magnà sol patate. Debbie la ga imparà a far tanti magnar difarenti cole patate. Anca se no l’è stà mia fàcile, ghemo seità a far el nostro meio contenti. Èrino sicuri che Geovà l’era drio tenderne. — Sal. 64:10.

Un tempo dopo, ghemo ricevesto una notìssia che no speteino mia. Semo stati convidadi par ndar laorar nel betel del Canadà. Semo restadi contenti de ricever el convite, ma pena gaveino fato la petission par Gileade parché quel che voleino l’era esser missionari. Stesso cossita, ghemo acetà ndar a betel. Quando semo rivadi là, ghemo domandà al fradel Kenneth Little, che el servia nela Comission de Filial: “E se semo ciamadi par far la Scola de Gileade?” Lu el ne ga rispondesto: “Se ricevé pròpio el convite, vederemo cossa far.”

Una stimana dopo, mi e Debbie semo stati convidadi par far la Scola de Gileade. Alora, ne tochea dessider se restarìssino in betel o se ndarìssino far la Scola. El fradel Little el ne ga dito: “No importa quel che ndaré scòlier, fursi dopo ndaré pensar in come saria se gavesse fato quel’altra dessision. Ma tuti due laori i ze importanti e podé esser sicuri che Geovà el ndarà benedirve.” Alora, ghemo dessidio ndar far la Scola de Gileade, e ghemo visto che quel che el fradel Little el ga dito l’è pròpio vero. Noantri ghemo belche doperà el so consìlio par giutar tanti fradei a far de pi par Geovà.

LA NOSTRA VITA COME MISSIONARI

Mi e Debbie ghemo fato la turma 83 dela Scola de Gileade insieme a altri 22 fradei e sorele. La scola la ze stata in Brooklyn, Nova York, in april de 1987. I nostri istrutori i ze stati i fradei Ulysses Glass e Jack Redford. I sinque mesi che ghemo fato la scola i ga passà pròpio svelto. In 6 de setembre de 1987 ghemo finio la scola e semo stati mandadi servir nel Haiti insieme a John e Marie Goode.

Nel ano de 1962, tuti i missionari del Haiti i zera stati paradi via del paese. Alora, dopo de quel ano, gnanca un missionàrio l’era stà mandà servir lì. Ma tre stimane dopo che ghemo finio la scola, èrino nel Haiti, nte una congregassion con 35 predicadori. Mi e Debbie èrino gióveni e gaveino tanto de imparar. Noantri steino nte una casa che la era par missionari, ma ghen’era sol mi e Debbie. Le persone in quel posto le era pròpio poarete, e quasi tute no le savea leder. In quel tempo, le persone le era pròpio cative col governo, e anca ghen’è stà guere rento el paese e bruti furaconi.

Ma noantri ghemo imparà tanto dela forsa e dela alegria che i fradei i gavea nel Haiti. Lori i infrontea tante dificoltà, ma i amea a Geovà e la predicassion. Par esémpio, ghen’era una sorela pi vècia che no la savea leder, ma che la era bona de ricordarse de 150 testi dela Bìblia. Le brute robe che vedeino ne assea cada volta pi sicuri che sol el Regno de Geovà el saria bon de finir coi problemi del mondo. E l’è stà tanto bel veder arquanti dei nostri studianti dela Bìblia deventar ansiani, pionieri regolari e aussiliari.

Nel tempo che mi ero nel Haiti, go cognossesto Trevor, un gióveno che l’era vegnesto de nantro paese par parlar dela religion mormon ale persone. Noantri ghemo discoresto dela Bìblia arquante volte. Un per de ani dopo, lu el me ga mandà una carta che la disea: “Mi vao batesarme nela pròssima assemblea e vui tornar al Haiti par servir come pioniero spessial nel medèsimo posto che son stato ani indrio.” Trevor l’è tornà al Haiti cola so dona e lori i ga predicà lì par arquanti ani.

SEMO NDATI SERVIR NELA EUROPA E NELA ÀFRICA

Come l’era cada volta pi fàcile far el laoro de predicassion nela Europa, noantri semo stati convidadi par ndar servir lì. Alora, nel ano de 1992, semo rivadi nela Slovénia, darente de ndove i me genitori i ze stati slevadi, prima de lori ndar de star nela Itàlia. In quela època, ghen’era ancora guera ndove l’era la Yugoslàvia, e i betei dela Àustria, dela Croàcia e dela Sèrvia i tendea del laoro de predicassion in quel posto. Ma ancoi ghen’è ancora altri betei che i giuta a tender de tuto el laoro che ghen’è lì.

Alora, gavarìssino de imparar una nova léngua e una nova cultura. Le persone le parlea: “Jezik je težek”, che vol dir “la léngua la ze fadiga”. E la era pròpio fadiga! Noantri semo restadi maraveiadi de veder come i fradei e sorele i era obedienti ale orientassion dela organisassion e come Geovà li ga sempre benedidi. Noantri ghemo visto nantra volta come Geovà el mete a posto le robe con amor e nela ora giusta. Quel che ghemo imparà del tempo che semo restadi nela Slovénia ne ga insegnà tante robe e ne ga dato forsa par dàrghene fora con altre dificoltà.

Ma la nostra vita la ga seità a cambiar. Nel ano de 2000, noantri semo stati mandadi a Costa del Marfin (Côte d’Ivoire) nela Àfrica. Ma in novembre de 2002, ga scominsià una guera rento el paese e ne ga tocà ndar via ala Sera Leoa, ndove i gavea pena infrontà 11 ani de guera. L’è stà pròpio fadiga ndar via dela Costa del Marfin presto cossita. Ma quel che gaveino imparà ne ga giutà a seitar servir a Geovà contenti.

Noantri la ghemo metesta tuta par predicar ale persone e par giutar i nostri cari fradei e sorele che i gavea pena infrontà tanti ani de guera. Anca se i era poareti, lori i gavea caro de spartir quel che i gavea coi altri. Par esémpio, una sorela la ga volesto dar a Debbie arquante robe de meter su, ma no la ga acetà. Alora, la sorela la ghe ga dito: “Nela guera, fradei de altri paesi i ne ga giutà tanto. Adesso, semo noantri che volemo giutar.” Mi e Debbie se sforsemo tanto par far compagno a quei cari fradei e sorele.

Dopo de un tempo, semo tornadi a Costa del Marfin, ma de colpo, problemi nel governo ze vegnesti fora nantra volta e le persone le ze deventade tanto violente. Alora, in novembre de 2004, ne ga tocà ndar via de elicòptero e ghemo portà pròpio poche robe insieme. Quando semo rivadi nela Frància, ghemo dormio par tera nte un posto che l’era del esèrsito e, nel giorno dopo, semo ndati ala Suìssa. Semo rivadi in meso la note e i fradei dela Comission de Filial e i istrutori dele scole insieme dele so done i ze vegnesti catarne. Lori i ne ga dato tanti struconi, robe bone de magnar e una mùcia de ciocolata dela Suìssa. Noantri ghemo sentio che lori i ne amea tanto.

Ghemo servio par un tempo in Gana e dopo semo tornadi a Costa del Marfin quando la guera la se gavea finio. No l’era fàcile cambiar de un posto al altro, ma i nostri fradei i ne ga giutà tanto. Mi e Debbie se ghemo parlà intrà de noantri che anca se i fradei e sorele sempre i se giuta un al altro, no podemo mai assar de darghe valor. Noantri ghemo capio come quel che gaveino infrontà ne ga insegnà robe importante che ne giutaria pi avanti.

GHEMO SERVIO NEL ORIENTE MÈDIO

In 2006, la sede mondial la ne ga mandà servir nel Oriente Mèdio. Alora, nantra volta, ndarìssino imparar nove léngue, nove culture, cognosser tante bele robe e infrontar tante dificoltà. Gavarìssino tanto de imparar in quei posti ndove ghen’era tanti problemi del governo e cole religion. Ne ga piasesto tanto veder come i fradei de difarente léngue e culture i ze obedienti e unidi. Semo stati pròpio incoraiadi de veder come fradei i seitea leai anca se persone nela fameia, nel laoro, nela scola o visigni i volea che i se fermesse de servir a Geovà.

In 2012, semo ndati a un congresso spessial in Tel Aviv, Israel. L’è stà la prima volta che tanti servi de Geovà i se ga riunio in quel posto dopo el Pentecoste de 33. L’è stà tanto bel esser in quel congresso.

In quei ani, noantri feino vìsite nte un paese ndove i fradei no i ze lìberi par predicar e adorar a Geovà. Noantri porteino insieme arquante publicassion par la predicassion e feino pìcole assemblee. Ghen’era soldadi con sciope in man da par tuto, ma seiteino a far el nostro laoro sensa paura e in pìcoli grupi de predicadori.

SEMO TORNADI ALA ÀFRICA

Nel ano de 2013, noantri semo stati convidadi par servir nel betel del Congo, che l’è un bel paese. Nel Congo, le persone le ga belche sofrio tanto par causa dela fame e dele guere. Quando ghemo savesto che ndeino al Congo, ghemo pensà: “Noantri belche cognossemo la Àfrica, alora, saremo belche pareciadi.” Ma gaveino ancora tanto de imparar. Par esémpio, nel Congo, ne tochea ndar de un posto al altro, ndove no ghen’era strade gnanca ponti. Ma ghemo imparà tanto de veder come i fradei i seitea a servir a Geovà contenti, anca se i era poareti. Resteino maraveiadi de veder el sforso che i fea par ndar ale riunion e ale assemblee e el so amor par la predicassion. Semo restadi ancora pi sicuri che el laoro de predicassion sol el va avanti par via del aiuto de Geovà. Quei ani che ghemo servio nel Congo ne ga insegnà tante robe importante e ne ga dato cari fradei e sorele che i ze deventadi come una fameia par noantri.

Nel fin del ano de 2017, semo stati mandadi servir nel betel dela Àfrica del Sud. Questo betel l’è tanto grando, e ghemo bio de imparar a far laori novi. Ma quel che ghemo imparà ne ga giutà tanto pi avanti. Noantri amemo i fradei e sorele che i ze belche drio servir a Geovà fà tanti ani. E l’è tanto bel veder che i fradei e sorele i laora tuti insieme in union, anca se i ze de culture e posti difarenti. Tuti i se sforsa de meter su la nova personalità e ndar drio ai prinsipi dela Bìblia. Vedemo che Geovà l’è drio benedirli con tanta pace.

In tuti questi ani, mi e Debbie ghemo fato tanti bei laori e ghemo cognossesto léngue e culture difarente. No l’è stà mia fàcile, ma ghemo seità a sentir el amor de Geovà par meso dei fradei e dela organisassion. (Sal. 144:2) Noantri semo sicuri che quel che ghemo imparà fin adesso ne ga giutà a servir a Geovà ancora meio.

Mi dao tanto valor a quel che i me genitori i me ga insegnà, al aiuto dela me cara dona e al esémpio de tuti i fradei e sorele che ghemo cognossesto. Mi e Debbie volemo seitar a imparar tuto quel che el nostro Grandioso Istrutor el vol insegnarne.